خربتوا لينا سمعة المجموعات...المجموعات انتهت يا رجالة !!...المجموعات بقت اي كلام يا جدعان !! """""""""""""""""""""""""""""""""""""" ناس (طيور الجنة) ديل – نلعب معاهم كيف؟...وهم كلهم داخلين للمجموعات بي (بزازاتهم) """""""""""""""""""""""""""""""""""" ديل لا قدرنا...ولا مستوانا...ولا عندهم تاريخ...الاندية الكبيرة كلها (طارت)...نحن البقعدنا شنو مع (النغنغ) ديل؟ """""""""""""""""""""""""""""""""""""""""" · المجموعات السنة دي في بطولة الاندية الافريقية للابطال (هملة). · عايرة وادوها سوط. · حمام مغربي. · حمام سوداني. · حمام مصري. · يوجد في المجموعات كل انواع الحمام. · حمام بكل الانواع. · الحمام السوداني امس كان لابس (اخضر). · عشان ما تلخبطوا ساكت. · السنة دي الما بيصل (المجموعات) عمره تاني ما بيصل. · لا بصل. · ولا فجل. · المريخ خلوه. · مجموعات قاعدة في السهلة. · مفتوحة تكية. · جنينة من غير بواب. · الناجح بيدخل. · والراسب بيدخل. · زي مدارس الزمن دا. · ما بعاينوا لي نسبتك ..بعاينوا لي قروشك. · الطالب في المدرسة الخاصة ما بقولوا ليه انت نسبتك كم؟. · بقولوا ليه ابوك شغال شنو؟. · مجموعات شنو؟..والله لو عارفنها كدا كنا نزلنا (الكونفدرالية). · الكبار كلهم نزلوا (الكونفدرالية). · (سانغا) كان ممكن يعملها. · كان نخليها لي (سانغا). · دي ايام (الصغار). · دا زمن (الحمام). · مجموعات لو قلت فيها (وه) ..5 اندية من الاندية الوصلت المجموعات تطير. · اندية كلها (حمام). · كديسة ممكن تفرتكها. · جيبوا ليكم (كديسة)...الاندية دي كلها بتطير. · مجموعات رأس مالها (كديس). · كورة مجنونة فعلا. · لا بتعرف الكبار ولا عندها احترام للتاريخ. · الاهلي – الترجي – الرجاء - ليوبار ...كلهم برة. · دا زمن (الحمام). · السنة دي (المجموعات) مفروض ما يتلفزوا مبارياتها في بي ان سبورت. · تعب ساكت..لو تلفزوا المباريات. · التلفزة كتيرة عليها. · كفاية عليها (104). · ولا في زول مفروض يحضر ليه مباراة من المباريات دي. · مباريات خسارة على (الكرت). · ناس بي ان سبورت مفروض يفكوا (التشفير). · ما في داعي ليه. · المجموعات السنة دي زي السوق بعد الساعة اربعة...تشتري بي اي حاجة. · السوق بعد اربعة بيفرش. · الطماطم والموز بيرقد في الواطة. · كوم – كوم. · بي اي حاجة بتشتري ..وتملأ قفتك. · ما عندك اصلو مشكلة. · خلوه المريخ. · في زول بيصدق ان يخرج (الاهلي) المصري امام فريق المغرب التطواني. · فريق اسمو زي (البقالة) اخرج فريق القرن في القارة الافريقية ...وصاحب اكثر الالقاب القارية في القارة السمراء. · التطواني دا (ساردين)؟. · شكولاتة جديدة؟. · التطواني دا جنسو شنو؟. · طبق فول؟. · محشي؟. · بكسويت؟. · محطة مواصلات؟. · عاوزين نعرف بس. · الاهلي المصري كان قد خسر في المغرب 0 / 1. · وجاء الاهلي المصري في مباراة الاياب وكسب المباراة بنفس نتيجة التطواني في المغرب ليعادل الاهلي في الاياب نتيجة مباراة الذهاب. · الاهلي المصري خرج بالضربات الترجيحية بعد ان اضاع له محمود حسن ترزيجيه...(كورتو مشت شبرا). · واضاع حسام غالي كابتن فريق الاهلي ضربة اخرى ...