الفرق بين اعلام الهلال واعلام المريخ ...ان الاخير فعلا (سالب). اعلام الهلال أي لاعب في المريخ (بتلحو) اقنعوا منو؟...ما بتقوم ليهو قائمة. والله اعلام المريخ دا لو مشى (الدهب) احسن ليهم. كلموهم يمشوا يطلعوا (الدهب)...افضل ليهم من (البرونزية) الجابهو من (سيكافا) دي. عندنا جارنا مشى الدهب...غاب 21 يوم ..جاب ليهو كيلو ونص دهب. انتوا يا المريخاب غبتوا في سكافا شهر ...ورجعتوا بي (برونزية). نرجع ونقول أي لاعب يتلحو اعلام الهلال ..ما بنفع. اقنعوا منو؟. هسه لو قبلنا ليكم على (باسكال) بنقلبوا ليكم (طارق مختار). وارغو دا جابو هداف بطولة الاندية الافريقية ب (13) هدفا. وارغو جاء المريخ موسم كامل ما سجل. لمن عملوا ليهو مباراة مخصوصة مع (الشجرة) عشان يجيب ليهو هدف. تذكروا زمان. كان في انتخابات ..بقولوا فيها ادي صوتك للشجرة. على الاساس دا ناس المريخ لعبوا مع (الشجرة) ...عشان أي زول بعطي صوته للشجرة...يقوم وارغو يستغل الحتة دي يقوم يجيب ليهو (قون). وارغو جاب ليهو قون في (الشجرة) ونام على كدا. المريخاب قام كرموا لي هدف (وارغو) دا. لكن وارغو بعد الهدف دا برضو ما قامت ليهو قايمة. عارفين ليه؟. عشان اعلام الهلال (اتلح) وارغو. وارغو ما عرف يعمل شنو؟. اللاعب البتلحو اعلام الهلال تاني ما بنفع. لدرجة ان اللاعب صدر عليه عقوبة بالجلد. الجلد دا يكون قررو خالد عزالدين. غايتو انا شاكي في حسن عبدالرحيم. ناس المريخ قنعوا من اللاعب رغم انهم دفعوا في اللاعب قرابة ال 5 مليون دولار. 5 مليون دولار عشان يجيب ليهو قون في (الشجرة). قاموا قالوا احسن حاجة نحن نهربوا هو والباشا الي (ليبيا). هسه الباشا ذنبو شنو؟. الباشا عشان يرفق وارغو في ليبيا. المهم المريخ اللاعب الجابوه ب (5) مليون دولار اعاروه الي ليبيا ب (50) الف دولار. هسه (وارغو) رجع. لكن (وارغو) الشايفنو دا ...(سطر) ما بستحقو. ولا كلمة. براهو منتهى. وارغو دا ما عندو أي فرق من (هنو). غير شعرو كتر ما عمل حاجة جديد. دي بتذكرني بي (مغترب). مشي السعودية واغترب هناك ...7 سنوات زولكم قاطع في السعودية. الناس المرقو معاهو كلهم عملوا (عمارات) وعربات. اسوأ واحد فيهم رجع عرس تاني. زولكم السافر السعودية ..ما عمل أي حاجة. 7 سنوات ..(لا خبر لا جية). المهم بعد 7 سنوات زولكم رجع. زولكم ذاتو ...ما عندو أي جديد...لا عمارة ..لا عربية ..لا عرس. ما عمل أي حاجة. راجع بي جلابيتو القديمة ديك ...الكان بلبسها قبل ما يسافر. في (جلابيات) كدا بتجيب نفسيات للزول. في واحد شافو واقف تحت العمود بي جلابيتو ذاتها ...قال ليهو والله يا ابوالسعود ما فيك أي حاجة اتغيرت ...غير (جلاحتك) بقت كبيرة. قال ليهو : انت قايل الجلحات دي بتكبر ساكت. دي خبرة دي. خبرة في شنو يا ابو السعود. خبرة في تصليح الفول. هسه (وارغو) دا ما فيهو حاجة جديدة ..