سوء الطالع نقصد به عدم الحظ او الحظ السيئ، ويرتبط ذلك بالتشاؤم والتفاؤل، وكان العرب يتشاءمون اذا رأوا غراباً اسودَ في بداية سفرهم، كما يتفاءلون اذا رأوا طائراً ناحية اليمين والعكس صحيح. وكان من عادات العرب ان يزجروا الطير اى يجبرونه على الطيران فإذا طار ناحية اليمين فهو طائر السعد واليمن، واذا طار ناحية الشمال فهو طائر الشؤم والنحس، وقد يتركون السفر. اكثر الطيور شؤماً عندهم هو الغراب الاسود والبومة. وقد نهى الاسلام عن التشاؤم وطالب بالتوكل على الله وان الاقدار مسطرة لا دخل لطائر او خلافه فيها. الشاعر العربي يشكو سوء حظه فيقول: ان حظى كدقيق فوق شوك نثروه ثم قالوا لحفاة يوم ريح اجمعوه صعب الامر عليهم ثم ولوا تاركوه ان من اشقاه ربي كيف انتم تسعدوه الشعر الغنائي وغناء الحقيبة فيه جرسة شديدة من سوء الحظ: اندب حظى ام آمالي دهري قصدنى مالو ومالي شوف الخيرة يا رمالي اظن كاتبني عن عمالي عارض يعترض اعمالي ابني واملي ما تمالي الشاعر الشعبي يلخص الامر في الدنيا والحظوظ بالآتي: ان جادت عليك بي خيط العنكبوت تنقاد وان صعبت تكسر سلسل الحداد بعض الحكاوي عن سوء الحظ والكلاوي: 1/ بعض الجزارين يقولوا ليك عديم الحظ يلقى في الفشفاش عضم!. 2/ واحد حظه بطال جداً وعمره ما كسب رهان ولا حاجة، وشدة حظه ما بطال عنده كلوة واحدة وما شغالة كويس مرة قال يكسب ليه رهان في حياته وقف ليه واحد سايق عربية جميلة قال ليه تعال نتراهن انا وانت عندنا ثلاثة كلاوى الراجل وافق وكسب من صاحبنا النحس الرهان لأنه طلع عنده ثلاثة كلاوى (هاك الكلاوى بالبيض دي). 3/ الفنان الزوحى ختو ليه البلنت عشان يشوتها وقع فيها (هندسها) وقال (الله ينعل ابو الحظ وينعل ابو الفقرا). 4/ عيسى دهب لاعب الهلال السابق قال انا من الناس الحظهم كعب جداً قلنا ليه كيف؟ قال هلال مريخ حارة وانا لاعب فيها قمت شقيت بالكورة وجبت قون في المريخ، المباراة في نهايتها وانا مبسوط وطالع في الكفر وقلت الحكم متين يصفر للنهاية، في آخر دقيقة صديق محمد احمد يقوم يعكس كورة لى جكسا يحرز فيها الهدف الثاني. في زول ثاني سأل من عيسى الشيل على الكتف والهتاف والقروش كلها مشت لى جكسا وانا فضلت اعاين بعيونيى واندب حظى وأكيل السباب لصديق محمد احمد. 5/ هات وخد: - الكيشة في الكونكان عنده جوكرين ومعرج وينعل في الحظ. - المنحوس الحظ طرق بابه اشتكى من الازعاج. 6/ أقوال سودانية: - تجري جرى الوحوش غير رزقك ما بتحوش!. - هو حائم وحظه نائم. 7/ اللاعب المنحوس دمه فاير ومولود يوم 29 فبراير اى كورة يشوتها داقة في العراضة واي قلشة كورة على فريقه تدخل قون سينما. هدايا الحلقة: 1/ غبي نفسه يشرب لبن فتح الثلاجة لقى زجاجة لبن تاريخها منتهى زور التاريخ وشربها!. 2/ واحد متزوج من (10) سنين ما ولد، اتزوج واحدة ثانية بعد 16 سنة مرته حملت قال لصاحبه: الظاهر ربنا عايز يكرمني، مرتي حامل بس خايفها تجيب بت، صاحبه طلع بتاع كوتشينة قال ليه والله مش لو جابت بت لو جابت (دو) حقو تحمد الله. 3/ عربي فتح حساب في بنك ادوه بطاقة صراف آلى قام (غلفها). 4/ فيل عفص ليه نملة قالت ليه ياود يا ثقيل. 5/ واحد بتاع ألعاب قوى سكه الحرامى... سبقه!. 6/ واحد جنو يلعب العاب ڤيديو (ڤيديو قيم) لما اتوفى واحد صاحبه كتب على قبره انتهى الماتش (Game Over). 7/ رباطابي سأل صاحبه الجنو (كنكان) قال ليه انا عايز احج لى امي مع انو ما حج حجة الفريضة، صاحبه قال ليه ماممكن لانك ما أديت الفريضة انت عايز تغطي قبال ما تنزل!. 8/ أمثلة مقلوبة: أ. الأعور ضربوه في عينه قال ليهم كسرتو نضارتى!. ب. لو حبيبك بقى ليك عسل تأكد انه عسل نحل أصلى!. ج. العين بصيرة واليد الواحدة ما بتصفق!. 9/ جعلى جا حفلة لمصطفى سيد احمد ومنتظر غنى دلوكة ومصطفى يغنى «الشجن الأليم» و»غدار دموعك» و»والله نحن مع الطيور»، الكلام ما دخل في رأس الجعلى مشى هز فوقه بعصايته وقال ليه كلامك ده كله ما داخل في رأسي وعلى الطلاق نحن لا مع الطيور ولا حاجة لكن حرم شنبك سمح!. خاتمة: يا سلام على شاعر الحقيبة المتفائل الذي يقول: الدنيا حظوظ وانا حظي جميل مادمت أراك لي ودادي تميل أكثر المتفائلين كان رسولنا الكريم -صلى الله عليه وسلم- الذي يقول ما معناه: اذا علمت ان القيامة تبقت لها ساعة وفي يدك فسيلة (شتلة) فأغرسها، وقال ايضاً تفاءلوا بالخير تجدوه. مع تحياتي وحبي.
