بالعربي الكسيح - محمد الطيب الأمين * قالوا : من علامات الجمال عند الرجل (البرادو) .. * لو انت بتشبه (على كبك) وعندك (برادو) معناها في نظر بعض الناس بتكون أجمل من تامر حسني .. * ومن علامات التميز عند شرف شيبوب (الرباط الصليبي) .. * وأنا أكتر (5) حاجات عاجباني في شرف شيبوب (3) هي : (الرباط الصليبي) و(الصليب الرباطي) .. * والله صحي .. * من قلوبنا بنحب الرباط الصليبي .. * وطبعا حب الناس مذاهب .. * أي زول بيحب الحاجة البتعجبو .. * مثلا عندك ناس المريخ بيحبو (عزو) وما بحبو أسامة ونسي .. * أو بالأصح ناس المريخ بيحبو (جيب) عزو .. * أسامة ونسي لو لقى قروش جمال الوالى ح يكون هو حبيب إعلام المريخ .. * لكن معليش (الفلس راجل كلس) .. * أول أمبارح الكاردينال عمل حركة عجيبة جدا .. * الكاردينال إتعامل مع تسجيلات (تانى يوم) زي الزول البمشي الكافتريا وبيطلب (3) سندوتشات شاورما .. (أتنين بشطة وواحد خالي شطة) .. * يقول لبتاع الكافتريا : أديني تلاتة سندوتشات واحد خالي شطة واتنين بشطة .. * رئيس الهلال جاب سادومبا وشيبوب وسادومبا .. * أتنين بصلعة وواحد بشعرو .. * والكاردينال قصد إنو شيبوب يتوسط سادومبا وسادومبا .. * لو لاحظت في أحدي الصور داخل مكاتب الإتحاد العام شيبوب كان متوسط سادومبا وسادومبا .. * قاعد في نصهما .. * والحركة دي مقصودة .. * ودي عملية إسمها : (قاب قوسين أو أدنى) .. * إحنا سميناها (قاب قوسين أو أدني) وأولاد حلتنا سموها (خير الأمور أوسطها) .. * وعندنا صاحبنا أطلق علي عملية شيبوب أسم (أعذريني النطة دي تبقي آخر نطة ليا) .. * قالوا شيبوب (نطة) من الطابق الرابع عشان يقابل وفد المريخ بجوبا .. * جوبا ب(الغاء) ؟؟ * والله لو نطة من برج الفاتح أهو في النهاية لبس شعار الهلال وقبل شهر ستة .. * و(نططني حاول حس بي عاتبني أرمى اللوم علي) .. * و(أكتب سطر وأنط سطر) .. * و(نططوك وانت ما بتعرف صليحك من عدوك) .. * و(نطة) سطر جديد .. * بمناسبة النطة .. * موضوع شيبوب ده أنا بتهمني فيهو حاجة واحدة بس .. * الموضوع ده كلو بتهمنا فيهو حاجة واحدة بس .. * مريخاب الجنوب رأيهم شنو في العملية دي ؟؟ * مش قلتوا مريخاب الجنوب هم النططوا شيبوب من الطابق الرابع وهم الشكلوا ليهو حماية بجوبا ؟؟ * طيب مريخاب الجنوب هسه شن كلامهم بعد الهلال نفذ عملية (الوعد الصادق) ؟؟ * شن قولكم ؟؟ * والله يا جماعة لو جينا للجد كردنة بالغ .. * قول لي كيف ؟؟ * أصلو ما ممكن في يوم واحد تسجل (صلعتين وشيبوب) .. * والله ما ممكن .. * ده بزار عديل .. * يعني كان ممكن تسجل (صلعة واحدة وشيبوب) .. * أو تسجل صلعتين بدون شيبوب .. * لكن كونو تسجل لينا صلعتين وشيبوب معناها شكلك كده قاصد المضرة والأذية .. * والحاجة دي ذكرتني نكتة قديمة .. * قالوا في (شحاد) واقف في الإستوب .. * الشحاد ده مد يدو لواحد من رجال البر والإحسان .. * قام رجل البر والإحسان ده أدى الشحاد (50) جنيه بالقديم .. * الشحاد إستلم ال(50) وقال لعمك : (شكرا ليك لكن بطريقتك دي يوم بتكتل ليك شحاد) .. * هسه الزول ده بطريقتو دي يوم بكتل ليهو (وصيفابي) .. * صلعتين في يوم واحد .. * سادومبا (ونو) وسادومبا (تو) .. * بحجر واحد الكاردينال ضرب (صلعتين) .. * بموس واحدة الكاردينال (حلق صلعتين) .. * وعلي فكرة .. شيبوب كان عندو نية يحلق صلعة لكن رفضنا ليهو عشان مريخاب الجنوب ما يزعلوا .. * زمان تقول للزول أنا في (الكبري) يقول ليك (القديم ولا الجديد) ؟؟ * تقول ليهو بجيك الساعة عشرة يقول ليك (بالقديم ولا بالجديد) ؟؟ * تقول ليهو لقيت لي ألف جنيه واقعة يقول ليك (بالجديد ولا بالقديم) .. * بالمناسبة .. * لماذا إختفت القروش الكنا بنلقاها واقعة ؟؟ * زمان كل يومين تلاتة كنا بنلقي لينا قروش واقعة .. * تجي ماشي تلقي ليك خمسين واقعة ، تعاين يمين شمال وتشيلها .. * بعد بكرة بتلقي ليك عشرين واقعة .. * بقينا لما نلقى جنيه أو جنيهين ما بنرفعهم من الأرض .. * لكن هسه الحاجة دي إختفت .. * وبصراحة أنا ما عارف السبب شنو ؟؟ * السبب في القروش ولا في فينا إحنا ولا في الأرض ؟؟ * جائز يكون المشكلة في الصراف الآلى .. * المهم .. * في الدورة التانية في الممتاز لو قالوا ليك جاب القون سادومبا ح تقول ليهم (سادومبا الجديد ولا القديم) ؟؟ * صنع القون بشه .. (بشه القديم ولا بشه الصغير) ؟؟ * وبما إنو الهلال سجل (مهند الريدة) نتمنى من رئيس الهلال يرجع لينا مهند الطاهر عشان يكون عندنا (مهند الجديد ومهند القديم) .. * غايتو ناس المريخ بيحننوا والله .. * بقو مساكين جدا .. * علي جعفر قال داير مليار .. * قال داير مليار حسب ما تم تدواله .. * يا على جعفر .. عليك ما شايف إنك عصرت على (العملة السودانية) بهذا الطلب الغالي ؟؟ * عصرت علي أسامة ونسى .. * أسامة ونسى لو عندو مليار ما بيجي المريخ أصلا .. * عشان كده يا ود الحلال قول كلام معقول .. * قول (170) مليون أو (200) أو لحدي (220) ما كعبة معاك .. * لكن مليار بصراحة كتيرة .. * المهم .. * أنا عندي وصية لجمهور الهلال العظيم .. * يا جماعة الزول لما يكون (بيهضرب وبيقول كلام بره رأسو ما في زول بسألو) .. * وفي هذه الأيام إعلام المريخ ح يقول إنو تسجيل شيبوب ما قانوني .. * وح يقول الطاهر سادومبا كعب .. * ح يقولوا كلام كتير .. * عشان كده لازم نتعامل معاهم حسب الحالة الهم فيها .. * ما نتجاوب معاهم ولا نكتر معاهم الكلام .. * الناس ديل ظروفهم صعبة والكوكب المراكشى راجيهم وكريم الحسن داير مخالصة وقصتهم طويلة .. * لو في مريخابي قال ليك تسجيل شيبوب ما قانوني أسكت خليهو .. * ما ترد عليهو .. * إحنا ذاتنا بنحب التسجيلات الما قانونية .. * وشيبوب ده جبناهو (يتونس ونسة مع أخوانو) .. * ولا دايرنو يلعب .. * يتونس بس .. * يتونس وبعد عقدو ينتهى تانى بنجدد ليهو وبعد عقدو التاني ينتهى بنفكو ليكم .. * زي علاء الدين يوسف .. * علاء الدين شلناهو (رجاااااله من جوة الكشف) ولما قنعنا منو فكيناهو ليكم .. * هسه كترت الكلام ما بتنفع معانا .. * لو دايرين شيبوب عليكم أن تنتظروا (8) سنين .. * والسنين بتجري يا حبايب .. * غايتو جنس غايتو !! * ونركب صافنات ونجيبة (زمباوبوية) وأصلو الزول بموت والذكرى تفضل حية .. * و..و.. * ويا يمة رسلي لي عفوك ينجيني من ...(النطة والصلعة) ..
