الوسط الرياضي وسط عظيم متكافل متكامل متراحم كالجسد الواحد إذا اشتكى منه عضوُ تداعى له سائر الجسد بالسهر والحمى. التنافس فيه مطلوب الوقوف مع الفريق الذي تشجعه وتحبه مطلوب، تحبه غالباً او مغلوباً داخلياً وخارجياً وهو يُرفع له علم السودان ويُعزف له السلام الجمهوري. نحن في توافق تام كأهلة ومريخاب - وعندنا اتفاقية جنتل مان ، خصوصاً إذا لعب أحدهما مع فريق أجنبي وكذلك في الجانب الثقافي وقد رفعنا شعارنا رائعة د. عمر محمود خالد «نحن في الوسط الرياضي» والتي تغنى بها الرائع أيضاً سيف الجامعة: نحن في الوسط الرياضي لا بنخاصم لا بنعادي ساس شعاراتنا التسامح والتصالح والتراضي *** ندعو للقيم النبيلة ونعلى رايات الفضيلة ننسى عصبية القبيلة والمحبة هي المبادئ نمضى نتنافس بقوة في سماحة وفي أخوة وللشرف نهتف ننادي *** يلا صفقوا للرياضة للعزيمة وللإرادة والتميز والريادة وللعلم رمز السيادة وللسلام مدوا الأيادي *** نحن جندك يوم تنادي نبني مجدك يا بلادي نحن في الوسط الرياضي لا بنخاصم لا بنعادي ما ظهر في الآونة الأخيرة من لعب خشن في التشجيع والتجريح للاعبين والإداريين وكسير كراسي الإستادات التى بنيت بعزم وعرق الرجال لا يجوز، يجب كلنا أن نرفع الكرت الأصفر لهذا السلوك وإذا لزم الأمر الكرت الأحمر. هلال مريخ هما حسن وحسين لا غنىً لواحد منهما عن الآخر هما مكملان لبعضهما ورافعا رايات السودان في المحافل الدولية. هدايا الحلقة: 1/ أدروب أول مرة يخش دار الرياضة الحكم أعطى اللاعب كرت احمر، الجماعة قالوا أداه كرت احمر أدروب قال ليهم ما أداه كرت احمر حكم طلع كرت وراه ليه ورجعوا في جيبه!. 2/ الرباطابي ولده قال ليه أنا عايز بسكويت وكررها كم مرة. أبوه قال ليه خلاص أنا ماشي الدكان علشان أجيب ليك البسكويت، الشافع شفق لحق أبوه في الدكان أبوه بي زعل قال ليه أنا ما قلت ليك ماشي أجيب البسكويت لاحقني ليه؟ البسكويت دايرين ياخدو ليه مقاس؟!. 3/ فلاح مصري زرع نص أرضه عدس والنص التاني رز، لمن جا يحصد لقى المحصول كشري!. 4/ واحد ثقيل قال لبتاع السوبر ماركت عندك معلبات؟ قال ليه أيوة، قال ليه طيب أديني علبة كبريت!. 5/ في المحكمة القاضي سأل المتهم إنت متزوج مين؟ قال ليه متزوج واحدة ست، القاضي هرشه وقال ليه يعنى في حد بتزوج راجل؟ قال ليه ايوة أختي متزوجة راجل!. 6/ رباطابية يوم عقد أختها بتغسل في العدة اخو العريس شافها قال يعرسوها ليه ويعقدوا ليه مع أخوه قوموها من غسيل العدة وحموها ولبسوها وعقدوا ليها، الرباطابي قال ليهم «العروس لحقوها بي حلة البريستو»!. 7/ القمر طلب من الشمس يتزوجها، الشمس قالت ليه أنا ما بعرس واحد صايع حايم طول الليل!. 8/ واحد على نياته دخل محل تحف قام كسر ليه نجفة بالخطأ، صاحب المحل قال ليه بتعرف التحفة دي تاريخها بيرجع للقرن الثامن عشر؟ صاحبنا قال ليه: الحمد لله افتكرتها جديدة!. 9/ صعيدي داير يشرب اللبن بارد دخّل الجاموسة في الثلاجة الفريزر!. 10/ مدرس العلوم سأل الطالب ما هي فائدة الأذنين؟ الطالب قال ليه: تمنع النظارة من السقوط يا أستاذ!. 11/ صعيدي داير يجرب الصدى قام قال أنا مين؟ الصدى قال ليه: إنت حمار!. 12/ بخيل اتزوج مشى شهر العسل براه!. 13/ سائق تاكسي نايم بالليل، دخلت عليه زوجته وقفلت الباب بالراحة، صاحبنا صحى وقال ليها افتحيه واقفلي تاني!. 14/ واحد من أصحاب الخيال مشى يعزي في اخو صديقه سألهم المرحوم مات كيف؟ قالوا ليه جاتو رصاصة في رأسه، قال ليهم الحمد لله ما جات في عينه!. 15/ الأول: تعرف ليه سموا قناة السويس بهذا الاسم؟ الثاني: لان السفن بتمشي بسويس بسويس!. خاتمة: تعالوا كلنا إدارات ومشجعين وصحفا سياسية ورياضية ومجلات وقنوات فضائية وإذاعات رياضية ومواقع الكترونية وإدارات أندية ووزارات ومجالس أن نحافظ على اللعب والتشجيع النظيف. مع تحياتي،،
