* الظروف في كثير من الأحيان تجعل كل الخيارات أمامك هي (خيار واحد) .. * تنعدم كل الخيارات ويبقي أمامك خيار واحد يمثل كل الخيارات .. * والذي أمامه خيار واحد يجتهد أكثر لأن الفرصة واحدة .. * بتعرف إنو خياراتك هي (خيار واحد) .. * أما أن تكون أو لا تكون .. * وبما أن ذلك كذلك فإن الخيارات أمام الهلال عندما يواجه إنيمبا الأحد القادم هي مجرَّد خيار واحد .. * خيار التأهل ولا شيء خلافه .. * ومن أجل ذلك يجب أن نفعل كل شيء حتى (نصعد بس) .. * و(تصعد بس) شعار يحتاج لمقومات أولها الإصرار والتكاتف والعمل بقوة .. * والجمهور الذي أسقط النظام لن يغلبه إسقاط (11) لاعباً، يمثلون إنيمبا .. * الأوامر تخرج من المدرجات وتنفيذ الأوامر تحت أقدام وليد وبشة والثعلب .. * ويسقط بس .. * المهم .. * مع انتهاء فترة مقاطعة (اللحم) ارتفع سعر شوال البصل إلى (3) آلاف جنيه .. * البصل أغلى من التفاح اللبناني .. * يباع البصل الأربع حبات بعشرين جنيهاً .. * يعني دستة البصل بي (60) جنيهاً .. * أغلى من البرتقال .. * البصل أغلى من البصر .. * مقاطعة البصل واجبة .. * وبمناسبة مقاطعة البصل .. * أقترح للإخوة في نادي المريخ مقاطعة (المدربين) .. * المريخ ده لو هبط للدرجة التانية بهبط بسبب شكاوى المدربين .. * أي مدرب يذهب من المريخ بيشتكي المريخ بما فيهم المدربين من أبناء المريخ .. * وآخرهم إبراهومة .. * ورد في الأخبار أن المدرب (المقال) إبراهومة قد طالب المريخ بمليار جنيه .. * مليار دي شاملة (الطيران) الأفريقي و(الطيران) العربي .. * واضح إنو إبراهومة عندو طموح .. * المريخ لو عندو مليار دي ما كانت حالتو يا إبراهومة .. * مليار شنو البيدفعها ليك المريخ والفريق كلو متمرد؟ * غازيتو وولدو قربو يهبطو المريخ للدرجة الأدنى .. * قروش غارزيتو دفعها (التركي)، وقروش إبراهومة دي إلا يدفعها (الصيني) .. * شوفو ليكم واحد (صيني) يدفع ليكم مليار إبراهومة .. * بطريقتكم دي المريخ ده لقدام إلا تبيعو .. * مزاد علني .. * أو مزاد ما علني ما فارقت .. * قاطعوا البصل وقاطعوا المدربين .. * سلموا الجهاز الفني لصلاح نمر .. * خلوا نمر يكون لاعب ومدرب عشان يتم ليكم الناقصة .. * وغايتو جنس غايتو .. * قال الكاردينال إن المحترف السوبر لا يوافق باللعب في السوداني .. * طيب ليه؟ * قال عشان المحترفين دايرين ياخدوا راحتهم ونحن هنا ما عندنا غير القهوة في شارع النيل .. * هل يعلم الكاردينال أن السعودية قبل سنوات وفي عز تشددها الديني كانت قبلة للمحترفين الأجانب؟ * المحترفون في السعودية حتى شارع نيل ما لاقينو .. * كانوا شغالين الملعب الفندق، الفندق الملعب .. * وبعد ده مستوياتهم على أفضل ما يكون .. * أما إذا قلت إن الدوري السوداني غير جاذب فهذا وارد ولكن نقول إن هذا الدوري لعب فيه سادومبا وكلتشي وإيداهور ومكسيم ونيلسون وجمال سالم والحضري .. * الموضوع في النهاية قروش .. * ما قلنا ليك جيب ساماتا .. * ساماتا والأخطر منو خليهم، جيب محترفين زي الناس وبأسعار عالية عشان يحدثوا ليك الفارق.. * جيب محترفين في حدود قدوين وكلتشي وساسا .. * عفيناك من ساماتا .. * لأنو عرفنا إنو موضوع ساماتا كان مجرَّد (كذبة) .. * جيب محترفين زي الناس .. * ناس هارونا وبلعويدات ديل علي بالنعمة كأس السودان ما يجيبوا ليك .. * فشل الكاردينال في ملف فريق الكرة لن تبرره هذه التصريحات العرجاء .. * فريق الكرة يحتاج لإدارة محترفة تعرف كيف تصنع فريق كرة يهز الأرض .. * الكذب لن يصنع فريق كرة .. * وطق الحنك والاستهبال لن يصنع فريق كرة .. * لو لم تتغيَّر النظرة لن ينصلح الحال .. * الآن أمامنا مباراة إنيمبا وهي مباراة ذات اتجاه واحد يدخلها الفريق من أجل الفوز والتأهل .. * بعد نضرب إنيمبا ونتأهل إن شاء الله نتمنى إنك تضع يدك على لاعب أو اثنين من نجوم إنيمبا .. * إنيمبا ياهو قدامك اختار منو واحد أو اتنين .. * بدل السماسرة يغشوك كل سنة أحسن تختار من إنيمبا .. * اختار ولن تحتار .. * ونركب صافنات ونجيبة (مصرية) وأصلو الزول بيموت والذكرى تفضل حية .. * و..و..