* عندما كنت طفلاً صغيراً كانت تتنازعني (رغبتين اتنين) .. * الرغبة الأولى أبقى (والي ولاية) والرغبة الثانية أبقى (بتاع دكان) .. * إتمنيت أكبر عشان أبقى بتاع (دكان)، وكان الهدف من هذه الأمنية هو (الطحنية) .. * والله صحي .. * كانت عاجبانا فكرة إنو تكون شغال في دكان وتأكل (طحنية) في أي وقت دون أن تدفع قروش .. * إتمنيت أكبر عشان أبقى (والي)، وكان الهدف من هذه الأمنية هو أن (أحوم) السودان ولاية ولاية .. * سنة أكون والي في كسلا، وسنتين والي في الجزيرة، وسنة ونص والي في شمال كردفان، وخمسة سنين والي في القضارف وسنتين ونص والي ولاية جنوب دارفور .. * حوامة جد .. * كنت فاكر إنو شغل (الولاة) حوامة بس، وبعد يفتروا من الحوامة بيجيبوهم الخرطوم يرتاحوا .. * وبما أن هذه هي أفكارنا في تلك المرحلة فان اللاعب كونتاك الذي يتوقع أن يدخل كشف الهلال اليوم هو أشبه ب(الولاة) .. * كنتاك (حام) نص الولايات .. * زي المعتمد .. * سنة (2005) كان لاعباً في أهلي مدني .. * والآن نحن في (2018) يا كاردينال .. * ما هي معايير تسجيل كونتاك في كشف الهلال ؟؟ * كونتاك في تشكيلة الهلال ما عندو خانة وكبير في السن ولن يلعب أكثر من موسم .. * يبدو إنو معايير التسجيل في الهلال هي أن تكون (مفكوك الإرتباط مع ناديك السابق) .. * يفترض الهلال محلياً ما يسجل لاعب إلا يكون لاعب منتخب.. * أرجو وأتمنى أن يصرف الهلال النظر عن كونتاك مثلما صرف النظر عن عماد عبد الله .. * ولو أصريتوا على تسجيله فان (كنبة الهلال) قد إستقبلت ضيفاً جديداً.. * طالما عماد الصيني راجع لا داعي لكونتاك، وطالما عمار الدمازين راجع لا داعي لعماد .. * الهلال محتاج محترف أجنبي بمواصفات ياسر رحمة .. * إذا كان المدافعين الموجودين في كشف الهلال (مش ولابد) فان محلياً ما في مدافع أفضل من المدافعين الموجودين في كشف الهلال .. * المهم .. * يقول المثل : (الغُطي الضيق بيعلم الكرفاس) .. * ونقول نحن : (الشكوى الغلط بتعلم الرفاس) .. * المريخ الشهير ب(المدفور) اشتكى (غلط) ومع ذلك إعلامه يرفس .. * رفس المريخ النعمة في الجوهرة وانضرب بواسطة الشعلة، ورفس النعمة في النقعة وانضرب بواسطة منتصر، ورفض النعمة في الشكوى وانضرب بواسطة أيمن عدار .. * وقبل هذا وذاك رفض نعمة الفيفا (ست نقاط) وانضرب في الرأس .. * وفعلاً (الغُطى الضيق بيعلم الكرفاس) .. * حاجة تكسف .. * اليوم كما تردد سيظهر رئيس الهلال عبر قناة الهلال في حوار مباشر للحديث عن الراهن الهلالي .. * وإذا كان لابد من نصيحة فاننا ننصح الكاردينال بأن لا (يعد) بما هو غير قادر على الإيفاء به .. * ما توعدنا بحاجة انت ما واثق منها .. * ولا توعدنا بحاجة ما عندك ليها قدرة .. * تعال قول الحاجات الإنت واثق من إنك بتحققها .. * بنقبلها منك حتى لو كانت حاجات أقل من طموحات أهل الهلال .. * الصراحة كويسة .. * والقيادي في أي مكان لابد أن يكون صادقاً في القول والفعل .. * يعني لو ما واثق إنو ح تجيب (الأخطر من ساماتا) ما توعدنا .. * لو ما واثق إنو ح تشيل الكأس الافريقي السنة الجاية ما تقول : (الهلال لو ما جاب كأس أفريقيا تاني ما بجيبو) .. * لو ما واثق من (نقاط الفيفا الستة) ما تقول إنها راجعة .. * قول لينا الحاجات (الحقيقية) والبتقدر عليها ونحن ما عندنا مشكلة .. * شبعنا من الونسة .. * بمناسبة الونسة .. * لا يملك (القرد) خيارا أفضل من أن يرى (إبنه) غزال .. * يعلم القرد أن إبنه قرد ولكنه مع ذلك يخدع نفسه فيراه غزال .. * ولا يملك المريخ خيارا أفضل من أن يرى كأس السودان (ممتاز) .. * ولأن التشبيه يجوز فمن حقنا أن نقول (كأس السودان في عين المريخ كأس ممتاز) .. * وغايتو جنس غايتو .. * ورد في الأخبار أن كلتشي فاجأ إدارة المريخ وهو يزور المكتب التنفيذي ويطالب بمتبقي مستحقاته .. * مشكلة المريخ إنو ضهرو مكشوف .. * كل يومين تلاتة بيظهر ليهم زول ببلاغ جديد .. * وكلتشي ده بالذات لو ما حليتو ليهو مشكلتو ممكن يحرمكم من التسجيلات بعد القادمة .. * إذا كان مارسيال محترف المريخ (الما في زول حافظ شكلو) تسبب في حرمان المدفور من التسجيلات التى تنطلق اليوم، فما بالك بكلتشي وما أدراك ما كلتشي .. * عالجوا مشكلة كلتشي عشان شايف جابسون بيسأل من تلفون محمد جعفر قريش.. * وأوكرا برضو .. * وعبد الكريم الدافي برضو .. * وأيمن سعيد كذلك .. * وغايتو السنة دي بالذات يا متنا من الضحك ويا كمان الضحك كلتنا .. * وأهم حاجة.. الامارات تعيش هذه الأيام تفاصيل الشتاء .. * يعني برد .. * المقصود إنو قمة عام زايد ح تكون في البرد وما أدراك ما شلباية .. * المريخ تاريخياً عندو مشكلة مع البرد في الخليج .. * ممكن يلعبوا في البرد داخلياً أو حتى خارجياً في أفريقيا ولكن في الخليج يعاني المريخ في الشتاء .. * سباعية الوحدات الأردني كانت بسبب (البرد) .. * ودي أول مرة في تاريخ كرة القدم فريق يخسر بسبب البرد.. * عموماً.. السعودية برضو فيها برد .. أقصد السعودية برضو فيها قمة .. * وتبكو بس.. عين قطرة وعين مس .. * ونركب صافنات ونجيبة (خليجية) وأصلو الزول بيموت والذكرى تفضل حية .. * و..و..
