يمكن من تقاليدنا العتيقة أن أي زول شفقان بكون عندو قميص أبيض ما بلبسو نحن في البلد دي بنعمل المشروع – ونعمل ليه (مشكلة) عشان نقفل المشروع ونرتاح منو الصادق المهدي بكلامه الكتير لمن كان في الحكومة بفوتنا المسلسل ولمن بقى في المعارضة بقى يفوتنا المسلسل والسهرة كمان يا بكري ما تتعب في الاعداد شديد – عشان الفيفا ح توقفك ..بتستعد لي شنو انت؟ * عندما كان صلاح ادريس (الملحن) رئيسا للهلال خفت ان يشترط صلاح ادريس على اي لاعب يسجله الهلال ان يكون عازف جيد للعود. * او اي آلة وترية اخرى. * ما مشكلة – صلاح ادريس متفاهم في الحتة دي. * وعندما اصبح اشرف الكاردينال (الشاعر) رئيسا للهلال خفت ان يضم الكاردينال للجهاز الفني للهلال (مطرب). * طبعا شعر الكاردينال نص – نص..عشان بكرة ما يقوم يطلع لينا (ديوان). * من حسنات جمال الوالي في المريخ انه لا بلحن ولا بكتب شعر. * والله انتوا مرتاحين يا مريخاب. * الوظيفة في السودان يوشك ان يكون من شروط قبولك فيها مع الشهادة الجامعية والخبرة احضار (لوح تلج) فقد لاحظت ان كل الذين قبلوا في وظائف حديثة في السنوات الاخيرة بقدموا (لوح التلج) قبل (الشهادة الجامعية). * تلجك قبل شهادتك. * عندنا زول في الحلة – زول عادي في حالو. * ما عندو قضية مع زول. * مشكلتو الوحيدة في الدنيا ان بسقط مشكلتو على البلد كلها. * يعني الزول دا في الصيف بتلقاه ...نازل من سوق وطالع في سوق. * ما بخلي ليه دلالة. * دلالات الجمعة بمشي ليها من يوم الخميس. * زول شفقان. * يمكن من تقاليدنا العتيقة ان اي زول شفقان بكون عندو قميص ابيض ما بلبسو. * بتقول ليه : ما تلبسو ليه؟. * بقول ليك : القميص الابيض ما بستحمل. * ثم يضيف ويقول ليك البلد دي ما بلد (قميص ابيض). * خلاص يا ود الناس انتظر لمن تمشي (فرنسا)..عشان تلبس قميصك الابيض هناك في فرنسا. * بلدنا دي خليها ...عاجبنا بي عدم امكانية ان تلبس فيها قميص ابيض. * هو يعني بقت على (القميص الابيض). * قميص ابيض شنو كمان؟. * صاحبنا كان بنزل من سوق لي سوق. * قالب الاسواق قلب. * تقول ليه يا زول مالك؟..عاوز شنو؟. * يقول ليك عاوز لي (مروحة). * والمروحة في الثقافة الفرنسية حاجة غير (الفرخة). * وكأن المروحة عندنا هنا (فرخة). * ما في داعي للخبطة. * هو شنو الما ملخبط؟. * اي حاجة ملخبطة. * بقت على المروحة. * زولكم بفتش ليه عن (مروحة) الصيف كلو. * الى ان يأتي الشتاء ما بلقى ليه (مروحة) بالمواصفات العاوزها هو. * زولنا بمشي السوق وبقول عاوز ليه مروحة ب (5) اجنحة. * صاحب المحل بقول ليه (5) اجنحة ليه؟ ...انت عاوز تطير بيها – الهلال دا سنة 87 وصل النهائي بجناح واحد. * خمسة لي شنو؟. * بي جعفر عبدالرازرق بس ...جناح واحد الهلال حلق في النهائي – تقول لي (5) اجنحة ...مروحة هي وإلا فندق؟. * المهم زولك دا بتلاقي قنعان في آخر الصيف تقول ليه يا زول مالك؟. * يقول ليك انت عارف البلد دي مشكلتها شنو؟. * تقول ليه مشكلتها شنو؟. * يقول ليك : (مروحة). * ويمشي يخليك على كدا. * قبيل قلت ليكم الزول دا بسقط اشكاليتو على البلد كلها. * البلد مالها ومال مروحتك؟. * ومرات بتلقى نفس الزول في مناسبة. * الناس عطشانة في المناسبة. * يلاقيك زولك دا ذاتو يقول ليك انت عارف البلد دي عاوزة شنو؟. * تقول ليه عاوزة شنو؟. * يقول ليك (لوح تلج). * تقول ليه لوح تلج يا مفتري – لو كانت المشكلة في (لوح تلج) البلد ما كانت اتقسمت. * تفتكر يعني المشاكل دي كلها ...والضرب والصراعات دي كلها في (لوح تلج). * لكن برضو الراجل عندو منطق. * هسع عليكم الله لو امريكا دي كسرتو ليها (تلج) مشاكل البلد دي ما كانت اتحلت. * بعدين انتوا اصلا قاعدين تكسروا تلج. * بدل ما تكسروا تلج في دولة ما بتستاهل ..