غير شعرو بقي كتير. لكن وارغو يا هو وارغو. لسه بعاين في كرعينو. وارغو نفسيات. ولسه عامل فيها زول خارق. هو طولو متر وربع. المهم يا جماعة وارغو اتلحو اعلام الهلال انتهى منو؟. اتحدث ليكم عن نموذج تاني. النماذج كتيرة. طارق مختار. طارق مختار دا وقت مشي المريخ بعد ان شطبو الهلال كان عامل فيها ابوعرام. زول صعب. اعلام الهلال ادهو (سطر). اليوم التاني شطبو ليك (طارق مختار). طارق مختار دا كلو ما اتذكر (ترتحتو) بشغل (المروحة). هسه (المروحة) ذنبها شنو؟. طمبل ..بتذكروا الاسم دا. طمبل دا هسه وصل لمرحلة انو برجعوا من (المعسكر). بشيلوا من (كشف) المعسكر. نخش ليكم على نموذج اخر من اللاعبين الذين اتلحهم اعلام الهلال. عصام الحضري. عصام الحضري دا مسكين من نزل اعلام الهلال اتلحوا. ناس يقولوا عمرو 40 سنة. وناس يقولوا عمرو 43 سنة. وناس قالوا 47 سنة. وناس وصلوه الخمسين. التورتة ما ريحوه فيها. كيف ابوجريشة يجيب ليهو (تورتة). الحضري دا اعلام الهلال من (متالحتو) للحضري ...الحضري المسكين بقي كل مباراة يسجلو فيهو (هدف عكسي). من شغل اعلام الهلال ...ناس السعودي والباشا ونجم الدين ومصعب عمر قلبو عليهو. عندما اشتغل اعلام الهلال عصام الحضري ...كان تركيز اعلام الهلال على سلوك الحضري. وقد اثبت الحضري سوء سلوكه ...ولا خلاف على ذلك. لكن الجديد في الحضري ان مستواه الفني تدنى ...وتراجع كثيرا ...لدرجة ان الحضري في 3 مباريات في سيكافا استقبلت شباكه 5 اهداف. الشيء الاخر الذي يثبت تراجع مستوى الحضري هو فشل (احسن حارس في افريقيا) في الضربات الترجيحية. فشل الحضري في الضربات الترجيحية في دور ال 32. وخرج المريخ من دور ال (32). في سيكافا خرج المريخ ايضا بعد ان فشل في الضربات الترجيحية...وجاء المريخ في المركز الثالث واحرز الميدلية البرونزية. اذن فشل الحضري ليس في عدم انضابطه فقط وسلوكه ...بل في الناحية الفنية ايضا. الحضري هرب بعد 5 شهور مع المريخ وبعد ان كلف خزينة المريخ (الدولة) 1200000 دولار. 1200000 دولار ...راحت في 5 شهور. هذه نماذج من بعض اللاعبين الذين (قصدهم) اعلام الهلال وكان هذا الاعلام في (تحدي) مع الاعلام المريخ ...لأن معطيات اعلام الهلال كانت تؤكد فشلهم ..بينما كان رهان اعلام المريخ على نجاحهم. وقد ثبت ان أي لاعب راهن اعلام الهلال على فشله في المريخ جاء وفشل اللاعب حتي لو جاء اللاعب للمريخ وهو يمتلك لمقومات النجاح. تعالوا شوفوا الجانب الاخر. أي لاعب في الهلال استهدفه اعلام المريخ كان ذلك الاستهداف سببا في نجاح اللاعب ودافعا لنجاحه. يمكن ان نثبت ذلك منذ اللاعب الراحل والي الدين محمد عبدالله الذي كان اول لاعب يستهدف من قبل الاعلام السالب فيحقق الاعب بعد ذلك نجاحا منقطع النظير اذ يعتبر والي الدين افضل ما انجبت الملاعب السودانية. من بعد تواصلات الاستهدافات ...