٭ سنوات من الصبر ومجابدة الحياة وصراع الظروف لتحقيق الذات، هى حكاية لانسان سوداني ظل يتحلي بالصبر يكافح حتى مل الصبر من صبره، ومصمم على الا يعود بخفي حنين، وينهتز كل دقيقة تمر به للمعرفة.. التقينا به في ونسة يعمها جو من الفرح ممزوجة بشيء من الجدية في محتواها كثير من الاثارة والاندهاش مع الموسوعة السودانية التي تحمل في طياتها كثيرا من من الجوانب الخفية حول الحياة الباكستانية عكس لنا بمرآة كلماته السحرية بعض غرائب السند.. وجدناه يحمل مصباح علاء الدين ليضئ الطريق للاجيال القادمة ليعرفها بالحياة الباكستانية بتفاصيلها الدقيقة. ٭ نتعرف عليك؟ انا يحيى عبد الوهاب مدثر محمود «الشهير بكلبش» ٭ مكان الميلاد والمراحل الدراسية؟ اتولدت في الخرطوم، وكل مراحلي الدراسية في الامارات، ماعدا الجامعة طبعا هنا في باكستان. ٭ طيب انت جيت هنا سنة كم وقريت شنو؟ أنا قريت هندسة كهرباء بجامعة مهران للعلوم والتكنلوجيا.. الكلام ده كان سنة 1996م. ٭ جيت باكستان كيف وكانت رغبة ولا صدفة؟ رغبتي كان اقرأ في السودان وسط اهلنا، لكن طلع قبول لي في باكستان، قلت اجي اشوف الحاصل شنو. وجيت مع واحد صاحب ابوي نزلت معاهو في كراتشي قام وصلني لحدي الجامعة. ٭ سكنت وين؟ سكنت في الهوستل «الداخلية» مع واحد سوداني معرفه اخوي. ٭ الزمن داك كان في سودانيين كتار؟ ايوه السودانيين فى اى محل كتار. ٭ كتار هسي ولا زمان؟ كتار هسي.. وانا كنت السوداني الوحيد البقرأ كهرباء، ومعاي اتنين دفعتي بيقروا مدنية. ٭ انت لمن طلع ليك قبول في باكستان ما كنت خائف باعتبار انو باكستان دولة فيها ارهاب وانفجارات وحاجات زي دي؟ ما كنت خائف الكلام ده كلو ناتج عن الاعلام السيئ.. صحيح باكستان خطرة لكن ما بمستوى الاعلام ده.. والاعلام دائما بعكس الجوانب السيئة يعني لو قعدت تعاين للقنوات التلفزيونية بتقول الباكستانيين ديل ساكنين في قنبلة، وبعدين الاعلام ما قاعد يتطرق للجوانب الثقافية والاجتماعية للبلد دي، وانا مما قمت ما شفت لي برنامج عن الحياة الاجتماعية في باكستان.. بس انفجرت سيارة مفخخة وانفجر مطعم وداك فجر نفسه. ٭ انت مما جيت هنا ما شفت انفجار او حضرتو؟ لا لا.. ما شفت، ومرات اهلنا اضربوا لينا اقولوا لينا في انفجار ما جنبكم. المنطقة هنا لقيناها آمنة جدا وطبيعة السكان ناس باردين ومسالمين وجنهم قروش، يعني الواحد ما بفجر نفسه، ودي طبيعة عموم ناس الجنوب، لكن ناس الشمال ناس شرسين في طباعهم وممكن اعملوا اي حاجة. ٭ طيب يعني البلد دي آمنة مئة المئة؟ لا ما آمنة زي السودان بس اقليم السند فيها داكو كتير شديد. ٭ الداكو ده شنو يا يحيى؟ الداكو ديل عصابات شوارع وقطاع طرق، وهم غالبا الطلاب الجامعيين الظروفهم الاقتصادية صعبة. ٭ طيب باقي الاقاليم التانية زي البنجاب والبلوج والبتان ديل فيهم داكو؟ اول حاجة ناس اقليم الشمال البسموها منطقة القبائل ديل ناس انفجرت سيارة دي ذاتا. وانا مشيت لاهور قبل كده اقليم البنجاب ما فيها داكو لكن البلوج عندهم. ٭ طيب يا يحيى الانسان لمن يكون جديد في البلد دي بلاقي صعوبات في التعامل مع الناس؟ طبعا..لأنه هناك عامل اللغة بكون حاجز... في الجامعة والمؤسسات الحكومية مافي صعوبة لأنو التعامل بالانجليزي، لكن التعامل في الشارع صعب جدا لأنو يا أردو او سندي. ٭ انت شايفك اكتر سوداني بعرف اردو اتعلمتو في كم سنة؟ انا والله ما متذكر لكن اول حاجة بديت بالاردو ثم البشتو ودي لهجة سكان اقليم اسمو NWFB حتى آخر حاجة اتعلمت سندي وهي اللهجة المحلية لسكان المنطقة. ٭ بتذكر اول كلمة بالاردو؟ ايوة لياو ومعناها احضر لي، وكتنا معناها كم، ديل اول كلمتين اتعلمتهن. ٭ بتتكلم كم لهجة باكستانية؟ ثلاث لهجات الاردو ودي اللغة الرسمية في باكستان والهند وبنغلاديش.. تاني بتكلم بشتو دي لهجة البتان، وسندي ودي لهجة سكان المنطقة. وللمعلومية كل اللهجات الهنا ما لهجات لأنو قاعدة تنطق وتكتب اي مصنفة ضمن اللغات. ٭ رأيك شنو في الإنسان الباكستاني؟ الباكستانيين بختلفوا مننا شديد شعب جنوا قروش، وهي بالمناسبة محددة للتعامل، وبعتقدوا الاجانب ديل مولودين في بئر بترول. ٭ في مقولة شهيرة عن القروش؟عارفه؟ ايوه عارفه.. اقر بيسا هي كج بي نهي.. يعني لو ما عندك قروش مافي اي مشكلة. ٭ الفرق بين زمان وهسي شنو؟ زمان كانت العيشة رخيصة يعني الدولار في حدود 30 روبية والبص القوج من حيدر اباد لكراتشي ب 50روبية، هسي الحاجات غلت شديد. ٭ البص القوج ده يعني شنو؟ البص القوج يعني البص السريع ومكيف وفيو وجبات. ٭ بمناسبة الوجبات دي الأكل الباكستاني شايف الأجانب بشكوا منو؟ لأنو الباكستانيين بستعملوا بهارات كتيرة جدا، ونحن عموما قاعدين نستعملا كرائحة بس، يعني زي البرياني دا اي زول جديد بعمل ليو مغص، لكن بعد شوية بتعود. عشان كده الناس بركزوا على البيض والجداد وهسي غلى ذاتو. ٭ غلى لشنو؟ اتخيل انو تعداد باكستان 170 مليون في عادات الباكستانيين انوا ياكلوا بيضتين مسلوقات مع الشاي، ديل يومي بياكلوا 340 مليون بيضة قبل جرس الصباح.. كيف ما يغلى. ٭ طيب المأكولات الشعبية أدينا عنها فكرة؟ عندك البرياني أرز بالجداد، والدال يعني العدس وانواعه كتيرة زي الدال ماش ودال جنى والبندي البامية والكراي والو اندة البيض بالبطاطس. ٭ طيب لمن اكلهم بهاراته كتيرة ما فكرت تعملوا مطعم مأكولات سودانية؟ ايوه... فتح مطعم سوداني مرتين لكن هسي قفل. ٭ كان فيو شنو؟ كان فيو فول وفتة وسلطة أسود. ٭ ناس شبه القارة الهندية ديل بتصفوا بتقالة الدم ما بحسوا.. قالوا دمهم تقيل والزول لمن اجي اول مرة بعاني من تقلة الدم.. تفتكر تقلة الدم ناتجة من شنو؟ «ضاحكا».. والله اتخيل لي من طبيعة الأكل بتاعهم ده ٭ البرود بتاع الباكستانيين ده في رأيك ما أثر على السودانيين الهنا؟ كيف ما اثر.. يعني كل السودانيين الهنا لو اديت واحد كف ما بسألك.. بقينا زيهم، يعني زمان لو في زول عاين فيك ساي تشاكلوا. ٭ البرود بتاع الباكستانيين دا ما عندكم معاه مواقف ظريفة؟ مواقف كتيرة، لكن مرت علي تلاتة مواقف انا لحدي هسي محيراني، الاول في واحد اموا ماتت في حادث حركة وهو ماسك تلفونو يتكلم، والتاني في اتنين راكبين في مواتر اطاقشوا ووقعوا في الأرض قاموا من الأرض.. انا قلت بتحصل مشكلة بيناتن الليلة. بعد داك اي واحد نفض بنطلونو وركب موترو وكأنو ما حصل شيء.. والموقف التالت طقشت لي واحد بموتر وقع في الأرض وشرطت بنطلونو قام من الأرض قال سوق كويس.. وسألتو عن محل قام وصفوا لي ومشى في طريقو. ولكن البرود ده كويس بعلم الصبر واها نحنا صابرين. ٭ بالنسبة للعادات والتقاليد الغريبة المرت عليك هنا؟ والله عاداتهم كلها غريبة، وفي مقولة باكستانية بتقول ليك باكستان زندا آباد يعني بلد العجائب، لكن اكتر شيء غريب طريقة السلام الواحد بنحني للتاني يعني يركع ليو في السلام، هو بسموا «نمستا». ٭ تفتكر التقاليد اصلها شنو؟ اكثر العادات لو لاحظت متأثرة بالعادات الهندوسية. ٭ زي شنو مثلا؟ يوم الألوان ترش اي زول بالألوان، والناس تلون وشها وتاني السلام على البنات في الرأس يضع يدو في رأس البت. ٭ يعني عدم المصافحة ما لانه حرام؟ لا لا هم اصلا بخافوا من النساء، و المراة عندهم مقدسة.. 25 إله امرأة ما زالوا متمسكين بالعادات دي. ٭ الزواج في المجتمع الباكستاني عندك عنه فكرة؟ أيوه.. بالنسبة للمهر مافيو مشكلة، وقاعدين يواجبوا العريس في حفل الزفاف، لكن المشكلة في مؤخر الصداق هو تقريبا عشرة آلاف لاك واللاك مئة الف روبية، ودي قيمة شبه تعجيزية، عشان كده مافي طلاق او نادر جدا. ٭ خلال سنواتك دي في كم سوداني اتزوج باكستانية؟ اتنين وواحد خاطب هسي. ٭ ما عندك فكرة تتزوج باكستانية؟ ما عندي. ٭ لشنو؟ اختلاف العادات والتقاليد عشان كده السودانيين ما قاعدين يتزوجوا باكستانيات. ٭ عندك اصحاب باكستانيين؟ ايوه عندي، ومصاحب البتان لأنو زينا في العادات والتقاليد. والبتان فيهم تقريبا اغلب صفات السودانيين الجميلة، عشان كده موش انا بس اغلب السودانيين بصاحبوا البتان لانه ما بختلفوا عننا كتير، بعكس السنود اصحاب المنطقة نظرتهم عرقية وبختلفوا مننا اختلاف توتلي. ٭ الصعوبات البتواجه الطلاب شنو؟ اول حاجه الاكسنت بتاع الباكستانيين بقلبواw الى v لكن بعد شويه الواحد بتعود وببقى بفهم الاكسنت بتاعن بمرور الزمن، ومن عجائب البلد دي الصور الفتوغرافية، يعني اول ما إجي طالب جديد من استديو المطار لازم تصوروا اكتر من 100 صورة وبعد يتسجل في الجامعة وينتهي من اجراءات الاقامة بتكون كل الصور دي انتهت. ٭ انت هسي خلال الفترة دي اتعلمت شنو؟ بلعب كركت واسنوكر. ٭ زرت السودان قريب؟ والله طولت شديد.. لكن ان شاء الله حا أزور السودان قريباً. ٭ طيب يا باشمهندس بنشكرك جزيل الشكر. وانا بشكركم شديد، وبشكر اسرة جريدة «الصحافة»، والحقيقة خلال سنواتي كلها اول مرة اتعرض لينا اعلام سوداني، ويا ريت ما تغيبوا كتير تجوا طوالي تعكسوا شكل الحياة هنا واوضاع الطلاب، على أساس المجتمع السوداني اتعرف أكتر بباكستان. {}{
