قد تعترضوا وتقولوا لي هسه دي حكمة. قلت ليكم زمان كان عندنا طالب ..بذيعوا اسمو في طابور الصباح عشان يطلع يقول حكمة اليوم. زمان كان طابور الصباح بقولوا فيهو (حكمة). مقدم الطابور بقول : الان مع حكمة الصباح والطالب سعيد. سعيد بطلع ويقول حكمة اليوم : (العفش داخل البص على مسؤولية صاحبه). الحكمة دي بكتبوها في (تذاكر السفر). نحن وقتها ما فاهمين حاجة ...كنا نسمع الحكمة دي ونقعد نصفق. فاكرنها (حكمة). الواحد وقت يقولوا ليهو حكمة تؤمن بها طوالي يقول : (العفش داخل البص على مسؤولية صاحبه). وكان بعضنا يتهامس مع طلاب سنة سادسة باعتبارهم فاهمين شوية ..وبنقول ليهم الحكمة دي قالها تولستوي وإلا جان جاك روسو. وكان اكثرنا (شقاوة) يقول الحكمة دي حكمة عادل امام. من الحكم التي قرأتها في احد الكتب القديمة هذه الحكمة : (تقول احدى لافتات المرور : الزم اليمين ..الطريق الاوسط للحوادث فقط). ودي حكمة مرورية. او هي ما حكمة ..لكن نقول مجازا كدا. طبعا اللافتة دي مفروض يكتبوها على طريق التحدي على ان تكون على هذا النحو: (الزم الواطة ...الطريق المسلفت للحوادث فقط). اقول ليكم كلام اشبه بالحكمة. يقول ستيفن شيلنزد (تدل الاحصاءات على ان الفرص كثيرا ما تدق ابوابنا ، ولكننا لا نسمعها بسبب انهماكنا في مشاهدة التلفزيون). الايامات دي في موضة (مسلسلات تركية). الحلقة يحضروها عشرة مرات متل ضربة جزاء اتوقووون. قدر ما تشوفها ما تشبع منها. هناك حكمة لا تبعد كثيرا عن (العفش داخل البص على مسؤولية صاحبه). الحكمة بتقول: (السيارة : مكان مناسب للجلوس فيه خلال الساعات التي يزدحم فيها المرور). وتلك حكمة اخرى في نفس المحيط. (الشيء الوحيد الذي يمكن ان تفقده بسبب الادب ...مقعد في أتوبيس مزدحم). ونفس الشيء هذه الحكمة: (في احدى ورش اصلاح السيارات ..وضعت لافتة كبيرة كتب فيها : « بارك الله في نسائنا اللواتي يقدن السيارات» ). شفتوا (السيارات) دي عندها حكم كتيرة كيف. دا عالم غريب...عالم كبير. انتوا فاكرين الموضوع ساي. أي عالم عندو لوائح وحراك وحكم. مجتمع السيارات دا مجتمع ما ساهل. أي مهنة عندها (حكم) ولوائح شغالة بيها. هذه اللوائح بمثابة (الدستور) الذي تعمل بيه تلك الحرف. نحن (مجازا) نسميها (حكما) او لوائح ...او مُثل. ناس الموصالات والعربات مثلا عندهم حكمة بتقول (ممنوع التحدث مع السائق) او هي قانون يكتب امام أي سواق في أي حافلة وبص. لكن حكمة (ممنوع التحدث مع السائق) ما شغالين بيها ..اول زول بكسر القانون دا ...(السواق). اذكر في بدايات ثورة الانقاذ على ما اعتقد ان الدكتور حسن الترابي احدث (جدلا) سياسيا واسعا يتصريحات اطلقها وتعديلات احدثها في الدستور..وكان بسبب تلك القرارات والفتاوي ان احدث حراكا كبيرا جعل الكاريكاتيرست الكبير الراحل عزالدين عثمان ينشر كاريكاتيرا عليه صورة الترابي او كراكتر له وهو سايق لعربة مكتوب فيها : (ممنوع التحدث مع السائق). لذلك اصبحت مقولة (ممنوع التحدث مع السائق) سائدة ومعمول بها في مواضيع تبعد حتي عن محيط العربات والمواصلات. الهلال يلعب اليوم مع انيمبا في (أبا) النيجيرية واظن ان مقولة : (ممنوع التحدث مع السائق) تصلح لهذا الموقف. وان كان في (الصمت) حديثا. بالمناسبة امس قرأت الصحف الرياضية ...قوون وعالم النجوم وحبيب البلد والمشاهد ...لقيت ليك جرايد الهلال (غرقانة) عديل من المطر. تحس ان الصفحات (مبلولة) من الموية. شفقتونا. نحن لاعبين ضد (انيمبا) وإلا لاعبين ضد (المطر). انتوا ماشيين تغطوا المباراة وإلا المطر. خلوا سادومبا وسيدا وتوريه واتوقووون ..وقعدوا يكتبوا عن (المطر). الرشيد علي عمر اظنو كان بكتب فقرة في عمودو ...