لا احسب ان مباراة الهلال اليوم امام القطن الكاميروني مباراة ضد (القطن) وحده. مباراة اليوم ..مباراة يلعب فيها الهلال ضد عدد من العوامل والظروف. ضد عدد من الاندية. لكن قبل كل هذه الاشياء ..الهلال يلعب مباراة اليوم من اجل الانتصار ..لأن الانتصار يفتح للهلال طريق التأهل ويحسم التأهل بصورة نهائية ..والانتصار كذلك يعطى اشارات واضحة وقوية لامكانية فوز الهلال بالبطولة الافريقية. لأن الانتصار اليوم اذا تم باذن الله ..سوف يعطى عنوان واضح لفوز الهلال بالبطولة الافريقية التي يخطب الهلال ودها منذ سنوات. نقرع بابها ..ونلعب في مجموعاتها اكثر من 5 سنوات ..دون ان نمل ..او نرجع عن هدفنا ومرادنا. واظن ان ذلك اعظم درس للهلال ولعشاقه ..ألا نفتر او نكل ..وان نظل نسعى ونسعى حتى وان لم نحقق هدفنا ...هذه العزيمة والارادة والرغبة التي نمتلكها هى اكبر حافز لنا ..وقد تكون اعظم من البطولة نفسها ..طالما لم يعرف (اليأس) طريقا الينا. سوف نصل لهدفنا ..ونبلغ مرادنا اليوم او غدا ...طالما هذا هو عملنا ..وذاك كتابنا نقدمه في كل بطولة افريقية بفخر واعزاز. برانا نحن. من غيرنا ...والكلام العارفنو داك. سيكون لنا ما نريد ..لن نرجع ..ولن نتراجع ..نستمتع نحن بهذه الارادة والقوة والسعى. ولعل ذلك من جمال كورة القدم ومن اصول المتعة في الرياضة بصورة عامة. الانتصار غدا يمنحنا (الثقة) الكافية ..ويعطى رسالة قوية لكل خصوم الهلال ..ان الهلال هو الاحق بهذه البطولة. نحن (طبعنا) بقى كعب. بقينا ما بنقبل غير (لانتصار). التعادل ذاتو عندنا فيه (رأي). وهذا اكبر دليل على قوة الهلال ...نحن وحدنا اليوم نتحدث عن (الانتصار). نعترض على (التعادل). ونعرف ان (الخسارة) لا قدر الله فرضية ثالثة في كرة القدم ..قد يكون لا مفر منها...رغم اننا نرفضها جملة وتفصيلا. برانا نحن ..على كيفنا ..نقعد ..ونطلع. نفكر. نكتب..ما نكتب. نحضر المباراة في (الجزيرة)...نحضرها في (الاذاعة). احرار ..ما في زول عاوز مننا حاجة. ما نحضرها كلو ..كلو. برضو على كيفنا. في زول عاوز مننا حاجة. نحاول نجيب (الجزيرة) بالاريل. ما نحاول. انتوا مالكم. نضع حجارة البطارية تحت (الزير). نشترى حجارة جديدة. على كيفنا. برانا بنلعب في المجموعات. برانا كدا. اخوانا ناس المريخ ديل زي مرة كدا وصلوا حتتنا دي طلعوا زي الزول الجابوا للجامعة (لوري بصل). زمان كدا. في ناس بجوا الخرطوم ب (لوري) البصل. يصلوا باللوري ..ويستملوا الخرطوم. ما بخلوا ليهم (حديقة). الواحد وقت يصل الخرطوم ريحة البصل فيهو ..اسبوع ما بتطلع. اها ناس المريخ ديل وصلوا مرحلة المجموعات ..(دايشين) زي زول الزول الجابو (قطر). اقصد زي الزول الجايبو (لوري). عشان كدا ريحة المريخاب في المجموعات كانت ...(بصل ..بصل). هسه البصل ذنبو شنو؟. على كيفنا نحن. وصلنا مرحلة ..بقينا كل سنة نصل ليها. نحن ما بنتراجع. نحن بنمشى لي قدام. الهلال صنف الافضل عربيا...والافضل افريقيا ...