نحن بعد ما طلعنا من البطولة الافريقية قبلنا على (جوهرتنا)...انتوا بعد ما تطلعوا ح تقبلوا على وين؟ فريق المريخ الحالي هو (جزيرة الفيل) معدل...مع احترامي الشديد والكبير لفريق جزيرة الفيل اذا كان الهلال بتاريخه كله ح يلعب في سيكافا – عاوزين انتوا بي (علي جعفر) تلعبوا في المجموعات اما امير كمال ..لو شافو (غلطتو) دي اشرف الكاردينال اسبوع تاني ما بقعد ليكم في الكشف * وفاق سطيف وصل الخرطوم وهو يفقد (9) لاعبين من تشكيلته الاساسية ...الناس ديل لو جايين عشان يشاركوا في معرض الخرطوم ، قولوا ليهم معرض الخرطوم انتهى. * كأنهم جابهم (الدرب). * وفاق سطيف قالوا ليك تشكيلتهم امام المريخ امس تموها من فرقة الشاب خالد الموسيقية ..الذي احي حفل في الخرطوم الجمعة الماضية. * الطرف الشمال ..قالوا بتاع (البنقز). * الارتكاز قالوا بتاع (الفلوت). * الناس ديل وصلوا ناقصين. * مع ذلك ..استطاع وفاق سطيف ان يتقدم مرتين على المريخ ليخرج بنتيجة ايجابية في ام درمان. * طلع بالنتيجة العاوزها. * من غير تعب. * الناس ديل (عرق) ما عرقو. * بي اقل مجهود حققوا النتيجة التى يريدون. * وفاق سطيف لعب على الواقف ..واستطاع ان يسجل من (كورتين) من غير ما يقوم نفسو. * ولا قاعدين يجروا. * ولا قاعدين يتعبوا. * شوف عيني ..لا فيهم واحد عرق. * ولا فيهم واحد نفسو قام. * ولا فيهم واحد وقع. * ديل هنا وعلى الواقف بيعملوا فيكم كدا في الجزائر ح يعملوا فيكم شنو؟. * غايتو الله يجيب لينا مباراة الجزائر. * على جعفر في الجزائر ح يقبل القسمة على خمسة. * وامير كمال اذا كان في ام درمان (بجليها) ..في سطيف اكيد يعمل عملية ابيكو. * وفاق سطيف مع انه لعب على الواقف سجل من (كورتين). * امس قلت اقعد احضر المباراة – واشوف الجماعة البتكلمو عن الهلال ليهم 21 يوم ح يعملوا شنو؟. * نشوف فهمهم. * نشوف الفصاحة. * فريق النجم الاول فيه (علي جعفر)..الفصاحة على شنو؟. * نحن لو علي جعفر دا بيلعب في الهلال ..كنا من الاسبوع التاني في الممتاز بنشجع اهلي الخرطوم. * البيجبرنا على (علي جعفر) شنو؟. * نحن طبعا كنا في المباراة قاعدين لينا فوق رأي. * عارفين ما عندهم فريق. * ناس لا عندهم فريق. * لا عندهم قروش. * لا عندهم (جوهرة). * نحن بعد ما طلعنا من البطولة الافريقية قبلنا على (جوهرتنا)...انتوا بعد ما تطلعوا ح تقبلوا على وين؟. * على الاقل الجوهرة باقية لينا موضوع. * يوم نحفر الاساس. * ويوم نبدأ في الطابق الثالث. * ويوم نشيل الدكاكين. * ويوم ننزل السيخ. * ويوم الاسمنت. * الحمدلله (جوهرتنا) مونسانا ..انتوا وقت تطلعوا ح تعملوا شنو؟. * ح تملأوا فراغكم بي شنو؟. * ح تقول لي (اسلام) شنو يا سلك؟. * يمين فريقكم دا يدخل (المجموعات) بي حالتو دي ...علي جعفر من ربيع طه ما تفرزو. * امير كمال هسع بعمل في حركاتو دي – في المجموعات ح يعمل شنو؟. * خلوها المجموعات. * الزول دا في الجزائر ..