كانت سبب في ان ينزل الاهلي ليلعب في الكونفدرالية. · التطواني دا في المجموعات إلّا يغسل لي اعمامك. · خربتوا لينا سمعة (المجموعات). · المجموعات انتهت يا رجالة !!. · المجموعات بقت اي كلام يا جدعان!!. · هسع (المجموعات) دي فرقها شنو من (سيكافا)؟. · بقيتوا تنظموا لينا سيكافا في (المجموعات). · الكورة انتهت. · افريقيا انتهت. · المجموعات بقى ما عندها اي فرق من (سيكافا). · بقينا ولا بنستمتع بالمجموعات. · بقت فاتحة ساكت. · زي (طب) الزمن دا. · الطالب تلقاه ولا شايل (احياء). · بعد خمس سنوات تشوف زولك ذاتو حايم في (الحوادث) ولابس (الروب) الطبي. · دكتور عديل كدا. · وبدخل غرفة العمليات كمان. · الزمن دا يكون عندك (قروش) بتبقى اي حاجة. · عاوز تبقى (دكتور) بتبقى دكتور. · ولا في مشكلة. · بي قرشك!!. · عاوز تبقى (مهندس) بتبقي مهندس. · ولا في مشكلة. · بي قرشك!!. · عاوز تدخل البرلمان بتدخل البرلمان. · ولا في مشكلة. · بي قرشك!!. · عاوز تدخل المجموعات بتدخل المجموعات!!. · ولا في مشكلة. · بي قرشك!!. · عندك (قرش) تعمل اي شيء. · انتهى زمن الشطارة والموهبة والاخلاص. · انتهى زمن الشجاعة...والجسارة والتاريخ. · عندك قروش ..انت احسن زول. · انت بطل. · اشجع زول. · افضل زول. · هسع عليكم الله نحن (مجموعات) بدون الاهلي المصري نعمل بيها شنو؟. · ديل نقعد معاهم كيف؟. · ديل لا قدرنا. · ولا مستوانا. · ولا عندهم تاريخ. · ناس (طيور الجنة) ديل – نلعب معاهم كيف؟...وهم كلهم داخلين للمجموعات بي (بزازاتهم). · بي مرايلهم. · الاندية الكبيرة كلها (طارت)...نحن البقعدنا شنو مع (النغنغ) ديل؟. · ديل (نغنغ) ساكت. · كنا ح نضرب الاهلي المصري جوة وبرة. · ونخلي ليك (الفضائيات) المصرية تقعد (تولول). · الفضائيات المصرية كلها تبقى ليك زي (امينة رزق) في مسلسل (ليلة القبض على فاطمة). · المسلسل كله بتبكي وتعيط ..وفردوس عبدالحميد بتنحس فيها. · ويشكوا ليك من (بويا). · ويشكوا ليك من (مساوي). · ويشكوا ليك من بشه. · ومن كاريكا. · المجموعات انتهت. · المجموعات خلاص بقت اي كلام. · بقت هملة. · تاني ما في زول يقول لينا المجموعات. · نحن ذاتو ما بنفرح بيها. · البفرحنا شنو بالحمام دا؟. · المريخ خلوه. · انتوا شفتوا (سموحة). · سموحة وصلت المجموعات. · سموحة دي عشان تفكيركم ما يمشي بعيد. · سموحة دي فريق مصري. · يعني ما صومالي. · ولا كيني. · ولا من تنزانيا. · في زول فيكم سمع بي (سموحة). · ابدا..ما حصل. · سموحة الفريق الذي يحتل المركز رقم (15) في الدوري المصري ...وهو مهدد بالهبوط وصل لمرحلة المجموعات. · تقولوا لي (مجموعات). · يعني الاهلي الخرطوم لو كان بيلعب في البطولة الافريقية كان وصل للمجموعات. · النسور. · هلال الفاشر. · اي فريق كان ممكن يصل للمجموعات. · سموحة في المجموعات ..تقولوا لي مجموعات. · الغريبة (الكونفدرالية) ولعت نار. · الحكاية اتعكست. · اي حاجة اتغيرت. · الكونفدرالية بقت الاقوى. · الرجاء المغربي – الاهلي المصري و الزمالك المصري – النجم التونسي – الافريقي التونسي – الترجي التونسي ...اسيك العاجي ..فيتا كلوب الكونغولي..