بالعربي الكسيح- محمد الطيب الأمين * أهلنا بيقولوا : (الطول نعمة) .. * والقصر حكمة .. * يقول ليك : (القصر يا حكمة ويا فتنة) .. * وأظرف ناس هم الناس القصار .. * دمهم خفيف جدا .. * وقالوا في واحد قصير شديد .. * شدة ما قصير بيفصل (المنديل) عراقي .. * الزول ده مرة ركب (الأسانسير) .. * ماشي الطابق العاشر .. * طبعا أول ما تدخل الأسانسير بتضغط على رقم (الطابق) الأنت ماشي عليهو .. * لو ماشي الطابق التالت بتضغط على الرقم (3) ، ماشي الطابق السابع بتضغط على (شلباية) .. * المهم .. صاحبنا ده لقى (لوحة الأرقام) معلقة فوق ، يعني أطول منو ، وهو ماشي الطابق العاشر .. * ما بيلحق الرقم (10) عشان يضغط عليهو .. * قدر ما إطاول وإتشابا ما لحق الرقم (10) .. * في النهاية فكر وقرر قام ضغط الرقم (5) مرتين .. * والنكتة دي حقيقة بتذكرني المريخ .. * المريخ أصلا فنيا هو (قصير جدا) .. * قصير لدرجة إنو (سيكافا) ممكن تلبسوا وتقنعوا .. * سيكافا في الأساس معمولة للقصار فنيا .. * زي المريخ ده .. * المريخ ركب اسانسير الأبطال لقى روحو ما بلحق المجموعات ، ضغط (5) مرتين نزل المغرب .. * ولاقى الكوكب المغربي .. * والكوكب هابط من الدوري .. * لما فريق هابط من الدوري يطيرك ده معناها انت اصلا وصلت المرحلة دي غلط .. * وصلت في غفلة من الزمن .. * وأنا بصراحة مما الهلال ودع الأبطال عرفت إنو المريخ ماشي ب(الغفلة) .. * لا يمكن الهلال يطير والمريخ يستمر .. * دي حاجة ما بتجي أصلا .. * ما حصل شفنا لينا زول قاعد في (البرندة) و(ضلو) قاعد يتحاوم في الحوش .. * ما حصل ؟؟ * إنت قاعد في البرندة معناها (ضلك) بيكون قاعد معاك في البرندة حتى لو ما شفتو بيكون قاعد .. * الضل بيتبع سيدو .. * يعني مثلا دايرين تقنعوني إنو شيبوب واقف في (زريبة المواشي بيشتري في خروف الكرامة وضلو قاعد في البيت) ؟؟ * ما بتجي كده .. * الضل بيكون معاك محل تمشي بيمشي .. * كل سنة الهلال بيكون مشارك في الأبطال والمريخ في الكونفدرالية .. * ولما الهلال بقى يصل المربع قام الإتحاد الافريقي أكرم الهلال باضافة فريق سوداني آخر يلعب في الأبطال .. * ووقع الإختيار لضلنا المريخ .. * يعني مشاركة المريخ في الأبطال من الأساس هى (هوادة ساكت) .. * ما شاركوا بعرق جبينهم .. * شاركوا بعرق جبين الهلال .. * عشان كده هم ما فاهمين حاجة في البطولة دي .. * ما تعبوا فيها ولا دقوا فيها حجر دغش .. * لو دقوا فيها حجر دغش على بالقسم ما بيضربوا الحكم ويعملوا حركاتهم العملوها دي .. * لكن لقوها باردة .. * بدون مقدمات لقوا نفسهم في الأبطال .. * قبل سنتين تلاتة كانت (كداراتهم بتطاقش مع كدارات ناس القطن التشادي والغزالة الكيني في سيكافا) .. * والله صحي .. * قرييييب ده كانوا بيلعب مع الأسماء الغريبة دي .. * وجاء الهلال عمل نقلة في تاريخ المريخ الحديث وأتاح له فرصة المشاركة في الأبطال .. * وكمان إطوروا وبقوا يصلوا دور ال(16) ويلعبوا ترضية .. * سبحان الله .. * والله إحنا لو عارفين أخلاقكم كده كنا سنويا بنطير من دور ال(32) عشان (الكاف) ما يكرمنا ويوفر لينا مقعد إضافي في الأبطال تشاركوا