اخر روايات الكاتبة والروائية الجزائرية احلام مستغانمي (الاسود يليق بك) ...احلام في هذه الرواية تتجه نحو كتاباتها (الفلسحبية) التى اتجهت اليها احلام بصورة واضحة في (نسيان دوت كوم) ...و (الاسود يليق بك)...وابحرت بعمق في الحب وفلسفته من خلال الطرح الروائي الجميل. تقول احلام في (الاسود يليق بك) :
(الأحلام التي تبقى أحلاما لا تؤلمنا ، نحن لا نحزن على شيء تمنيناه ولم يحدث ، الألم العميق هو على ما حدث مرة واحدة وما كنا ندري انه لن يتكرر).
اذن الاشياء التى لا نمتلكها لا نحزن عليها ..لأننا لم نفتقدها ...هي اصلا لم تكن لنا.
هي مجرد احلام.
والقول لا يحتاج الي تفسير ...ولا يحتاج الى ان نركبه في حدث واضح ...لأن (صنعة) الانزال هنا تفسد روعة النص.
وتقول احلام ايضا في (الاسود يليق بك):
(الكبرياء أن تقول الأشياء في نصف كلمة ، ألاّ تكرّر . ألاّ تصرّ . أن لا يراك الآخر عاريا أبدا . أن تحمي غموضك كما تحمي سرّك).
هذا نص نحمي به (الغموض).
الغموض المتزن ...افضل من الوضوح المبتذل.
وتستخرج لنا احلام في (الاسود يليق بك) هذه الحكمة ..او تلك النصيحة.
(قرأت يوما إن راحة القلب في العمل، وأنّ السعادة هي أن تكون مشغولًا إلى حدّ لا تنتبه أنّك تعيس).
اظن ان التعساء فقط هم من ينتبهون الى ذلك ...السعادة (وهم) يجب ان نعيش فيها توهما.
وعند احلام هذا النص :
(بأموالك بإمكانك أن تشتري ملايين الأمتار من الأراضي ، لكنّك في النهاية لن تستقرّ بجسدك إلا داخل متر ونصف من قشرة كلّ هذه الأمتار).
ثم تأتي احلام وتعرف الشجاعة على ذلك النحو :
(الشجاعة هي أن تجازف بقول ما لا يعجب الآخرين).
ولا تعليق.
اما الحب فان احلام مستغانمي تعرفه بهذا :
(الحبّ هو اثنان يضحكان للأشياء نفسها ، يحزنان في اللحظة نفسها ، يشتعلان و ينطفئان معاً بعود كبريت واحد ، دون تنسيق أو اتّفاق).
هذه بعض نصوص احلام مستغانمي في (الاسود يليق بك)..قصدت من ذلك كله مدخل ل (الازرق يليق بك)...وانا اتحدث عن نصر الدين الشغيل.
شوف الشغيل بالازرق ..ح تشعر ان الزول دا ولدنا ..لكن ساكت (المقادير) سوت كلامها.
كان طوال الفترة الماضية اللاعب نصرالدين الشغيل يخضع للعلاج والتأهيل والكورسات التى تجعله اهل للدخول الي كشوفات الهلال.
توقعت في الفترة الماضية ان يكتب المريخاب عن هيثم مصطفى (الاحمر يليق بك) ...وهم سعداء كل هذه السعادة به.
لكن يبدو ان المريخاب اكثر قناعة من غيرهم ان (الاحمر) في وداي وهيثم مصطفى في وادي.
ثم ان المريخاب لا يفكرون على هذا النحو ..هم فقط ولاد هذه اللحظة.
هل هناك في المريخ الان من يذكر هيثم طمبل.
حتي كلتشي اصبح مجرد لاعب لا تشعر به إلا عندما يطالب بمرتبه وحوافزه.
في واحد قال لي هيثم مصطفى بالاحمر زي يوم الاجازة العصر.
بكرة المدرسة.
زي البامية المفروكة بالرغيف.
الرغيف طبعا هيثم مصطفى ...والبامية المفروكة معروفة.
اتخيلوا وسط الهلال فيه كل هذه الغزلان ...(مهند الطاهر – بشة – نزار حامد – نصرالدين الشغيل).
والله تعاين ليهم كدا (ما شاءالله)...تقول بس (الكلية الحربية) عندها تخريج ضباط في استاد الهلال.
شفتوا (الطول والعلا) دا كيف؟.
والله دا وسط (كديس) ما يفوت منو.
غايتو يا ناس المريخ ...مباراة القمة القادمة إلا تدخلوها ومعاكم عربية (مطافي).
وسط الهلال دا مولع نار.
العجب مسكين ..قاعد يتفرج بس.