ديل كلهم بلعبوا في الكونفدرالية. · الجماعة ديل كلهم بتنافسوا على لقب البطولة الثانية في افريقيا. · تونس كلها نزلت الكونفدرالية. · تونس كورتها انتهت. · ومصر كورتها انتهت. · الهلال والمريخ لو ما عملوا شيء السنة دي عمرهم تاني ما بعملوا حاجة. · دي فرصتهم. · الهلال وصل للمجموعات بي اقل مجهود. · من غير اي تعب. · رغم ان الكبار كلهم طلعوا – لكن الهلال ظل هو الكبير. · اصلا البطولة دي بطولة (حمام). · مع ذلك ...الهلال ضرب الحمام القابلو كلو ..وان كان (الحمام) في المباريات الاخرى هو الذي كسب. · يعني ما في زول يقول لينا كي ام كي (حمام). · او يقول لينا الرصاصات (حمام). · او سانغا (حمام). · الحمام كسب في كل المباريات الاخرى. · ضربنا (حمام) المراحل الاولى ..وداخلين على حمام (المجموعات). · كمان قالوا ليك المجموعات السنة دي فيها جنس (حمام). · حمام (قُلاد). · حمام زي (الجداد). · الهلال في مشواره الافريقي استقبلت شباكه هدف وحيد. · وتعادل وانتصر خارج ارضه. · خسر مرة واحدة. · وانتصر في كل مبارياته بام درمان. · فعل كل ذلك باقل مجهود. · وناس الاهلي المصري طاروا. · الرجاء المغربي طار. · الترجي التونسي طار. · ليوبار طار. · وجابوا لينا (الحمام) دا. · المريخ خلوه. · التطواني دا هسع ما حمام؟. · سموحة دا ما حمام؟. · اتحاد الجزائر ما حمام؟. · نحن الفرق دي اول مرة نسمع بيها. · لا شفناها ولا سمعنا بيها. · ولا بنلعب معاها في المجموعات. · المريخ خلوه. · الصفاقصي برضو طار. · والصعد منو؟. · فريق اسمو مولدية المعلمة. · هسع دا اسم فريق بيلعب كورة. · الفريق دا رئيس مجلس ادارته ما بكون عارفو. · في حمام اكتر من كدا. · الحمام السنة دي رقد في المجموعات. · كمان جابت ليها (علمة). · الحمام دا انتوا بتجيبوه لينا من وين؟. · حمام ساي. · ................ · ملحوظة : الفريق لمن يكون (حمام) ويصل المجموعات بيبقى فيه حلاوة ضرب. هوامش · الهلال والمريخ من السودان في المجموعات. · ووفاق سطيف واتحاد الجزائر ومولدية العلمة من الجزائر ايضا في المجموعات. · ثلاثة اندية من الجزائر في المجموعات. · مولدية المعلمة اخرج الصفاقصي عبر الضربات الترجيحية ..ليكتمل حمام المجموعات. · حمام جد السنة دي. · تاني لا تقول لي توانسة. · ولا تقول لي مصريين. · هسع ناس سموحة والتطواني والمريخ يلعبوا معاهم كيف في المجموعات. · خربتوا لينا سمعة المجموعات. · لكن (الترجي) طلع اي كلام. · الترجي طلع حاجة تانية. · اي حاجة غير الترجي. · دفاع الهلال اصبح عنده قدرة على الالعاب الهوائية وتميز فيها بسبب اتير توماس ومعاوية فداسي. · في اكثر من كورة تميز فداسي واتير وطلعوا كور (دبل كيك) بصورة لا تتوفر حتى عند المهاجم. · فداسي كان النجم الاول في المباراة. · فداسي دافع بامتياز ..وهاجم باقتدار. · كفي ان هدف المباراة كان من عكسيته. · كذلك احسن واجاد اتير توماس. · اما مساوي فقد اصبح (كاريكا) اخر. · في اي مباراة يجيب ليه قون. · تاني يعمل ليكم شنو؟. · فريق سانغا فريق خطير ..وكان يمكن ان يخرج الهلال يمتلك القدرة والسرعة والمهارات. · لكن مع ذلك احسن الكوكي في التعامل معه. · المحيرني (سموحة) مهدد بالهبوط في الدوري المصري ..ووصل المجموعات. · سموحة كان قد تخطي انيمبا وليوبار قبل الوصول لمرحلة المجموعات. · سانغا كفى انه تجاوز القطن. · لذلك يشكر الهلال على انتصاره ذهابا وايابا على هذا الفريق (الما ساهل). · ........... · عاجل : الترجي دا (الكونفدرالية) كتيرة عليه.