السر دوليب لعب في الهلال ونجومية جكسا وصديق منزول وصديق محمد احمد ربما ظلمته واجلسته قصرا على الدكة وقت نمشي نخطب لى ود الخال ...موضوعنا كلو بكون حول هدف مدثر كاريكا نعمل اي حاجة من (تمريرة) هيثم مصطفى – نطلع منها (السمنة) واللوغريثمات وقصص الف ليلة وليلة ونسدد بها حساب الدكان ما كان في احلى من (هوبة) مهند الطاهر ...حولنا عشانها (الطبق)...ومعطنا ليها (النجيلة) * يمكن نحن (سعادتنا) بسيطة...ما اكتر من (قون) يجيبو مدثر كاريكا نهضم بيه (الفول) الما بتهضم دا. * وندفع بيه رسوم الدراسة للشفع. * والكهربة والموية. * ونطلع ليه (السراير) في الحوش. * نرش ليه (الواطة) ...ونعمل ليه الليمون. * ونوزع ليه كراسات (الفيزياء). * نحن كدا. * ما عاوزين لينا جبنة للفول ...ولا زيت زيادة...وقت نشوف هدف كاريكا. * قون كاريكا نهضم بيه (الزلط). * ونركب بيه المواصلات. * ووقت نمشي نخطب لى ود الخال ...موضوعنا كلو بكون حول هدف مدثر كاريكا. * شفتوا لمن قام ..وفات ..وختاها في القون. * بعد (الجري) دا كلو بكرة ابوشيبة بيكتب (تسلل). * ومزمل ابوالقاسم ح يقول ليك مدثر كاريكا عندو ود عمتو بيلعب في الدمازين ...عندو كرتين صفر. * علاقة الهدف بالكلام دا شنو؟. * سعادتنا في قون لي (بشه) نمزق بيه (12) روشتة دواء. * البيبيتوا القوا ديل ..ما في حاجة بتشبعهم غير هدف لبشه. * وتلبس جلابيتك البيضاء تاني يوم ما سائل في زول. * ولا بتحتاج لعطر ..عشان عطر هدف بشه اقوى. * زمان كانت سعادتنا في (تمريرة) لهيثم مصطفى ..نقعد نتغالط فيها يومنا كلنا. * التمريرة بتبقى لينا زي (الكوتشينة). * نعمل اي حاجة من (تمريرة) هيثم مصطفى – نطلع منها (السمنة) واللوغريثمات وقصص الف ليلة وليلة ونسدد بها حساب الدكان. * سعادتنا كدا. * ما كان في احلى من (هوبة) مهند الطاهر ...حولنا عشانها (الطبق)...ومعطنا ليها (النجيلة). * وعملنا لينا (نضارة) مخصوصة. * نضارة قراية. * ونضارة شمس. * ونضارة نظر. * ونضارة هوا. * ونضارة هوبة مهند الطاهر. * قعدنا ليها في الدكان..واشترينا لها (الطحنية). * شربنا بيها (القهوة) وسمعنا بيها اغاني صالح الضي لمن يغني (عيش معاي الحب) و(يا طير يا ماشي لي اهلنا). * ما في احلى من انتصار الهلال. * الشارع كلو بتلقاه بيضحك. * يوزع في (الفرح) – متل مناديل الورق. * الموضوع ما عاوز له (جردل). * ولا (جك). * ولا رسوم جديدة. * في الامارات تم انشاء وزارة للسعادة وقد عينت (عهود الرومي) وزيرة للسعادة في دولة الاماراتالمتحدة. * برضو فهم. * شوفوا الناس وصلت وين؟. * ونحن قاعدين نتغالط في فاتورة الكهربة ..ليه جمعوا معاها الموية. * منتظرين (الموية) في الماسورة ...جابوها لينا في فاتورة الكهربة. * الناس بيبحثوا عن (السعادة)...ونحن هنا شغالين لينا ب (الزيادة). * زادوا (الموية). * الناس مرقوا من الحتة دي ...