منفذ هجوم فرنسا سوداني "طلب من الشرطة أن تقتله عند اعتقاله"    القوات المسلحة تؤكد هدوء الاحوال وتنفي شائعة الانقلاب    مقاطعات إسبانية تتهم أنقرة بالإستيلاء على "أجهزة تنفس" وأنقرة تصف الاتهامات بالقبيحة    الصحة السورية: تسجيل 3 إصابات جديدة بفيروس كورونا    إسرائيل.. عدد الإصابات بكورونا يتجاوز ال8000 وحصيلة الضحايا 46    عذراً الأستاذ المحترم محجوب محمد صالح .. بقلم: سعيد أبو كمبال    ما بين العنصرية والتصالح الاجتماعي نقلة من صناعة الموت إلى تحقيق السلام الشامل .. بقلم: عبدالرحمن صالح احمد (ابو عفيف)    سيناريو جودة في لغة جون .. بقلم: حمدالنيل فضل المولي عبد الرحمن قرشي    الثوار لا ينسون جرائمك او جهلك!! .. بقلم: طه مدثر عبدالمولى    الرأسمالية الطُفيلية والتكسُّب الرخيص في زمن الأزمات !! .. بقلم: جمال أحمد الحسن – الرياض    رسالة من شفت وكنداكة عنوانا (القومة ليك يا وطن) .. بقلم: د. ابوبكر يوسف ابراهيم    الوراق والكهرمان .. بقلم: حمد النيل فضل المولي عبد الرحمن قرشي    في نقد حكومة ثورة ديسمبر الحالية (2) .. بقلم: د. عمر بادي    الوزير يلوح بتأجيل انتخابات الهلال    المريخ يرد على الوزير بقرار المحكمة العليا    الكوارتي: لن يكون هناك تمديد في الهلال    تفاصيل جديدة حول مصرع وإصابة (5) أشخاص على يد سوداني بفرنسا    السجن والغرامة لشابين واجنبية ضبطت بحوزتهم خمور بلدية    الغرامة لسائق حاول تهريب مواد بترولية    تراجع إنتاج الدقيق بالمطاحن واتجاه لزيادة الرغيفة لجنيهين    إجلاء (11) سائحاً ألمانياً من بورتسودان    الصحة : 151 حالة اشتباه ب(كورونا) ولا إصابات جديدة    تجار مجهولون يغزون سوق العملة وهجمة شرسة على الدولار    بسبب "الوباء".. البيتزا من المطعم إلى باب بيتك بالطائرة    غاب ضيوف الزفاف فاستبدلهم العروسان.. لكن بماذا؟    ترامب يتحدث عن عقار تحت الاختبار لعلاج كورونا: قد أتناوله    محجوب شريف ، مات مقتولا !وبقي خالدا في ضمير شعبنا، أغنية وراية وسيرة في النضال لأجل الحياة .. بقلم: جابر حسين    وصول جثمان الطبيب السوداني من لندن    السودان ومصر يبدآن تشغيل شبكة مشتركة للكهرباء    ترامب يواصل "انتقامه" ممن شهدوا ضده لعزله من رئاسة أمريكا!    على هامش الحدث (25) .. بقلم: عبدالله علقم    عندما تحرك الكوارث والأمراض كوامن الإبداع .. بقلم: د. فراج الشيخ الفزاري    جائحة الكورونا في أفريقيا جنوب الصحراء والسودان: فرضيات لاتغير استراتيجيات منع الانتشار .. بقلم: د. عمرو محمد عباس محجوب*    سفاه الشيخ لا حلم بعده .. بقلم: د. عادل العفيف مختار    (التوبة) .. هي (الحل)!! .. بقلم: احمد دهب(جدة)    مساجد الخرطوم تكسر حظر التجوال وتقيم صلاة العشاء في جماعة    نصر الدين مفرح :نحن نتابع كل التّطوُّرات ولن نتوانى في منع إقامة صلوات الجماعة    السودان وخارطة الطريق للتعامل مع إسرائيل .. بقلم: د. الشفيع خضر سعيد    سامح راشد : أخلاقيات كورونا    الموت في شوارع نيويورك..! .. بقلم: عثمان محمد حسن    أمير تاج السر:أيام العزلة    شذرات مضيئة وكثير منقصات .. بقلم: عواطف عبداللطيف    مقتل 18 تاجراً سودانياً رمياً بالرصاص بدولة افريقيا الوسطى    حكاية .. بقلم: حسن عباس    والي الخرطوم : تنوع السودان عامل لنهضة البلاد    محمد محمد خير :غابت مفردات الأدب الندية والاستشهادات بالكندي وصعد (البل والردم وزط)    ردود أفعال قرار كاس تتواصل.. إشادات حمراء وحسرة زرقاء    «كاس» توجه ضربة ثانية للهلال وترفض شكواه حول النقاط المخصومة بأمر الفيفا    البرهان يتلقى برقية شكر من ملك البحرين    البرهان يعزي أسرة الراحل فضل الله محمد    5 ملايين درهم جائزة "الأول" في مسابقة "شاعر المليون"    ميناء بورتسودان يستقبل كميات من الجازولين    وزير الري يتعهد بتأهيل مشاريع الأيلولة بالشمالية    لجنة التحقيق في أحداث "الجنينة" تتلقى شكاوى المواطنين    برلمان العراق يصوت على إنهاء تواجد القوات الأجنبية    إيران تهدد بالرد على مقتل سليماني    الإعدام شنقاً ل (27) شخصاً في قضية المعلم أحمد الخير    حريق محدود بمبني قيادة القوات البرية للجيش    







شكرا على الإبلاغ!
