أنا الفي البندر اتثقفت لبست البدلة والشورطي وفي نصي ربطت القاش وشعري حلقتو مخروطي جدعت الجبه والسروال رميتو بعيدي خلاس سوطي وقلت أصبحت ود بندر أغير يومي شكاتي أكلت الكبده والبيرقر وأشرب ديمه في فراتي أجبد في السجار بنسون أغلى سجار وبكوتي وأسف تمباك أجنن جن وأشرب شاهي صاموتي بحلم إكون معاي فرده وأجمل جلسة في الشاطئ شاكي تمام ومتطقطق وعامل فيها تفتيحه واقف ساعة اتهندم صابي علي فتيل ريحه النظاره مع الشكه وآخر موضه تسريحه أسابق في الزمن وأجري واكرتح ليكا كرتيحه أكيد أسعد معاك وأفرح لما القاكي يا سميحه أنزل ليكي مكناتي واسطح بيكي سطيحه أطلع بيكي في العالي وامرجح بيكي مرجيحه تقولي خلاص هدي الفرده وأطوح بيكي طويحه عايش في خيال رحله مساهر بيها طول الليل ضروري المنيه تتحقق أكان أعوج وكان بعديل أنا ما أصلي ود فلته قيس عصرو وكما زنقيل ماش نشوان وبتقدل على الاسفلت وزني تقيل فجأه قفزت في ركشه شتات بالله شارع النيل تجي الحنكوشه بيجنبي وألوح ليها بالمنديل تقيف جنبي وتقول لي هو آريو وآند وط دو يو دو بسم الله يا اهل الله يا الكباشي يا مومو تقول الشافعه شن قالت تقول يا ربي انا الدودو داير انضم واقول معليش لاوكت الحديث مركوك رفعت ايدا تورور لي وقالت لي دونت تو توك يا رجاله أبحراز جمله ويا البادراب وليكن عووك عاد يا الماغي يا أبشله يا البطحاني ود تكتوك هيا وكب عليهو سوا زولكن في الشروك مدروك خلاس اسكبن كرعي وكمان ازرزرت عيني كمل صبري وبقيت ارجف جبدت الريق ما لقيتو ومنا لاقي وحلقي نشف قالت لي يا عولاق ويا دلقان عربي بليد ومتطرف شكلك زي حمار الوحش وعامل فيها متعجرف كر الليله من حالي وواي الليله من قدري منيطيرة تقول جانه تدقدق لي في سدري عاد اللوم وراهو العيب أكان فكرت اقوم اجري حنيت دنكوسي متبوم واستسلمت لي قدري عاد يا موسى لا تلاوم ما انغشيت تبعت ابليس قول يا خوي قم وارد طق شاتر ختيت الميس امانه عاد هي مي زره زرة فار وراهو كديس شديعه قوية ما بتخاف راحت نادت البوليس جو العسكور وقادوني من اضني قودة تيس وعاد شوف ليك جنس رجفي وكتر نضمي مع الهلويس شبع زله وكما رخسه واتفننت في التجريس هناك ودوني لي جلطم مما شفتو اتلخبت راح ساعلني من اسمي اتسجمت واتلجمت أكان والله نضم الحيط اكون والله انا اتحدثت وعل الحس معاي بلحيل عاد يا خويا ما اتبهدلت جابو السوط وقلسوني لحست التوبه واستغفرت حكايتي حكايه ما بتنطاق حكاية رازه ونطاحا حكاية العادم البصله وقال دايرلو تفاحه صدقو الفي المثل قالوا تعود العرجا لمراحا التعود العرجا لمراحا
