موسيقى * صوت والله الواحد كورتو زي الجنيه الدهب يلعب من سنة اسكت لغاية هسع وكورتو ما فكت. يشوت ليك الشوتة عيار 21 الحارس قدر ما يدق فيها ما يقدر يوزنه. موسيقى المذيع: ده واحد صائغ بشكر في لاعب عاجبو.. يعني الليلة حنكون في ضيافة أخوانا الصائغ. المعلق : بيمر ويواجه المرمى ويشوت وقوون * المذيع: الصائغ لامن يشجع الكورة يشبها دائمًا بأغلى حاجة عندو وهى الذهب.. عشان كده بنسمع بالرأس الذهبي والرمح الذهبي وكده.. وحتى أخونا بلاتر شكلو كان صائغ عشان كده فكر في الهدف الذهبي ولا من حاول يغيروا استعان ببنات أفكاروا واستعان بالفكر الصياغي وصل للهدف الفضي. وكلنا عارفين أنه أول فريق استفاد من فضة بلاتر فريق اليونان أمام الشيك. موسيقى * المذيع : الناس لا من يلعبو أي رياضة بيكون تقييمهم لبعض تقييماً صياغياً بحتاً. الأول بيأخد ميدالية ذهبية والتاني ميدالية فضية والتالت ميدالية برونزية وده بيوضح لينا تدخل أخوانا الصياغ في شغلانية التقييم. المعلق: خطرة خطرة وقووووون * المذيع: لا من الصائغ يقفل محلو ويمشي للإستاد عشان يحضر مباراة طوالي بيخش المقصورة ده لو كان صائغ تمام ما صائغ نص كم، ودائماً بكون جايب معاهو عمة احتياطي عشان الصياغ بحبو حريق العمم يعني لو الفريق بتاع الصائغ لاعب مع فريق تعبان بكون شايل معاهو زي أربعة أو خمسة عمم احتياطي ولو لاعب مع فريق صعب بكون شايل عمه عمتين بالكتير؟ طبعاً الكلام ده كان زمان قبل ما يمنع حريق العمم وأى نوع من أنواع الحريق داخل الاستاد اللهم إلا وليع السجاير وده يمكن يكون سبباً أساسياً في عدم دخول معظم الصياغ الاستادات. المعلق: قوووووووووون * المذيع: أخوانا الصياغ عندهم لغة بتاعة التشجيع الخاصة بيهم يعني ممكن تسمع واحد يقول والله الباك ده تلقاهو لاصق في المهاجم زى الكردان ويقعدوا في كرسي جابر، أو تسمع واحد يقول شات ليك كورة مدورة زي الخاتم أو عكس الكورة زي الحلق ولا من يتكيف من لاعب شديد بكون اللاعب بستاهل وزنو ذهب. موسيقى * المذيع: والصياغ لأنهم بحبو الدق كتير وكلو مرة يغيروا الدقة بنلقى معظمهم بشجع المدافعين شديد وكلهم بحبو الكورة الايطالية لأنها بتعتمد على دق الدفاع يعني ممكن جداً يطلعوا دقة اسمها دقة (نستا) أو (كشت مالديني).الصائغ طلع زعلان من الكورة وقال ده لعبوا (فالصو) زي الذهب المغشوش. هدايا الحلقة: * رباطابي معزوم فطور عند أنصار سنة، أثناء الأكل صبت مطرة شديدة والعرش قعد يطقطق، الرباطابي لاوز وقال لأنصار السنة: حالة السقف كيف؟ قال ليه: مالك خايف؟ السقف كويس. وقعد يسبح لربو، رد الرباطابي: بس أنا خايف يسجد ونحن بنفطر!. * نسبةً للسخانة الشديدة أفاد شاهد عيان بأن اللافتة الخاصة بشاي الغزالتين في السوق العربي: أفاد بنزول الغزالتين وجروا على الضل. حالة صعبة!. * زمن الاستعمار منع الحاكم العام (الكرشة) أو الكمونية وأرسل مناديب خواجات للجزارات في الأسواق لمنع الناس من شراء الكرشة وكان يقول لكل من يقترب من الجزار بي تحت تحت (come on near) أي لا تقترب من الجزار، فأطلق المواطنون كمونية على الكرشة، الباقي لينا أم فتفت والفشفاش!. * الأستاذ: ما هو مفرد مصائب؟ التلميذ: ما عندها مفرد يا أستاذ، الأستاذ: كيف؟ التلميذ: كلها بتجي مع بعض!. * مسطول رومانسي كتب لحبيبته: " كم تمنيت أن أكون أحول كي أراك مرتين..."!. * خلقت المرأة لتسألك: من قابلت؟ ومن اتصل بك؟ ومن أكل معك؟ ومن ... ومن... عشان كده سموها بالإنجليزي: Woman!. * لحظات رومانسية صادقة: قالت ليه: توعدني أن حبك لي ما ينقص؟ قال ليها : توعديني أن وزنك ما يزيد؟!. * هل تعلم: أن البطة تعيش مع ذكر واحد فقط فإذا مات تبقى وحيدة طول العمر. قمة في الوفاء، اللهم بطبط جميع النساء!. * المرأة: تتحجب وتصلى وتصوم وتقرأ القرءان، لما تتكلم عن تعدد الزوجات تطلعك كافر!. * مرت طائرة فوق أدغال أفريقيا فسأل الشبل أبوه الأسد: ما هذا الحيوان الضخم؟ الأسد: إنها طائرة كبيرة، الشبل: وهل تؤكل؟ الأسد: يؤكل ما بداخلها ... زي السردين!. * مسطول عيان لابس تي شيرت فيهو علم السودان، الدكتور سأله بتحس بالألم وين؟ قال ليه: تحت كسلا!. * سألت قلبي لماذا لا أنام الليل؟ رد قلبي: عشان نومته العصر وعامل فيها عاشق!. * أدروب معزوم عند صاحبه غداء، زوجة صاحبه طباخة طبيخ شديد، الأكل عجبوا لما جاء طالع قال لي صاحبه: مرة بتاعك لما تجي تطلق كلمنا!. * الامتناع عن التدخين يحتاج إلى: قرار صارم، هدوء تام، تفكير عميق، كباية شاي وسيجارة!. * الأمريكية: تنجب الأطفال كدليل حب ووفاء والتزام * الفرنسية: تنجب الأطفال لتمنحهم حياة جديدة وتضمن لهم حقوقهم * الإنجليزية: تنجب الأطفال لكي تحس بطعم الأمومة * والعربية: تنجب الأطفال فقط لتضمن بقاء زوجها... وفي الآخر بتطلق!. * خاتمة: * يظل التشجيع وحب الأنصار لأنديتهم شئ أساسي والصياغ وسوق الدهب أغلبهم هلالاب مع أن لون الدهب أصفر. * مع تحياتي،،، * د. أحمد دولة