سيتم حجب هذه الصورة تلقائيا عندما يتم الإبلاغ عنها من طرف عدة أشخاص.





سعيد السعودي قعد في (الكنبة) اكتر من قعادو في (مرحلة الاساس)
نشر في قوون يوم 24 - 05 - 2014

هجوم عصام الحاج على جمال الوالي اصبح اخطر من هجوم الهلال على ضفر
يستعدوا ب (بايرن ميونخ) الالماني عشان يلعبوا مع (البوليس) الزنزباري
""""""""""""""""""""""""""
الاهداء
نفضت عيونك من (النعاس)...قعدت برة.
شفت الموبايل – راجعت (مكالمات لم يرد عليها).
رجعت تاني نفضت من بدنك (الفتر).
دخلت على حواري (روحك) - يمكن تلقى ليك زول (شبه).
عاينت للساعة – معقولة !! الليلة اليوم دا مالو جاري كدا تقول مشارك في سبق الخيل؟.
سكت ما قلت حاجة (كتمت غيظك) – ضلك قام ثائر عليك قال : (الاسعار دي مالها ارتفعت كدا– انتوا ح تصبروا لمتين؟).
رجعت تاني تعاين في وارد (مكالمات لم يرد عليها – يا ربي الرقم الغريب دا رقم منو؟).
يكون رقم (انجلينا جولي)– مرات بتضرب من رقم غريب.
قعدت – ضلك (واقف) وطلع خلاك.
ود صوت العرب

احتمال
عصام الحاج كلامو كلو بقى في (الاكل).
كل ما يكتب ليه مقال يقول ليك زمان ناس المريخ ديل كانوا بياكلوا (سليقة) وبيلعبوا بقلب حار...وزمان كنا بنجيب للمعسكر كم رغيفة؟.
(عدس) عصام الحاج ولا (شية) جمال الوالي.
عصام الحاج دا عاوز يصل لي شنو؟.
يا عصام الحاج لو عملت ليك (مطعم) احسن ليك من البتعمل فيه دا...تعدعد في (الحلل) زي الطباخ.
ما معقولة الامين العام السابق للمريخ يقعد يحسبها لينا كدا ب (العيشة)...كمشة – كمشة الليل نعدو.
انت تعال هنا – هسع وينو (الاحتمال) هنا؟.

يمكن
الزول البخيل ..الزول الصعب ...الزول الما بتفاهم (عامل زي رجل المرور وقت يجيك جاري بي دفتر الايصال من تحت الشجرة) – الزول دا لو عزمك فطور بقول (يمكن) تجي شايل معاك (سمك).
الناس بقت صعبة – الواحد وقت يشغل ليك (المروحة) يقول ليك عليك الله وقت تطلع اقفل معاك (المروحة).
انت تعال هنا – ثقافة (المراوح) الماسك لينا فيها الايامات دي شنو؟.

كل زول يمد كراعو قدر بطولتو الريال واتلتيكو..الهلال والزمالك ..المريخ والبوليس
من محاسن الصدف ان الهلال يلعب اليوم امام الزمالك المصري في ربع بطولة الاندية الافريقية للابطال في نفس اليوم الذي سوف يلعب فيه ريال مدريد امام اتلتيكو مدريد في نهائي بطولة الاندية الاوربية.
الاختلاف الوحيد ربما فقط في ان الهلال يلعب في مرحلة المجموعات اي على بعد خطوتين من النهائي بينما يلعب الريال واتليتكو في مباراة النهائي.