لكن كلها كانت دافعا للاعبين للنجاح وللتقدم. أي لاعب مسكو فيهو ...نجح. واعتقد انا سبب فشل (امولادي) مع الهلال ...عدم استهداف اعلام المريخ له. طبعا سلسلة استهدافات الاعلام السالب للاعبي الهلال طويلة ...لكن نتوقف ووقوف خاص عند (سادومبا). سادومبا دا منذ ان جاء للهلال ...هم قلبهم اباهو. عرفوا ان ناس (الباشا) ديل ما بثبتوا قدام الزول دا. قاموا قالوا احسن حاجة نحن نعملها ...نقوم نخترع لينا حاجة. نشوف لينا أي حاجة توقف لينا الزول. الزول ابوصلعة دا ما بثبت. دا ناس (سفاري) ما بقدروا عليهو. قاموا قالوا نحن نعمل شنو؟. نتصرف كيف في (السخانة) دي. في واحد قال ليهم (سادومبا) دا ما في حاجة بثبتو غير (البطيخ). يا زول البطيخ ذنبو شنو؟. البطيخ هسه ذنبو شنو؟. في واحد مفتح ..قال ليهم : البطيخ هسه خلوا ...نحن احسن حاجة نمشي لينا لي (انطون) خطير. انطون يكون عارف مستوى بلة جابر ...وعارف ظروف (موسى الزومة). المريخاب مشوا للانطون. الموضوع دا كلمتكم عنو قبل كدا. الانطون دخلوا عليهو كدا ...قام صنقر ...قال ليهم مالكم داخلين علي كدا زي (التكاسي) وقت يصل بص سفري. مالكم يا جماعة ..خير الحاصل شنو؟. قالوا ليهو : سادومبا. قال ليهم : سادومبا مالو ..اوعكم تقولوا لي ثبتوا لينا ..الزول دا صعب ..عشان يقيف عاوز ليهو شغل كتير. المريخاب قالوا ليهو : شوف لينا أي حاجة ...ان شاءالله تقول لينا كسروا (الطابق التاني) وابنوه تاني. هسه الطابق التاني ذنبو شنو؟. الانطون ..دخل ومرق...قال للمريخاب ادوني اسبوع...الموضوع دا ما ساهل. الموضوع دا صعب. ناس موسى الزومة وبلة جابر ديل ما بقدروا على الزول دا. المهم المريخاب مشوا وجوا للانطون بعد اسبوع. الانطون قال للمريخاب ..سادومبا دا ما عندو حل ...غير حاجة واحدة. ما عندكم طريقة غير تعملوا الحاجة القلتها ليكم دي. قالوا ليهو : شنو ...بس ما تقول لينا بلة جابر بمسكو. الانطون قال ليهم هو لو بلة جابر بمسكو ...جمال الوالي كان جاب (الحضري). ما قلت ليكم... الانطون دا اسمو (كرفتة). كرفتة قال ليهو : قولوا الايميل اتمسح. ايميل شنو يا زول. انتوا مالكم ..بس امسكوا في الموضوع دا ...قولوا الايميل اتمسح ..وخلوا لي الباقي. ما في حاجة بتمقرقكم غير (الايميل). اها المريخاب 3 شهور ..ماسكين لينا في الموضوع الميت دا. الايميل. الايميل اتمسح. لمن نحن صدقنا ...وقلنا الايميل دا المسحو منو؟. تمسحوا ساي يا ناس الهلال. سادومبا ..سمع الحكاية دي ..قالوا ليهو انت يا سادومبا ايميلك اتمسح. سادومبا ما رضى ..قال كيف يعني ايميلي يتمسح ..انا عندي كرامة ..ما بقبل بي حاجة زي دي ...كل شيء ولا مسح الايميل. إلا الايميل يا مزمل. الزيمبابيون ديل ممكن يقبلوا بي أي حاجة ...إلا مسح الايميل. الزيمبابوي ممكن تقول ليهو العن ابوك ...