* مباراة الاهلي شندي امام جمعية كيجالي امس وخسارته رهان التأهل بعد اقصائه بواسطة الضربات الترجيحية ضاعف المسؤولية على الهلال وجعل مهمة الازرق في غاية الصعوبة. * الهلال بقى براهو. * يقاتل وحده. * (الكلام الفوق داك ما تشتغلوا بيه كتير ..عاوزين نفتح للجماعة ديل اضنينهم ساكت). * كمان ناس الهلال بتلفتوا. * كمان بلعبوا. * لكن احسن نعمل ليهم (قرصة) صغيرة كدا ...احسن نفتح ليهم عيونهم. * الايامات دي في موضة (خروج). * المريخ طلع ...(بعد معسكر شهر و12 مليار ومباراة مع بايرن ميونخ). * الاهلي عطبرة طلع. * الاهلي شندي طلع. * خروج ثلاثة اندية على التوالي من المنافسات الافريقية يجعلنا نقول أن الهلال يقاتل وحيدًا في ادغال افريقيا ومجاهلها. * الزول الكبير دائماً بتقع عليه (المسؤولية). * دائماً نحن بشيلوني سمعة البلد دي. * الجماعة يخربوا ..ونحن نصلح. * هم يخربوا ..ونحن نصلح. * ثلاث اندية طلعت ..ووفد التفاوض ذاتو طلع من اثيوبيا بدون ما يعمل أي حاجة. * قلت ليكم البلد كلها طلعت. * لا نريد أن نرهب الهلال وما عاوزين نذكره بالخروج الحزين لثلاثة اندية سودانية خرجت من المنافسات الافريقية على طريقة احتراق (الفراشات). * انتبهوا إلى الذين سبقوكم حتى لا نكون لهم لاحقون ..واعتبروا من تجاربهم ..وتحسبوا من المثل الذي يقول : (اخوك اذا حلقوا ليه بل رأسك). * (الكلام البقولوا ليكم دا ..ما تشتغلوا بيه ..عاوز اخوف ناس الهلال ساكت). * دا شغل بتاع (ارهاب) ساكت ..عشان يعملوا حسابهم. * ملعب مالي منو البيقيف قدام الهلال...ح نضربو والشمس حية. * كمان نحن بنلعب. * لكن برضو (التخويف) افضل. * يا ناس الهلال ..ناس المريخ بي معسكرهم (شهر في قطر)..والمباريات الاعدادية التى لعبوها امام بايرن ميونخ الالماني وزينت الروسي وريد بول النمساوي والوحدات الاردني. * ديل لعبوا لي مع اندية اوروبا الكبيرة كلها ...وطلعوا لينا امام كمبالا سيتي. * ناس المريخ (الشتر) ديل ...لعبوا امام بطل العالم للاندية والنادي المصنف أولاً في العالم بايرن ميونخ وخسروا امامه في قطر 0 / 2. * ناس شكروهم على الهزيمة دي. * طلعوهم لينا ابطال ...(قالوا لينا انتوا ما قلتوا ح يتغلبوا تسعة). * المريخ رجع السودان ولعب امام جمهوره وفي ارضه امام فريق يوغندي حق الفطور عندهم في مشكلة. * خسروا امام هذا الفريق اليوغندي المتواضع ..بنفس النتيجة التى خسروا بها امام بايرن ميونخ 0 / 2. * شفتوا الدرس دا. * اتعلمتوا حاجة من النظرية دي. * بالمناسبة في حاجة ساكت. * المريخ اتغلب من كمبالا سيتي بنفس النتيجة التى خسر بها امام بايرن ميونخ. * علماً ان كمبالا سيتي لعب معه المريخ وخسر في الخرطوم. * وكمبالا سيتي دا لا فيه روبن ..ولا فيه ريبيري. * فريق قاعد في (الصقيعة). * ومثلما خرج المريخ من التمهيدي دور ال (64) ..خرج الاهلي عطبرة من نفس المرحلة لكن في بطولة الكونفدرالية. * امس خرج الاهلي شندي امام جمعية كيجالي. * فريق جمعية كيجالي فريق متواضع ..لم يشكل أي خطورة على الاهلي شندي في مباراة الامس ..