الفائز من لقاء اليوم بين الريال واتلتيكو سوف يمثل القارة الاوربية في بطولة كأس العالم للاندية.
اما الفائز من مباراة اليوم بين الهلال والزمالك سوف يكون هو المرشح الاول للتأهل الى بطولة كأس العالم للاندية في المغرب ..خاصة اذا انتصر الهلال لأن انتصار الهلال سوف يقفز به ان شاءالله الى النقطة السادسة.
عليه وبما ان مباراة الهلال والزمالك سوف تسبق مباراة الريال واتلتيكو ..فان متابعتنا لمباراة الريال واتلتيكو سوف تبقى فوق رأي.
كامبوس ذاتو ح يجيب الورقة والقلم ويقعد يرصد في مباراة النهائي الاوروبي.
انا شخصيا افضل انتصار الريال اليوم ..عشان لعب الهلال امام الريال سوف يكون له طعم خاص ...الهلال يمكن ان يقابل الريال من غير ان يدفع للريال (ريال) واحد ، ولا قرش.
بل الهلال سوف يدفعوا ليه كمان ..وح يلعب ان شاءالله يا رب امام الريال مباراة رسمية وتحت تنظيم الفيفا.
ما زي ناس المريخ ..دفعوا ليهم (12) مليار جنيه عشان يلعبوا امام بايرن ميونخ ..وفي النهاية (كورنر) ما طلعوا بيه في مباراة (ودية).
ديل في مباراة ودية كورنر ما جابوه ..ومعروف ان المباريات الودية بتكون مفتوحة.
طيب لو لعبتوا امام بايرن ميونخ رسميا كان حصل ليكم شنو؟.
يمين (جدعة تماس) ما بتطلعوا بيها.
كامبوس ايضا سوف يكون متلى ح يفضّل (ريال مدريد)..عشان كامبوس دا عمل في الجهاز الفني للريال ...وهو بالتأكيد عارف اي حاجة عن الريال.
اذا كانت مباراة الهلال والزمالك في ربع النهائي منقولة على قنوات بن سبورت. ومباراة الريال واتلتيكو منقولة في نفس القنوات ، الدلالة ظاهرة واضحة زي الشمس ..(مفروض تفهموها براكم يا مريخاب).
الحكاية بقت واضحة ما عاوزة ليها شرح.
لكن مع ذلك المريخاب ديل الواحد فيهم يكون ما عندو (كرت)..وقاعد يغالط.
لا مباراة الهلال والريال ولا مباراة الزمالك واتلتيكو ..اقصد لا مباراة الهلال والزمالك ..لا الريال واتلتيكو عندكم طريقة تتكلموا فيها.
اتكلموا قدر بطولاتكم ..ومدوا رجلكم قدر لحافكم...شوفوا (البوليس) وين؟.
هسع يا ناس المريخ البوليس دا لو سألكم من (البصمة) ح تقولوا ليه شنو؟.
انتوا ساكت بتحرجوا في نفسكم.
المشكلة الاكبر ..صاحب البصمة علاءالدين يوسف الان اصبح كابتن المريخ.
غايتو يا ناس المريخ مبارياتكم كلها (تحريات) ليكم حق تلعبوا امام البوليس.
نحن نلعب مع مازمبي..نلعب مع الزمالك ..نلعب مع فيتا نلعب مع الترجي نلعب مع ريال مدريد ..ما بخصكم.
تكتروا الكلام بنجيب ليكم (البوليس).
بتعملوها براكم في نفسكم.
هسع في زول عاقل في الدنيا دي بجيب (البوليس) عشان يلعب امامه مباراة.
عالم ما تختشيش.
لو شفتوا لي مريخابي واحد في مباراة الهلال والزمالك او مباراة الريال واتلتيكو بيحضر في المباراة – بجيب ليه (البوليس).
البوليس الزنزباري لو ما حسم الحكاية ..بنجيب ليكم البوليس السوداني.

شوال غتاتة
يا سعيد السعودي ناس شندي ديل ممكن المباراة الاولى يستحملوك في (الكنبة).
المباراة الثانية ..بستحملوك.
المباراة الثالثة لو لقوك قاعد في (الكنبة) بقول ليك سمع لينا مقال حرقة اسماعيل باشا في شندي.
عشان كدا من هسع احفظ تاريخ (المك نمر)..الناس ديل ما عندهم (كنبة) اكتر من تلات مباريات.
هسع وينو (شوال الغتاتة) في كلامك دا؟.