وبنزل يغرف الموية من (الغرفة) ويرجع يكتب تاني. مرة الهلال كان لاعب ضد انيمبا في نيجيريا جابو ليك صلاح ادريس خائض في الموية. طبعا فرصة زي دي صلاح ادريس ما بفوتها. صلاح ادريس خايض في الموية للركبة. انا من شفت صلاح ادريس خائض في الموية ..قلت خلاص صلاح ادريس لقي ليهو حاجة يهاجم بيها كمال شداد. اصلو صلاح ادريس الوقت داك كان في أي حاجة بهاجم كمال شداد. لو هطلت امطار بهاجم (كمال شداد). ولو ما هطلت امطار برضو بهاجم (كمال شداد). الايامات دي صلاح ادريس عندو حاجات جديدة. شغال شغل جديد. صلاح ادريس الايامات دي متفرغ للتلحين ولمهاجمة الامين البرير. يا صلاح ادريس الايامات دي خلي الهلال. الهلال بيلعب في المجموعات. ركز يا صلاح ادريس مع فريقك الاهلي شندي. وخليك عارف ...الاهلي شندي بكرة عندو مباراة ان شاءالله مع المريخ. اوعكم صلاح ادريس يكون ناسي الموضوع دا. بالمناسبة الامين البرير لو كان مع الهلال في نيجيريا كان برضو كفكف ودخل الموية. البرير بشبه صلاح ادريس في حاجات كتيرة. يعني ما في فرق كبير. ندخل على مباراة اليوم والتي سوف تكون عند الرابعة عصرا. اعتقد ان هناك مخاوف عديدة وضعتها الصحافة الهلالية لمباراة اليوم ...حيث عرضوا للوضعية السيئة للهلال في نيجيريا وكان الحديث عن سوء الاستضافة باسهاب. ولا احسب ان هنالك جديد في تلك الاستضافة. بل ان الاستضافة الجيدة من قبل فريق انيمبا هي التي يجب ان تخفينا. الهلال لعب من قبل مع انيمبا وتعرض لنفس الظروف التي تعرض لها الان. بل ان ما تعرض له الهلال في المباراة السابقة مع انيمبا في نيجيريا كان اكثر من هذا الذي تعرض له الهلال الان. وكل مباريات الهلال التي لعبها في نيجيريا تعرض فيها الهلال لسوء المعاملة. حاجة عادية ..ما في حاجة جديدة. ونتذكر كلنا ما تعرض له الهلال عندما واجه ناساوروا في نيجيريا ونزل الهلال في فندق غرفه فاتحة على السماء. وخسر الهلال بثلاثية نظيفة بسبب سوء المعاملة والارضية والامطار التي سبقت المباراة وجاءت اثناء المباراة وبعدها. وتعرض الهلال لمعاملة غاية في السوء عندما لعب امام انيمبا في مباراة سابقة وخسر من انيمبا برباعية مقابل هدف. اذن هذه السيناريو نتعرض له كلما ذهب الهلال الي نيجيريا ...يجب ان نكون استفدنا من التجارب السابقة ...وذلك ليس بهذا الطرح المخيف الذي نجده في صحافة الهلال الان. الامطار جزء اساسي من أي مباراة في نيجيريا والهلال نفسه تعود على هذا الامر واكتسب خبرة كبيرة في التعامل مع مثل هذه الظروف. يجب ألا تخفينا (الامطار) وألا تجعلنا بهذه الرهبة والخوف ..وقد صنعنا ب (اقلامنا) فوبيا من الامطار وجعلناها احدي الشماعات التي نعلق عليها الخسارة. التعامل السيئ من جانب انيمبا الان امر يجب ألا يخفنا بل يجب ان يكون دافعا لنا لتقديم مباراة جيدة. الشيء المهم والذي اتوقف عنده وقوفا للتذكير هو ان ما يتعرض له الهلال في نيجيريا هو بالتأكيد ليس قصرا على الهلال وانما كل الفرق التي تلعب في نيجيريا تتعرض لما يتعرض له الهلال الان. واكيد ان (الامطار) ليس مخصصة ضد الهلال وحده ...وانما الوضع الجغرافي لنيجيريا هو الذي يجعل الامطار بهذه الكثافة. الهلال يجب ان يعرف ان يتعامل مع مثل هذه الاجواء. لا نريد ان يأتي لنا الهلال بانتصار فرشت له الارض ورودا من اجل ان ينتصر. الانتصارات اصلا تكون جميلة ومقبولة اذا حققت بعد صعوبة ..وبعد معاناة. سوف يسعدنا الهلال كثيرا ان انتصر في ظل هذه المعاملة والامطار والظروف الصعبة. على النطاق الشخصي ارى ان انتصار اليوم سوف يتحقق ان شاءالله. الهلال قادرا على الانتصار اليوم. نرى ذلك الانتصار قريبا ...