يا زول العجب هسع الدخلو شنو في الكلام.
اول مباراة لعبها نصرالدين الشغيل مع الهلال ضد شباب ناصر ...الشغيل جاب ليه هدف.
دي ما قضيتنا والله ..يجيب هدف ..وإلا يجيب ليه (صندوق بيبسي).
وكان افضل لاعب في المباراة ...حالتو عائد من اصابة ومن توقف قارب ل (4) شهور.
دي برضو ما قضيتنا ..يكون افضل لاعب وإلا يجي في العشرة الاوائل.
قالوا ليك غارزيتو ..طوالي وضع ايدو في رأسو ..وقال معقولة دا (الشغيل) الكان بيلعب في المريخ.
هو المريخ فيه كورة.
غارزيتو دا ما صدق.
انت يا غارزيتو بس ضايق للتصريحات ..ما قلنا ليك اصبر ..الشغيل دا ح ندخلو ليك مدرسة قيادة ..(نشيل ليه الطوحال والمرارة)..ونجيبو ليك.
لكن انت ضقت.
قعدت تصرح.
اها الشغيل جاك ...ما سائل في (انستا).
انستا عديل كدا يا كوتش.
نحن المواضيع دي ما بنهظر فيها ..ولا بنلعب ..انستا ...يعني انستا.
الزول دا ترسبات المريخ ديك كلها ..شلناها منو.
الطحالب ..الفطريات ...الفيروسات.
عملنا ليه (فرمتة) شاملة كدا..فولدر ..فولدر.
بعدين الشغيل دا والله كان معذور ..كان بيلعب مع ناس بلة جابر وموسي الزومة وضفر ونجم الدين.
ديل هسع (عزا) بمشي معاهم ؟.
المباراة كلها الشغيل كان واضع ايدو في قلبو.
زي الراديو الحجارو بتقع.
بتكون ماسكها بي ايدك ...(خاصة في عالم الرياضة).
الجماعة ديل ..لو قعدت معاهم في حافلة ساكت ....الكورة الفي رأسك كلها تطير.
والله (سطر) ما يقعد ليك.
بلة وموسي وضفر ونجم الدين.
انا ما عارف (الشغيل) كان متحمل الجماعة ديل كيف؟.
لو ما الجماعة ديل ..الشغيل كان كمل دراستو ..وكان دخل كلية الطب ..زي الما حصل حاجة.
هسع هيثم مصطفى قلبو انقطع ..الكورة يسلموها ليه في (رقبتو) ..ما عارف دي (دغالة) من ناس احمد الباشا ومصعب عمر ..وإلا الجماعة ديل اصلو كورتهم كدا.
نفسي اعرف الحكاية دي مقصودة ..وإلا اصلو دا طبع.
الشغيل الله شافو ...مرق مع (الاعدادية) وجاء الجامعة حقت الهلال.
ودي حاجة طبيعية ..الكلام الناس العكسوا الحكاية من الجامعة للاعدادية.
انا عاوزكم تتخيلوا الشغيل في الهلال ...(صواقعنا) تاني تقول يا الليل.
تقول يا غربتي.
الكورة تبدأ تمانية ...تمانية وخمسة ...اخوك ما بتعرفو من الخبط.
غايتو تاني اي مباراة للهلال ..جهزوا ليكم (73) نقالة ...و15 عربية اسعاف.
خبط شديد.
والله انا هسع خايف على ناس عنكبة واسماعيل بابا ..ديل اولاد صغار.
ناس كلتشي ممكن يزوغوا ..ديل لعيبة كبار بتصرفو.
اتخيلوا كدا ..نزار حامد ونصر الدين الشغيل في وسط واحد ...والله نحن ح نفتر من (الصنقيع).
تاني (صنقعة) ساكت.
تاني بس نعاين فوق.
ناس مونزا وفيصل موسي وبلة ونجم الدين ورمضان عجب وامير كمال ...ديل تاني إلا نشوفهم بين الشوطين.
دا ما وسط نصاح.
الشغيل ومهند وبشة ونزار حامد.
البعاين تحت منو؟.
عاوز الفن والمهارة بتلقاها في وسط الهلال (مهند الطاهر) ..العاوز الابتكار والاختراع بلقاه عند (نزار حامد) ..العاوز الون تو والسهل الممتنع بلقاه عند (بشة)..والعاوز الخبط والالتحام واللعب الافريقي المولع نار ..كمان برضو بلقاه عند (الشغيل).
عمر بخيت وايكانغا ..ديل للشغل التكتيكي ..ديل ناس العقل والمخمخة ..ورسم الخطط الكروية الدقيقة وتنفيذها.