قوات الدعم السريع (كاريكا وبكري والجزولي)
اول حاجة بعتذر ليكم عن التشبيه ..عشان عندي رأي في الحتة دي ما عاوز اقول ليكم اي شيء.
ولا عاوز المح.
جني وجن (التنظير) في السلطة.
الواحد يعزمك فطور ..ويجيب ليك (سلطة) ويقعد ينظر ليك فيها.
السلطة القاصدها انا سلطة العجور والخيار والفقوس ..انتوا اول فهمتوا شنو؟.
ما تقعدوا تفهموا لي براكم.
حاجة ما قلتها ليكم ما تتبرعوا بي (فهمها) براكم.
تدخلونا في كلام ساكت.
مدثر كاريكا وبكري المدينة وصلاح الجزولي (ما شاءالله عليهم) سرعة خيالية ..وقوة ومهارات (وسفر بس).
بتلتلوا ليك (الدفاعات) تلتلة جد– بدخلوها ليك في (حيص بيص) شديد.
عشان كدا نحن هجوم الهلال دا ح نسميه (قوات الدعم السريع) بس يا جماعة ما تفهمونا غلط.
وتفكيركم ذاتو ما يمشي لي بعيد ..حدكم بس خط (18) اوعكم تطلعوا منو.
على العموم نتوقع ان تتعرض دفاعات الزمالك بقيادة محمود دفع الله وياسر ابراهيم لتصفية تامة من هجوم الهلال – خاصة اذا لعب الهلال بقوته الثلاثية الكاملة.
دفاع الزمالك يعاني من بطيء واضح ..فرق السرعات دائما يكون ليس في صالح هجوم الفريق المنافس للزمالك ..ضف الي ذلك ان هجوم الهلال اصلا بتمتع بسرعة (خرافية) ما شاءالله.
عليه فان هجوم الهلال سوف يكون حديث الفضائيات المصرية اليوم ..وحديث وكالات الانباء والمواقع ..عشان مباراة اليوم سوف تحصل فيها طرائف ومفارقات ..وح تشوفوا براكم ناس عبدالواحد السيد ديل ح يحصل ليهم شنو؟.
ديل ح يتعذبوا في الدنيا دي جنس عذاب.
ما بعيد كمان عبدالواحد يجيه (انفصام في الشخصية).
اها عليكم االله يا جماعة بعد ما قريتو الحتة دي لقيتوا ليكم فيها حاجة كدا وإلّا كدا.
كدا وإلّا كدا يعني شنو؟.
انا عارف..
تشيلوا وتأولوا براكم.
تقوّلو الزول كلام ما قالو.
""""""""""""""""""""""""""""""""""""""""""""""""""""""""""
افتراض
افترض كدا جمال الوالي قدم استقالة ومشى زعل ليه (6) شهور في بيتو.
ناس الحكومة ديل ح يعملوا ليهم (دمغة جريح) تانية لي ناس المريخ ..عشان يجيبوا بيها (الكهربة).
الناس ديل وقت جمال الوالي (يزعل) كهربة ما بقدروا يجيبوها.
الافتراض ما عندك لكن!!.
"""""""""""""""""""""""""""""""""""""""""""""""
بالوصف
مفروض اي لاعب عاقل في المريخ يقولوا ليه : (هاك شارة الكابتنية) يقول ما عاوزها.
اي لاعب في المريخ يصبح (القائد) بطيحوا بيه – المريخ مع جمال الوالي دا ما عاوز ليه (قائد).
المريخ دا عاوز ليه (ترمسة) شاي كبيرة ...الناس يقعدوا ويشربوا فيها ..(زول يسأل ليه زول مافي).
شطبوا فيصل العجب ..واتخارجوا من سعيد السعودي ب (الاعارة).
الله يستر على (علاءالدين يوسف) في تسجيلات ديسمبر االقادمة او نوفمبر حسب التعديل لو اصبح (كابتنا) للمريخ.
هسع وينو (الوصف) هنا؟.
"""""""""""""""""""""""""""""""""""""""""""""""
جردل شلاقة
تراوري بعد الانتقال من الهلال الي المريخ ..قال لو كان عارف المريخ ح يطلع من دور ال (64) كان عمل ليه (قدرة فول) قدام البيت – كان استفاد من وقتو.
تراوري دا لو مسك ليه قدرة فول – ح يطلع هداف الفول الاول.