لكن ما تقول ليهو ايميلك ممسوح. دي حاجة ما بجاملوا فيها. عندهم عيب عديل. عشان كدا سادومبا دا غضب غضب شديد من الموضوع دا. سادومبا من قالوا ليهو (ايميلك ممسوح) ..سادومبا طوالي قال ليهم جيبوا لي فايل اكرم الهادي سليم. قالوا ليهو يا ود الناس الزول دا عندو (حصوة)..ما بقدر على الشغل دا. سادومبا قال ليهم عندو حصوة ..عندو قطعة ارض ...الموضوع دا ما بخصنا ..جيبوا لي بس فايلو. جابوا ليهو (الفايل). قال ليهم اعملوا لي ترسيم للقلب. يا زول القلب ذنبو شنو؟. سادومبا قال ليهم ما تسألوني ..خلوني اشوف شغلي ...موش انتوا قلتوا ايميلي اتمسح. جابوا ليهو ترسيم القلب. قال ليهم اعملوا لي صورة للرأس. جبنا ليهو الصورة. قال طيب وينو الترسيب. عملنا ليهو الترسيب. قال اعملوا ليهو موجات الصوتية. يا ود الناس دي (حصوة)..وإلا كشك ناصية. هسه الكشك الناصية ذنبو شنو؟. سادومبا مسك ليك الحاجات دي ودخل ليك مباراة كأس السودان. سادومبا دا عمل ليك عمايل في اكرم. شفتوا استاد المريخ ..موش في المرمي الجنوبي في حتة واطة ...ما فيها نجيلة. عارفين الاكل النجيلة دي منو؟. دا اكرم. طبعا انتوا فاكرين الاكلها مزمل. لا. دا اكرم. نحن (الحقيقة) بنقولها. سادومبا سجل ليهو هدفين في اكرم الهادي سليم ..بعدها طوالي تم شطب اكرم. شطبوا اكرم ..وخلوا مزمل. عشان تاني تقولوا (الايميل) اتمسح. قلنا ليكم سادومبا دا جنو وجن زول يقول ليهو ايميلك ممسوح. عندهم الموضوع دا عيب عديل كدا. كلو ولا الايميل الممسوح. اها بعد الموضوع دا ما انتهى ...والمريخاب لقوا حكاية (الايميل الاتمسح) دا ما شغال ...وما جاب حاجة ..قالوا يشموا لي (كرفتة). يمشوا لي (كرفتة) دا يشوف ليهم حاجة. ان شاءالله (حلبة). ان شاءالله يقول ليهم اغلوا (حرجل). أي حاجة توقف ليهم (السدمبة) دي. سادومبا دا غلبوا معاهو. كرفتة المرة دي قال ليهم ..موضوع سادومبا دا ما بتقدر. الموضوع دا صعب شديد. المريخاب قالوا لي (كرفتة) شوف لينا أي طريقة ...نحن ناس بلة جابر ديل قنعنا منهم. كرفتة قال ليهم ادوني اسبوع ..عشان اشوف ليكم حاجة كبيرة ...تلجن ليكم سادومبا. المريخاب قالوا ليهو يا كرفتة شوف لينا حاجة توقفو سادومبا دا (مدى الحياة). عاوزين لينا حاجة تخلصنا من سادومبا دا (مدى الحياة). ناس بلة جابر ديل ما في حاجة بتثبتهم إلا يوقفوا سادومبا دا (مدى الحياة). كرفتة قال ليهم مدى الحياة دي كتيرة. بصراحة مدى الحياة دي ما بقدر عليها ...انا يا دوب ممكن اوقفو ليكم شهر ..سنة ..سنتين ..لكن اوقفوا (مدى الحياة) دي حاجة ما بقدر عليها. ممكن امسح ليكم ايميلو. لكن اوقفو (مدى الحياة) دي صعبة. يا كرفتة شوف لينا أي طريقة ..توقف لينا سادومبا مدى الحياة. شوف ليك أي (شتلة) كدا توقفوا لينا. ان شاءالله (شتلة) ليمون. كرفتة ..قال ليهم طيب الموضوع دا عاوز ليهو شهر. الشغل دا اسبوع ما بجضم لي (الشتلة) دي. بعد شهر المريخاب رجعوا لي (كرفتة)..