· الايامات دي في التلفزيون ..والفضائيات السودانية بحاولوا يقنعونا انو (العدس) اجمل واطيب. · عدس تركي (احمر) خطير. · دا عدس وإلا (مهاجم) الخطير دا. · سيكلوجيا (الدعايات) طبعا تعمل من اجل اقنعانا ان شوربة العدس ..احلى من شوربة الفراخ. · الفراخ تطير عيشتها. · عشان بنصدق ليكم. · العدس دا إلا تقلبوا فيهو طلب كبدة. · بعد كدا ممكن يتقابل. · ما تقولوا لي ما تحكوا لي لا توبال لا بهار لا زيت كتير ما تقولوا لي ما تحكوا لي. · عدس (الفضائيات) هسع زي فريق المريخ الحالي. · اعلام المريخ بحاول يقنعنا ان فريقهم كويس ..وان ريكاردو ممتاز. · ريكاردو ما عندنا فيه أي كلام. · احسن زول ...الكلام الناس الكانوا بهاجموا فيهو زمان ..بقولوا (ريكاردو) ما عندو سيرة ..وكان مدرب ناشئين في السعودية. · الارشيق موجود. · بركة الهلال العمل تاريخ لي (ريكاردو)..خلاكم تشوفوه احسن مدرب. · والله ريكاردو قبل الهلال كان زي (ابراهومة) واحد. · ما عندو أي فرق. · لكن نحن عملنا ليهو تاريخ. · مشى قطر ..ومشى الاسماعيلي ..وبقى مدرب عندو سمعة وتاريخ. · لكن اتأكدوا تاريخ ريكاردو ح ينتهى قريب. · هسع يطلع ليكم من دور ال (32)...وتلقحوا (برانكو). · وما تقولوا لي ..ما تحكوا لي. · عدس تركي احمر خطير. · على العموم نحن (شكير) يكاردو ما بنابهو. · دي حاجة بتأكد لينا انو المريخ ضل الهلال. · اصلو ما بتتطورا انتوا. · عشان تكونوا عارفين ريكاردو دا كان في الهلال قبل خمس سنوات. · المحطة دي نحن اتجاوزناها. · نحن هسع مع (غارزيتو). · يعني ريكاردو دا ما بيأكل عيش معانا.. · نحن جبنا لينا مدرب فرنسي ..ايطالي الاصل. · عشان ما تشيلوا هم (للدفاع). · عاوزين نقفل المجموع. · الدفاع ..والهجوم. · زمان كانوا بقولوا حاجة ..بقولوا (الانشاء) ما بتتقفل. · ليه؟. · نحن الانشاء بنقفلها. · مع غارزيتو دا ما عندنا أي مشكلة. · أي حاجة تمام. · وكمان عشان تكونوا عارفين ..نحن ح نجيب لينا (مدرب احمال). · أي حاجة نحن عندنا بي نظام. · خلاص الشغل بقى مؤسس. · امس طبعا عرفت ليكم مامون ابوشيبة متحسس شوية من موضوع (غارزيتو) دا. · الظاهر ريكاردو ما واقع لي مامون ابوشيبة. · شكلو كدا. · وما تقولوا لي ..ما تحكوا لي. · عدس تركي احمر خطير. · ابوشيبة قال لي غارزيتو دا بكلفكم شمع كتير ..بكلفكم (62) شمعة. · باقي موضوع (الشمع) دا ابوشيبة مجربو مع (الحضري). · الحضري براهو كانوا بجيبوا ليهو (44) شمعة. · ام اربعة واربعين. · اما مجدي ام بدة (بابل نويل)..او كما يقول اعلام المريخ (مجدي تحدي) لو عاوزين تحتفلوا يا ابوشيبة بي عيد ميلادو إلا تحجزوا (الشمع) الفي السوق كلو. · ح تعملوا لينا ازمة في (الشمع). · اما لو جبتوا (العجب) مع مجدي ام بدة فان المريخ إلا يستعين بالشمع في الدول المجاورة. · يا ابوشيبة عشان نريحك. · نحن في البداية ما عندنا لاعب او مدرب بنحتفل بي (عيد ميلادو). · نحن صعبين ..ما عندنا كلام زي دا. · كلو ولا الشمع. · الموضوع دا عندنا عيب عديل. · لا فايقين لي شمع. · ولا شغالين بي (تورتة). · نحن ناس الدم يصل الركب. · الواحد فينا ما بضحك إلا تقول ليهو (الدم وصل الركب). · هيع. · (شافعنا برى الموت في الركاب سنه). · تقول لي شمع. · وما تقولوا لي وما تحكوا لي. · عدس تركي احمر خطير. · اول مرة اشوف لي عدس (خطير). · من الله خلقك يا ابوشيبة شفت ليك لاعب في الهلال جبنا ليهو (تورتة). · الحاجات دي نحن ما عندنا. · سمعت ليك بي (شمعة) حايمة ساكت جنب استاد الهلال. · لا ..لا ...الحاجات دي ما بنعرفها. · بنشوفها مرة في المسلسلات...لكن في الهلال لا. · وانتوا ذاتو يا ابوشيبة كانت ما عندكم. · لكن جاتكم في زمن جمال الوالي. · بلة جابر بقى عندو (عيد ميلاد). · وموسي الزومة عندو (عيد ميلاد). · وضفر ..عندو عيد ميلاد. · تصوروا. · حاجات غريبة بتحصل في البلد دي. · الحاصل شنو؟. · دي زي حكاية حرامي تلب ليهو في بيت عزابة. · الحرامي المسكين تلب في الحوش كدا...لقى نفسو محاصر بي (12) زول. · كلهم قاموا صنقروا من عناقريبهم. · في البرد دا الجماعة راقدين في الحوش. · الحرامي لقى نفسو محاصر بي دستة من الرجال..