"""""""""""""""""""""""""""""""""""""""""""""""
طحنية بالزعل البلدي
لو قلت ليك لي زول – اي زول بدون تحديد كدا ان المريخ ح يلعب امام (بايرن ميونخ) مباراة ودية – ويستعد عن طريق بارين ميونخ الالماني لفريق البوليس الزنزباري في بطولة سيكافا ..في زول في الدنيا يا جماعة بصدق الكلام دا.
ح تقعدوا تزعلوا ..وتعملوها لي كلها نفيخ جضوم ..وطنطنة ..انا عارفكم ..وعارف طبعكم الكعب ..ما قاعدين ترضوا بالحقيقة.
دا الواقع بقول كدا.
الزعل في شنو؟.
الزعل عرفناه ...وينها (الطحنية) في كلامك دا؟.
"""""""""""""""""""""""""""""""""""""""""""""""
صفيحة دغالة
مباراة المريخ والبوليس الزنزباري زي حفلة الزفاف البقلبوها (حفلة شاي) ساي.
""""""""""""""""""""""""""""""""""""""""""""""
تعريجة
واحد قسمو ليه ورقو ..من الجرة التانية (عرج).
زميلو عاين ليه كدا ..قال ليه اسمع حركات (موسى الزومة) دي ما تعملها لي في الكوتشينة.
"""""""""""""""""""""""""""""""""""""""""""""""
سعيد السعودي خريج معهد (الكنبة) للجلوس الدائم
المدرب القومي ولاعب المريخ الدولي محمد عبدالله مازدا قال في برنامج (زمن اضافي) مع الزميل حسن فاروق في اذاعة هلا 96 – كلام خطير.
كلام يعقد.
كلام يقفل النفس ..من مدرب كبير ...قاد المنتخب والمريخ سنوات عديدة ..ووصل بالمنتخب الى نهائيات الامم الافريقية مرتين ...(يعني عارف اي حاجة).
شايف كل شيء.
مازدا قال كلام كتير لحسن فاروق في برنامجه الاذاعي (زمن اضافي ) لكن اخطرماقاله المدرب محمدعبدالله مازدا ..قوله انه ليس من المعقول ولامن المنطق في شيءان يكون كابتن المريخ قاعد في الكنبة (7) سنوات.
والله مازدا ليه حق.
سعيدالسعودي دا قاعد في (كنبة) المريخ منذ (المراحل السنية)..يعني منذ ان كان تحت السن ..وهو قاعد في الكنبة الي ان اصبح كابتن فريق المريخ واقدم لاعب في الفرقة الحمراء.
الكنبة ذاتها قعدت تشكي من سعيد السعودي.
بعملية حسابية صرف سعيد السعودي دا لعب في المريخ قرابة ال (9) سنوات ..وليس (7) سنوات كما قال محمد عبدالله مازدا ..وهذا يعني ان سعيد السعودي (قعد) في الكنبة اكتر من قعادوا في مرحلة الاساس ..اذا اعتبرنا ان مرحلة الاساس (8) سنوات ..وسعيد السعودي قعد في الكنبة (9) سنوات.
الاخطر من هذا ان سعيد السعودي نال شارة الكابتنية من (الكنبة) مثلما ينال الجنود في الجيش الرتبة من خلال (الصف).
سعيد مصطفى بدلا من ان يكون لقبه سعيد (السعودي) يفترض ان يكون اسمه سعيد (الكنبة).
امس الاول اعار فريق المريخ كابتنه سعيد السعودي الي الاهلي شندي ليتحول اللاعب من كنبة المريخ الى كنبة الاهلي.
عليكم الله عيروا معاه (الكنبة).
قد يتحرر سعيد السعودي من (الكنبة) في شندي ..ولكن نخشى ان يكون الجلوس الدائم لسعيد السعودي خريج معهد الكنبة قد ادى الى (ارتخاء) في عصب سعيد السعودي وادي الى خمول طبيعي في العضلة الضامة.
يعني ممكن سعيد السعودي دا بالعادة كدا يكون مشارك في المباراة في الدقيقة (30)يجي يقعد (الكنبة).
الزول دا (9) سنوات قاعد في (الكنبة) – سعيد بقى (مكنب) طبيعي.
يا ناس الاهلي جهزوا (كنبتكم) من بدري جاكم (مكنب) دولي.
"""""""""""""""""""""""""""""""""""""""""""""""""
حوار من طرف واحد
واحد جابو ليه (ولد)...قعد يشيل ليك في (الهم)...حيلو برد ..بقى زي (لقد نفد رصيدك الرجاء تغذية البطاقة).
النسوان بتاعن (جرجرة) ...قالن ليه : اها ح تسمي منو يا ابوالرجال.