قالوا ليهو اها ان شاءالله تكون لقيت ليك حاجة توقف سادومبا (مدى الحياة). كرفتة قال ليهم لقيت لي حاجة ...سادومبا دي سنة 2009 كان مشارك مع منتخب بلاده...وكانت هناك (مراهنات) وتلاعب في نتائج المباريات...وممكن اضع ليكم (سادومبا) دا في القائمة المهددة بالايقاف (مدى الحياة). في واحد من المريخاب قال لي كرفتة ..لكن يا كرفتة الشيء دي بتوقف سادومبا (مدى الحياة). كرفتة قال ليهم انا كمان بلعب ...انا ما عندي حاجة ساكت ..انا أي اقل حاجة عندي (مدى الحياة). بعدين احب اطمنكم ..سادومبا دا كان مشارك ب (افراط). بس الله يفتح عليك يا (كرفتة). امسك لينا في (افراط) دي. افراط دي ذاتها جديدة ..ما سمعنا بيها قبل كدا في الايميل ...ولا سمعنا بيها في وكيل كلتشي ..ولا في المحامي الفرنسي. بي (افراط) دي خطيرة. لكن يا كرفتة ..تفتكر ب (افراط) دي بتوقف سادومبا (مدى الحياة)...الهلالاب ديل نحن فترنا منهم. ما عارفين نعمل ليهم شنو؟. وسادومبا دا ذاتو ما بتقابل...ولا بنقدر عليهو...وان بقى ما لقينا لينا حاجة توقفو (مدى الحياة) نحن ناس بلة جابر وموسي الزومة ما بثبتوا لينا. ولا بقعدوا لينا. الاعلام السالب شال الوصفة من (كرفتة) ودور ليك في (مدى الحياة). مدى الحياة ليه ؟...كاتل ليهو زول. عاوزين توقفوا مدى الحياة. هو حسني مبارك. هو زين العابدين بن علي. مدى الحياة يا مفترين. خلاص دا الفضل ليكم. عاوزين ترتاحو ..موش. عاوزين تتخلصوا من وجع الرأس دا نهائي. الهلالاب شفوت. طوالي شالوا كلام المريخاب ديل ..ومشوا لي سادومبا ..قالوا ليهو : انت يا سادومبا موقوف (مدى الحياة). سادومبا سمع كلمة (مدى الحياة) دي غضب غضب شديد. سادومبا قال الناس ديل عاوزين مني شنو؟. مرة ايميل اتمسح...ومرة (مدى الحياة). سادومبا قال ليهم : جيبوا لي فايل اكرم الهادي سليم. قلنا ليهو انت من زمن اكرم الهادي سليم....اكرم يا اخوي شطبوه. قال خلاص ما في مشكلة ...جيبوا لي فايل الحضري. قلنا ليهو انت من زمن الحضري ....الحضري هرب. سادومبا وضع ايدو في رأسو..وقال الحضري هرب بعد ما دفعوا ليهو (الغرامة). قلنا ليهو : والله بعد ما دفعوها ليهو (هرب). والتورتة. التورتة مالها يا سادومبا ...كمان انت عندك خبر بالتورتة. سادومبا قال لينا انا عارف أي حاجة. انا ما في حاجة بتفوت علي. سادومبا دخل وطلع ..وقال خلاص جيبوا لي فايل (كرفتة) دا ..عشان نحددها مع المريخاب ديل. جبنا ليهو فايل (كرفتة)...وسادومبا فتح ليك في (انيمبا). هدف على طريقة اغناني الحقيبة ...