* لا أعلم لماذا ربط الناس شراب (القهوة) بساعات النهار .. * يشرب الناس القهوة نهاراً جهاراً حتى إنك تحس أن (القهوة) من محرمات الليل .. * أغلب الناس يشربون القهوة نهاراً وخاصة الجنس اللطيف .. * وربما هذا بسبب أن (القعدات بالنهار) أجمل عند النساء في غياب (رجال البيت) .. * وربما أن ذلك بسبب أن القهوة (مُنبه) إذا تعاطيته ليلا جعلك تتأخر في النوم .. * وأظن وليس كل الظن إثم أن معظم عشاق (القهوة) تعلموا (شراب القهوة) أيام الإمتحانات في المدارس ثم الجامعات .. * كنا أيام الدراسة نشرب القهوة (دون كيف) ونقصد بها (السهر) من أجل (المذاكرة) .. * نهمل الدروس حتى إذا أقبلت الإمتحانات تجدنا (نساهر) بفعل فاعل .. * نحتسي القهوة (وسيلة) من أجل (غاية) إسمها (السهر) .. * وبما أن ذلك كذلك فنحن نرى أن حل مشكلة مهاجم المريخ خالد (النعسان) في (القهوة) .. * والله صحي .. * عدد من جماهير المريخ وإعلامه السالب طالبوا بشطب خالد (النعسان) لأنه سجل هدفاً عكسياً في مرمى فريقه (الفاتح أصلاً) .. * وأنا والله أرى أن خالد لا يستحق الشطب ولكن مشكلته تستحق العلاج .. * يستحق العلاج وعلاجو في (القهوة) .. * زول نعسان.. قبل ما تتحركوا للاستاد خلوهو يشرب كبايتين تلاتة .. * ح يصحصح .. * القهوة مُجربة .. * وأنا بقترح إنو (قهوة النعسان) يكون مسؤول منها أيمن عدار .. * طالما أيمن عدار قاعد ساكت وحتى في الشكوى بيشتكي غلط يبقي خلوهو يمسك ليكم (قهوة النعسان) .. * أعملوا ليهو وظيفة عديل ومرتب .. * مش في المريخ عندكم (مسؤول المعدات ومسؤول النجيل ومسؤول المكتب التنفيذي) ؟؟ * طيب نفس الفهم.. أعملوا أيمن عدار (مسؤول قهوة النعسان) .. * لكن الخوف إنو أيمن عدار بدل يعمل سكر في القهوة يقوم يعمل فيها ملح .. * زول بيشتكي غلط عادي ممكن (يكب) دواء (قُحة) في القهوة بدلا عن الدواء المعروف (الجنزبيل) .. * الحل في (القهوة) .. * يا تدوهو قهوة بعد المغرب ويا كمان تلعبوهو في المباريات التي تقام عصراً .. * كيف زول نعسان تلعبوهو بالليل ؟؟ * الكلام ده غلط والله .. * خلاص إنتو وقت مصرين تلعبو النعسان بالليل خلوا صلاح نمر يصحيهو كل ربع ساعة أثناء المباراة .. * المشكلة صلاح نمر ذاتو داير البيصحيهو .. * صلاح نمر صاحي وداير ليهو زول يصحيهو .. * نحمدالله على نعمة الهلال وعلى نعمة الأفراح وعلى نعمة كأسين في ظرف (17) يوم .. * كأس النخبة وكأس زايد الخير .. * ما في أجمل من إنك تختم الموسم بكأس وتفتح الموسم بكأس .. * ده شغل كبير ما بقدر عليهو إلا الكبير .. * وكبير البلد دي معروف .. * الكأسات بتعرف ناسها .. * كأسين في ظرف أسبوعين .. * والكأسين شلناهم من (مدفور البلد) .. * وصيف هنا ووصيف هناك .. * قابلناهم في قطر شلنا منهم كأس، قابلناهم في الامارات شلنا منهم كأس .. * يلا أرح نمشي السعودية والبحرين والكويت .. * ضرب المريخ برة البلد ليهو طعم مختلف .. * زي القهوة .. * القهوة في البيت وفي شارع النيل بتختلف .. * كمان ضرب المريخ في البيت بيختلف من ضربو في بيت الجيران .. * عليكم الله أرح السعودية .. * طيب نمشي نشارك في مئوية (حافظ الأسد) رأيكم شنو ؟ * أو شوفوا لينا المئوية بتاعت صدام حسين متين .. * الشغلانية دي جميلة وطعمها مختلف .. * شكلنا كده ح نركز على المئويات دي .. * تاني أي مئوية في العالم العربي نحن أساسيين فيها .. * بس أدونا خبر .. بنسوق المريخ ونمشي نشارك ، أصلا المريخ (صحبة راكب) .. * المريخ ما عندو رأي ، لو قلنا ليهم أرح نشارك ح يمشوا .. * أي حاجة فيها قروش المريخ بيمشي يشارك فيها حتى لو ما كان جاهز .. * بعد جمال الوالي حالتهم بقت تحنن .. * والله أنا كان أمنيتي إنو الهلال يشيل كأس زايد وال(150) ألف دولار ويكون الفريق الخاسر ما عندو جائزة .. * إتمنيت الحاجة دي من قلبي والله .. * وأي زول طبعاً حر في (أمنياتو) .. * أمنياتي وأنا حر فيها .. * ما في داعي المريخ خسران ويدوهو (100) ألف دولار .. * لشنو يعني ؟؟ * بالطريقة دي ح تخربو طبع المريخ المخروب من زمن جمال الوالي .. * جمال الوالي زمان المريخ يتغلب يقوم يحفزهم .. * هسه الأخوة الاماراتيين ديل لو في طريقة بعد ده يسحبوا ال(100) ألف دولار دي من ناس المريخ .. * الموضوع ما بيستاهل والله .. * ما خلاص كفاهم الميداليات الفضية دي .. * المهم .. * إنتو تسموهو (درع) ولا (طوبة) ما فارقة، البنعرفو إحنا (كأس جوي) شلناهو من (مدفور البلد) .. * إنتو إختاروا الإسم البريحكم وإحنا عارفنوا كأس جوي .. * طبعا بقول ليك: المريخ لعب كورة والحظ عاندو .. * الحظ ما بيعاند ليهو فريق خصمو خاصمين منو (6) نقاط وما قادر يشيل الكأس .. * الحظ ما بيعاند ليهو (مدفور) يحقق الإنتصارات ب(الدفرة) .. * الهلال عندما كانت لياقته البدنية عالية في الشوط الأول حاصر المريخ وسجل هدف وقدم كرة قدم ممتازة .. * وعندما إنهار الهلال بدنيا في الحصة الثانية عادل المريخ النتيجة .. * لياقتنا خذلتنا .. * والموضوع عادي نحن في أول الإعداد .. * لكن الحاجة الأنا عايزكم تعرفوها إنو نفسيا تاني المريخ صعب يفوز على الهلال .. * الحاجة دي بقت (عادات وتقاليد) .. * كل ما نقابلكم بنصرف ليكم (بركاوي) .. * ومن هسه بقول ليكم: النعسان ده لو حاول ينوم ليكم في البطولة العربية بتتعبوا والله .. * وتبكو بس.. عين قطرة وعين مس.. * ونركب صافنات ونجيبة (إماراتية) وأصلو الزول بيموت والذكرى تفضل حية .. * و..و.. * وما زال الليل طفلاً يحبو يا النعسان ..