مع ذلك عجز الاهلي من التسجيل في شباكه إلا عند الدقيقة (92)..ليعادل نتيجة مباراة الذهاب. * كان يمكن ان يفوز الاهلي شندي بثلاثة اهداف على الاقل لو كان الاهلي شندي يمتلك (مهاجماً) قناصاً. * الاهلي امس لعب امام جمعية كيجالي وهو لا يملك في الهجوم غير (صرخات) الفاتح النقر. * مسؤولية خروج الاهلي شندي يتحملها كاملاً صلاح ادريس الذي جرد الفريق من (هجومه) واعار اسماعيل بابا إلى فريق المهدية في صفقة غير مفهومة إلى الان. * اذا تقبلنا اعارة اسماعيل بابا ..فإننا نسأل لماذا لم يكن البديل لإسماعيل بابا في نفس مستواه. * الفاتح النقر (افريقياً) لا يستطيع أن يتقدم ...لأن ماكينة الفاتح النقر مصممة على قياس (محلي). * افريقياً سوف يفشل الفاتح النقر وان لعب امام فريق متواضع مثل جمعية كيجالي. * هدف الاهلي شندي امس جاء عن طريق المدافع (سيلا)..وقد انتظرنا حتى الدقيقة (92) ليسجل الاهلي. * تقول قاعدين لينا في بانطون. * تقول منتظرين في عنبر الولادة ...والاهلي يسجل في الدقيقة (92)..رغم المساندة الجماهيرية الكبيرة التى وجدها الاهلي. * استاد شندي كان ممتليء حتى اخره ..وظل الجمهور يشجع طوال زمن المباراة. * لكن للاسف الشديد خرج جمهور الاهلي شندي بعد المباراة وهو مصدوم بسبب خروج الاهلي شندي الذي كان يستحق التأهل. * الفريق الذي لعب امام الاهلي شندي فريق متواضع ..لا يستحق حتى وصول دور ال(32) ناهيك التأهل منه. * جمعية كيجالي عجزت من الوصول لمرمى عبدالرحمن الدعيع إلّا عن طريق الضربات الترجيحية التى احسنوا تنفيذها ..وفشل في التصدي لها (الدعيع). * الناس كانت تتوقع ان ينجح عبدالرحمن الدعيع في التصدي لبعض الضربات وقيادة الاهلي شندي للتأهل طالما كان الاحتكام للضربات الترجيحية. * لكن عبدالرحمن الدعيع كان بعيدًا عن مستواه ..ولم يقدم ما يحلل (الضجة) التى احدثها في التسجيلات الاخيرة. * وأن كانت الضربات الترجيحية لا يمكن أن نحكم عبرها على حارس المرمى. * على العموم خروج الاهلي شندي جعل الهلال يقاتل وحده في ادغال افريقيا ..فهو المناط به رفع علم السودان..بعد أن سقطوا الذين كانوا يحملون اسم السودان تباعاً. * لقد خرج المريخ والاهلي عطبرة والاهلي شندي ..مثل (الشفع) وتركوا الباب فاتح. * لذلك نحذر الهلال ألف مرة ..ونرجو أن ينتبه. * في نهر النيل هناك مناطق معروفة في كل منطقة ..دائماً ما يمنع السباحة فيها. * في نهر النيل امكنة متى ما اتيت لكي تسبح فيها قالوا ليك المكانة دي احسن تخطاها. * احسن تبعد منها ...الحتة دي غريقة ...الاسبوع الفات غرق فيها (شافع). * الان نحن بنفس الطريقة ..نقول للهلال...اعمل حسابك ..الحتة دي خطيرة ...امس القريبة دي غرق فيها (ولد). * الغرق السنة دي طبعاً بدأه المريخ ...(العالمي). * عليك امان الله ..(العالمي) البقولوه دا من دور ال (64) طلع ليك. * غرق في شبر موية. * قلنا ما مشكلة ...المريخ اصلاً قاعد يطلع من الحتة دي. * يعني متين المريخ مشى لي قدام. * بعد المريخ ما فتح الطريق ...جاء الاهلي عطبرة ..وخرج من (التمهيدي) في الكونفدرالية (المسيخة) دي. * قلنا الاهلي عطبرة ..