على الطريقة التقليدية: انت حكمة انت آية و لاّ انسان انت صاحي ولاّنايم ولاّ طرفك من طبعو نعسان انت راحي انت روحي انت انسان عيني يا صاحي وانت احسان انت نادي انت هادي انت ميسان انت ظافر انت ضافر اسود وفرسان انت شادن انت لادن انت فتّان انت ضامر انت سامر انت هتّان انت نادر انت ناضر انت بستان انت صافي انت نافي زور و بهتان يا حياتي يا مماتي هاك سطران الصبابة ومر عذابا و قلبي اقران انت ساهي انت لاهي انت بطران في دلالك في جلالك ياسامي وكران اما الهدف الثاني فكان على طريقة الاغنية الحديثة. باقي نحن أي حاجة عندنا بي نظام. ياحليلك والفؤاد ملكوه غيرك ربي يعدل ليك سبيلك كل مناي في الكون عديلك ونهاية الخير نصيبك ليه ... ضيعوك ودروك انت مابتعرف صليحك من عدوك استغلو الطيبة في قلبك وبي اسم العواطف خدعوك حتى من كلمة حنانم وودادم حرموك الله ياخد ليك حقوقك ويجازي الظلموك طبعا المقطع الاخير دا سادومبا قاصد بيهو (جمال الوالي). بالمناسبة دي. يا جمال والله نحن ما رضيناها ليك..شفناك في (الملاعب اليوم) في دريم حالتك تحزن الحجر. تبكي عديل كدا. اول مرة اشوف جمال الوالي (محبط) ومصدوم كدا. جمال الوالي دا نحن كأس الممتاز شلناهو منو 7 مرات في 8 مواسم ..ما شفناهو في الحالة دي. غايتو العملها فيكم (الحضري) سواق شال الرخصة ليهو 3 ايام ..ما عملها. (ارجع تعال عود لي ..رجع حناك لي). وين يا فردة ...الحضري تاني ما برجع. موش ح اتنازل منك ابدا ..ابدا مهما يكون. تتنازلوا ما تتنازلوا ...الحضري ما شغال بيكم. يا جمال الوالي اقول ليك حاجة تتخارج بيها من الموقف البايخ دا. نظم (سيكافا). الدولة بتدعمك ..ما بتقصر معاك. ما عندكم حل غير (سيكافا). ملحوظة : وفي سيكافا ما عندكم غير (برونزية). هوامش سلة الهلال فازت على سلة المريخ. مبروك يا هاشم ملاح. الهلال في كل الالعاب مية ..المية. محمد كمال قالوا (اتصاب). تكون دي حركات ساكت ...محمد كمال دا يكون عاوز ليهو (تورتة). محمد كمال دا بكون في زول كلمو عن حرقة اسماعيل باشا. عشان كدا محمد كمال قال احسن اتخارج. يا البدري ..خليك عارف..ديل حرقوا اسماعيل باشا. عارف حرقوا اسماعيل باشا ليه؟. يا الباشا اعمل حسابك. اسمك دا بعمل (حساسية) لي ناس شندي. من تتوقع ان يحرس مرمى المريخ اليوم. سعيد السعودي وإلا مصعب عمر. مجاهد لو مع البعثة ممكن يقيف. مجاهد ما عندو مشكلة. والاتحاد العام ممكن يراعي ظروف المريخ ..ويسمح للمريخاب باشراك مجاهد. بعدين مفروض مجاهد يحرس مرمى المريخ اليوم ..عشان مجاهد هو (الفرط) في جواز سفر الحضري. البعمل فيهو الحضري دا ..كلو من (تورتة) ابوجريشة. خربتوا طبعو بالتورتة. بعدين الموضوع بقي ليكم حار. ناس الاهلي شندي ..للمرة الالف نقول ليكم بين الشوطين عندهم (جلد). مطرة نيجيريا دي لو جات في شندي ...المريخ بغرق عديل. جردل موية ممكن يغرق المريخ. الاهلي شندي ان شاءالله الليلة يلحق خسارة تاريخية بالمريخ. تاني ح ترجعوا تهاجموا الحضري. نحن انيمبا لعبنا ضد بي (جمعة). هيع. والله صعبين يا ناس الهلال. مع سادومبا دا ما عندكم أي مشكلة. عمر بخيت لو وقف حارس ما بتجيكم عوجة. عندكم هجوم قاطع ..