دق الدلجة محمد عبد الماجد امير كمال بتحدث عن (عرض اوربي) جدع والله في الوقت الذي يستعد فيه الهلال في معسكر نموذجي في تونس – حيث اكمل الهلال المرحلة الاولى بنجاح تام. وسوف الهلال يدخل في المرحلة الثانية اليوم السبت – يتحدث اعلام المريخ عن استعدادات (تراوري) للمجموعات في دولة (مالي). قالوا شنو؟. (خضع اللاعب ممادو تراوري لتمارين جادة و قوية في مالي خلال الايام الماضية و ذلك من اجل الاستعداد بقوة للبطولة الافريقية لقيادة فريقه في مباراة العلمة التي تلعب باستاد المريخ في أفتتاح مباريات الجولة الاولي و يجدر ذكره ان اللاعب تراوري شارك في مباراة واحدة مع المريخ في الابطال كانت ضد عزام التنزاني). (خضع) شنو؟..قولوا (خدع) يبقى اصدق. انتوا عارفين مباراة العلمة باقى ليها كم يوم؟..باقى ليها (26) يوم. يا مريخاب الكلام دا بنقولو ليكم نحن – اعلام المريخ ما بقولو ليكم. تراوري بيستعد براهو – (انتوا بتصدقوا الكلام دا). قالوا تمارين (جادة وقوية) – انتوا بتتكلموا عن منو؟..تراوري وإلّا زول تاني. قالوا ليكم نحن ما بنعرف تراوري. تراوري مع الجماعة ما بيستعد ..ح يمشي يستعد براهو في (مالي). وكمان (جادة وقوية). يا جماعة قولوا ليكم كلام غير دا. افترضوا كدا انو قاعد يستعد …البيلعب ليكم (تراوري) منو؟. غارزيتو قال تراوري دا تاني في المريخ ما بدقها إلّا في (البوفيه المفتوح). او في مريخ الفاشر. في المستطيل الاخضر – نهي يلعب في المريخ. خلوه تراوري ..انتوا استعدادكم وينها؟. ح تلبعوا لينا في (المجموعات) بي ناس اسامة عطا المنان ومجدي شمس الدين. بي (لا شوفتن تبل الشوق ولا رد يطمئن). ناس الهلال انتهوا من المرحلة الاولى. وانتوا منتظرين (تراوري). الظاهر السنة دي (الفلسة) قوية. الفلسة شديدة. يبدو ان (تحويل الرصيد) حق التذاكر ما جابها. كان تشوفوا صلاح ادريس يدعم ليكم المعسكر – الزول دا ما قصر معاكم في التسجيلات. تراوري في (مالي) تلقوه بيستعد على الطريقة التى يمكن عبرها اضاعة الفرص. وكيف يرفع رأسو في السماء؟. ومتين يطالب بي قروشو؟. دي استعدادات تراوري. اسألوني منو انا الزول دا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس استعدادات تراوري في مالي بالغتو فيها. فلستو للدرجة دي. اي محترف بقى يستعد بي طريقتو. يجوا للمجموعات جاهزين. كل واحد يشيل (خررراية) واحدة. شيلوا (الخيار) كلو – وخلوا لي خررررراية واحدة بس. انا موش عاوز خيار. ما بحبوش. نسيب (تراوري) – انتوا عارفين (امير كمال) قال شنو؟. امير كمال الذي رفض ان يجدد عقده في مايو – عارفنو قال شنو؟. شوفوا (النرجسية). واحكموا براكم. وخلوا لينا التعليق. (قال اللاعب امير كمال انه يملك عرضين في الوقت الر اهن ، عرض اوربي و آخر من نادي عربي ولكن اتفق مع رئيس نادي المريخ بالتمديد للمريخ في التسجيلات المقبلة مشيرا الى انه لن يترك المريخ على مهما كانت المغريات والعروض فالمريخ بيتي و قدمني للنجومية و اريد تحقيق النجاحات معه). عارفين العرض الاوربي دا من وين؟. من ناس الهلال. كمان الهلال بلعب. إلّا يجبوها ليكم كدا باللفة. هسع قضية بكري المدينة موش وصلت (لوزان). اها عرض امير كمال الهلال بيجيبوا ليه من اوروبا. والاتحاد العام سمح بتوقيع العقود اذا تبقى للاعب اقل من (6) شهور مع ناديه مع اعتماد التوقيع خارج مكاتب الاتحاد. يعني يا الكاردينال الناس ديل قدموا ليك امير كمال في طبق من فضة. امير والباشا. الباشا خلوه – موضوع خطير شديد ..