والله مفروض تاني ما نلعب ليكم في (الدوري الممتاز). مفروض تاني لو عندنا مباراة مع المريخ. المريخ يجيبوا عشان يلعب في (ملعب) بتاع تراب. ونحن نكون في ملعب منجل تاني. ما مفروض نتلم في ملعب واحد. فرق والله. اما ناس النيل الحصاحيصا والاتحاد مدنى ديل مفروض ما نلاقيهم إلا في (كأس السودان). بمناسبة المباراة دي. في واحد قال لي انا عندي احساس (خليفة) يجيب ليه (قون). قلت ليه خليفة ما بجيب قون ساكت إلا يشوف (الكأس) برة. خليفة طبعو كعب ..لو ما شاف (الكأس) برة ما بسجل. والكأس ذاتو لو ما كان في (الفلانتاين) ما بتشغل بيهو. خليفة صعب. لكن بالجد كدا ..الليلة الزول الممكن يسجل هو (ابراهيما توري). المباراة اليوم مباراة (توريه). حقتو براهو. انتوا مالكم بس. نقول المباراة حقت خليفة. حقت توريه. ما عندكم دخل. نحن احرار. في زول عاوز مننا حاجة. لكن في كل الاحوال ..نحن الليلة عشمنا كبير في الهلال. ما عندنا حاجة غير (العشم). بكل المعطيات المباراة صعبة على الهلال. فريق القطن ..اذا خسر المباراة اليوم (ان شاءالله) سوف يكون فريق القطن بكل تأريخه (خارج المنافسة). برة. القطن الفريق الذي كان مرشح للبطولة ..هو الان مهدد بالخروج. القطن الكاميروني بقوته وتاريخه ..ومستواه الجيد يمتلك (نقطة) واحدة. اتخيلوا المريخ بيلعب في مجموعتنا. المريخ لو كان معانا ...كان طلع (مطلوب). كان طلع بالسالب. احتمال (الطابق التاني) ذاتو كانوا يشيلوا منكم. القطن بي نقطة. القطن الكاميروني ..بي نقطة وحيدة. انتوا كان ح يكون حالكم كيف؟. عليه ..وبما ان فريق القطن بنقطة وحيدة ..سوف يدخل فريق القطن مباراة اليوم بشعار نكون او لا نكون. وان شاءالله ..(القطن) ما ح يكون. سوف يعمل فريق القطن بكل السبل من اجل كسب نقاط هذه المباراة ..حتى يحافظ على حظوظه في التأهل لدور الاربعة. انتصار القطن يعني لا قدر الله ان الفريق الكاميروني سوف يصل للنقطة الرابعة. وللقطن مباراة في غاية السهولة امام الرجاء المغربي في الكاميرون ...سوف يعمل فريق القطن ان يصل من خلالها للنقطة السابعة. لتبقي من بعد مجاهدات الفريق الكاميروني من اجل الفوز او التعادل مع انيمبا النيجيري الذي سوف يستقبل القطن في ارضه ووسط جمهوره. وفريق القطن يحسن اللعب خارج الارض ..وهو قادر على الخروج بنتيجة جيدة امام انيمبا مع التأكيد ان فريق القطن سوف ينتصر على الفريق المغربي في الكاميرون. لذلك مباراة اليوم بالنسبة لفريق القطن هى الفرصة الاخيرة ...وطوق النجاة الوحيد الذي يمكن لا قدر الله ان ينقل الفريق الكاميروني لدور الاربعة. اذن دوافع ا القطن الكاميروني كبيرة في مباراة اليوم.. يدعم ذلك ان القطن يلعب في ارضه ووسط جمهوره ..وربما ينحاز اليه حكام المباراة بشكل يؤثر على نتيجة المباراة. في الجانب الاخر ..نجد ان فريق الهلال يلعب هو الاخر بدوافع كبيرة. اول دوافع الهلال في مباراة اليوم تتمثل في روح البطولة التي يلعب بها الهلال. واضح ان الهلال يلعب في هذه البطولة بروح البطولة ..وهذه الروح واضحة في النتائج التي خرج بها الهلال في هذه البطولة. كفى ان الهلال يتصدر قائمة الاندية الافريقية والعربية. وكفى ان الهلال بتوفيق من عند الله لم يخسر الي الان في هذه المباراة ..واذا استطاع الهلال الانتصار اليوم او حتى التعادل فان الهلال لن يخسر لاحقا في هذه البطولة. لأن اصعب العقبات والمواجهات ..