ابوالرجال بي همو قال ليهم : المشكلة ما في (الاسم) – المشكلة في (الخروف).
البلد دي تجيب ليك ولد بدل ما (تفرح) ...(تسرح).
"""""""""""""""""""""""""""""""""""""""""""""""""""""
حكمة صينية
صيني دخل (واتس آب) سوداني ما فهم اي حاجة ..طلع ليك من (الواتس آب) لاقوه جماعة قالوا ليه الحاصل شنو؟.
الصيني قال ليهم ما عارف ..لكن الحكاية دي زي احتراف بلة جابر في الدوري الفرنسي – يقولوا ليه : (اعكس الكورة) يقول ليهم (محمد وردي) ..صاحبكم فاكرهم سألوه من فنانه المفضل.
ما فاهم اي حاجة.
""""""""""""""""""""""""""""""""""""""""""""
حصة املاء
واحد مشى ليه لي معطم سمك عديل كدا ...قال ليهم عاوز لي طلب سمك.
قالوا ليه سمك ما في...في (فول) بس.
قال ليهم طيب (الريحة) دي ريحة شنو؟.
قالوا ليه : انت عاوز (ريحة) وإلا عاوز (سمك)؟.
الواحد يمشي الدكان يسأل عشان يجيب ليه (كامبودر) وقت يقولوا ليه (كامبودر) مافي يتكيف ويتبسط ويقول لبتاع الدكان ..خلاص اديني (طحنية).
بدون مناسبة كدا الواحد يدخل ليك (الطحنية).
انت من البداية ما تقول عاوز (طحنية) بدل اللفة الطويلة دي.
"""""""""""""""""""""""""""""""""""""""
بطولة سيكافا دي – اعملوا ليها (خميرة)
اعلام المريخ كمّل فهمو كلو في مباراة (بايرن ميونخ)..ما خلوا حاجة في مباراة المريخ وبايرن ميونخ ..كبوا لينا (فشخرة) صاح.
معاوية الجاك كان شغال لهذه المباراة (3) شهور ..مشى قعد في قطر عديل عشان يكتب من ارض المباراة ذاتها.
وهيثم كابو اشترى ليه (12) بدلة ..كل عمود بكتبوا ب (بدلة).
اما احمد محمد احمد قالوا مشى دخل ليه معهد لغات المانية عشان يكتب عن المباراة بالالماني.
قلنا ليه يا احمد محمد الموضوع ما بستاهل الحكاية دي كلها.
المباراة كلها (90) دقيقة يعني الموضوع ما عاوز ليه (معهد).
مزمل ابوالقاسم عمل ليه دورة كاملة لتيم صحيفتو عشان يغطوا المباراة.
يا مزمل هي ودية.
بارين ميونخ دا لو ما طار من بطولة الاندية الاوربية كان يمكن نلاقيه عديل كدا في كاس العالم للاندية.
الايام لفت واثبتت انو الحصل على المريخ بسبب مباراة بارين ميونخ الي يوم الدين ما بطلع.
من مباراة بارين ميونخ المريخ تاني ما شاف ليه (عافية).
طلعوا من البطولة التى استعدوا ليها من دور ال (64).
وفي الدوري الممتاز احتكروا بجدارة تامة مركز (الوصافة).
بل ذهبوا ابعد من ذلك ونظموا ليك (سيكافا) ذاتها ..(دي الحاجة الخايفين منها).
يعني في داعي تستعدوا لسيكافا بي بارين ميونخ.
المريخ الان يلعب في بطولة سيكافا وهو في حالة خجل تامة ..ما قادرين يقولوا اي شيء.
الواحد وقت يجيب ليك سيرة سيكافا ..يتعقد ..ويشعر بالخجل..ونفسو تمرق من الاكل.
اتحدى اي مريخابي يقدر يطلع لي جدول مباريات المريخ في سيكافا.
انتوا يا جماعة وقت خجلانين كدا ..بتشاركوا في البطولة دي ليه؟.
الجابركم شنو على سخرية الهلالاب ديل؟.
الموضوع ما بستهال.
اكبر دليل على ان بطولة سيكافا ما عندها اي قيمة ..ان حي العرب بورتسودان لأنه فريق محترم ..انسحب من البطولة.
وانسحب كذلك فريق مريخ الفاشر ..عشان عنده قرار.
وشارك في البطولة فريق الاهلي شندي بعد العلاقة المريبة التى اصبحت تجمع المريخ بالاهلي شندي.
على العموم المريخ والاهلي شندي سوف يتضررا كثيرا من بطولة سيكافا التى لا جدوى منها.
