أسئلة ثقيلة واجابات اثقل: س: في طوبة وقعت من عمارة ولوح الزجاج التحت ما انكسر ليه؟ ج: لان الطوبة ما وقعت فيه!. س: دجاجة معدية الشارع ماتت فجأة ليه؟ ج: لأن الطوبة وقعت فيها!. س: في واحد خاتى جمب السرير كباية شاي وهو نايم ليه؟ ج: لأن الشاي منبه!. س: واحد خاتى جمبه كباية موية فاضية وواحدة مليانة ليه؟ ج: علشان يمكن يشرب ويمكن ما يشرب!. س: واحد وضع سكر على الكرسي قبل ما يقعد ليه؟ ج: علشان القعدة تكون حلوة!. أسئلة محرجة واسئلة تغيظ: - انت في غرفة النوم في السرير وطافى النور ومتغطى بالبطانية يجى واحد من اهلك يفتح الباب ويقول ليك انت نايم؟ لا لاعب دافوري!. - معزوم مع الاسرة عند جماعة وصلت البيت الشافع يفتح الباب ويقول ليكم انتو جيتو؟ لا نحن لسه في الطريق داير حاجة نجيبها ليك معانا؟. - انت لابس بدلتك ومتريح وشايل مفتاح العربية والموبايل ومارق من البيت واحد من اهلك يقول ليك انت مارق؟ لا طالع راس البيت اصلح السبلوقة!. - انت خاشي الحمام وشايل الصابونة والليفة والبشكير قريبك يقول ليك انت داخل تستحمه؟ لا داير اغير زيت العربية!. أسئلة عايزة اجابة: - انت بتجري للامام لتقليل وزنك لو جريت للوراء هل وزنك حيزيد؟ - لافتة مكتوب عليها ممنوع المشى على النجيلة – طيب لو ممنوع المشى الختة اللافتة منو؟. - البطيخ الماعندو بذور زرعوه كيف؟. - سمعنا عن سرعة الضوء، ماسمعنا عن سرعة الظلمة؟. - في امريكا لماذا يعقمون الابر السامة لقتل المحكوم عليهم بالاعدام؟ ما اصلو ميت ميت وما اصلو مسمم!. - اذا كانت الخضروات والفاكهة تزيد في تخسيس الوزن ليه ما استفاد منها الفيل؟. أسئلة ساهلة واجابات مجنونة: س: لو واحد اداك برتكانة تقول ليه شنو؟. ج: اقول ليه قشرها لي!. س: ايهما ابعد استراليا ام القمر ولماذا؟. ج: استراليا لاننا بنشوف القمر وما ممكن نشوف استراليا!. س: خمسة بنطلونات وخمسة قمصان واربعة جزم ماهى النتيجة؟ ج: خمسة رجال قاشرين فيهم واحد حفيان!. س: لماذا عملوا قضيب السكة حديد؟. ج: علشان القطر مايروح!. س: اثنين حرامية سرقوا عشرين جنيه كم نصيب الواحد؟. ج: الحبس ستة شهور مع الشغل!. س: ماهى قمة الادب؟ ج: ان تدق باب الثلاجة قبل فتحها!. هدايا الحلقة: 1. الحارس في حديقة الحيوانات قال للمرة ممنوع تصوير الحمار في حديقة الحيوانات المرة قالت ليه انا بصور في راجلى، الحارس قال ليها ده ما مهم المهم ممنوع تصوير الحيوانات!. 2. المريضة الرقاية كانت بتتكلم والدكتور بعالج فيها قام قال ليها طلعى لسانك ولما اخرجته قال ليها بس خليو كده لحدى ما انتهى من الكشف!. 3. واحد من زعماء "الفيس بوك" قال للمتظاهرين المطالبين بالحرية "انا ايضاً أؤمن بالمساواة والحرية فأنتم أحرار في سعيكم للحرية وانا حر في حرمانكم منها"!. 4. المرة قالت لي جارتها اسمعى هنا كونه ابنك البليد بنقل في مسائل الحساب من ابنى قلنا مافي حاجة لكن ما بنقبل بعد اليوم بدقه لان الحلول كانت غلط!. 5. الضابط قال للحرامى ارجو ان تكون قد عرفت خطأك – الحرامى نعم يا سيدى وسأتجنبه في السرقة المقبلة!. 6. واحد مشى يبيع كلبه الزول العايز يشتريه قال ليه هل الكلب مخلص؟ قال ليه انو مخلص جداً لانى بعته عشرة مرات في كل مرة برجع لى! 7. واحد اتزوج واحدة صينية قدم فيها الشاي لاصحابه!. 8. المرة قالت لى راجلها تفتكر نحن مش اتأخرنا على دعوة العرس؟ قال ليها بالضبط حنصل مع موعد تقديم العشاء!. 9. اشتكى رجل لقراقوش قال ليه داير عشرة مليون من محمد سنة كاملة ما ادانى ليها قراقوش سأل محمد، محمد قال ليه كلو ما الم القروش افتش عليه ما القاه، قراقوش حكم بسجن الراجل صاحب الدين علشان محمد لما يجيب القروش يلقاه!. 10. واحد ثقيل سأل واحد قال ليه هل الروح بتمرض؟ قال ليه ايوة اذا شافت الثقلاء، بعد ايام الثقيل وجد الرجل قال ليه كيف الروح؟ قال ليه في الرمق الأخير!. خاتمة: & في هذا الشهر الكريم نسأل الله الا يرميك في واحد من هؤلاء الثقلاء حتى لا تجرح صيامك، تقبل الله صيامكم وقيامكم وجعلكم من عتقاء هذا الشهر.