حكومتهم بقت شغالة في شئون السعادة. * ونحن هنا بنتكلم عن ازمة الغاز. * وحاجة آمنة اتصبري. * حاجة آمنة تعمل شنو؟. * تتقطع ليكم. * التعريف (القوقلي) لعهود لرومي يقول : (تشغل عهود الرومي حالياً منصب المدير العام لمكتب رئاسة مجلس الوزراء، حيث تشرف على تنسيق وتنفيذ رؤية الإمارات 2021 والأجندة الوطنية واستراتيجية حكومة الإمارات والاستراتيجية الوطنية للابتكار، والقمة الحكومية، ومركز محمد بن راشد للابتكار الحكومي ونظام إدارة الأداء الحكومي (أداء)، وبرنامج الشيخ خليفة للتميز الحكومي، وجائزة محمد بن راشد للأداء الحكومي المتميز، وبرنامج قيادات حكومة الإمارات، وغيرها. واختيرت الرومي لعضوية مجلس ريادة الأعمال العالمي التابع للأمم المتحدة لتكون بذلك أول شخصية عربية تحصل على هذه العضوية.تحمل عهود الرومي شهادة الماجستير التنفيذي في إدارة الأعمال من جامعة الشارقة ودرجة البكالوريوس في الاقتصاد من كلية الإدارة والاقتصاد من جامعة الإمارات العربية المتحدة، كما أنها خريجة برنامج محمد بن راشد لإعداد القادة). * هذا حسب ما جاء في موقع (الامارات اليوم). * علم والله. * نحن واقفين في نفس الحتة. * شوية (مطرة) بتجهجهنا. * تدخلنا في ضفورنا. * وتقوم نفسنا. * تقفل شوارعنا. * والحكومة تشبكنا ليكم (توخي الحيطة والحذر). * الحكومة الاماراتية استحدثت ايضا وزارة للتسامح ..هذه الوزارة لو كانت عندنا في السودان لرشحت لها بلا تردد الشاعر (السر دوليب) فهو صاحب اكثر الاغنيات تسامحا. * رسالتو في الدنيا دي (التسامح). * هدفو الاول – وقضيته الاساسية. * هو الذي كتب (مسامحك يا حبيبي)..شاكل اي (حبيبة) في الارض واسمع هذه الاغنية سوف تجد (التسامح) يشغل كل المساحات. * هو الذي كتب (ريدتنا ومحبتنا) ، وهي اغنية للفرح والبهجة والاحتفاء بالحب. * وفي الحرب على الوشاية كتب (ما بصدقكم) – ثنائيته مع عثمان حسين تشكل (حقل) من التسامح. * السر دوليب بدأ من عثمان الشفيع الذي ارسل له (للون الخمري) عبر البريد وقبلها كان قد كتب اغنية السباتة (مبروك عليك الليلة يا نعومة) – لاحظوا لهذا التسامح فهو يبارك لنعومة الحبيبة التى تزوجت غيره. * فرحان ليها – ما في تسامح اكتر من كدا. * وغني له محمد ميرغني محفلا للشوق (انا والاشواق في بعدك بقينا اكتر من قرائب). * ليس هناك شاعر سودانيا او عربيا غني للتسامح بمثلما غني السر دوليب. * بالمناسبة السر دوليب لعب في الهلال ونجومية جكسا وصديق منزول وصديق محمد احمد ربما ظلمته واجلسته قصرا على الدكة. * المهم عندنا ان شاعر بهذا التسامح والفضل لعب في الهلال وارتدى شعاره وكان رمزا للتسامح. * مثلما لعب للهلال كرومة. * لو ما عاوزين تعينوا لينا وزير للسعادة ..(التسامح دا اصلو قنعانين منو) – كفاية علينا السر دوليب. * لو ما عاوزين تعينوا لينا وزير للسعادة – جيبوا لينا (رأس حربة) سوبر للهلال. * سعادتنا في (رأس حربة) قاطع. * الهلال في التسجيلات القادمة – التسجيلات التكميلية يحتاج الى (رأس حربة) سوبر. * لو وجد الهلال رأس حربة خطير ..ممكن يعمل اي شيء في الكورة. * الكاردينال اضاف في سجله ..حارس (صاقعة)..ما بتقابل. * حارس اسمه (مكسيم). * واضاف الشيخ موكورو ..