مامحيرانى الا حكاية العزاء عند ( النسوان ) بعد مايمر زمن على البكا غايتو فيها دراما ماعاديه تجيك( المره ) من هناك تخت ليك يدها فى راس التانيه (ست الو جعه) وتبدأ ليك العزف اييييييييييييييييييي مساااافه كده وبعدها يتم الدخول فى حالة صمت لخمس ثوانى وتبدأ المرحلة التانيه ولو كان البكا حار تانى بتكون فى مقطوعه ذي الاولى بس بتكون فيها شوية وصف وتلاوة لأبرز ما فى صحيفة المرحوم، مع الحفاظ على النغمة نفسها تصاحبها صوله ورجفه وقطيع فى الصوت ....نخش بعدها فى دور (الستاشر ) وده بكون فيه جمل قصيرة كده ذى .....والله سمعنا متأخرين... ولا انا كنت ياهو فى ابوظبى ...جيت قريب ماطولت ...( فرصه لاستعراض اخر طلعه ).بعد داك ندخل فى (دور التمانيه ) وهو حديث عن المرحوم ذاتو ......ذى مالو ماكان كويس الجاهو شنو ...ودى لازم تكون بصوت باكى ومشحونه بالاسى ..( حتى لو ماشافتو فى حياتها ) اما (دور الاربعة ) ده خلاص بكون الحوار مشى فى اتجاه بعيد شويه بس داخل الأجواء يعنى تعليق عن الجا منو والماجا منو .....والبكى كان كيف ..(.قسمت بالله غايتو الخلق ( بكسر اللام ) الجات للبكا هلال مريخ مافضل زول ماجا ( تصريح من اسرة المتوفى ).... ندخل بعد داك للمباراة النهائية ودى ماعندها اى علاقه بالبكا اصلا بل هى محاولة لقراءة الحاضر واستشراف المستقبل حيث يبدأ التعليق على التوب ودقة الغوايش وطلاق (هنايه ) وخطوبة سهير( سهير دى منو ) وتبدأ الونسه تسخن والسنون تظهر ( والشمارات ) تنهمر كالمطر، وممكن تظهر قهوة بعد الموية الجات فى البداية ديك تعبيرا عن الحزن كل ذلك والمرحوم يتململ فى قبره من هذا المشهد العجيب ...صحي الحى أبقى من الميت لكن كمان ماقدر ده .....وبعد البحث والتحرى اكتشفت انه لوتم الاكتفاء بالفاتحه بس ولم تصاحبها المقطوعة أعلاه فدى بتكون رسالة مبطنه لأهل الميت من المعزيه أنكم قبل كده مات لينا زول ولم تشاركونا هذه (الترانيم) ....... ياربى اول زول عمل الحركة دى منو !!! ؟؟وليه !!؟؟