ناس المريخ ديل بعد علاءالدين يوسف انتقل للهلال ..كان قد فقدوا روحهم القتالية.
اللعب في المريخ بقى لعب معلب كدا ..وبدون نفس وما فيه اي مجهود او طاقة.
الي ان جاء نصر الدين الشغيل ...بروح الشباب وحماس الصبيان ..ولع ليك وسط المريخ ..واشعل ليك النار في القلعة الحمراء ..واعاد الروح القتالية.
ناس الهلال انتبهوا للحكاية دي.
قاموا عملوا شنو؟.
قاموا شالوا (السكينة).
بشويش كدا ....رجعوا علاءالدين يوسف الذي فقد روحه القتالية بعامل (العمر)..وجابوا نصرالدين الشغيل ، الولد الصغير.
هسع المريخ واضح ان بمتلك وسط بملّس الكورة ..ناس رمضان عجب وامير كمال ..(ديل الواحد لو قاعد في الاستاد إلا يطلع في الكرسي عشان يشوفهم).
وسط الهلال الان ضخ في عصبه روح قتالية جديدة ..زول بتاع لخبطة وخبط ..وضرب.
ما بتفاهم.
ما بتكلم كتير.
بيلعب كورتو ..وبيطلع.
تصريح في الجرايد ما بتلقى ليه.
زول بتاع (ميدان) بس.
لاعب (عمليات).
والله انا اكتر شيء بسعدني في الموضوع دا ..وسط الهلال الذي اصبح وسط (ناطحة سحاب).
تاني من سبعة ونص ..نصنقع فوق.
الشغيل ونزار حامد وبشة ومهند الطاهر ...الوسط دا منتخب البرازيل 1986م ...ما كان بيحلم بيه.
ولو عاوزين تتأكدوا من كلامي دا ..خلوا الرباعي دا يشارك في مباراة واحدة ..عشان تتمتعوا في عمركم دا.
مع الوسط دا والله (ترمسة) ما بتخلوها حائمة في الاستاد.
حظ ولاد الترمس ...ناس الهلال جابوا ليهم (فرامة) جديدة ..بتشيل من طرف.
ملحوظة : الترمس هسع الدخلو هنا شنو؟.
هوامش
المنتخب يلعب اليوم ...في ظروف صعية ...اعداد ما في ...اختيار غلط ...دوافع ضعيفة.
الله يكون بس في عون المنتخب.
رغم ان الجميع بطنها طمت بعد ان تسبب اتحاد الكورة في ان نفقد (3) نقاط ..كان يمكن ان تجعلنا اليوم نقاتل ونلعب بدوافع كبيرة.
المباراة فقط اداء واجب.
نخشي من الخسارة الكبيرة ..ومن الاصابات.
منذ ان خسر المنتخب امام المنتخب الاثيوبي في التصفيات الافريقية الماضية ..والمنتخب يعاني من احباط شامل وعام.
المنتخب بعد ذلك الخروج المحزن ..يحتاج الي تجديد ..وجهاز فني جديد ..ودماء جديدة ...لأن هذا الجيل الذي يمثل المنتخب الان ..وقف في الحتة دي.
مازدا ذاتو وقف.
الاتحاد المصري ابعد شحاتة الذي فاز معهم 3 مرات ببطولة الامم الافريقية ..فقد لانهم شعروا ان شحاتة وقف.
مازدا دا ..هسع الفيه انتهت.
وقف هنا.
فهمو كمل يا جماعة.
غايتو لا شيء ينفع المنتخب اليوم غير (الدعاء)...والله يستر.
لكن لا مازدا ولا اللاعبين المختارين يمكن ان يقدموا شيء اليوم امام غانا.
والله يكضب الشينة.
كلما اقرأ خبر عن المريخ ..الخبر بكون عن الازمة المالية التى يمر بها المريخ.
حقيقة ازمة المريخ المالية تتمثل في مكسيم وسليمانو الذان تعاقد معهم المريخ.
الهلال تعاقد مع لاعب في حجم تراوري ..والمريخاب طموحهم كله لم يتجاوز (مونزا).
الهلال في يونيو القادم ..يجب ان يبحث بدلاء عن دومنيك وسنكارا.
من بدري شوفوا غيارات للجماعة ديل.
ترواري ما فيه كلام.
سيدي بيه سوف يكون اضافة كبيرة.
ساني مع ناس الشغيل ونزار حامد ومهند وكاريكا ..بجعل الصورة اجمل.
ايكانغا ايضا استمراره ضروري.
ساني وايكانغا طبعا تعاقدهم مع الهلال سوف ينتهي في يونيو.
واعادة قيد ساني ...شيء لا بد منه ..ان غادر ايكانغا.
