قبل ايام قرأت خبرا يقول : ان جمال الوالي رفض دفع فاتورة كهرباء نادي المريخ . بعد ان تم قطعها بواسطة الهئية القومية للكهرباء ، في مطالبة مالية بلغت 29 مليون جنيه..واعلن جمال الوالي للذين تحدثوا معه (حسب الخبر) عن فاتورة الكهرباء (المقطوعة).. من انه سوف يدفع فقط 15 مليون جنيه. على ان يدفع بقية الاعضاء المبلغ المبتقي 14 مليون جنيه لكن لا احد استجاب ، مما جعل رواد نادي المريخ يتواجدون في الظلام لاربعة ايام. 14 مليون جنيه فقط ..(قطعت) رأسهم.
وقرأت ايضا ان روابط المريخ ..وجماهيره ..سوف تعمل نفرة من اجل (فاتورة الكهرباء).
نفرة عشان يدفعوا (الفاتورة)...عليكم الله شفتوا الجماعة ديل حالتهم بقت صعبة كيف؟.
بيني ..وبينكم ..(الكلام دا ما يطلع من العمود دا)..فاتورة الكهرباء بعد دمجها مع فاتورة الموية ..بقت صعبة عديل كدا.
بقت زي امتحان الفيزياء.
عليكم الله هسع في داعي يدمجوا فاتورة الكهرباء مع فاتورة الموية في (البرد) دا.
بعدين المضوع دا من ناحية (اخلاقية) ساكت ما بصح.
مفروض فاتورة الكهرباء تكون ..براها ..وفاتورة الموية تكون براها.
نحن (اللخبطة) دي ..ما بنريدها.
والخلط دا في الجامعات ما كنا ناسو.
الغريب في الامر ان (قطع) الكهرباء من نادي المريخ ، لم اعلق عليه وقتها ...وكاد ان يفوت علينا موضوع زي دا في ظل احداث الهلال الملتهبة.
كنا مشغولين في روحنا دي.
بقينا في (رقبتنا).
غايتو البرير دا شغلنا من جنس حاجات ...(سينما) بس ..ما بتتكرر.
زي دي والله نلقاها في حالاتنا العادية ..إلا نسيركم بيها يا مريخاب.
كمان نحن بنلعب.
نحن أي حاجة عندنا بي نظام ..كان ترضوا ..كان تغضبوا.
اول حاجة ..وتحليلا للخبر ..يوضح مضمون هذا الخبر ...لماذا استقال جمال الوالي عن رئاسة نادي المريخ؟..او لماذا عزم على الاستقالة ؟..ورفض كل الرجاءات والتوسلات.
عاوزين جمال الوالي يدفع ليكم (الفاتورة)..عشان تجوا تلبعوا الكوتشينة ، والضمنة في النادي ، وتصرحوا الصباح في الجرايد.
فاتورة...ما قادرين تدفعوها.
الفصاحة ليكم على شنو؟.
معقولة ..المريخ النادي الكبير ..بكل جماهيريته ..ورجال مجلس ادارته ..ودعم الدولة له..وروابطه في الخليج واوربا ..ناديه في الظلام اربعة يام متواصلة.
هسع ما عارف الحاصل عليهم شنو؟...دفعوا ..وإلا لى هسع الكهرباء مقطوعة؟.
يعني كأس السودان ..دخل نادي المريخ في (الضلمة) دي.
ضيعتوا لينا (كأس السودان) ساكت ..لو عارفين كهرباء ما عندكم ..يمين ما كنا بنفرط في الكأس.
والله جمال الوالي ليه حق يستقيل ما دام ..ناس المريخ ديل (فاتورة) الكهرباء بدفعّوها ليه.