كان يمكن ان تكون هناك فائدة من بطولة سيكافا لو ان هذه البطولة تأتي قبل بداية الدورة الثانية بفترة قصيرة ..يعني منها وانطلاق مباريات الدورة الثانية للممتاز.
طبعا بنتكلم فقط عن (الدورة الثانية للممتاز) عشان المريخ والاهلي شندي ما عندهم حاجة غير (الدوري الممتاز).
طلعوا (مبكرا) من البطولات الافريقية ..وقعدوا لينا كدا يتبادلوا في (اعارة) اللاعبين.
بطولة سيكافا تلعب في توقيت غير جيد ..قبل انطلاقة كاس العالم ..وسوف يدخل المريخ والاهلي بعد هذه البطولة في (راحة) طويلة الى ان تنطلق مباريات الدورة الثانية.
وهذا يثبت انها ما في فائدة.
خاصة وان المرحلة الان مرحلة (تسجيلات) احلال وتبديل واكيد اي لاعب في المريخ ما مركز..وبالو في التسجيلات فكل لاعبي المريخ الان مرشحين للشطب (بلة وموسى واكرم).
تأتي كل هذه الاشياء في ظل تعتم كامل على بطولة سيكافا ..البطولة التى لم يكتب عنها اي اعلامي في المريخ عمود واحد.
قلت ليكم كلهم خجلانين من الحكاية دي ..وشاعرين بالاسف.
خاصة وان توقيت هذه البطولة يتوافق مع مباريات الهلال في مرحلة المجموعات ..وهذا يمنح الهلالاب بل المريخ نفسهم الكثير من (السخرية) ، ليسخروا من الفريق الاحمر.
ناس المريخ ديل مفروض يدوا بطولة سيكافا دي (خميرة) عشان البطولة تفور شوية وتقوم.
بطولتكم دي ميتة ، وما في ليها اي اثر.
اقول ليكم مع (الخميرة) اعملوا ليها (محلبية).
ناس المريخ عرفناهم – هسع يا ناس الاهلي شندي دي بطولة تشاركوا فيها.
احرجتونا مع بتاع المكتبة.
بتاع المكتبة هسع الدخلو هنا شنو؟.
"""""""""""""""""""""""""""""""""""""""""""""""""""
ملحوظة
اتخيلوا الهلال دا بقى (عملاق) كبير كيف...تتصوروا بشه ومساوي والمعز وسيرجيو وسيدي بيه وصلاح الجزولي قاعدين برة.
اكبر من كدا مافي.
""""""""""""""""""""""""""""""""""""""""""""""""
سطر جديد
مريخابي يوم طلوع المريخ من دور ال (64) جاهم حرامي في البيت.
الحرامي وهو طالع من الغرفة بي دهب المدام ..قبضو ليك ..وادوه (النقطة).
في قسم البوليس ..الجماعة كان بضربو في (الحرامي) الذي سرق له دهب يقدر باكثر من مليار جنيه...المريخابي قال للبوليس : والله يا جنابو انا ما حارقني الدهب السرقو الحرامي دا ...حارقني خروج المريخ من دور ال (64).
الحرامي دا ممكن (يتحلل)...لكن المريخ دا (يتحلل) لينا كيف من الخروج من دور ال (64).
""""""""""""""""""""""""""""""""""""""""""""""
تنويه
واحد قال لي صاحبو ..اسمع انا ح اقفل التلفون ...لو الهلال جاب قون اضرب لي في تلفون (المدام).
ومشى على كدا قفل تلفونو – وتلفون المدام ذاتها.
""""""""""""""""""""""""""""""""""""""""""""""""
قلاب الهنا والسرور
بتاع قلاب دخل في شارع غلط ..بتاع المرور جاهو طالع من تحت الشجرة شايل دفترو..قال ليه البدخلك في الشارع دا شنو وانت سايق ليك (قلاب)؟.
بتاع القلاب قال ليه انا اصلى دخلت بي قلابي دا في (دولاب)...الشارع كبير وواسع – المشكلة شنو؟.
انتوا حريات للقلاب ما عندكم؟.
""""""""""""""""""""""""""""""""""""""
قصة للمريخاب فقط
واحد خاطب ليه واحدة ..(متلتلة) تلتلة شديدة ..كل مرة يقول ليها ح نعرس في العيد...ويمشي يطلع بيها الحدائق.
يجي العيد يقول ليها : والله ظروفي صعبة العيد دا ما بنقدر نعمل اي حاجة في موضوع العرس..ويمشوا الحدايق.