كسروا تلج لي امريكا. * زولكم برضو مرات بكون سايق ولدو الصغير وماشي على السوق. * تقول ليه مالك يا زول سايق ولدك من الصباح كدا؟. * يقول ليك تصور في المدرسة قالوا ليهم اي طالب يجيب ليه (زمزمية) موية. * مالكم ومال الزمزمية انتوا؟. * ثم يلاقيك نفس الزول في آخر اليوم ويقول ليك انت عارف البلد دي مشكلتها شنو؟. * تقول ليه مشكلتها شنو؟. * يقول ليك : (زمزمية) الموية. * بقت يعني على الزمزمية. * ما قلت ليكم الزول دا بسقط اشكالياتو على البلد كلها. * ايام الهلال كان عندو مشكلة في الطرف الشمال. * ايام صلاح ادريس. * اي طرف شمال جابوه للهلال طلع ما عندو علاقة بالكورة. * لو فتحوا ليه (مطعم) في السوق الشعبي كان احسن. * الطرف الشمال عمل لينا ارق. * اي بطولة نخرج منها ..السبب الطرف الشمال. * اي مباراة نخسرها – السبب الطرف الشمال. * زولكم لاقاني يوم الجمعة طالع من الجامع. * افتكرتو ح يقول حاجة فيها فايدة. * ثبتنا ليك – قال لي انت عارف البلد دي مشكلتها وين؟. * قلت ليه وين؟. * قال لي في الطرف الشمال. * قلت ليه ابدا والله. * مشكلتها في (المالية). * والخارجية. * والداخلية. * يعني عاوزين تعملوها في (الطرف الشمال). * مرة مشينا لينا حفلة. * خلق ما ليها حد. * تعاين شرق وغرب ..ناس. * خلق مبالغ فيها. * الناس اتعشوا في امان الله. * وقت الموضوع وصل للحفلة ...والفنان طلع في المسرح. * فتشنا البلد دي فوق وتحت ما لقينا لينا (مايك). * قلبنا البلد دي كلها. * ما في (مايك). * زولكم جاني دافر ...قال لي انت عارف البلد دي مشكلتها في شنو؟. * قلت ليه اوعك تقول لي مشكلتها في (المايك). * هو عليك الله شن كتر بلا المايكات. * البلد كلها تتكلم. * هسع اضرب لي زول. * اضرب اي رقم عشوائي. * ح تلقى الرقم مشغول. * الناس بتتكلم. * البلد كلها بتتكلم. * الصادق المهدي لمن كان رئيس وزراء كان بتكلم صباح ومساء. * وقت المهدي اسقطت حكومته قلنا ح نرتاح من كلام الصادق. * لقينا ليك الصادق المهدي كلامو بقى اكتر من اول. * اخير لمن كان في الحكومة – كان بفوتنا المسلسل بس. * هسع الصادق المهدي في المعارضة بفوتنا المسلسل والسهرة كمان. * كلام بس. * وتقول لي عندنا ازمة في (المايكات). * شن رقد الله في البلد دي بلا المايكات. * نحن في البلد دي بنعمل المشروع – ونعمل ليه (مشكلة) عشان نقفل المشروع ونرتاح منو. * مشروع الجزيرة كان زي الحلاوة. * عملنا ليه (مشكلة) ووقفنا على كدا. * السكة حديد كانت زي الطلقة. * عملنا ليها مشكلة. * وخلينا الجزيرة ..وخلينا السكة الحديد ...ومسكنا في (المشاكل). * هسع الكاردينال بفتش للمعارضة فتيش. * والكاردنيال يا دوب في طور الاعداد يعني ما بقى للمعارضة. * ...... * ملحوظة : لكن افتكر البلد دي مشكلتها في (حلة الملاح). هوامش * الاهلي شندي هزم الاعلاميين خسمة. * وناس المريخ فرحانين عشان غلبوه تلاتة. * بكري المدينة طلع يصرح. * ويعلن عن جاهزيته. * وانه سوف يكون هداف الممتاز. * دا كلو عشان شنو؟. * عشان جاب ليه هدف في الاعلاميين. * يا بكري ما تتعب في الاعداد شديد – عشان الفيفا ح توقفك ..بتستعد لي شنو انت؟. * سيمبو سافر ام انه الى الان في فرع الرياضة المركزية. * قمة في 30 يناير إلا بالرديف. * عاوزين قمة بالرديف. * الكبار ديل خلوهم للمهمات الكبيرة. * نحن ما عندنا محترفين عشان يلعبوا لينا امام المريخ. * نلعب بالرديف بس. * عاوزين – عاوزين ...ما عاوزين شيلوا (جنسياتكم). * ............... * عاجل : اول اسبوع في الدوري الممتاز الاهلي شندي والمريخ في شندي ..ما تنسوا الكلام دا.
