* الظلم هو وضع الشئ في غير موضعه وهو الذي جاوز العدل الى الجور وكذلك من تعدى حدود الله من الحلال الى ما حرم الله عليه، فتجاوز طاعته الى معصيته (ومن تعدى حدود الله فأولئك هم الظالمون). كلمة الظلم ومشتقاتها وردت في كتاب الله أكثر من 313 مرة، قال ابن الجوزي "الظلم يشتمل على معصيتين، أخذ حق الغير بغير حق، ومبارزة الرب بالمخالفة والمعصية" والمعصية هنا اشد لأنها لا تقع إلا على الضعيف والظلم ينشأ من ظلمة القلب لأنه لو استنار القلب بنور الهدى لاعتبر. الظلم ثلاثة: * ظلم لا يغفره الله وهو الشرك به. * ظلم يغفره وهو الذي بينه وبين عباده. * ظلم متروك بين العباد أنفسهم، اذا غفر العبد لأخيه غفر الله له وان لم يغفر لا يغفر الله له. * أول ظلم في الدنيا هو قتل قابيل أخاه هابيل، جاء في الحديث "يؤتى يوم القيامة بالظالم والمظلوم فيؤخذ من حسنات الظالم فتزداد في حسنات المظلوم، فإن لم تكن للظالم حسنات أخذ من سيئات المظلوم فتطرح على الظالم (ربنا انك من تدخل النار فقد أخزيته وما للظالمين من أنصار) تقول الملائكة وهي تنزع أرواح الظالمين أخرجوا أنفسكم إلى سخط الله ولعنته (ولا تحسبن الله غافلاً عما يعمل الظالمون إنما يؤخرهم ليوم تشخص فيه الأبصار)، قال رسول الله (صلى الله عليه وسلم) في الحديث القدسي انه سبحانه وتعالى يقول (يا عبادي إني حرمت الظلم على نفسي وجعلته بينكم محرماً فلا تظالموا). * من مشى مع ظالم يعينه وهو يعلم انه ظالم فقد خرج من الإسلام، ويقول انه (إذا رأيت أمتي لا يقولون للظالم منهم أنت ظالم فقد تُودع منهم). ب/ الظلم في الشعر والغناء: * وظلم ذوي القربى أشد مرارة على المرء من وقع الحسام المهند * ظالمني وطول عمري ما ظلمتك يوم وتلومني يا قاسي وكان حقي ألومك (أحمد المصطفى) * ظلموني الناس ونسوى هواي أشكي وأبكي آلامي براي ظلموني الناس * ظلموني الناس وتجنوا على والقالوا كتير علي ما شوى (الكاشف) * أنا شفت ناس ظالمين كتير بس أنت أظلم من ظلم (ترباس) * يا ظالم يا قاسي لو تدري الحقيقة ألوان من عذابك ما قادر أطيقه * يكفيني عذاب وأنساك أنا لو أعرف طريقه (ابراهيم عوض) * ضيعوك ودروك أنت ما بتعرف صليحك من عدوك * الله ياخد ليك حقوقك ويجازي الظلموك * (وردي) هدايا الحلقة: * الأستاذ بينده في أسماء الطلبة يقول الطالب الكراريس المجمرطه، الطالب قال ليه يا أستاذ أنا اسمي الكرار يس المجمر طه!.. * الرباطابي زهجان من الدنيا ومشاكلو كتيرة قال مشاكل الدنيا بقت زي صندوق مناديل الورق كل ما تجر ليك واحد يمرقن ليك عشرة!. * الرباطابية راكبة القطر مع ولدها، القطر امشي ويقيف وصلوا بعد 3 أيام الكمساري جاها أدته حق تذكره واحدة قال ليها لازم تقطعي تذكرتين ليك ولي ولدك ده بي شنبه، قالت ليه شنبه ده قام ليه في قطركم ده!. * تخيل كدة وانت بتآكل فراخ ورايح تغسل أيدك ولقيت كتكوت بقوليك ما شوفتش ماما!. * دعا صديق صديقه الذي افترق عنه قرابة ال 30 عاماً الى تناول طعام الإفطار في احد المطاعم وفيما هما جالسان اتصلت زوجته فقال لها: أهلاً حبيبتي. حاضر يا عمري تكرمي يا روحي؟ وبعد ان أنهى الاتصال قال له الصديق: ما شاء الله متزوج وليك 30 سنة ولسا بتقول يا حبيبتي ويا عمري السنين دي كلها. أجابه: يا راجل أنا ناسي اسمها!. * أحلى شئ في رمضان انك بتخلي أي حاجة في الثلاجة وانت ضامن إنك حترجع تلاقيها "واحد عنده أخوان كتار"!. * عمك معزوم فطور في المنشية. شاف ليك العصائر أشكال وأنواع والصواني فيها ما لذ وطاب من اللحوم والفراخ والسلطات والشوربة قاموا يصلوا المغرب. الإمام قعد يقرأ سورة التين والزيتون قعد يبكي بعد الصلاة قالوا ليه ما شاء الله خشوعك في الصلاة قوي قال ليهم: فطورنا هناك جك ابري وعصيدة والإمام بيقرأ لينا إذا زلزلت الأرض زلزالها!. * نصيحة للبنات البقارنن شبابنا بشباب تركيا ونحن حنقارن بناتنا مع بنات تركيا زي القارنت البرازيل مع جيبوتي في الكورة!. * يقول الشيخ العريفي: كان واقف جنبي في الحرم المكي حاج مصري رافع أيده ويقول يا رب إنت عارف وأنا عارف وكتر الكلام مالوش لازمه!. * هل تعلم: أن البنت القصيرة ربنا عوض عليها في لسانها!. * قال لصاحبه: نفسي اتزوج لبنانية لان اللبنانيات زي التفاح ولو ما لقيت بتزوج سورية لان السوريات زي الخوخ، رد عليه صاحبه وقال: التفاح والخوخ في يومين بيبوظوووا يا زول أخد ليك سودانية زي التمر خمسين سنة ماتبوظ. يعني يا دفنتك يا دفنتها!. * مرضان كوشتينة جاء داخل البيت لقى ابوه تعبان من الصيام قال ليه يا حاج العشرة الاولى دي مشت معاك كويس لكن العشرة الجاية شكلك حتحرق!. * عمك طالع من عملية عيون ومتابع كورة المريخ مع العلمة الجزائري في التلفزيون والمذيع قال المعز بيلعب لعلاء الدين يوسف، علاء لعمر بخيت، عمر ماشي وبيمرر لبكري المدينة الحاج نادى ولدوا الصغير قال ليه: شوف ناس الهلال ديل لابسين احمر ولا أنا عمليتي ما نجحت!. * واحدة جاته جلطة ودوها المستشفى هي في غيبوبة جاها ملك الموت قال ليها ما تخافي إنت لسع باقي ليك 40 سنة و 5 شهور لما بقت كويسة عملت عملية تجميل وشفط وشد طلعت من المستشفى ضربتها عربية ماتت لما جاها ملك الموت قالت ليه أنت ما قلت لي لسع عندي 40 سنة قال ليها هو دي إنتي؟ والله ماعرفتك!. * جماعة طلعوا من الجامع بعد الصلاة واحد في حوش الجامع وقع مات، الجماعة قالوا يا سلام حسن الخاتمة واحد حلفاوي قال ليهم لكن ده وقع بره التمنتاشر. * رباطاب رسلوا شريط زواج لولدهم في السعودية قالوا ليه اعزل واحدة من البنات نعرسها ليك، الشريط مدته 90 دقيقة الراجل شاف الشريط كله قال ليهم داير البت الفي الدقيقة 42 من الشريط أمه قالت ليه دي عروسه ولا هدف؟!. * خاتمة: * على الرغم ان الله عز وجل قادر على الظلم ولكن لا يفعله فضلاً منه وجوداً وكرماً وإحساناً لعباده وقد منع نفسه من الظلم لعباده فقال (ما أنا بظلامٍ للعبيد)، (وما الله يُريدُ ظلماً للعالمين)، ( وما ربك بظلامٍ للعبيد)، (إن الله لا يظلم مثقال ذرةٍ)، قال رسول الله (صلى الله عليه وسلم) في الحديث القدسي انه سبحانه وتعالى يقول (يا عبادي إني حرمت الظلم على نفسي وجعلته بينكم محرماً فلا تظالموا). * ده كرت اصفر لك أخي فراجع نفسك قبل ان تعطى الكرت الأحمر، ونكير قريب (مش؟). مع تحياتي،،، د. احمد دولة
