@ اهلنا الطيبين ثقافتهم الغذائية تعبانة شوية او بمعنى اصح بياكلوا ساى، اكلات الاكثار منها يضر وتسبب امراض مثل مرض النقرس او «القاوت» والذي يدلعه البعض بمرض الملوك، وهو يأتى من الاكثار من اللحم الضانى «هو نحن لاقين فيه كده بعد سعر الكيلو فات العشرين جنيه» وعلشان ما نتفلسف نشوف تشخيص الأطباء لهذا المرض ويقولون انه مرض يصيب المفاصل ويؤدى الى تفاقم الحالة واحداث خلل فيها وهو يسبب الم ووخزات عنيفة عند كعب القدم او في الاصبع الكبير. @ القاوت يحدث بسبب ترسب « أملاح البورات» في أنسجة المفصل وما يحيط بها من غضاريف وعظام وعضلات ويشبهه الاطباء ب «مسمسار القدم» المرض له علاقة مباشرة بوظيفة الكلي لأنها المسؤولة عن طرد أو حجز أملاح الجسم، وهذا المرض يكثر عند الرجال عن النساء وهو مرتبط بزيادة الوزن والإفراط في الأكل وشرب الكحول. أهم أسبابه: 1/ الوزن الزائد. 2/ عدم علاج ضغط الدم. 3/ العقاقير المستخدمة لعلاج ضغط الدم والتي تعمل علي خفض نسبة الأملاح والماء في الجسم. 4/ قلة النشاط والحركة. 5/ الامراض المزمنة مثل مرض السكري، ارتفاع نسبة الدهون في الدم أو ضيق الشرايين. بالدارجي كمية من الأكلات والمشروبات التى تبدأ بالكاف كلها ترفع نسبة القاوت وهي: 1/ الكمونية. 2/ الكلاوى. 3/ الكوارع. 4/ الكستليتة. 5/ الكبدة. 6/ الكبكبي والفول والبقوليات. ومن المشروبات الكوكا كولا. ولو مشينا للتحلية ابعدوا عن الكنافة والكستر ودي من عندى ولو عاوزين تنزلوا الضغط اشربوا الكركدي شاى ولا شربات. هدايا الحلقة: 1/ الراجل في مقابلة اذاعية قالوا ليه تحب تستمع لشنو؟ قال ليهم اذان المغرب!. 2/ البت لخطيبها لما نتزوج انا عاوزة اشاركك في كل مشاكلك ومتاعبك واخففها عنك، الخطيب: الحمد لله انا ما عندي مشاكل، البت: ايوة لأننا لسا ما اتزوجنا!. 3/ واحدة شينة جداً قبل ما تدخل الحمام قالت اللهم انى اعوذ بك من الخبث والخبائث، الشيطان قال ليها من غير ما تقولى انا اساساً كنت مارق!. 4/ مسطول عرف رقم ابليس بقى كل دقيقة يرسل ليه رسالة «اعوذ بالله من الشيطان الرجيم، وآية الكرسي!. 5/ واحد قال للفنان الراحل ابوداود في عطبرة انا معجب بيك جداً بس ما كنت قايلك «اسود» قال ليه يعنى كنت قايلنى «قاورمة»!. 6/ واحد سكران كان بيسأل عن جماعة قرايبه، واحد قعد يوصف ليه قال ليه: تمشي بي شارع كشك بسط الامن الشامل داك تخش على شارع المحكمة تخلى مركز البوليس على يمينك البيت الفاتح على بيت الامن طوالى ده البيت، السكران قال ليه: في ذمتك هسى وصفك ده انا انا لو كنت شارب كركدي بمشي بيه؟!. 7/ واحد ايام الضحية اشترى ليه خروف من ست عرقي سأل الامام: قال ليه الخروف لا تجوز الضحية بيه لأنه كان بيشرب مريسة، سأل مولانا الثاني قال ليه نفس الكلام، سأل مسطول قال ليه اقول ليك ادي الخروف 40 سوط وضحى بيه!. 8/ واحد مرته كل يوم تتمكيج قدام المرايا قال ليها ان شاء الله تعجبي عزرائيل وياخدك!. 9/ واحد سأل اخوه المسطول تفتكر القميص ده ماشي مع البنطلون؟ قال ليه هو البنطلون ماشي وين؟!. 10/ شايقية عجوز في محو الامية، سألتها المدرسة قولى لي جملة فيها ادغام بغنة؟ قالت ليها «عمن يعميك»!. 11/ شافعة رباطابية قاعدة تاكل مع ابوها في الصينية قالت ليه يابا اديني عيشة. ابوها حب يشاغلها قال ليها بتدوري بيها شنو؟ قالت ليه بدور ارضعها!. 12/ واحد جا ضيف لي مرة اسمها حاجة بخيتة اكرموه بالبيبسي والشاى ولد الحاجة جاب بطيخة كبيرة الضيف فكر في البطيخة لكن الجماعة عملوا نايمين منه لمن داير يمشي قال للمرة مع السلامة يا حاجة بطيخة!. 13/ صاحب خيال جابوا ليه بت قالوا ليه حتسميها منو؟ قال ليهم حأسميها «هبة» على عمتى «علوية»!. خاتمة: لعلاج هذا المرض العصري اللعين ينصح الأطباء بالآتي: 1/ الراحة التامة عند حدوث المرض. 2/ تناول الدواء المضاد للمرض والمسكن. 3/ شرب الكثير من الماء. 4/ الامتناع عن شرب الكحول «هاك الجلد ده». 5/ البعد عن الاكلات الغنية بالبروتين مثل الاكلات التى اشرنا اليها. 6/ المحافظة على الوزن وتخفيفه. 7/ الحركة والرياضة. نحن في السودان بروتاريا وناس بسطاء وما عايزين نكون ملوك خصوصاً في امراضهم. ام رقيقة مالها لوموها لى!. وكل عام وأنتم بخير،،،