* في الحياة العامة تجد أن (برلوم الحب) يكثر من (القمصان المزركشة) .. * أي زول اتعلم الحب جديد بيحرص على مناديل الورق وموية الصحة والقمصان اللونها فاتح والأورنيش … * وأنا صراحة لا أعلم ما هي علاقة الحب والريد بموية الصحة؟ * كل زول جديد في الحب بشرب موية صحة كتير. * حتى لو ما شرب بتلقاهو شايل (قارورتو) وحايم . * والله صحي . * نظام الولد راقي وكده . * نظام إنو الولد ما بحب الموية الملوَّثة . * البتعلم الحب جديد مشكلتو مشكلة . * تلقاهو (بيكوي) البنطلون مرتين وبيعمل منديل في (لياقة القميص عشان العرق وكده). * البتعلم الحب فجأة بتعب وبتعب معاهو الناس . * والبتعلم السياسة كذلك . * ما كان للسودان أن يعيش كل هذا الفراغ العريض لولا أن المجلس العسكري (بتعلم في السياسة ياداب) . * برالمة في السياسة عشان كده تعبوا وتعبونا معاهم . * التوقيع السياسي منقوص ما لم يتم التوقيع الدستوري الذي كان مقرراً يوم أمس، وتم تأجيله . * القول الحق هو :(البلد هذه لا تستحمل مزيد من الدم والكضب والاستهبال) . * لا تبحثوا عن مكاسب وضمانات فهذا السودان لا يتحمل (المجابدة) . * لو زادت المجابدات سينقطع السودان خلف خلاف . * رغم أن بطولة الأمم الأفريقية التي جرت بمصر هي أكبر سوق للمحترفين الأفارقة إلا أن الهلال وبواسطة رئيسه (المستقيل والما مستقيل) الكاردينال قد استجلب محترفين من سوق تاني . * زي الزول البيشتري (السلطة والبامية) من سوق الملابس مع أن (سوق الملجة) قريب منو . * السوق الذي يستجلب منه الكاردينال الأجانب يشبه سوق يوسف كبر المعروف بسوق المواسير بمدينة الفاشر . * الكاردينال (المستقيل لكن ما مستقيل) عينو في بطولة الأمم وبيمشي يتعاقد مع لاعبين يلعبون في أندية على شاكلة بلعباس وأبو العباس . * الكاردينال يحتاج لعين حمراء من جمهور الهلال الذي قاد الثورة العظيمة من الشارع . * كفاية مواسير وسمسرة وعبط . * محترف عمرو (30) سنة جايبنو لشنو وعشان يعمل شنو؟ * فات جوفياني الطاعن في السن وجا الجزائري المطعون في العمر . * محترفون كبار في السن واتعلموا الكورة كبار . * محترفون زي داليا الياس . * بالمناسبة . * يتضاعف عندي الضحك كلما أقرأ تصريح أو أسمع حديث للشاعرة (الكبيرة) داليا الياس . * أضحك مرتين .. الأولى لأن داليا لا تملك ما يؤهلها للتصريح أو الظهور، وأما الثانية أن داليا تريد أن تشتهر وبس . * قلتها من قبل إن داليا تعلمت كتابة الشعر بعد ما (بقت كبيرة) ولذلك هي متعطشة للشهرة وتجتهد لتعويض سنوات ضاعت من عمرها . * الموهبة البتجي للزول بعد ما يكبر هي أشبه بالصلع الوراثي . * وبما أن (هذا هو هذا) فإن داليا الياس تقابض من أجل أن تكون . * ربما تكون داليا قد عرفت أن أقصر طريق للشهرة هو التصريحات السخيفة . * كثير من النسوان اشتهرن شهرة كبيرة بالإساءات وتجاوز الخطوط الحمراء . * (قِلة الحياء) من أسرع طرق الشهرة. * داليا صديقة الفنانين تحدثت عن العسل والحبوب وهي مسميات يجهلها حتى الرجال وحقيقة لا أعلم من أين لداليا بهذه الثقافة الكبيرة . * وقالت في ناس هبشهم طرف السوط . * طالما داليا تتحدث عن الرجال بشكل عام وطرف السوط فمؤكد أن لداليا ابن وزوج وخال وعم . * أنا أضحك لأن داليا تريد أن تصبح نضال الحاج (كسر رقبة كده). * نضال بقت نضال بالموهبة والشعر الجميل وليس بالتصريحات العبيطة. * نضال لم تفرض نفسها على الفنانين . * نضال صغيرة في السن ومع ذلك (تقيلة) . * نضال موهوبة حقيقة، وموهبة نضال ظهرت منذ أن كانت نضال في الأساس . * نضال ما بتلقاها في أي منتدى وأي ليلة ثقافية وأي حفلة . * دعوا داليا الياس لعلها تصبح نضال حسن الحاج يوما ما . * وغايتو جنس غايتو . * في كل مجال يوجد موهوم يظن أنه موهوب . * ولعل محمد هنيدي في فيلم (عندليب الدقي) قد جسَّد شخصية المواهيم بطريقة مذهلة . * عندنا في السودان كتير جداً من (عندليبات الدقي) . * عندليبات ب(العاء) ؟ * ونركب صافنات ونجيبه (فوراوية) وأصلو الزول بيموت والذكرى تفضل حية .. * و..و.. * انتظرتو لما ما جا رحت زرتو …. جنس خفة ورشاقة .
