٭السودانيون بطبعهم طيبون ولكنهم اهل شجاعة ومروءة ناس حماس ودواس وكما وصفهم امير سعودى «السوداني زى قزازة الببسى حلو وجميل لكنك اذا اغضبته زى الببسى يزعل ويفور ويصعب تهدئته». والشواهد على ذلك كثيرة فى التاريخ القريب والبعيد المك نمر وحرقو لاسماعيل باشا القائد المصرى الذى ضربه بالكدوس احسن دليل. الشعراء السودانيون هم من يحمس على الدواس وعلى رأسهم النساء واشهرهن بنونة. & الخوف عندهم عيب كبير للرجال يهزأون من الخواف والهراش. ولنثبت هذه المعانى اليكم هذه النماذج من شعر الحماسة: 1/ الخواف لبدوهو لمن تمشوا وتجوهوا عجبونى الليله جو ترسوا البحر صددوا 2/ ماحرسو الجرى صدرك موشح بالدمى مابخاف فارس الحديد ان حمى 3/ مابخاف من شئ برضى خابر المقدر لابد يكون 4/ انا اخوى كان جرى بحلق رأسى ازينه واعقر ما أجيب جنى شوف عينى جريتوا جرى السواد وقايلنوا قصب البلاد حجر الظلط مين بقيسو الليلة 5/ تمساح جزاير الكرد بتقضى الغرض أنت بتشيل بى وكد مامتلك ولد 6/ غنى وشكريه يا أم وضيباً حد بحر الأتبراوى ساقى الرجال بالند العشامى بتجيه انت ليهم حد غرضى ان ما انقضى خلى دار جعل تتهد 7/ الجنزير في النجوم زى الهيكل المنضوم مابخاف فى المحاصه دموم الخوف لا يذكرونه في اشعارهم الا لفراق المحبوب. مثلاً: خوفى تنساني وتنسى الليالي يا حبيبي انا خايف يا ما بعدك انسى حالى هدايا الحلقة: 1. بمناسة غلاء اللحوم والدعوة لمقاطعتها، فى ناس حله قالوا يقللوا استهلاكهم من اللحوم لذا تعاهدوا على الا يشترى الواحد الا ربع كيلو فقط ومن لا يلتزم يقاطعوه. فى احد الايام النسوان والاطفال حول الجزار ويقولوا ليه جيب ربع كيلو جيب ربع كيلو جاء واحد قال ليه أوزن ثلاثة كيلو، الناس بانزعاج عاينوا ليه قال ليهم «سماية ياشباب». 2. رباطابية خطبوها ويوم العقد الذى حدد له العصر بعد الغداء جاء اخو العريس لابو العروس وقال ليه انا عايز اخطب اخت العروس الصغيرة وعايز اعقد مع اخوى العروس الشافعة قوموها من غسيل العدة وعقدوا ليها مع اختها الرباطابى الذى كان حاضرا قال « لحقوها بى حلة بريستو». 3. مصرى مسطول عضلاته تبش فى الطابق الارضى كورك لى أمه في الطابق الثاني قال ليها «يا ماما كل حاجة تمام عندك فوق؟ قالت ليه كله تمام اطلع فوق قال ليها يعنى مافي زول قل أدبه عندكم؟ قالت ليه لا بس اطلع فوق، قال ليها ما في زول عاكس اخواتى؟ قالت ليه لا اطلع فوق، قال ليها طيب مادام كده ولعلى لى نور السلم عشان فى كديسة واقفة فيه»!. 4. رباطابي سايق «ركشة» مر على شايقى بيعجن في «زبالة» الشايقى قال للرباطابي بتين بتركبنا في الطيارة بتاعتك دي؟ رد عليه الرباطابي قال ليه لما تخلص من تخصيب اليورانيوم بتاعك ده!. 5. صاحب خيال قالوا ليه اذكر اسم طائر يبدأ بحرف كاف قال ليهم «كنتاكي»!. 6. مسابقة عالمية للكدايس الكديس المصري الذي تأهل عن افريقيا قابل الكديس الياباني ممثل آسيا وهزمه، في «الفاينال» الكديس المصري قابل الكديس الامريكي الذي فاز على الكديس الالماني بالنقاط. كل وكالات الانباء تنبأت بفوز الكديس الامريكي من الجولة الاولى وتنتهى المباراة لكن الكديس المصرى خيب آمالهم وفاز على الامريكي بضربة واحدة!. وكالات الانباء في المؤتمر الصحفى عايزين يعرفوا سر فوز الكديس المصري على الامريكي، قال ليهم في الحقيقة انا ما كديس انا نمر بس ظروف البلد خلتنى كده!. 7. قرد جوه قفص شاف قرد بره القفص قال الله يلعن ابو الواسطة!. 8. واحد مسطول رجع البيت متأخر زوجته سألته كنت وين يا «سوبر مان» قال ليها كنت في مشوار يا ولية، قالت ليه مشوار ايه يا سوبر مان؟ قال ليها بقول ليك كنت في مشوار وبعدين ايه حكاية سوبر مان دي؟ قالت ليه اصلوا مافي زول بلبس لباس فوق البنطلون غير سوبر مان!. 9. واحد نفسه مسدودة بدل يمشي الدكتور مشى للسباك!. 10. مسطول في حافلة عجبتوا بت كانت راكبة لمن نزل سجل رقم الحافلة!. 11. حلفاوى قالوا ليه بكرة عيد الحب قال ليهم دا بصلوا فيه كم ركعة!. 12. «قملة» اتزوجت، راجلها قال ليها تحبى نقضى شهر العسل وين؟ قالت ليه في رأس «مهند التركي» قام طلقها!. 13. عجوز سمع انو الدش حرام قال الحمد لله 70 سنة وانا بستحم في الطشت!. خاتمة: السودانيون ناس حماس ودواس عشان كده نقول لاهلنا في النيل الازرق وجنوب كردفان وفي أبيي أجنحوا للسلم عشان نجنح له. والحوت ما بهددوه بالغرق وما تسمعوا كلام اسرائيل عشان بيجيب عزرائيل. اللهم انت السلام فأحينا بالسلام.