البنت مسكينة مخطوبة (21) سنة...اهلها اكلو لحمها.
البنت قالت لخطيبها ...لازم تحدد لي يوم للعرس ..عشان ارتاح من كلام الناس.
خطيبها وقت اتعصر شديد ..قال ليها خلاص نعرس سنة 2020م.
البنت قالت ليه اصلو ما معقول ...انا ح انتظر لي (عشرين – عشرين)..انت عاوز تعرسني وإلا عاوز تنظم كأس العالم – لازم تحدد لي تاريخ تاني.
خطيبها قال ليها : خلاص نعرس وقت الهلال يشيل كأس افريقيا.
البنت رجعت وقالت لي خطيبها ..قلت لي في سنة 2020 ح نعرس شهر كم؟.
اها قصرنا معاكم يا مريخاب..(عشان بس ما تزعلوا وتنجهونا بالكلام الكتير).
""""""""""""""""""""""""""""""""""""""""""""""""
روسي اتجاه واحد
روسي قاعد يتابع في مباراة المريخ والبوليس الزنزباري ...قال : والله السودان دا زمان كان فيه جنس (حمام).
هسع حمامكم بقى زي (ود ابرق) ما عندو اي فرق.
"""""""""""""""""""""""""""""""""""""""""""""""""
حالة استغراب
في واحد قاعد مستغرب قدام البيت ..في واحد جاء ماشي فيه ..قال ليه : اسمع في (ديك) جاء ماشي فيك بي جاي.
الزول المستغرب قال ليه انت اول (ديك) اشوفو في الشارع دا.
""""""""""""""""""""""""""""""""""""""""
مثل جديد لنج
اتنين لو قالوا ليك رأسك ما فيك اضرب تلاتة تسعات.
"""""""""""""""""""""""""""""""""""""""""""""""""
رسائل الى هؤلاء وهؤلاء وهؤلاء
- مزمل ابوالقاسم.
= عنكبة لو لعب ليكم طرف يمين ..بحل ليكم مشكلة الهجوم نهائي – (على الاقل تاني ما بكون عندكم عنكبة شنكبة في الهجوم).
- مامون ابوشيبة.
= في المريخ بقوا يقولوا اشطب موسى الزومة وشيل سعيد السعودي اعارة...(رصيد مجاني).
بالمناسبة يا ابوشيبة جهّز (تسللك) من الان ..بكري المدينة الليلة ان شاءالله جايب ليه هدف في الزمالك.
- هيثم كابو.
= الايامات دي احسن ليك تركز في عمر الجزولي ..ناس عمر بخيت ديل ما بتقدر عليهم.
- اسماعيل حسن.
= الحل في المريخ ليس في اعارة سعيد السعودي ..الحل في المريخ تشطبوا (جمال الوالي) ذاتو...بس يا سماعين فالحين لي سعيد السعودي.
- معاوية الجاك.
= البسمع عن بايرن ميونخ ..ما يشوف البوليس الزنزباري.
- احمد محمد احمد.
= انت اكتر من كدا ما ح تقدر تصبر على المريخ ...ح يعيروك (الاهلي شندي) يا احمد.
- هيثم صديق.
= انتوا زعلانين ليه؟..برشلونة ذاتها الموسم دا طلعت بدون حمص.
- بابكر سلك.
= نختم رسائلنا دي بي ابوالاسلاك ، وختامها (سلك).
يا سلك قالوا ليك سعيد السعودي في شندي قالوا ليه الخانة البتلعب فيها شنو؟.
قال ليهم : خانتي المفضلة الكنبة.
"""""""""""""""""""""""""""""""""""""""""""
شولة هندية
الكوكي مشى تونس ..واتفرغ للتصريحات عن المريخ.
الزول دا تصريحاته في تونس عن المريخ ..اكتر من تصريحاته عن المريخ وقت كان مدربا للمريخ.
الظاهر الكوكي اصبح المدير الفني للتصريحات.
"""""""""""""""""""""""""""""""""""""""""""""
شوربة تلتلة
واحد زوجتو قالت ليه الساعة اربعة لو ما جيت البيت دا تاني ما تجي.
الساعة اربعة وخمسة ..صاحبكم جاء يجرجر في كرعينو ..زوجتو لاقتو ليك في الباب ...وعاينت للساعة...وقالت ليه عاوز شنو؟.
قال ليها عاوز اشيل شنطتي واطلع.
""""""""""""""""""""""""""""""""""""


انقر هنا لقراءة الخبر من مصدره.