جلس على حمد على اقرب كرسى بعد ان أحضرت له المدام شاى المغرب فتناول رشفة منه ولم يقطع عليه مزاج الشاى الا صوت زوجته وهى تقول: له يوم الاحد الجاى يوم يصادف يوم اربعتاشر ماتنسى كويس ؟ أخذ على حمد يحك خلفية رأسه محاولاً أن يعرف ما هو الميز بهذا التاريخ وتسأل سراً هل هو يوم عيد ميلاد المدام ؟؟؟ هل هو عيد زواجنا؟؟؟ هل هو تاريخ وعدتها فيه بتوب جديد ؟؟؟ فى نهاية الامر قال لها : اها يوم اربعتاشر دا يوم شنو ؟؟ نظرت اليه بشي من الغرابة والدهشة وقالت معقولة تكون ناسي يا ناكر الجميل . تذكر أيام الجامعة لما كنت بتقول لى دا عيد الحب وبتجيب لى وردة وتقولى كل سنة وانتى طيبة يا حبيتى ,,, الاحد الجاى عيد الحب ،جحظت عيناه قائلأً عيد شنو وحب شنو ياوليه ؟ نظرة اليه نظرة غاضبة و(حمرت ليه كويس) وقالت شوف لازماك هدية يعنى لازماك هدية وصارت ترد هدية تكون على قدر المقام وهى تحدق فى الستائر التى تحتاج الى تغير ان شاء تكون حاجة رمزية وهى تلوح بيدها أشارة الى انها لوكانت غويشة دهب تكون احسن وعدها على بأحسن هدية فى اليوم المحدد ، وهى انتظرت يوم اربعتاشر بفارغ الصبر وعندما عاد على من العمل فى اليوم المحدد كان يحمل كرتونه كبيرة مغلفة بورق الهدايا البراق الجميل تلقته زوجته بفرح كبير وهى تحدق فى الكرتونة ولم تتمالك نفسها وهى تنزع اوراق التغليف وهى تمنى نفسها بهدية كبيرة وجميلة وكم كانت المفاجاءة حينما راتها تحتوى على (كفتيرة شاى) استغربت وأبدت اندهاشها معقول كفتيرة شاى وفتحتها وهى تحاول ان تجد بداخلها علبة بها خاتم دهب اوغويشة ولم تجد اى شئ من هذا القبيل فاخذت تصيح دا شنود ا كفتيرة شاى فى عيد الحب ؟؟ اجلسها بهدؤ وقال لها : عاينى للرسالة البتضمنها الهدية نظرت الى الكفتيرة وقالت رسالة شنو يا مجنون انت ؟ قال : تعرفى هدية عيد الحب لازم تكون تعبير عن الحب والريد والمشاعر والعاطفة قالت : كلامك دا ممكن تقولوا لو انت جبت لى ورد وزهور اوحاجة بالشكل دا . قال لها : أسمعى كلامى وكان ما عجبك ارميه البحر وواصل كلامه وقال تعرفى انا لما كنت طفل صغير ايام أولى مدرسة كانت أهم لحظة لى فى حياتى لما اقعد الصباح جنب امى وهى بتعمل لى فى شاى الصباح ونقعد نتونس ونشرب الشاى من الكفتيرة كانت أجمل لحظات اليوم وطوال سنوات الدراسة كان ارتباطي باجمل مشاعر بقعدة الشاى ولما كنت ممتحن كانوا بيجيبوا لى كفيترة شاى عشان اذاكر واقراء ولما كبرت دخلت الجامعة كان اكتر وقت بنحس فيه الصداقة والاخوة لما نعمل كفتيرة شاى وانتى ذاتك لما كنت بضهب عندكم كنتى بتعمل لى شاى كاااارب تجيبهو لى بالكفتيرة وانا أشرب واذداد وانتى تكبى لى فى الشاى وماكنا بنحس بالوقت ياسلام الشاى أقصد ياسلام على الزكريات تعرفى كفترة الشاى دى الزول لو ما بحب مرتو والله مايجيب لها كفتيره شاى وتأكدى الزول البيجيب دهب وهدايا غالية دا اكيد بغطى على غلطاته واخطاؤه وبيحاول يغش ضميره بانه حاء يخليك سعيدة بالدهب لكن التعبير الحقيقى عن مشاعر الحب لازم يكون مرتبط بالمشاعر انتى عارفة المشاعر دائماً بتكون دافية بالمحيط الحولينا ، ولما يكونك حولك (بوخ) الشاى الدافى حاء يذيد دءف المشاعر , نهضت بهدؤ وذهبت الى المطبخ واعدت شاى لبن كارب فى الكفتيره الجديدة وتجاذبا اطراف الذكريات الجميلة وقال على فى سره : الله يخليك ياعلم المنطق الولية كان داير تضيع مرتب الشهر كلو قال العيد الحب قال . صهيب عبدالله اتبرا [email protected]