قال ليهم يا جماعة انتوا قايلين نفسكم في كرري...انا جيت عاوز لي (شاحن موبايل) ..ما تفهموني غلط. · الجماعة سمعوا حكاية (شاحب الموبايل)..رجعوا رقدوا تاني. · اصلهم متعودين على الحكاية دي. · كل المرة الجيران يدقوا ليهم : عاوزين شاحن الموبايل. · واطيب عدس. · ما تقولوا لي ..ما تحكوا لي. · اما حكاية انو (غارزيتو) عمرو (62) سنة يا ابوشيبة ..فليس في ذلك (منقصة)..ولا مشكلة. · يعني شنو؟. · ما في أي مشكلة. · العمر دا (62) سنة في المريخ عمر لاعبين. · خلوها مستورة احسن. · ما عاوزين نتكلم ليكم عن (مجدي ام بدة)..ولا العجب. · ان شاءالله اللاعب تجيبو ليهو (150) شمعة يا ابوشيبة. · دي حاجة ما بتخصنا. · حاجة اخيرة في الموضوع دا ...انت عارف يا ابوشيبة ان (الخبرة) كويسة في المدربين وانجح المدربين في العالم الذين تجاوزوا الستين. · في مصر قارب جوزية مدرب الاهلي المصري من السبعين. · حسن شحاتة مدرب المنتخب المصري السابق قارب من الستين. · اما عالميا فان اشطر المدربين على الاطلاق هو السير فريجسون عمره 69 سنة. · فريجسون دا ما اشوفو في التلفزيون بكون بيأكل ليهو في (لبانة). · تقول الدوري الانجليزي دا ما فيهو غير (اللبان). · الدوري كلو بيأكل في (اللبان). · الشيء المحيرني ان المريخ سبق له ان تعاقد مع (اتوفيستر) وهو في السبعين. · اتوفيستر دا يا ربي كنتوا جايبنوا (للتوثيق). · وإلا كان عابر (قارات). · اتوفيستر دا قالوا ليك زمان كان بعرف (الكورة) بي صوتها. · ما بشوفها. · بس بسمع (شوووو) ..وبقول لي بلة جابر طلع يا بلة. · بلة جابر هسه ذنبو شنو؟. · يسمع كووو..بكورك لي موسي الزومة. · مدرب (مفتح)..رغم انو ما بشوف. · لكن سمعو كويس. · اتوفيستر دا قالوا ليك لمن فات من المريخ كان قايل موسي الزومة ..ابراهومة. · وفاكر ابراهومة ...احمد السيد. · احمد السيد هسه الدخلو هنا شنو؟. · صديق علي صالح قدر ما حاول يقنعوا ..ما اقتنع ليهو. · الزول الكبير في السن ما بقتنع بالساهل. · برضو (السن) ليها احكام. · اما عن اللغة الفرنسية ..اكيد ما في مقارنة بين الدكتور حسن علي عيسي وعلي قاقارين ومازدا ..وكلاهما تبوأ مناصب كبرى عن طريق تخصصهم في اللغة الفرنسية ...الاول رئيس شعبة اللغة الفرنسية في جامعة الخرطوم والاخر سفير. · قاقارين دا بتكلم 12 لغة. · 12 لغة ومسجل في المريخ 19 قون. · الكترابة. · انتوا يا مامون ابوشيبة ...زمان ما كان عندكم (حارس). · دكتور حسن علي عيسي قالوا لك في (البيت) بتونس بالفرنسي. · ما بتكلم عربي إلا في مناسبات المريخ ..وتقاطع المواصلات. · غير كدا ..كلامو كلو بالفرنسي. · دا قالوا ليك (اكلو) فرنسي. · واطيب عدس ..ما تقولوا لي ..ما تحكوا لي. · اذكر ان في الهلال لاعب اخر اجاد الفرنسية وكان قنصل للسودان في فرنسا وهو لاعب الهلال السابق (عثمان الجلال) الذي جاء للهلال من مدينة شندي ...فريق (ساردية). · نحن عندنا لاعب سفير. · وعندنا لاعب قنصل. · وعندنا لاعب وزير. · وعندنا لاعب طبيب. · وعندنا لاعب مهندس. · كسلا ومعني والرشيد ...والقائمة تطول. · الموضوع دا احسن تقفلوا...دي رقبة ما عندكم ليها (شعر). · شوفوا (تورتكم) وين؟. · ملحوظة : ونفا نفا نفا. هوامش · كاريكا فتح. · واتوبونج مشى امريكا ورجع زي (الطلقة). · قولوا ما شاءالله. · وعندنا مدرب فرنسي كمان. · في المريخ لاعب يوغندي ..قالوا صانعى العاب. · قالوا كدا. · الاستاذ عبدالمجيد عبدالرازق كتب اجمل عمود عن (غارزيتو). · كتاب الهلال ما كتبوا عمود عن غارزيتو بهذه الروعة. · وابوشيبة ذاتو لو قعد للموضوع ما بقصر معانا. · بس شيل (الشمع) دا من رأسك يا ابوشيبة. · ريكاردو دا ح يدرب المريخ بالمراسلة. · شنو جا ورجع ...وما شغال بالموضوع. · نحن مدربنا برجع يوم 10 يناير. · ونحن أي حاجة عندنا بي نظام. · اخبار ضفر شنو؟. · قالوا ضفر الي الان نفسو قايم من الدوحة. · اصلو كان جاري شديد. · والله نحن الله بريدنا. · الله شافنا. · ضفر دا لو اتسجل..كنا شطبناهو من اول اسبوع. · ضفر شنو؟. · المستوى دا ما بنفع معانا. · وكمان حالف (قسم). · عاجل : لكن العدس في السقط دا ما كعب.