* قبل يومين قال تجار (التمباك) في تصريح نشرته صحيفة (الانتباهة) : (البغلبها راجلها بتأدب حماتا) .. * وتفسير المثل يقول : المرا التى يقسو عليها زوجها فأنها تسعى لفش غبينتها في أم زوجها .. * وتجار التمباك بهذا التصريح يقصدون وزارة الصحة .. * تذكرت هذه التصريح وأنا اطالع تصريحات اهل المريخ بخصوص الإنسحاب من الممتاز .. * ناس المريخ كلو ما يغلبهم الهلال بيفشو غبينتهم في الإتحاد العام .. * الناس ديل مما يشوف ليك الهلال ماشى كويس وامورو ظابطه طوالى بيعمل ليهم حركة بحركتين مع الإتحاد العام .. * حاليا المريخ خايف من الهلال خوف شديد .. * رغم ان النصف الثانى من الدورى لسه بعيد .. * سجل المريخ تسعة لاعبين وهو يخشى ان يكون فارق النقاط بينه والهلال (18) نقطة على نحو ما حدث في موسم (2003 – 2004) .. * عشان كده مرة يهددو بالانسحاب ومرة يفاوضو نجوم الهلال ومرة يقولو (العارف عزو مستريح) .. * بصراحة يا جماعة جمال الوالى معذور .. * جمال الوالى في فترة التسجيلات الاخيرة دى سجل (18) لاعبا .. * تسعة لاعبين دفع ليهم قروش ودخلوا كشف المريخ .. * وتسعة لاعبين دفع ليهم قروش عشان يطلعو من كشف المريخ .. * أنا العاجبني في جمال الوالى إنو بيدفع للزول لحظة التسجيل ولحظة الشطب .. * ودى ميزة كويسه ما بتتوفر إلا عند عزو .. * في زمنا ده نادر جدا تلقى ليك زول يدفع في الحالتين .. * هسه حتى (المنشار) بقى ما بيقطع بالجهتين .. * لكن عزو ده خطير .. * بدفع للداخل وبدفع للمارق .. * عزو ده ممكن يدفع لللاعب المشطوب أكتر من اللاعب المسجل حديثا .. * ولذلك نحن نجد له العذر عندما يخطئ على الهواء المباشر .. * بمناسبة الهواء مباشرة .. * أكتر حاجة تعبت مع رؤساء الهلال هى (الإذاعة) .. * اى رئيس عايز يترشح لرئاسة الهلال بتكون (إذاعة الهلال) ضمن برنامجه الإنتخابى .. * يقول ليك ح نعمل (إذاعة هلالية) .. * لاحظ للحاجة دى بتلقى واحدة من اهم برامج المرشحين الإنتخابية هى (إذاعة الهلال وبنك الهلال) .. * ولحدى يوم الليلة لا عملوا إذاعة ولا عملوا بنك .. * حتى الدكاكين كسروها .. * ما سمعنا ب(هنا صوت الهلال) .. * وبعدين يا صلاح إدريس انت قايل الإذاعة دى بتجيب لينا كأس ؟؟ * هسه عليكم الله يا جماعة مشكلة الهلال كلها بقت في الإذاعة ؟؟ * يعنى خلاص ما عندنا مشاكل غير الإذاعة ؟؟ * الإذاعة ما بتجيب لينا قوون ولا بتجيب لينا كأس خارجى .. * خلونا من الحنك ده .. * وبعدين عشان ما تفرحوا ساكت الإذاعة ذاتها ما إنجاز .. * البلد دى كلها إتملت إذاعات وكافتريات وحبش .. * إيمان لندن قالت دايرة تعمل ليها قناة .. * أنا بتمنى من المرشحين يشيلو حكاية (إذاعة الهلال) دى من برامجهم .. * الإذاعات في بلدنا دى بقت زى التلفونات الصينية .. * إزعاج ساكت .. * والهلال ما ناقص إعلام ، الهلال ناقص بطولات .. * شبعنا من البطولات المحلية دايرين بطولة افريقية .. * وإحنا ما عندنا مشكلة في الرئيس القادم .. * المهم الرئيس يكون هلالابى .. * ما يطلع لينا زي جمال الوالى .. * أمبارح صلاح إدريس في عمودو قال جمال الوالى مريخابي بالتجنس .. * غايتو جنس غايتو ؟؟ * يعنى الزول ده إتعلم المريخ وهو كبير .. * وعلى فكرة صلاح ادريس لو ما قال كده إحنا عارفين الحاجة دى .. * الشغل البيعمل فيهو جمال في المريخ واضح إنو هو شغل زول إتعلم الكرة كبير .. * وعلى بالنعمة إحنا عارفين حاجة .. * وعارفين كمان منو العارض موضوع كابتنية علاء الدين .. * إنتو مش علاء ده صاحب هيثم ؟؟ * طيب ما تكلمو يحل ليكم المشكلة دى ؟؟ * علاء لو كان بقى الكابتن كان بيحل ليكم مشكلة هيثم .. * الجماعة قالوا لمحمد الشيخ مدنى أدخل واسطة خير في موضوع هيثم .. * وكلموا اسامة عطا المنان برضو .. * والله لو كلمتو اوباما ما بيحلكم .. * ومن هسه أنا بقول ليك احسن إنتو تعتذرو لهيثم .. * قصة هو غلطان ونحن ما بنعتذر وموروثات المريخ ده كلام ساكت .. * الزول ده تلاتة إجتماعات ما جاء للجنة .. * ومجلسكم البعرفو انا ده ما بيقدر يعاقب ليهو زول .. * وعشان الموضوع ما يبقى شكلو شين إحنا شايفين يفترض تمشو لهيثم في البيت وتشيلو معاكم فواكه ودولارات وتعتذروا ليهو والمشكلة تتحل .. * يعنى هى بقت على هيثم .. * الحضرى ده عمل فيكم السبعة وذمتها وما في زول قدر يحاسبو .. * وهسه هيثم برضو ما في زول بيقدر يحاسبو .. * اكسبو زمنكم وامشو للرجال ده في البيت وإعتذروا ليهو وخلو يجي ينزل التمارين عشان شهر اطناشر يمشى اهلى شندى يختم حياتو .. * بس انا خايف من حاجة .. * خايف هيثم ما يقبل إعتذاركم .. * و..و.. * وتانى لو قربت منك ...(أبقى بيلو) ..