فيهو إنتو .. * الغلطة دي يتحملها الهلال .. * إنتو أصلا ما غلطانين ، لانو إنتو (صحبة راكب) .. * في السفر بيقول ليك : (العفش على مسؤولية صاحبه) .. * يعني لو لقوا العفش فيهو مشكلة ما بيسألوا العفش بيسألوا صاحب العفش .. * والمريخ في الأبطال على مسؤولية الهلال .. * و(الكاف) لو عايز يعاقب يفترض يعاقب صاحب العفش ما يعاقب العفش .. * يعني المفروض (الكاف) يعاقب الهلال لان الهلال هو الذي إصطحب المريخ لهذه البطولة .. * لكن معليش .. اللوم بيجي بالغفلات يا حاتم .. * حاتم مفتكر افريقيا زي أيام زمان .. * زمان لما ناس حاتم كانوا بيدقوا والى الدين (عليه الرحمة) .. * شغل البلطجة الكنتوا بتعملوهو لوالى الدين محمد عبد الله ما بينفع هسه .. * معقولة تدي الحكم بونية ؟؟ * انت قايل الحكم ده كمساري في خط القطينة ولا شنو ؟؟ * موضوع الحكم ده يا جماعة بيذكرني بموضوع تاني .. * الزول لو عندو حاجات في تلفونو خايف عليها بفتكر إنو (حبيبتو) برضو عندها حاجات خايفة عليها .. * والله صحي .. * تلقى الزوج في تلفونو في بلاوي يقوم يجيهو إحساس إنو زوجتو برضو عندها بلاوي .. * وبدون مقدمات يطلقها .. * دي نفس قصة الحكم .. * ناس المريخ جاهم إحساس إنو الحكم (قابض) عشان كده إنفعلوا .. * يبقي الناس ديل دقوا الحكم بسبب (إحساس) .. * بمناسبة الإحساس .. إنتو المريخ عمل شنو مع صحيفة الهداف الجزائرية التى كانت قد إتهمت إداراة المريخ بتقديم رشوة ..؟؟ * أنا أتمنى إنو المريخ يكون لسه متابع هذه القضية .. * المهم .. * كونو يجيك إحساس ده مامعناها إنك تضرب الحكم وتسك الصحفيين .. * الكاف ما بيعرف ليكم الأحاسيس دي .. * البطولات الكبيرة ما فيها احساس .. * إنتو قايلين نفسكم قاعدين في (ماجك لاند) ولا قاعدين في (شارع النيل) عشان تتعاملوا بالاحساس ؟؟ * عندكم أوهام كده غريبة جدا والله .. * بس أنا والله بتمنى إنو (الكاف) ما يحرم المريخ من المشاركة افريقيا .. * ياريت العقوبة تكون مالية .. * مشاركة المريخ في المسابقات الأفريقية مهمة لانو المريخ (كلمة شاذة) ، ودائما الكلمة الشاذة بتعمل حركات فكاهية تخفف علينا ضغط المباريات والبطولات .. * وممكن أديك دليل على كلامي ده .. * المريخ لما أخدها سبعة في الأردن قالوا السبب (البرد) .. * يعني كان المفروض الإتحاد العربي (يُدفي الكورة) عشان لما الكورة تصل أكرم الهادي يلقاها (دافئة) في ظل البرد القارس .. * هسه دي ما فكاهة وظرافة ؟؟ * عندك تاني الحركة بتاعت الكنغو .. * ساقوا معاهم للكنغو أربعة طباخين وعشرة بودي قارد وأتنين فنيين بتوعين فحص هوا .. * ساقهم الكنغو .. * و(الخال) مازيمبي ما قصر معاهم أداهم تلاتة وطاروا طيران الذين طاروا .. * الحركات دي والحاجات المضحكة دي ما بيعملها فريق في أفريقيا غير المريخ .. * عشان كده ياريت (الكاف) يكتفى بالعقوبة المالية .. * ياريت والله .. * الفرق بين طيارة المريخ الطارت والطيارة الإختفت .. إنو طيارة المريخ (مغربية) وديك (مصرية) .. * ونركب صافنات ونجيبة (مغربية) وأصلو الزول بيموت والذكرى تفضل حية .. * و..و.. * والزول الوسيم في طبعو دائما ...(طاااااير) .