الزول دا المرة الفاتت جاب ليه (هدف) العندو (حوامض) كلو من الهلالاب شاله ليه. * الكاردينال إلى الآن في ملف المهاجم المحترف (راسب). * ما جاب ليه اي درجة. * ما تعملها لينا كلها (صور). * وتصريحات. * وجوهرة زرقاء. * عاوزين لينا (مهاجم) قاطع. * مهاجم اجنبي ..ليسجل ذلك في ملف الكاردينال. * صلاح ادريس في فترته اتسجل قودوين وكلاتشي وسادومبا ..إلى الآن عايش بهذه الاسماء في الهلال. * صلاح ادريس ما عمل ليه اي (جوهرة). * مزيرة في الهلال ما عملها. * لكن الناس كلها بتذكر ليه قودوين وكلتشي وسادومبا. * رغم من ان صلاح ادريس في النهاية مرر (كلاتشي) لجمال الوالي. * المهم عندنا الكاردينال جيب ليه (مهاجم) قاطع..عشان يبقى من حقنا نحلم بالبطولة الافريقية. * في وادي دجلة لاعب محترف اسمه (استايلي) وهو هداف الدوري المصري الآن. * اللاعب يتصارع حوله الاهلي والزمالك الآن. * طارق العشري اكيد بعرفه جيد. * هذا اللاعب لو نجح الكاردينال في التعاقد معه سوف يكون تجاوز محطة كلاتشي وقودوين وسادومبا. * نعرف ان الاندية المصرية بتطمع في (السعر) – خاصة اذا كان هناك صراع حول اللاعب ومنافسة لكسبه. * لكن مهما كلف ذلك ..اللاعب سوف يكون مكسبا للهلال. * ما تجيبوا لينا لاعب مغمور. * ولا تجيبوا لينا لاعب سعره 100 الف دولار. * او حتى 300 الف دولار. * هذه الارقام ما بتجيب ليها لاعب سوبر. * كمان يا الكاردينال اوعك تجيب لينا لاعب برازيلي. * نحن فترنا من (النظريات) دي. * فريق الهلال الحالي لا ينقصه غير مهاجم سوبر. * وبعدها سوف يكون الهلال ان شاءالله جدير باي بطولة. * الكاردينال عندما جاء للهلال وعد ب (جيان) الغاني. * وذهب ابعد من ذلك وتحدث عن اسماء عالمية. * وفي النهاية بجيب لينا (جوليام). * تسجيلات شهر مايو ..هي تسجيلات محدودة ..ويتم فيها التعاقد مع لاعب (سوبر ستار). * ما تعقدوا تنظروا لينا ساكت. * وتجيبوا لينا لاعب عمرو (44) سنة ..وترفعوه لينا السماء. * الفيلم دا بقى مكشوف. * ومعروف. * ولا في زول بيدخلو ليكم. * .......... * ملحوظة : شيبوب طبعا امرو محسوم. * هوامش * * هزيمة الاهلي شندي برباعية من مريخ كوستي لو كان فيها فايدة ..فهي حذرت الهلال ..وخلتوا يفتح عينو. * مريخ كوستي انطلق. * وعمل ليه 6 نقاط في فترة وجيزة. * لذلك الحذر واجب من هذا الفريق. * الهلال بقى في اي مباراة عندو هدف تاني. * الهلال في اي مباراة ..عاوز يحافظ على شباكه. * يعني ما بنلعب ساي. * المريخ والامل ..هل يمكن ان تعاد مرة اخرى. * يا ناس الامل قولوا كلمتكم. * الفريق من تكتر اصاباته ..اعرف الموضوع موضوع (فلس). * الجماعة ديل ظاهر عليهم فلسوا. * طارق العشري الجميل انه جعل تمارين الهلال مغلقة. * الزول ظاهر عليه عاوز يشتغل. * وعاوز يشتغل شغل خاص. * جميل ان مدرب الاحمال ..طبيب. * يعني عارف بيعمل في شنو؟. * والاجمل من هذا عودة فتحي بشير ليكون ضمن الجهاز الفني للهلال. * ............. * عاجل : الليلة سمير فضل ايدو بتاكلو. *