المتابع لتسجيلات المريخ في هذه المرة ..سوف يلاحظ ان اي لاعب رصده المريخ وقصد التعاقد معه ..فشل في قيده واتجه الي (بديل) له...(سوف نفصل ذلك بالورقة والقلم). اصبروا لينا انتوا ما تضيقوا.
الموضوع دا ..ما بنقولوا نحن (الهلالاب)..المريخاب ذاتهم عارفين الحكاية دي ..وبتكلموا عنو لمن يكونوا براهم.
المغصة كاتلاهم.
خلونا نقول اولا ان تسجيلات المريخ هذا العام ..خالية من اي (نجم).
او بالاصح ما في لاعب سجله المريخ هذا العام واحدث (ضجة اعلامية) ...وعملوا ليه مؤتمرات وجوطة واصبح حديث الصحافة والشارع السوداني.
اديكم دليل ..في لاعب سجله المريخ هذا العام ..مزمل ابوالقاسم وضع صورتو في عموده.
ناس (مالك) ديل رائحين فيها ساكت ...زول شغال بيهم مافي.
لعلكم تتفقون معي في الضجة التى احدثها انتقال وارغو الي المريخ ..وكذلك تسجيل عصام الحضري في المريخ.
ديل عملوا ليهم عشرة مؤتمرات صحفية ..لمن نحن افتكرناهم (حركة مسلحة) بتفاوض في الحكومة.
وقبل اولئك كان علي النونو وكان عبدالكريم النفطي ..ثم جاء اخيرا قائد الهلال السابق هيثم مصطفى في التسجيلات الماضية ..وكان اثر (الضجة) واضح في الطرقات.
هذه المرة تسجيلات المريخ خالية من (الضجة)..ربما يكون هذا عامل من عوامل نجاحها لا ادري ...لكن في كل الاحوال فانها جاءت هادية ولم تخالف التوقعات ، وجاءت دون الاحلام.
يا ربي عشان جمال الوالي ...قاعد في الامارات ..وعبدالصمد هنا شغال التسجيلات ب (الشيكات).
زي تسجيلات ابوجريشة زمان ب (الاتوسات).
قالوا ليك جمال الوالي لمن يقفل تلفونو ..مجلس المريخ هنا في الخرطوم رأسو بضرب.
ما يعرفوا (يتصرفوا) كيف؟.
بتموا حوافز التسجيلات (طوب احمر).
اذكركم اني قلت ربما يكون هذا (الهدوء) الخالي من الضجة في تسجيلات المريخ من عوامل نجاحها ..وان كنت ارى ان المريخ يبحث فقط في تسجيلاته عن (الضجة) دون التقيد بالاثر الفني والمردود الذي يمكن ان يكون من اللاعب المسجل.
هم يقصدون في الاصل هذه الضجة ...من بعد اللاعب واثره في ستين...ينجح او لا ينجح ما مهم عندهم.
لذلك نقول ان تسجيلات المريخ هذا العام فقدت اهم مقوماتها وجاءت باردة مثل (البيض المسلوق) الذي يكون من غير طعم.
ما في اي (مفاجأة)..وتسجيلات المريخ كلها كانت (محلية) حتى المحترفين جابوهم من شندي وشارع العرضة.
يعني المريخاب السنة دي حق التذاكر ما عندهم ..عشان كدا ركبوا التحدي وجابوا باسيرو ومالك.
مالك وباسيرو ديل من الليلة اسمهم تسجيلات (موقف شندي).
من موقف شندي لكشوفات المريخ.
وعشان يطعموا الحكاية ...قاموا جابوا (تراوري) الذي صرف الهلال النظر عنه.
يمكن المحترف الوحيد الذي جاء بمطار الخرطوم هو المحترف الاثيوبي الذي وصفته صحافة المريخ ب (المعجزة).
معجزة في شنو؟.
والله معجزتكم دا ..إلا يكون معجزة في (الشعر)...او معجزة في (الرسم).
معجزة في الكورة دي ..ما شفناه ليه.
ما تغشوا الناس ساكت ...وتتموا تسجيلاتكم (كلام جرايد).
نخش على (الملاحق).
قلت ليكم (يعيدوا ليكم الكلام مية مرة)...قلت ليكم تسجيلات المريخ السنة دي زي (امتحانات البدائل).
اي لاعب رصده المريخ ...قام سجل واحد غيرو.
يعني سجل بديله.
موش في مثل بقول ليك عينك في الفيل ..وتطعن في ضلو..أها ناس المريخ ديل خلوا الفيل وسجلوا (الضل).
وقعوا لي (الضللة) ساكت.
تسجيلاتهم دي ما فيها (فيل)...الرخصة كاتلاها.
عشان اثبت ليكم الكلام دا ...المريخ السنة دي اتجه نحو اللاعب مطلق السراح ...وبحثوا عن الانتقال الحر لاللاعب.
حتى اللاعب الاثيوبي قالوا ليه خلّص نفسك براك من الاتحاد الليبي وتعال بنسجلك.