ح يتصرف كيف؟. * طبعا البحصل ليكم في (الكونفدرالية) – اسوأ من البي يحصل ليكم في الابطال. * احسن تبقوا عارفين. * واحسن الموضوع يبقى ليكم واضح. * احسن كملوا جرستكم كلها هنا...عشان جرسة (الكونفدرالية) ح تكون اكتر. * عشان كدا ابقوا ناس سيكافا ساكت. * زول سيكافا ظاهر. * سيكافا اصلو ما بتغبى علينا. * مواصفاتها كلها بتنطبق عليكم. * يعني ح تروحوا وين من (سيكافا)؟. * العرجا لي مراحها. * اذا كان الهلال بتاريخه كله ح يلعب في سيكافا – عاوزين انتوا بي (علي جعفر) تلعبوا في المجموعات. * والله كلام. * ألحقوا سجلوا اسمكم سريع – قبل ما يقفلوا القبول في سيكافا. * غايتو الشافكم في سيكافا ما كضب. * فريق المريخ الحالي هو (جزيرة الفيل) معدل...مع احترامي الشديد والكبير لفريق جزيرة الفيل. * عاوز احلل ليكم المباراة. * ناس مزمل ما بقولوا ليكم الحقيقة. * جمال سالم ..من خلال الاداء ..والهدف الاول الذي سجل في شباكه واضح انو لم يستلم حقوقه كاملة من المريخ. * ظاهر عليه عنده قروش ما استلمه. * على الاقل عندو تلاتة شهور ما صرف مرتبه. * حركتو دي حركة زول ما صارف. * حركة زول اتقطع. * معقولة في حارس بطلع من مرماه بهذا الشكل ..تقول بركب ليه في (سقالة). * اما امير كمال ..لو شافو (غلطتو) دي اشرف الكاردينال اسبوع تاني ما بقعد ليكم في الكشف. * بلحقو ليكم (ابيكو) تاني يوم. * الكاردينال اكيد لو شاف مباراة المريخ امس ايدو تاكلو. * والله الزي امير كمال دا ..الكاردينال لا بفوتو ليكم ولا حاجة. * امير كمال شهر (مايو) مفروض ما ينتظرو. * لكن يمكن عشان امير كمال بيصرف بالعملة المحلية ..مجلس المريخ يستحمله. * لو امير كمال بيصرف بالعملة الصعبة ..يمين اسامة ونسى (48) ساعة ما بيستحملو ليكم. * امير كمال مرقو (الجنيه السوداني). * امس عندما كنت بشاهد في مباراة المريخ ...شعرت ليك بالامانة كدا بحضر لي في مباراة من الارشيف للهلال. * اول حاجة التصوير ما واضح. * واللون الذي لبسه المريخ ..لون (متغابش) كدا. * لون (طماطمي) كدا. * والفانلة كلها اعلانات. * الظاهر ناس اسامة ونسى ديل ظروفهم صعبة شوية. * عاوزين يلقطوا ليهم قروش بي فانلة المريخ. * شيء زيوت. * وشيء بطيخ. * لكن بي صراحة كدا – اي زول شاهد مباراة المريخ ..شعر ليك بي انو بتابع ليه في مباراة للهلال (قديمة). * علاءالدين يوسف ..كان بيلعب في الهلال قبل (9) سنوات. * علاءالدين يوسف خلاص ..بقى زي مساعد المدرب. * وعمر بخيت كان بيلعب في الهلال قبل (15) سنة. * يا جماعة انتوا بي الجماعة ديل عاوزين تصلوا المجموعات. * هو الهلال وقت كان ناس عمر بخيت وعلاءالدين يوسف في مجدهم ما صل بسببهم للمجموعات. * عاوزين انتوا يا مريخاب تصلوا بيهم بعد العمر دا كلو. * تراوري ذاتو كان بيلعب في الهلال قبل (6) سنوات. * بكري المدينة كان بيلعب في الهلال قبل (5) سنوات. * وكان للمعز محجوب القاعد في الاحتياطي ..فهو كان بيلعب في الهلال من سنة 2000. * وعاوزين تغلبوا. * عاوزين تصلوا للمجموعات. * الهلال الآن بكون ليه في فريق شاب. * فريق جديد. * ناس ابوعاقلة ولاءالدين. * ناس بشه الصغير. * ومحمود ام بدة. * وانتوا الى الآن شغالين لي ب (الارشيف). * جماعتكم البتلعبوا بيهم ديل يا ناس المريخ ...