السمنة كما يقول العلم الحديث هى الخطر المحدق بالانسان في عصر السرعة هذا.. الاكل السوداني من مفاريك وكمونية و(جقاجق) اضافة الى الكوارع والضلافين ورأس (النيفة) وما يضاف للملاح من (قدحة) ووش الملاح والدمعة كلها معاول هدم للصحة.. العلاج في حديث الرسول صلى الله عليه وسلم (صوعوا تصحوا) وما ملأ ابن ادم وعاءً شراً من بطنه.. القصة بقت لعبة خشنة فيها (كلسترول) وتصلب شرايين وانسدادات في الشريان التاجى وهاك يا قسطرة ومسطرة وعمليات قلب مفتوح وقلب مقفول وشنو ما عارف!. حبينا نرفع كرت اصفر للنسوان (الايدينهم طاعمة) علشان يغيروا من شكل الوجبات ويقللوا من الدهون والمفاريك والكرت الاصفر يشمل ايضاً الوجبات السريعة الجاهزة لانها ترفع الكلسترول. اذن ماهو الكلسترول؟: الكلسترول مادة دهنية لا يمكن للجسم ان يستغنى عنها لانها تدخل في ركن كل خلية وتشارك في صنع الكثير من الهرمونات، ولكن اصبح من الثابت علمياً ان ارتفاع الكلسترول فوق الحد المتعارف عليه طبياً يشكل خطراً على الصحة بشكل عام وجهاز القلب بشكل خاص ومع مرور الزمن يترسب الكلسترول على بطانة الشرايين فيسبب ضيقاً فيها وعليه يمنع الدم من التدفق بشكل طبيعى. نصائح غذائية مهمة لخفض الكلسترول: 1/ الابتعاد عن استهلاك الدهون المشبعة «قشطة، زبدة حيوان، والدهون الحيوانية». 2/ عدم اكل الاطعمة الغنية بالكلسترول «بيض، كلاوي، كبد، مخ، سجق» مع اكل الاسماك (اوميقا 3) التى تحد من الكلسترول. 3/ اكل الفواكه والخضروات «باذنجان، لوبيا، تفاح، زيت الزيتون، واكل الارز». 4/ الابتعاد عن الحليب الكامل الدسم. 5/ الابتعاد عن الحلويات والمشروبات المسكرة والصلص والايسكريم. هدايا الحلقة: 1/ واحد من اصحاب الخيال مشى يعزى في بكاء اخوه سأله انت عزيت قال ليه لا عاالسمنة!. 2/ واحد ثقيل عزم اخوه في مطعم في السطوح قال عشان تكون علاقته بيه سطحية!. 3/ خروف قال لاخوه اشمعنى عيدين ضحية ما ضبحوك؟ قال ليه انا مسجل في شهادة الميلاد حمار!. 4/ الشايقية راجلها نقلوه كسلا قام جاب ليها موز صاحبتنا قامت فركته وبعد ان دقت المفراكة في ايدها وضاقت المفراكة قالت قولتها الشهيرة (امانة يا كسلا ما فيكي ويكي!). 5/ الخدامة الجديدة ست البيت قالت ليها قبل ما تنومي نحن بنفطر الساعة 8 ص الخدامة قالت ليها كويس لو ما صحيت ما فى داعى تنتظروني!. 6/ صاحبة البيت قالت للخدامة الجديدة انتى بتحبي الكدايس؟ قالت ليها ما تشيلي همي انا ممكن اكل اى حاجة!. 7/ رجل قال لبرنارد شو: اليس الطباخ افضل للناس من الشاعر والاديب؟ فرد عليه برنارد شو: الكلاب تعتقد ذلك!. 8/ واحد فتح الثلاجة كان فيها قالب جلى قالب الجلى قعد يرجف مع فتحة الباب.. الراجل قال ليه ما تخاف انا جاى اشرب موية بس!. 9/ واحد جا ضيف لجماعة رباطاب قدموا ليه الاكل صاحبنا ضرب الاكل في ثلاثة دقائق وبعد ما غسل ايده قال لصاحب البيت المنطقة الفلانية دي بعيدة منكم؟ قال ليه يعني بصل ليها في كم من الزمن؟ الرباطابي قال ليه اكان مشيك زي اكلك ده هسع بتصل!. 10/ واحد فتان لقى صاحبه معاه زوجته قال ليه اقدم ليك زوجتي فلانة، قال ليه لكن دي ما الشفتها معاك قبل شهر!. 11/ ثلاثة من اهل العوض حاولوا يربطوا كرفتة 2 منهم تعيش انت والثالث في الانعاش!. 12/ واحد من اهل الخيال قاعد يشرك للسمك ثلاث ساعات ما قبض سمكة صاحبه الرباطابي قال ليه انت مشرك في زير؟. 13/ واحد بخيل مرته عايزة تلد عمل مس كول للداية!. 14/ ادروب سأل الجرسون عندكم شنو؟ قال ليه «كبدة، شية، شوربة، جقاجق»، رد ادروب ما شاء الله ضابحين؟. 15/ رباطابي زارع ليه شجرة حنة قدام بيته وكان بيسقى فيها جاء واحد قال ليه دى حنة قال ليه لا دخلة!. 16/ واحدة ما عندها شعر اشترت توكات!. 17/ واحد متزمت قال ما بحب الكوكتيل لانه مختلط!. 18/ واحد مشى يوكل محامي لقاه صائم!. 19/ صاحب خيال ابوه جاه هبوط بدل يوديه المستشفى وداه المطار!. 20/ لاعب «سخن» شديد حرق. خاتمة: الثقافة الغذائية والرياضة سبيلك للصحة الجيدة. مع تحياتي،،،