بالعربي الكسيح - محمد الطيب الامين * ترك العادة اصعب من (أكل الضفادع) .. * ممكن تأكل (ضفدعة في الفطور) أسهل من إنك تترك عادة تعودت عليها .. * ولذلك مأمون حميدة قال الضفادع فيها (بروتينات) .. * مأمون حميدة يريدنا أن نتعود نحن على أكل الضفادع حتى يتفرغ هو لأكل (الضأن) .. * لكن تلقاها عند الغافل يا مأمون حميدة * إحنا أذكى من (بروتين الضفدعة) .. * مأمون حميدة دايرنا نأكل ليهو (الضفادع) في الفطور بينما (البعوض) يجى يأكلنا في العشاء .. * شن فايدة البروتينات والبعوض ما خلى فينا قطرة دم * المهم .. * العادة صعب تخليها .. * وأهلنا بيقولوا : (الخلى عادتو قلت سعادتو) .. * وبما أن ذلك كذلك فإن مشاركة المريخ في سيكافا هى عادة .. * عادة ومع الأيام بقت طموح .. * ودى مشكلة العادة طبعاً .. * العادة لما تخليها تسرح بتبقى ليك طموح .. * حالياً ناس المريخ سيكافا بقت ليهم طموح .. * سيكافا دى بتقوم عشان المريخ .. * زمان مش ريكاردو قال : (تشكيلة الهلال عمر بخيت وأى عشرة لاعبين) * مش قال كده ؟ * هسه سيكافا هى : (المريخ وأى 15 فريق) .. * والغريبة المريخ هو البيدفع قروش سيكافا وبعد ده ما بشيل الكأس !! * هو الفريق نمرة واحد في سيكافا لكن لما سيكافا تبدأ بيكون هو (تانى الطيش) * واهمية المريخ في سيكافا تكمن في اهمية (جيب جمال الوالى) .. * يعنى اتحاد سيكافا (ده لو سيكافا عندها اتحاد اصلاً) ، اتحاد سيكافا بقرر انطلاقة البطولة على حسب مواعيد جيب جمال الوالى .. * والشغلانية دي بقت ليهم عادة .. * اتحاد سيكافا ذاتو اتعود .. * شدة ما اتعود بقى يعمل (سيكافتين) في السنة .. * وكمان بقى يتفنن في الاسماء .. * مرة سيكافا ومرة حوض النيل .. * غايتو جنس غايتو * غداً المريخ (المتعود) يواجه فريق عزام في دور الثمانية .. * أنا مستغرب عزام ده وصل دور الثمانية كيف ؟ * عزام ده أمبارح خليتو قاعد جنب الدكان في حلتنا مع ناس عاصم وهشام * كيف وصل هناك ؟ * غايتو عزام ده أول مرة يشارك في سيكافا .. * ما حصل ليهو الشرف قبل كده .. * كده اتخيل فريق زي عزام ده يلعب في الابطال * اتخيل بس !! * يقول ليك : (اليوم الترجى التونسى يواجه عزام في الأبطال) !! * الهلال السودانى يتحدى عزام في مرحلة المجموعات !! * إنتو الفرق دى بتجيبوها من وين ؟ * والله أنا مستغرب في اسماء الفرق دى * المصيبة إنو عزام ده يتعود .. * يتعود ويبقى زى (فريق عزو) .. * والتعويدة شينة .. * هسه صلاح إدريس ده اتعود على حاجة شينة جداً .. * حاجة ثقيلة .. * حكاية نبذ رؤساء الهلال دى بقت عادة عند صلاح إدريس .. * الراجل اتعود على كده .. * صلاح ادريس (ما خلى جنبة للبرير يرقد عليها) وجاء وكرر ذات النقد مع الحاج عطا المنان وشيخ العرب وطه على البشير وحتى البابا وحالياً الكاردينال * الرئيس الوحيد الذى علاقة الارباب جيدة معه هو (الفريق الأكثر ادهاشاً) عبد الرحمن سر الختم .. * صلاح إدريس يثبت يومياً أنه (أنانى) بدرجة مشير .. * لو الأنانية بالرتب قطع شك صلاح ادريس بيكون بقى (لواء) أو بكون بقى (فريق ركن) .. * اتعود ينتقد الرؤساء بطريقة لا تتماشى مع أدب الهلال .. * يبخس صلاح ادريس من قدر رجالات الهلال ويتعرض لمسائل شخصية صعبة جداً . * لم ينتظر صلاح إدريس حتى يرى ماذا يفعل الكاردينال فقد حاربه قبل الانتخابات بشهر .. * بشَّع صلاح ادريس بالكاردينال بعد أن بشَّع بالكيماوى .. * أنا كنت اتمنى أن يفوز (صلاح إدريس) برئاسة الهلال حتى ينتقد لنا (على أحمد) * صلاح ادريس لو فاز برئاسة الهلال سينتقد على احمد الملحن .. * من يتعود على الشئ صعب ان يتركه .. * ومهاجمة رؤساء الهلال اصبحت عند الارباب عادة سرحت وتطورت فأصبحت طموح وغاية .. * شخصياً بتوقع إنو صلاح إدريس لو فاز برئاسة الهلال يقوم يستقيل أو يهرب عشان ينتقد الرئيس الجديد .. * بتوقع كده .. * وأى زول طبعاً حر في (توقعاتو) .. * نحن والله نخجل إنابة عن صلاح ادريس لأن الدور الذى يلعبه الان دور خجول ولا يشبه الكبار .. * في صفحته الاخيرة سخر صلاح ادريس من الكاردينال والمجلس بشكل قاسى جدًا .. * أطلق صلاح ادريس اسم (الكاردينالي) على الكاردينال ونحن لا نفهم ماذا ينقص هذا من أشرف .. * هل يمكن أن ينادى الكاردينال صلاح ادريس باسم (صلاحي) مثلاً ؟ * كنا سنكون سعداء إذا وجه صلاح نقده القاسى لرؤساء المريخ حتى ينال منهم ويبخس المريخ . * ولكن مشكلة صلاح متخصص في اهل البيت .. * متخصص فينا عديل .. * صلاح ادريس لو بكى برتاح من هذه العادة دى ولكن صلاح يحتاج لعين على سبيل (الإعارة) يبكى بها ويعيدها لصاحبها .. * و..و.. * واعذريني الدمعة ديا ...(بأكلها بالعصيدة) . *