* الأمور في السودان طبعاً بين يوم وليلة ممكن تتقلب رأساً عن عقب * يعني الليلة تكون في السماء وبكره في الأرض * ودا يا جماعة للدقة مافي السودان بس .. دا حال الكورة عامة * وقبل فترة كان برشلونة حديث العالم والريال ظل يعاني، فبين يوم وليله انقلب الحال بعد خسارة البرسا من الريال * والكلام دا قلنا ليه ؟ * عشان الناس تعرف قيمة الغزال .. * قبل أيام ظل إعلام المريخ يتبجح على الهلال بعد الخروج الأفريقي , مع أننا لم نقل مابنطير برانا كما قال أحمد محمد أحمد * وبعد أيام ودع المريخ الأبطال * ومرة أخرى تبجح أهل المريخ بخسارة الهلال من النيل وبرضو سكتنا وماقلنا ليهم راجيكم مشوار أدغال ومواجهة ناس الغزال * أها أمبارح ولولة أهل المريخ كترت من قبل السفر للأبيض * (لاعبين) رفضوا السفر وإعلام يهاجم في لجنة التسيير ويبرز خبر تجديد الوالي لعضويته * يعني عديل يا والي الحقنا * في الحقيقة لو الوالي قلبو صحي مع المريخ كان اتبرع ليهم بقروش * لكن الوالي بي فهمو * أنا مابفسر وأنت ماتقصر ( 2 ) * لانريد التحدث عن هزيمة المريخ من هلال الأبيض ولكن سنتحدث عن فوز هلال الأبيض لأنه يهمنا * لأنه هلال ويلعب فيه الغزال * والتاج إبراهيم وحمودة بشير * وهلال الأبيض أصبح بعبعاً مخيفاً للمريخ ودي المباراة التالتة بين هلال الأبيض والمريخ * وهلال الأبيض حقق الانتصار الثاني على المريخ * ودا كلو من ونسي * إيمال لم يترك شخص لم يشكو له ومع ذلك يواصل في عمله * لا نقول إن إيمال لن يجد عمل ولكن الصحيح إن إيمال يسعى لتوريط المريخ بالقانون * والله يا سلك ظروفكم نار بقت * ومن الليلة سنتابع مسلسل ارحل ياونسي في الصحف وفي الواتس اب كمان ( 3 ) * واحد متصوف جداً قال لي فاتحة العيلفون دي إن شاء الله بتصلح حال الهلال * أمس بعد مباراة هلال الأبيض اتذكرته كلامو * والكاردينال حظو طيب الله أدا * والكلام دا قلنا ليه عشان الناس تعرف قيمة (الفاتحة ) ( 4 ) * الغزال زي الدهب والدهب ياعمك مابصدي * وهنا لا أقصد شخص * الغزال ظل يقدم دروساً في كل مباراة وأظنه يختار مواعيده بدقة عالية * تارة مع الهلال وتارة مع المنتخب وأمس مع مريخ ونسي * شكراً الغزال وستظل واحد من الأسماء التي سيذكرها التاريخ الكروي ب ( السمح ) ( 5 ) * كل يوم يا ولدنا الهواء بقلب علي جيهة * وياعمنا سلك الهواء قلب * ومفروض الكاردينال برضو يكرم الغزال * ومفروض ناس محمد عبد الماجد برضو يتبرعوا للغزال إن شاء الله بكرت رصيد ( 6 ) * الهلال أمس الأول فعل خدمة الجيل الرابع * والجيل الرابع في أي شئ * أربعة أقوان ونجوم شباب وجمهور ذواق وطرب كبير وكما زيارة لتقابة القرآن * والقرآن بهدي النفوس * ونتمنى أنو تكون الفترة المقبلة فترة وفاق في الهلال * على الأقل نطرد الشيطان ونحكم صوت العقل لصناعة مستقبل أخضر للهلال * وعلى الكاردينال أن يستفيد منا الأجواء الحالية يوسع دائرة المشاركة والمشاورة مع كل أهل الهلال * والرأي لما يكون بمشاركة كل الناس * أكيد بكون صائب ( 7 ) * يا الله يوم كدي بالنهار فرح المواسم نفرعوا * صوت القطارت من بعيد فوق الفلنكات نسمعوا * أشواقنا والناس الزمان وكل المسافرين يرجعوا
