الجن - حمانا الله وإياكم - معروف، وهو فقدان العقل او اللوثة، منه الجن الخفيف والجن الكلكي اللابس ملكي. والجن يمكن علاجه بالقرآن والرقية او بواسطة الطبيب النفساني، اما (الاندراوة) فيقول اهلنا عليها هي غياب العقل لفترة وحضوره لفترة، ويصفونه بالذهللة، وحديثاً يقولوا ليك الزول ده (ورقه زايد) او (بره الشبكة) او (مذهلل) ولو قالوا على الزول (جنريتر) معناها فكت منه، صحي صحي، وأهلنا بقولوا ان الجن يمكن علاجه لكن حالة الذهللة يصعب علاجها. خلف الله حمد في رميته الشهيرة بقول: أنا رحل الكحل وكتين يميل أنا الظل الظليل للداير يقيل انا الرمد البخلي العين تسيل انا الجن المخالطاهو أم غزيل وحلقتنا حتكون عبارة عن خلطة حكاوي المجانين والخارج الشبكة وأصحاب المزاج الخشو خط (81) وناس الاندراوة: 1 - في واحد مجنون في كسلا ساكن تحت شجرة ما شغال بي زول، لوري بتاع طوب من سنة حفروا البحر فرملته تعبانة خش في المجنون كسر رجله وضرب حيطة منزل وشجرة نيم.. في المحكمة محامي السواق وبعض الشهود قالوا للقاضي طبعا ده راجل مجنون وقع جنب العربية ضربته كسرت رجله والسواق ما غلطان، القاضي قال للمجنون رأيك شنو يا زول في كلام الناس ديل؟ قال للقاضي صحي انا مجنون وفاكة مني ووقعت تحت العربية، الشجرة والحيطة ديل برضوا مجانين؟ القاضي ضحك وحكم له بالتعويض. 2 - في واحد مهبوش شرب الدواء قبال مواعيده قال عايز يفاجئ الجراثيم. 3 - واحد مجنون كورة مشى للطبيب النفسي قال ليه يا دكتور مما أخت رأسي بالليل في الفراش الا واحلم بمنافسات كورة سخنة بين الجداد - الدكتور قال ليه حأديك دواء يشفيك ويمنع عنك هذه الاحلام - الراجل قال للدكتور خلي الدواء لبكرة الليلة نهائي البطولة يا دكتور. 4 - في واحد من أصحاب المزاج أمه شبت فيها نار بدل يطفئ النار وينقذها قال ليها (منورة يا حاجة). 5 - جعلي حمش (ورقه زايد) فتح محل غاز جديد فجر اسطوانة لزوم الدعاية. 6 - واحد من الجماعة زهجان من مرته قال ليها لو كنتي في الهند كان عبدوك قالت اصلوا انا ملاك؟ قال ليها انتي (بقرة). 7 - صاحب مزاج سألوه ما هو وجه الشبه بين امريكا و(البامبرز) بتاع الأطفال، قال ليهم الاثنين مسيطرين على الوضع تماما. 8 - المرة البراية قالت للطبيب النفساني راجلي بتكلم بالليل اثناء نومه، قال ليها العلاج عندك أديه فرصة يتكلم بالنهار. 9 - اندراوة أمثال: ٭ القرش الأبيض بيعوم في البحر الأحمر. ٭ الأعور ضربوه في عينه قال ليهم كسرتو نضارتي. ٭ لو حبيبك عسل اتأكد من انه عسل نحل اصلي. ٭ ما زي ابوك لكن بطفشك. ٭ العين بصيرة واليد الواحدة ما بتصفق. 01 - واحد من الجماعة امه شاكلته قالت ليه ما عافية ليك لبني ورضاعتي، مشى جاب كرتونة لبن فورموست وبذة، قال ليها من حلَّ دينه نامت عينه. 11 - واحد جنب البحر من الجماعة اسمه عوض، الجماعة يجوا يسلموا عليه (ازيك يا عوض) يرد عليهم (اهلا يا اخينا)، (ازيك يا عوض)، (اهلا يا اخينا) مرة واحد قال ليه (ازيك يا اخينا) قال ليه (أهلا يا عوض). 21 - مجنونة في سوق ام درمان اسمها بت النور شافت واحد «بطقع» في الشفع بالحجار، قالت ليه كلنا بديناه كده يا أخوي. 31 - واحد بايتة معاه، سألوه ما هي اعظم أم في نظرك قال ليهم (أم فتفت). 41 - الولد قال لي أمه: ما معنى كلمة ملاك؟ ردت هو مخلوق من نور يطير في السماء. الولد: سمعت ابوي بقول للسكرتيرة يا ملاكي بس ما طارت!! الام: الليلة بتطير..!! 51 - دكتور عيادته ما جايبة دخل، سأل الممرضة في زول سأل مني؟ قالت ليه سألت عنك العافية، قال ليها خليها تخش. 61 - واحد حاسد بكى في جنازة صاحبه شديد قالوا ليه الزول ده ما كنت بتحبه الببكيك شديد كده شنو؟ قال ليهم مش قالوا البكاء بعذب الميت في قبره. خاتمة: أغنية يا حنوني وعليك بزيد في جنوني، وكذلك أغنية ده الجنني وجنن عبد القادر، ده جنون اختياري بالمحبوب، الله يكفيكم شر الجن الاجباري ومشي الكداري وشوت (الضفاري) بالليل والنهاري.
