سودارس : لو بتحبي (الشطة) ح أفتح مطعم شطة !!

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

لو بتحبي (الشطة) ح أفتح مطعم شطة !!

بالعربي الكسيح نشر في كورة سودانية يوم 25 - 02 - 2018

محمد الطيب الأمين
* في عالم (الريدة والشوق والحنين) أحياناً (يكفي إنك تشوف زول شاف زول إنت بتحبو) ..
* لما تكون (15) سنة قاعد في السعودية ويجي زول من أهلك، إنت من خلال الزول الجاك ده بتشوف أهلك كلهم..
* وبتكون مبسوط جداً..
* ولما تكون إنت في عطبرة وحبيبتك في كسلا ويجيك زول من كسلا بيعرف حبيبتك، إنت برضو من خلال الزول ده بتشوف حبيبتك ..
* وبتفرح بالزول الجاك ده شديد..
* في أغنية (آمنة الفي الضمير) يقول الشاعر: (واحدين قالوا شفنا الشافها ما شفناها) ..
* يعني .. ناس شافوا الناس الشافوا آمنة ..
* هم ما شافوها لكن شافوا الشافها ..
* وفي أغنية (السيرة) تقول الفنانة: (البريد الشيخ يا ناس أنا بريدو) ..
* أو: (البريدو الشيخ يا ناس أنا بريد) ..
* (البريد الشيخ أنا بريدو).. يعني (ريدتك إنت للشيخ هي الميزة الوحيدة البتخليني أريدك)..
* وبما أن ذلك كذلك فان إعلام المريخ وجمهوره قد أحدث تعديلاً في هذه الأغنية وأصبح الكوبليه هكذا : (البريدو الوالي أنا بريدو)، على وزن (البريدو الشيخ أنا بريدو) ..
* جمال الوالى لو قال بيحب (سلطة الأسود) بكرة إعلام المريخ كلو ح يحب (سلطة الأسود) ..
* ح يحبوا سلطة الأسود ليس حبا فيها وإنما حبا في جمال الوالي الذي يحب سلطة الأسود ..
* مع مراعاة أن (سلطة الأسود) ممكن تكون ما بتنفع مع البعض منهم، لكن برضو بيحبوها عشان الشيخ بحبها.. أقصد عشان الوالي بيحبها.
* جمال الوالي ما عايز ناس محمد جعفر قريش ، إعلام المريخ ما عايز ناس محمد جعفر قريش ..
* جمال الوالى عايز محمد الشيخ مدني ، إعلام المريخ عايز محمد الشيخ مدني ..
* (البريدو جمال الوالي أنا بريدو) ..
* دي كل القصة ..
* ولعل الوسط الرياضي قد تابع كيف أن إعلام المريخ قد حارب وبشراسة مجلس قريش (المنتخب والشرعي) ..
* حاربوهم رغم شرعيتهم لأن جمال الوالي (ما عايزهم) ..
* وإعلام المريخ الآن يهلل ويتغزل ويرحب بمحمد الشيخ مدني (المُعين بواسطة الحكومة) ..
* يهللون لمحمد الشيخ مدني (المعُين) لأن جمال الوالي (عايزو) ..
* (البريدو الوالي أنا بريدو) ..
* يعني جمال الوالي ده لو رشح عماد الطيب لرئاسة المريخ فان إعلام المريخ وجمهوره سيدعمون عماد الطيب ..
* والله صحي ..
* جمال الوالي لو بقى هلالابي إعلام المريخ ح يبقى هلالي..
* عادي ممكن تلقى مزمل أبو القاسم كاتب مع الرشيد علي عمر في (أخيرة الأسياد) ..
* و(البريدو الوالي أنا بريدو) ..
* والمستفاد من القصة هو أن رئيس المريخ يجب أن يكون جمال الوالي أو (من يحبه جمال الوالي) ، بغض النظر عن الطريقة والوسيلة ..
* وأصلاً حكاية (إنتخابات وديمقراطية وجمعية عمومية ونصاب) دي حكايات المريخ ما بيعرفها ولا ح يعرفها ..
* ده نادي حكومي بيزعل لما يعمل إنتخابات ..
* المهم ..
* نادي الشعب اليوم يلاعب الأمل في عطبرة ..
* وعطبرة والهلال يشبهان بعض في كل التفاصيل.. (في المواقف والنضال والديمقراطية ونبذ التعيين) ..
* ولذلك ستكون المباراة بنكهة خاصة وروح خاصة جداً..
* يهمنا أن نأتي من عطبرة بالنقاط كاملة في إستهلالية موسم (2018)..
* لم نفهم قرار إبعاد مكسيم من رحلة عطبرة ولكن ثقتنا في جمعة كبيرة ..
* إبعاد مكسيم ما منطقي حتى ولو كان الغرض (إراحته) ..
* لو داير تريحو برضو يسافر ويقعد في الكنبة ..
* لو حصل أي شئ لجمعة على قدر الله سيكون حارس الهلال في هذه المواجهة يونس الطيب ..
* لا نشك في مقدرات جمعة ويونس ولكن اللعب في عطبرة يحتاج لحارس بقيمة وقامة مكسيم خصوصاً وأن هذه هي المواجهة الأولى للهلال في الدوري ..
* عموماً.. الهلال بمن حضر اليوم إن شاء الله ..
* التشكيلة المثالية والروح القتالية والهدف المبكر ستمكن الهلال من حصد النقاط..
* المهم ..
* بكري المدينة متوقف عن اللعب شهرين ونص بسبب الإصابة وجا راجع إتمرن أسبوع وقالوا دايرين يشركو في (مباراة الطيران) ..
* يعني المريخ واقف على لاعب واحد..
* طيران المريخ من التمهيدي سببو غياب بكري أو هكذا يقولون..
* قرار شداد بإيقاف بكري من مصلحة المريخ لأن بكري الذي غاب عن الملاعب شهرين ما كان سيفيد المدفور لأنو أصلاً بعيد عن الفورمة ..
* أنا أجزم .. لولا قدر الله وكان نزار حامد بيلعب في المريخ ناس المريخ ممكن يطلبوا منو يقطع العلاج ويجي يدوهو (حقنة مخدرة ويلعب) .
* عادي بيعملوا كده ..
* خمسة شهور نزار حامد في القاهرة يتعافى، لا في هلالابي قال ليهو تعال ولا في مدرب قال جيبو لي نزار..
* رغم إنو نزار من أهم اللاعبين في كشف الهلال وفي السودان..
* ولكن ده الهلال يا مولانا ..
* وداك المريخ الشهير ب(المدفور) والمشهور ب(الإصيفر) ..
* طيران من التمهيدي.. زي الزول البيركب المواصلات وبينزل المحطة الجاية ..
* والمحطة الجاية من المحطة الركب منها بتكون مسافة (دقيقة ونص) ..
* من المحطة بتشوف المحطة الجاية ومع ذلك في ناس (بطيروا) أقصد في ناس بركبوا المواصلات ..
* طيران المريخ من التمهيدي.. زي العصفورة الدخلت بباب الغرفة ومرقت بالشباك في نفس اللحظة ..
* حاجة تكسف والله ..
* وغايتو السنة دي بالذات يا متنا من الضحك ويا كمان الضحك كلتنا ..
* ونركب صافنات ونجيبة (عطبراوية) وأصلو الزول بيموت والذكرى تفضل حية ..
* و..و..
* ولو بتحبي (الشطة) ح أفتح مطعم شطة ..

انقر هنا لقراءة الخبر من مصدره.