الكرم شيمة محمودة في كل الاماكن والازمان، وبمثل ما ذاع صيت حاتم الطائي في الكرم فإن النعيم ود حمد خلد الشعر السوداني كرمه ومروءته. القصيدة التى تغنى بها خلف الله حمد والتى صاغتها اخت النعيم تعد من اجمل القصائد والاغاني لحناً ومعنى نوردها فيما يلي بالشعر والشرح: 1/ انا غنيت للولد الاسمه النعيم ود حمد وكت العيش بقى بالقبض ديوان النعيم ولا بنسد (ايام المجاعة التى يوزع فيها العيش بقبضة اليد كان ديوانه مفتوحاً للجميع). 2/ غنيت لى دابي الرجيمة ما بحوي على البهيمة هيلك الشكرة قديمة وما بشيل المال الفي القسيمة (شبهته بالثعبان الذي يرجم فريسته ولا يقبل بأن يعطى من الغنائم) 3/ النعيم يا قاصدين زُبا خشمه انطبع لى مرحباً والبتسبي للضيف بضبحها (البتسبي: هى البهيمة التى اوشكت على الوضوع) 4/ احييت سنن البرامكة عاجبني طول ايدو سامكة يا بابا قول للكريم دراج المتابكة (البرامكة: اهل يحيى البرمكي، سامكة: قوية، المتابكة: المرأة المحتاجة للعون). 5/ النعيم يا فارس القبائل الكريم لمام للهمايل شكراً بلاك ما اظنه خايل ايدو ام رويق والقبلي شايل (الهمايل الاشياء الهاملة، ام رويق: المطر القبلي). 6/ يا الشرفت الضعفا ويالحاكيت من مكوار بدا خدامته القعّدا هي بتدرش قالت قضى (الحاكيت من مكوار بدا شبهته بالنيل وكانوا يعتقدون ان النيل يبدأ من سنار التى كان اسمها مكوار). 7/ النعيم قادر وحدو ما تتفشخروا وتتقعدوا هو رب القدرة ساعدو ختو له الشكرة لا تجحدوا هدايا الحلقة: 1/ واحدة مسكينة قالت لبخيل أديني حاجة تفرح العيال، قال ليها غيبيهم بكرة من المدرسة!. 2/ واحد من أصحاب الخيال أبوه مات قعد يبكي، التلفون ضرب قعد يبكي اكتر من الأول، قالوا ليه في شنو؟ قال ليهم اختى أبوها مات كمان!. 3/ حكمة اليوم: محفظتي زى البصل كلما افتحها ادمع!. 4/ عجوز قحت ... سنونها طارت!. 5/ واحدة ضربت الاجزخانة وقالت للدكتور عندك ميزان حرارة؟ قال ليها ايوه، قالت ليه ختو في خشمك، زعل وضرب للبوليس، سألوه الكلام دا من متين؟ قال ليهم من خمسة دقائق، قالوا ليه خلاص طلع الميزان من خشمك وشوف حرارتك كم؟!. 6/ عجوز عايزة تضرب لي بتها في الموبايل جاها الرد الآلى: الرقم الذي طلبته غير صحيح، ردت يا بتي بطلى النضمي واديني امك!. 7/ اثنين من أصحاب الخيال سايقين عربية قامت اتقلبت واحد قال للتاني باين علينا اتقلبنا يا معلم، صاحبه قال ليه دا وسواس ساكت!. 8/ غبي قرر ان ينتحر من الدور العاشر ما لقى عمارة عشرة ادوار رمى نفسه من الدور الخامس مرتين!. 9/ صاحب خيال اشتغل في مستشفى، حالات الوفيات زادت، بعد التحقيق اتضح انو بيفصل أجهزة الإنعاش ويشحن موبايله!. 10/ نصيحة واحد بليد: ذاكر: تنجح تنجح: تفرح تفرح: تلعب تلعب: تتعب تتعب: تموت 11/ بتاع خيال جابو ليه ولد بعد سبعة بنات سماه بدري!. 12/ اشهر كضبتين للرجل والمرأة: المرأة: 5 دقائق وأكون جاهزة الرجل: 5دقائق وأكون في البيت خاتمة: النعيم ود حمد هو أحد الذين خُلدوا شعراً لكرمهم وهو نموذج للسوداني، ولكني أرى ان اغلب أهلنا كرماء فنرجو من الله ان يجعلنا من الذين ينطبق عليهم قوله تعالى: (إن أكرمكم عند الله أتقاكم). ودمتم،،