التقول قال لي بريدك وفي كلامو القالو ليا من زمان والله كايس عن مكانك وعن بريدك والتقول قال لي بريدك وكل كلمة تجول في خاطري بلقاها ماشة علي بريدك وانتي لو دايراني اشقي داري بالاشجان عيونك وشيلي من (النت) بريدك وزي اظن والله اعلم التقول قال لي بحبك بس مايكون بحب بريدي سألتني صديقتي (رهف) ماذا كنت اري في عيونه حينها ...فقلت لها :( بصراحة بصراحة لم (اتهور) واعاين في عيونو حينها .... لم تكن لدي تلك الجرأة ... افرضي (الود دا) قاصد (ريدة) ما (بريد) اعاين في عيونو ؟ والله ياهو الفضل يا صحبتي قالت لي :( طيب وماذا عن صوته)؟ قلت لها :( اذا نحن اتصادفنا في (محل ايسكريم) وقال لي هذا الكلام بعد (سعادتو اكل ايسكريم) اعرف ليك ملامح صوتو كيف يعني ؟ قالت لي : ( وبالنسبة لي احساسك) ؟ اجبتها :(هسه شربنا الشاي) وفي رواية اخري ( عملتا رايحة وقلبت الصفحة) قالت لي : (هو التقول قال ليك بريدك ... انتي قولتي ليهو شنو ؟) مؤكد قلت لي :( تعرف لو (إيميلي) بتكلم .... كان رد عليك ومرفق ابتسامة) هسه شربنا الشاي ومن جهة اخري موازية (للتحقيق) سألني (ابن خالي) ان كان الولد (التقول قال لي بريدك ) دا ... قد (عزمني ايسكريم) ... قلت لي :( لا هو عزمني بس في (الوكت) داك انا كنت (اسكمتا) يعني (اكلت ايسكريم) ف(اعتذرت) له وذلك لثلاثة اسباب (احتفظ بها جهراً) اولاً (لاني مابعرفو) ثانياً (لاني اسكمتا) ثالثاً (فوق راي) والتقول قال لي بريدك حبوبة جيرانا وفي تفسيرها لهذا الامر قالت :( طالما وردت كلمة (ريد) فالحكاية (ريد ريد) مافي كلام و(الود) إمورو واضحة وتخالفها الراي (جملة وقطاعي) الفنانة اللبنانية نانسي عجرم والتي قالت : بتفكر في ايه ؟ وعموماً يا (الجهجهتني) وحات الله ما عافية ليك ..... والله إجهجهك والبيني وبين (الريد) عامر ..... والبيني وبينك ( جزء من النص مفقود) اعتقد وبعض الاعتقاد ( يخرب بيتو) الزول البجيبوا الدرب لحدي (بريدك الالكتروني) وبريد بريدك ممكن (ممكن يريدك) و.............لذا سألت ذاكرتي : هل كان يرتدي الرمادي ؟ ... اجابتني انه كان يرتدي الحب وانني كنت ارتدي الهروب و تعرف لو قلبي بتكلم كان رد عليك والله جد.