لو مشوا التأمين الصحي بلقوا عندهم قروش من الهلال. * عندهم (معاش) من الهلال. * كلهم نزلوا معاش في الهلال. * الكبر واضح. * علاءالدين يوسف ..(الفتر) ظاهر في شعرو. * وبكري المدينة قولوا ليه حكاية (الجري) دا مع العرب ما بنفع. * عاملها لينا كلها جري. * المسرحية ما انتهت هنا. * المسرحية فيها (فاصل) تاني في الجزائر. * فاصل خطير جدا. * عشان كدا ح نرفع الفراش الى مباراة الجزائر. * عشان السبعات الظاهر عليها ح ترجع تاني. * شامي لي ريحة (وحدات) في الجزائر. * شامي لي ريحة (سبعات). * كلمتكم من الآن. * وتاني ما بقول اكتر من كدا. * ح نعمل راحين. * عشان ما تفتحوا عيونكم. * ......... * ملحوظة : بس اسكتوا ساكت ..ما تقولوا اي حاجة. هوامش * استطيع ان اجزم ليكم ..ان اعلام المريخ الليلة ح يحاول يخفف الحكاية. * بلطفوا الموضوع – عشان ما يقعوا في الذي وقع فيه الهلال. * بيستفيدوا من الدرس. * والمريخاب اصلا عارفين فريقهم متواضع. * مقتنعين انهم ما عندهم فريق. * غير كدا ..خروج الهلال خفف ليهم الموضوع. * لذلك ح يقولوا الهلال بي قروشه. * وبي مكسيمو. * وجوهرتو طلع. * نحن على شنو؟. * قروش ما عندهم ..وعاوزين يصلوا المجموعات. * لا قروش ..ولا جوهرة. * وعاوزين تصعدوا للمجموعات. * الشيء المؤسف كان في تصرفات المقصورة. * وفي (مدافرة) ابوجريشة. * معقولة يا ابوجريشة. * عمليتك دي (ضفر) ما بعملها. * الله يستر عليكم في الجزائر. * شكلها كدا ..(سبعة). * الكلام دا تاني ما بكرروا ليكم. * اعملوا رايحين. * انتظروا اسبوع. * عشرة يوم كدا. * اي حاجة بتظهر. * التسجيلات تبقى ليها 31 يوم. * الكاردينال ان شاءالله يكون استفاد من تجاربه. * وان شاءالله المرة دي يجيب لينا (محترفين)..صلاحيتهم ما شهر او شهرين. * عاوزين مهاجم (سوبر). * ما عارف ليه مجلس الهلال ما عاوز يسجل ليه (مهاجم) محترف. * كل تسجيلات ندخلها والهلال محتاج ليه مهاجم. * الكاردينال يسجل ليه لاعب وسط. * عليك الله يا الكاردينال السنة دي ما تعمل لينا نفس الحركة دي. * الدوري السعودي فيه محترفين ممتازين. * لكن ما في فريق في السعودية ممكن يفك ليه محترف ، إلّا اذا كان ذلك المحترف غير جيد. * لابد من محترف عنده انجازات ومحقق ارقام ..وصغير في السن. * الكاردينال عنده امكانيات تمكنه من احضار اي محترف يرغب فيه الهلال. * لذلك محترف نص كم ما بنفع. * خلونا نبدأ صفحة جديدة. * عاوزين هلال يهز الارض. * في الامكانية ان نصل لذلك ..من هذا الموسم. * حكاية هلال 2017. * وبناء الفريق. * والشاب ..ما بتجيب ليها بطولات. * من الآن اصنعوا هلال يهز الارض. * ما تنتظروا 2017. * وعندكم من العناصر ما يمكن ان يوصلكم لهذا. * فقط عاوزين الاستقرار. * وعاوزين تسجيلات جيدة. * ......... * عاجل : غايتو يا امير كمال ..لو الكاردينال شاف عمليتك دي ..الجوهرة جنبها ساكت ما بتمر.