جديد على البطولات الافريقية. * الاهلي عطبرة شن خبرو. * اتعشمنا في الاهلي شندي. * لكن الاهلي شندي ايضاً صدمنا ...وخرج من دور ال (32). * وبعد ما الجماعة ديل كلهما عملوا (خروج)...بقينا خايفين على (الهلال). * خوفنا على الهلال ناتج من هذا الخروج المتتالي. * ما معقولة ..اليوم والتاني يخرج لينا نادي سوداني. * عادة فإن الاندية السودانية مستواها متقارب ...عادة هي قريبة من بعض. * عندما يكون هناك تقدم ..يكون التقدم جماعي. * وعندما يكون هناك خروج ..يكون الخروج جماعي. * لذلك يبقى الحذر..وعلى الهلال الاحتراس ..والانتباه ..وأن كنا نثق في أن الهلال قادر على كسر القاعدة ..وقادر على يخلق (استثناء) خاص به. * ولكن لكي يفعل ذلك ...عليه أن يضاعف من جهده ..وأن يعرف أن المسؤولية عليه اكبر. * مطلوب كذلك من جماهير الهلال التدافع نحو استاد الخرطوم ..ومساندة الهلال بقوة ..حتى لا يلحق الهلال بمن سبقوه في الخروج. * إذا لم نضاعف من جهدنا ومن مساندتنا ..ومن حبنا للهلال فإن (الخروج) من البطولة الافريقية سوف يكون واقعاً. * الاندية الافريقية التى تشارك في البطولة الافريقية الان ..مستواها كلها (ضعيف) بما في ذلك الاهلي المصري والزمالك. * ربما القوة فقط في الترجي. * ضعف الاندية في هذه البطولة هذا العام ..يعطي الهلال الضوء الاخضر للتقدم في البطولة الافريقية. * فقط علينا تجاوز محطة (الملعب) المالي. * مباراة الغد ..إذا تجاوزها الهلال سوف تجعل الهلال قريباً من دور الاربعة في البطولة الافريقية ..رغم من أن المباراة تلعب في دور ال(32). * مباراة الغد ..لن تصعد بالهلال إلى دور ال (16) فقط. * هي (فلكياً) سوف تصعد بنا إلى دور الاربعة. * كما أن صعودنا إلى دور ال (16) يعني أن الهلال خرج بعد ذلك لا قدر الله سوف يلعب في الكونفدرالية. * علماً أن (الكونفدرالية) دي نحن للاهلي شندي ما قاعدين ندورها. * ملحوظة : بكرة يوم جميل إن شاء الله. هوامش * مطلوب من جماهير الهلال أن تنشر اللون الازرق والابيض في الخرطوم. * بل في السودان كله. * اعلام الهلال يجب أن ترفرف منذ اليوم في العربات ..وفي كل بيوت الاهلة. * الفرحة القادمة إن شاء الله غدًا. * الهلال قادر أن يعوض اخفاقات الاندية السودانية. * غدًا بإذن الله ينتصر الهلال برباعية. * كمان نحن بنلعب. * في حضرة جمهور الهلال ..ما بنخاف على الهلال. * نتمنى مهند الطاهر من البداية. * ويا ريت وليد علاءالدين يلحق. * ولو شاهدنا وارغو في تشكيلة الهلال غدًا ..يبقى ما بتجينا أي عوجة. * الزمالك تأهل. * اخشى على الاهلي المصري من الخروج غدًا. * لا ادري لماذا اعطى الناس قيمة لتصريحات احمد شوبير. * شوبير هذا ..لا يفهم أي شيء في قوانين كرة القدم. * شوبير فقط يجيد (الثرثرة) ..والبلبلة. * الرجل لا يفقه شيء. * هي دولة اتقسمت ..والعالم كله كان داعم لإنفصالها ..تجوا تحاسبوا الهلال على هذا الأمر. * الزول دا ما قاعد يتغطى كويس. * يا شوبير ..ما تقل في العشا. * .... * عاجل : بكرة يوم آخر إن شاء الله.