لو سجلوا فيكم عشرة ..بسجل عشرين. انتوا الهلال امس كان لابس ياتو لون. في البداية غايتو الهلال كان لابس ابيض. لكن بعد ربع ساعة من المباراة ..خليفة دا زي الكان لابس (بني). عمر بخيت دا كان لابس (اسود) عديل. انا في البداية كنت فاكرو (الحكم). جنس طين. الطين دا لو لعب فيه المريخ ...كان دفاع المريخ سجل 5 اهداف عكسية ...مرة واحدة. التجربة كانت كبيرة على جمعة ...لكن جمعة نجح بدرجة امتياز. خليفة الطلعة الوحيدة التي طلعها اثناء المباراة جعلت سادومبا يسجل الهدف الثاني. لو اطراف الهلال بتصل مرمي الخصم ..يبقي تاني ما عندنا أي مشكلة. ميشو بدأ بتشكيلة (مخيفة) ...لكن في النهاية نجح (ميشو). يوسف محمد واتوقووون افضل من يلعب في (الطين). مع ذلك ميشو لم يشركهما. كنت اتمني مشاركة امير الربيع حتي لا يفقد حساسية المباراة. ميشو سوف يحتاج لامير الربيع في المباريات الافريقية القادمة ..وكان يفترض ات يشركه حتي لو كان ذلك في اخر اجزاء المباراة. كان يمكن ان يشارك امير الربيع بدلا عن مهند الطاهر الذي دخل في وقت الفريق يحتاج فيه للدفاع. اعتقد ان فريق الرجاء ...اضعف فرق مجموعة الهلال. فريق انيمبا مستواه كان افضل مما اتوقع. لا القطن ولا الرجاء يستطيع ان يأتي بنقطة من نيجيريا. انيمبا مع الظروف التي تلعب معه ..صعب جدا ان يخرج أي فريق بنتيجة جيدة امام انيمبا في نيجيريا. توريه هذب اداء الهلال بعد دخوله امس في الشوط الثاني. مطر أبا دي الظاهر عليها (صناعية). تلك المطر جعلت الملعب غير صالح لاداء المباراة. حقيقة عندما شاهدت ارضية الملعب شفقت على لاعبي الهلال. الحمدلله في ظل هذه الارضية لم يصب لاعبا من الهلال. عودة مساوي والمعز اصبحت امر في غاية الاهمية. ومشاركة الربيع وتوريه واتوقووون امر في غاية الضرورية. يجب ان يعرف ميشو ان يستفيد من امكانيات لاعبيه. هناك امكانيات مجمدة. مباراة الامس في اعتقادي الخاص كانت مباراة اسامة التعاون. العكسيات دائما تشكل خطر على الهلال. استعدادات الهلال لمباراة الرجاء يجب ان تكون اكثر جدية. مباراة الرجاء لا تحتمل أي خيار غير الجدية والانتصار باهداف كثيرة. حكم المباراة لم يظلم الهلال. لكن الارضية ظلمت الهلال كثيرا. كل الاندية التي تشارك في بطولة الاندية الافريقية هذا العام دون مستوى الهلال. الهلال فقط يحتاج لمرجعات في خط الدفاع. لو ارتفع خط دفاع الهلال لمستوى الخطوط الاخرى في الهلال سوف يحقق الهلال البطولة. الهلال صعب يخسر تاني. الهلال لن يخسر في مجموعته. هل تعلم ان الهلال الي الان لم يخسر في البطولة الافريقية. رغم انه لعب امام فرق كبيرة. الافريقي والقطن. والهلال لن يخسر مباراة في هذه البطولة ان شاءالله. مباراة الاهلي والوداد بدون جمهور ..زي البطيخة قبل الغدا. عاجل : شندي الايامات دي قالوا فيها (سحاحير).