تتمثل في مباراة اليوم. اذا تجاوزنها اليوم ..وانتصرنا يمكن ان نقول ان الهلال قريبا جدا من البطولة. نعم مباراة اليوم تعطى بشكل واضح ملامح البطولة ..وشكل الكأس. ويمكننا ان نقيّم اداء الهلال وقدرته على الفوز بالبطولة من خلال مباراة اليوم. الهلال لا يكذب ..ونحن لا نتجمل ..سوف نعرف ان كان الهلال قادرا على الفوز ام لا؟. دافع اخر ربما يكون في صالح الهلال ..ويتمثل ذلك الدافع في ان انتصار الهلال اليوم يجعله اول المتأهلين لدور الاربعة بالنسبة لفرق المجموعتين. واحسب ان في الهلال لاعبين اصحاب خبرة عريضة ..وموهبة كبيرة ..وهم باذن الله قادرين على الانتصار. نحن في هذا اليوم ..وهذا الشهر الكريم لا نملك اكثر من (العشم) وحسن الظن في الهلال. نسأل الله ان يوفق الهلال اليوم ..وان يخرج من اصعب مواجهاته الافريقية في هذه البطولة بانتصار. حتى نتحدث بثقة اكبر عن (البطولة). وعلى كيفنا من بعد ..نقعد ..نطلع ..نتكلم ..نعمل أي شيء. ملحوظة : قولوا يا رب. هوامش يمكن ان تكون مباراة اليوم مباراة (ابراهيما توريه). الحسم اليوم ان شاءالله في اقدام (توريه). الصيام سوف يؤثر على الهلال. لكن اعقتد ان بركات الشهر الكريم سوف تكفل الهلال اليوم. سنفقد (اتوبونج). وسوف نفقد (كاريكا). ونسأل الله ان يكون العوض افضل. مهند الطاهر لو لعب بي مزاج. ناس القطن ما بفهموا أي حاجة. تحكيم البطولة الي الان جيد. الي الان ما في أي مشكلة. ملعب فريق القطن جيد ...وهذا شيء في مصلحة الهلال. ميشو لو طلع من (الشوط الاول). الشوط التاني ما بتجيه أي مشكلة. تنظير ميشو دايما بكون في (الشوط الاول). من حسن حظ الهلال ...ان اسامة التعاون واتير توماس سوف يشاركان. والتعاون واتير اصحاب قوة دفاعية ..ولهم قدرة كبيرة في المهام التكتيكية. ما نحذر منه هو الوقوع في (مخالفات) امام الصندوق. جمعة الحيطة بتغطي ...والكور العالية بتشكل عليه خطورة كبيرة. لذلك احذروا (المخالفات) امام الصندوق. هيثم مصطفى حفظه الله ورعاه كان اكثر من جيد في مباراة الهلال والاتحاد. وعندما يكون هيثم مصطفى جيدا ...يكون الهلال كله جيد. مزاج البرنس ..من مزاج الهلال. امير الربيع ..وجوده في التشكيلة اليوم مهم. علاءالدين يوسف بعيدا عن مستواه هذه الايام. لكن فييرا سوف يعود اليوم. مباراة الهلال القادمة امام انيمبا سوف تكون مباراة ان شاءالله من اجل الوصول للنقطة ال (13). تعادل الرجاء وانيمبا ..خدم الهلال من جهة. واضره من جهة. ان شاءالله (التعادل) اول امس يكون فعلا في مصلحة الهلال. وهذا الشيء سوف يتحدد اليوم. نتيجة مباراة اليوم ..سوف تحدد ايجابية نتيجة مباراة الرجاء والقطن ان شاءالله. الدعوات اليوم بانتصار الهلال تنفع الازرق وتجعله يعود من هناك بالنقاط الثلاثة. نسأل الله التوفيق لي (سيد البلد). وفي كل الاحوال ..ما في عوجة. نحن الان في النقطة السابعة. وهذه نقاط لا تحلم بيها معظم الفرق. معظم الاندية في البطولة الافريقية بعيدة عن هذا الرقم. والتوفيق من عند الله. وان شاءالله الهلال منتصر. وقولوا يا رب. عاجل : خلوا بالكم من (توريه).
