بالعربى الكسيح محمد الطيب الأرباب يأكل أطراف أصابعه من الجوع !! * الإنسان لا يشرب (المُر بعد الحلو) إلا في حالة المرض .. * لو عيان بتشرب (العصير الحلو) بعد داك بتشرب (الدواء المُر) .. * وفي الاحوال الطبيعية بتأكل (الملح الذي هو مُر) وبعد داك بتأكل الحلو ..
* الآن تسجيلات الهلال (حلوة) وختامها سيكون أحلى ب(القنبلة البرازيلية) .. * ولكن نحن نريد ان تكون تسجيلات الهلال عكس ما قال التجاني حاج موسى .. * والتجاني حاج موسى في (الريدة) شرب الحلو ومن بعد شرب المُر فكتب قائلاً : (سقيتني بعد الحلو مُر) .. * وإحنا تسجيلاتنا دارينها تكون: (سقيتني بعد الحلو حلو) .. * بعد الحلو تانى نشرب حلو .. * يعنى بعد (بوتاكو ومكسيم وبوبكر وماغنو البرازيلي) نقوم نجدد لنزار حامد .. * والهلال لو جدد لنزار حامد في هذه الفترة حالنا سيكون مثل حال الذي يأكل (سلطة فواكه) ثم يأكل (باسطة) .. * كلو حلو في حلو .. * زي الزول البيفطر ب(مديدة بلح) وبيحلي ب(كاسترد) .. * وموضوع نزار ده إحنا مركزين عليهو عشان الكاردينال ما يلدغ من (الجحر مرتين) .. * عشان بعدين ما تقول لينا نزار جاني في البيت وقعد في الصالون وقلت للولد جيب قروش وشال القروش ووقع على العقد وطلع .. * ما دايرين نسمع الكلام الميت ده تاني .. * الكاردينال ده والله في التلفزيون لما كان قاعد يتكلم عن بكري المدينة انا جاني احساس إنو بيتكلم عن معتز رابح .. * قال : (بكري ده انا ما كنت دايرو في هلال 2015) !! * يا راجل قول كلام غير ده .. * الكاردينال في الحلقة التلفزيونية اكثر من كلمة (أنا قوي) لكن في موضوع بكري ده بالذات الكاردينال (اضعف من ضعيف) .. * والكاردينال واثق من ان بكري لن يلعب كرة بعد اليوم وهذه الثقة استمداها من عماد الطيب .. * ونقول للكاردينال ولعماد الطيب : (ثقتنا فيكم زي الموية في الغربال) .. * عماد عذبنا عذاب بشكوى فيتا كلوب وفي النهاية طلع مواطن ساكت .. * إنتظرنا عماد يحسم الشكوى لقيناهو متصور مع فيصل موسى .. * المهم .. * أنا داير استغل موضوع (الحلو والأكل) ده في صلاح ادريس .. * صلاح إدريس الذي هو عبارة (تناقض يلبس عُقال) كان قد شطب كلتشي من الهلال بسبب سوء السلوك .. * شطب كلتشي قبل نهاية الدوري وبرر ذلك بأن كلتشي (جلس مع جمال الوالي وقبض قروش) .. * وفي صبيحة اليوم الثاني خرجت صحيفة حبيب البلد بمانشيت عريض جاء فيه : (كلتشي باع الهلال) .. * وكلتشي باع الهلال منسوب للسيد صلاح ادريس الذي اتهم (كلتشينو) بالخيانة .. * وبالفعل تم شطبه واللاعب ذهب للمريخ .. * الآن صلاح ادريس الذي هو عبارة (تناقض يرتدي عُقال) ضم كلتشي الخائن للاهلى شندي .. * السؤال الذي يفرض نفسه هل عندما شطب صلاح ادريس كلتشي من الهلال كان يقصد تقديمه هدية لجمال الوالى وعمل (الخيانة) شماعة ام ان كلتشي الآن تماثل للشفاء من مرض الخيانة فسجله صلاح للاهلي شندي ؟؟ * السؤال ده واضح .. * واحد من اتنين : يا صلاح زمان غشانا وشطب كلتشي دون اي خطيئة وقدمه هدية للحبيب تكعيب ويا كمان كلتشي حاليا تاب من الخيانة فسجله صلاح للاهلي .. * لماذا يتشرف صلاح بتسجيل الخاين والعميل لفريق الاهلي شندي ؟؟ * المبادئ تقول ان الرجل يجوع ويأكل اطراف أصابعه ولكنه لا يبيع القضية .. * وصلاح ادريس الذى هو (نرجسي من الطراز الاول) لن يأكل أصابعه ولكن يبيع القضية ويضم الخاين .. * نحن والله نستحي جدا من الدور الذي يلعبه صلاح الآن .. * نخجل انابة عن الارباب .. * الرجل يريد ان يدمر الهلال فتجده يفاوض كل من فاوضه الهلال وآخرهم (محمد صلاح) لاعب المهدية .. * يفعل صلاح ذلك لأنه (طيش الانتخابات) مرتين على التوالى .. * عموما نبارك لأهلى شندى ضم كلتشي وريكادو ونؤكد سعادتنا بأن الهلال له نصيب في نجاحات أهلى شندى .. * لولا البرير والحاج عطا المنان والكاردينال لما اهتم صلاح كل هذه الاهتمام بالاهلي شندي .. * نحمد للبرير انه جعل صلاح (يزعل) ويهتم بالاهلي .. * شكراً لجمهور الهلال الذي رفض صلاح فجعله يصنع لنا فريقا قويا يمثل مدينة شندي الحبيبة خير تمثيل .. * وهذه هى عظمة الهلال وهذا هو دور الهلال التاريخي الذى يلعبه الآن .. * بفضل الهلال السودان يشارك باربعة اندية في مسابقات الكاف وبفضل الهلال صنع صلاح الاهلى لأنه كان زعلان من الهلال وناس الهلال .. * فقط نرجو ان لا يشطح الارباب في أحلامه .. * خلي احلامك واقعية .. * يعني ما تكون بتفكر السنة الجاية تفوز بالممتاز .. * طول ما في هلال الممتاز لن يذهب لغيره . * على صلاح ادريس ان يركز كل جهده لازاحة المريخ من (الوصافة) ليصبح الاهلي شندي هو الفريق الثاني في الدورى .. * هذا ممكن سيما وان الحبيب تكعيب يعاني هذه الايام من ضيق ذات اليد .. * التسجيلات القادمة سيضم صلاح ادريس زولو وانقيدي وبيتر جيمس لاهلي شندي .. * غريبة الزول ده ما فكر في قدوين .. * طالما صلاح عمل فحص لكلتشي وإكتشف إنو (الدم خالي من الخيانة) كان يسجل قدوين برضو .. * قدوين ب(الخاء) .. * و..و.. * والاصل ما ببقى صورة و…(مُهيد ما ببقى نزار حامد) ..