ح نعود ونتكلم عنو تفصيلا. خلونا هسع مع امير كمال. عشان ما نلخبط الامور. امير كمال قال عندو عرض (اوربي) وعرض اخر من نادي عربي. خلاص العرض (الاوربي) خليناه. شلناه برة. العرض الذي قدم لامير كمال من نادي عربي ..بكون قدم من الهلال. كمان الهلال ما نادي عربي؟؟. الاوربي اعفيناكم منو؟. النادي العربي دا ما الهلال ذاتو. غايتو يا الهلال يا العربي الكويتي. جماعتكم ديل ..نزار حامد ودوه (العربي الكويتي) عديل كدا. فاوضوه. وحسموا القضية. وقالوا العربي الكويتي سوف يعلن عن الصفقة في مؤتمر صحفي يوم مباراة القمة الاخيرة. شفتوا (النفخ). لاقاكم (كضب) اكتر من كدا. عشان يهزوا ثقة الهلالاب في اللاعب ..يوم مباراة القمة قالوا ان العربي الكويتي سوف يعلن عن تعاقده مع نزار حامد في مؤتمر صحفي. ديل وصلوا درجة ان قدموا (عقد) مزور بين العربي الكويتي ونزار حامد يأكدوا فيه توقيع اللاعب. لاقتكم (كضبة) قدر دي. لاقتكم حرب زي دي. الكاردينال حسم ليكم موضوع نزار حامد. وجاب ليكم معاه كمان جمل الشيل (نصر الدين الشغيل). جماعتكم ما صدقوا. الكاردينال جاب ليهم مساوي. عاوزين يموتوا. عاوزين يروحوا فيها. هسع يا مريخاب امير كمال بلعب على عالي. امير كمال ..حكاية (العربي الكويتي) ما وقف فيها. امير كمال قال ليهم عندي عرض من نادي اوربي. الزول دا بعاين بعيد. رامي قدام. الجنيه السوداني ما بتسجل ليكم بيه. امير كمال بتسجل بالعملة الصعبة. مفروض تفهموه. طول ما قال (عرض اوروبي) يبقى تسجيلو بي (اليورو). يعني قروشكم السودانية دي لموها عليكم. ولا بتخارج معاهو. ما عندكم (يورو) لو صلاح ادريس ما حل ليكم المشكلة ..الكاردينال جاهز. يمين يجيب ليه العرض الاوربي من (العرضة شمال). ولا بتلفت. ولا بلعب. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس امير كمال كبّر اللفة. عملها واضحة. الزول دا ما فاضل ليه إلّا يقول ليكم عاوز الهلال. رفضكم في مايو. وقال عندو عرض اوربي. يعمل ليكم شنو اكتر من كدا؟. المشكلة المريخاب بعد دا ما فهموا امير كمال. بعد دا عشمانين فيه. مجلس المريخ واضح ما عندو قروش. حالتو صعبة. المعسكر ما قادر عليه. سيلا سجلوا صلاح ادريس. ديدي ب (20) الف دولار. رمضان عجب اعاد قيده ب (تحويل الرصيد). عشان كدا لا امير كمال ولا احمد الباشا قدرو يعيدو قيده في مايو. الباشا دا طبعا قصتو براها. اصبروا بس. خلونا هسع في امير كمال. ما في خلاف ان امير كمال هو افضل لاعب في المريخ الان. المريخ فيه تلاتة لاعبين فقط امير كمال واحمد الباشا ورمضان عجب. بلة جابر ظلموه. استهدفوه. وجردوه من الكابتنية. رأيكم شنو تمنحوا الكابتنية بكري المدينة؟. والله يلخبطها ليكم جنس لخبطة. ما تفهموا منو اي حاجة. اصلو زولكم قرب. قرب يقيف. امير كمال قال اقل من تسعة ما بوقع. يا ادوه تسعة مليار – يا كمان خلوه يشوف مستقبلوا في اوروبا. زول عندو عرض اوربي البقعدو هنا شنو؟. اوعكم تقيفوا ليه قدام مستقبلوا. خلوه يرتاح في الدنيا دي. نصر الدين الشغيل بعد شهر من اللعب في الهلال لاقوه ناس بلة جابر قالوا ليه الهلال كيف؟. قال ليهم انا طول عمري بسمع بالدوريات الاوربية – ما قائل نفسي بيجي يوم وألعب فيها. اظن كدا عرض امير كمال بقى ليكم واضح. بقى معروف جاءهو من وين؟. لكن انت يا الكاردينال في داعي تجيب ليه العرض من اوروبا. الزول دا بالطريقة دي ما بقدر يركز في (المجموعات). يا امير. يا الباشا. باقى ليكم خمسة شهور في المريخ. ما تحرقوا دمكم ساكت. ……….. و ماذا يحدث في الفيفا. نشوف بكرة البحصل شنو؟. ولعت. سخنت. الكورة طلعت (فساد) في (فساد). …… السيدة (ل) …طلعي (البامية المفروكة) من حياتنا. وقرّض على كدا.