* فوز الجزائر برباعية على كوريا مستغرب ولكنه غير مستحيل على بلد قدمت مليون شهيد .. * مليون شهيد .. * شهيد ينطح شهيد .. * مش زينا إحنا .. * إحنا قدمنا مليون فنان .. * ولا ما كده يا بابكر صديق ؟ * بابكر صديق كل يوم خميس يلبس (كرفتتو الحمرا) ويلم الفنانين ويجو يغنو * كل خميس .. * لحدى ما البلد إتملت فنانين .. * هسه عدد الفنانين أكتر من عدد المستمعين .. * لقدام كم سنة كده ما ح نلقى (مستمع وطني) !! * إلا نجيب مستمعين محترفين .. * السودان كلو بقى فنانين .. * الما فنان عندو نية يبقى فنان .. * في رمضان زمان كنا بنحلل الصيام ب(البلح) .. * وهسه مع السر قدور الناس بقت تحلل الصيام ب(أغانى وأغانى) .. * غايتو جنس غايتو ؟ * المهم .. * ملف المستمعين (المحترفين) ممكن يستلمو جمال الوالى الشهير ب(عزو) .. * جمال الوالى عندو باع طويل في استجلاب العمالة الفاشلة .. * وممكن ينجح ويجيب لينا مستمعين محترفين فاشلين عشان ما يقولو عايزين يبقو فنانين .. * هسه شريف نجيريا ده مستمع اجنبى .. * ممكن يجى هنا .. * بدل يرسل لناس ندى القلعة يجى يقعد هنا ويبقى مستمع من الداخل .. * وعلى حس الدولارات العندو ممكن نديهو الجنسية .. * جنسية ب(الغاء) .. * الذى يتابع حديث الأرباب عن هيثم مصطفى يظن أن قضية هيثم ضمن حملة صلاح الانتخابية .. * وصلاح إذا حكم الهلال سيفرض علينا هيثم وإذا فشل سيفرضه على أهلى شندى .. * يعنى كده كده هيثم لسه عندو باقى رزق مع الأرباب .. * مجلس المريخ المحترم من جانبه حتى تاريخ اللحظة فشل في اصدار قرار بخصوص هيثم .. * اللجنة قالت رفعت الحيثيات للمجلس .. * الموضوع ما داير ليهو حيثيات .. * واضح زي عين الشمس .. * حيثيات شنو كمان ؟ * زول عملتو ليهو مجلس محاسبة مرتين وما جاء .. * دى كمان دايرة ليها حيثيات وقومه وقعده ؟ * المريخ لن يستطيع معاقبة هيثم .. * والمريخ قصد أن يتأخر في اصدار العقوبة حتى يتدخل الأجاويد .. * والحنك ده إحنا عارفنو من زمااااان .. * إنتو وقت ما بتقدرو على العقاب بتعملو لجنة محاسبىة ليه ؟ * حاجة تكسف .. * في الهلال سيدى بيه لسه ما جاء .. * الذى يبدو أن والدة سيدى بيه قد تأثرت بوالدة سادومبا .. * أصلو المرض في أفريقيا بيعادى .. * في أفريقيا لو في زول (عطس) في غانا بتلقى ناس سيراليون جاتهم (نزلة) .. * المرض في أفريقيا بيتنقل بطريقة سلسله جدًا .. * ولذلك نقول إن جرثومة المرض انتقلت من والدة ساسا لوالدة سيدى بيه .. * وإذا كان غياب البيه هو بنفس سبب غيابات ساسا فإن الحاج عطا المنان مطالب بمعالجة والدته على أسرع وجه .. * مهم جدًا أن يشارك سيدى بيه في بداية الإعداد حتى لا يغيب في النصف الثانى عن الموسم .. * وإذا كان غيابه الحالى بسبب (قوة عين ساكت) فيجب أن تتم معاقبته وبشكل سريع جدًا .. * أهم من سيدى بيه (زوجة كامبوس) .. * في الأخبار ورد أن زوجة كامبوس تقيم الآن في السودان على حساب زوجها .. * والكلام ده عيب على بالقسم .. * نعم نحن عندنا ستين رأى في كامبوس * لو علينا كامبوس ذاتو يكون قاعد على حسابو .. * لو علي أنا كامبوس ده يسكن في الاستاد وإن شاء الله الهوا ينفخو .. * لكن الموضوع أكبر من كده .. * عيب زوجة كامبوس تقيم على حساب زوجها .. * وعيب الهلال يتمسك بنص العقد ويرفض استضافة عائلة كامبوس .. * في النهاية دى حُرمه .. * حُرمه أجنبية .. * والهلال نادى بيحترم الضيوف .. * والموضوع بتاع زوجة كامبوس ده لو صحيح يجب أن تتم معالجته اليوم قبل الغد .. * الحركات دى ما بتشبهنا .. * لو المريخ عمل كده مقبولة منهم .. * لكن الهلال لا وألف لا .. * ناس المريخ طردو صحيفة (الهدف) .. * منعوا الزملاء في (الهدف) من تغطية التدريبات وحرمهم من الأخبار .. * ناس زي ديل ممكن تتوقعو منهم شنو غير الخروج من التمهيدى ؟ * التمهيدى ذاتو كتير عليكم .. * لو ما الهلال ده أبطال افريقيا دى تشموها قدحه عليَّ بالنعمة .. * بلوغ الهلال للمربع الذهبى والمجموعات أربع مرات هو الذى كفل للسودان فرصة المشاركة بأربعة أندية في بطولات (الكاف) .. * والمفروض تشكرونا يا صديق على صالح .. * اشكرونا مرة واحدة في حياتكم .. * رفعناكم من الكونفدرالية للأبطال ولكن حنينكم الشديد للفشل خلاكم دائماً في مركز طيش أفريقيا .. * وعلى فكرة .. * ح تكونو كده لحدى ما الساعة تقوم .. * لأنو (تانى ناصية) عمرو ما ببقى (ناصية) .. * و..و.. * والزول أبو عيون كحيلة ...(بقى يشوف طشاش طشاش) .