ويمكننا ان نراهن على ذلك. الهلال الان يمتلك فريق يعرف ان يأتي منتصرا من نيجيريا. اذا كان الهلال يريد ان يحقق البطولة عليه ان ينتصر اليوم. عليه ان يعرف كيف يحقق انتصارا خارج الارض. عليه ان يحقق انتصارا في ظل ظروف صعبة. ليس الامطار وحدها التي يمكن ان تشكل خطورة على الهلال اليوم ...يمكن ان يتعرض الهلال اليوم لا قدر الله لظلم من حكام المباراة. مع هذا لن نرضى بغيّر الانتصار. في كل الاحوال نريد ان ينتصر الهلال. والهلال اليوم سوف ينتصر ..واشعر ان الهلال سوف ينتصر اليوم بعدد كبير من الاهداف. سوف يحقق الهلال ان شاءالله انتصارا كبيرا على انيمبا. انتظرونا بعد المباراة سوف تتأكدوا ان شاءالله من قولي هذا. ملحوظة : سادومبا الليلة سوف تكون اجمل مباراته على (مدى الحياة). هوامش جمال الوالي اخيرا اعترف بالقروش التي دفعوها في صفقة الحضري. 5 شهور لعبها الحضري في المريخ كلفت الاخير 2 مليون دولار. 5 شهور لا غير. بعد دا المريخاب بتحدثوا عن صفقة اتوقووون التي كلفت 800 الف دولار. 5 شهور للحضري كلفت المريخ 2 مليون دولار. الحضري قال الوالي كان ما بحلم انو يسلم عليّ. الحضري دا مغشوش ...وكما قال مصطفي يونس غير متعلم. تستاهلوا يا مريخاب...سلوك الحضري اصلا معروف وهو ثابت بهذا السوء وعدم الانضباط والاحترام. الزمالك رفض الحضري. ومصر المقاصة رفضت الحضري. لا اعتقد ان الحضري سوف يجد فريقا يقبل به بعد هذا السلوك. الحضري شكلو كدا ح يقعد في البيت. المشكلة مجدي عبدالغني قال الوالي لو عاوز يحل مشكلة الحضري يجي القاهرة. خد. تستاهلوا. تعادل مولودية الجزائر والترجي التونسي في الجزائر. رغم ايقاع المباراة السريع ...لكن الهلال الافضل في المجموعتين. الترجي اشرك لاعبه الكاميروني الجديد في اول مباراة له. ورغم ان اللاعب هداف للدوري الجزائري ظهر بمتسوى ضعيف. عشان كدا اصبروا لي اتوقوووون. ساكواها سوف يغيب عن المريخ اسبوعين. عشان تاني ما تتكلموا عن (سادومبا). اليوم مع سادومبا من هو اللاعب الذي سوف يسجل. بكري المدينة ام كاريكا ام اتوقووون. لاعبو الوسط ايضا ما يقصروا والتسجيل سوف يكون متاح لبشة وتوريه ومهند الطاهر. اليوم على مسؤوليتي ان شاءالله سوف يحقق الهلال انتصارا كبيرا. امير الربيع سوف يكون متاح للمشاهدة في (قناة الجزيرة فقط). امير الربيع في الدوري الممتاز ما بظهر ليكم. بس في الجزيرة. اتمني ان يبدأ في تشكيلة الهلال من البداية اتوقووون. الكلام عن المطر لا يمنع الهزيمة ..ولكنه يمنع الانتصار. وتلك مقولة ادبية لنجيب محفوظ يقول فيها : (الخوف من الموت لا يمنع الموت ولكنه يمنع الحياة). لا اعتقد ان الهلال سوف يتعرض لتحكيم ظالم. ولا اخشي المطر. اكرر مباراة المريخ غدا امام الاهلي شندي ..اصعب من مباراة الهلال اليوم امام انيمبا. نحن ح نمرق بالنقاط الثلاثة ...وانتوا يا مريخاب نقطة ما بتمرقوا بيها من شندي. طعمية من شندي ما بتشيلوها. عشان تكونوا عارفين. اول انتصار للهلال في نيجيريا سوف يتحقق اليوم ان شاءالله. الهلال تاني ما بخسر. اسوأ نتيجة نطلع بيها (التعادل). الهلال في الممتاز مباراته القادمة سوف تكون امام الموردة. وهي مباراة سوف تكون للمتعة. من هسه مفروض الناس يمشوا على الاستاد. جمهور الهلال موعود بفرح دائم. خلاص ...دا موسم افراح الهلال. المحلي داخل عطبرة. دي سمعنا بيها. لكن المحلي داخل شندي ...دي جديدة علينا. مكرر. في شندي بين الشوطين في جلد. ناس بلة جابر ديل لو ما بستحلموا (الجلد) من هسه ما يسافروا. ابوجريشة اعتذر. نذكر ناس شندي ان رئيس بعثة المريخ (همد). لو عندكم أي (مطرة) كلموه. اوعك تدخل الاستاد بي (عكاز) يا همد. كلمناك من بدري ...عشان تكون عارف. ناس شندي ديل لو شافوا ليهم (عكاز) حايم ساي ..ما بتطلع منهم. عاجل: برونزية سيكافا كان تمشوا بيها (القصر الجمهوري) ما عندها فرق من كاساتكم الجوية.
