(مهند ..تراوري...نزار)...عرض محلي جنن العالم قبل كدا ...كنا قد كتبنا عن اعلان زين .. الحساب بقى بال (سانيه) ، وكنا قد حركنا بتصرف (الثاء) الي السين لتصبح ال (سانيه) بدلا من ال (ثانية).
سانيه طبق الاعلان دا بالثانية ، بالحرف...جاب ليك هدف (رأسي) في الحضري عندما اعلنت اللجنة الفنية فوز عصام الحضري بنجومية المباراة.
الحضري المسكين ...ما فهم اي حاجة ...قصاد هذا الهدف بقى ليك زي (اهل العوض) في انجلترا.
ما ناقش اي حاجة.
هسع بعد (عرض) الهلال الرائع والذي استمتعنا به امام المريخ ..وجدنا ان بشة والصاقعة نزار حامد ..قصدوا في هذه المباراة ألا يسجلوا (اهداف).
ركزوا على (العرض).
نظام شنو؟.
نظام نحن اي حاجة عندنا بي نظام.
تراوري ومهند ..عملوا بمبدأ (الشوف) تطبيقا وتنزيلا لاعلان سوداني ...(عرض محلي جنن العالم)..وقد كان عرض الهلال امام المريخ بحق (يجنن العالم)..ومتعنا نحن هنا في ام درمان ، خلانا ليكم زي كأننا في حفلة لعبدالعزيز محمد داؤود ...ننقز في كراسينا متل كور (البنق).
عبدالعزيز محمد داؤود لمن يغني (غصن الرياض المايد ...يا الناحِلني هجرك وانت ناضر وزايد..تهجرني ليه.. وأنا ليك رايد؟)..بشة بمسك ليك ناس موسي الزومة ديل يفلفلهم ليك زي (الرز).
وبلة جابر في كنبتو (فانلتو) بتشرط.
بلة جابر ...حالتو بقت في الكنبة زي المغترب القدر ما تمشي ليه يقول ليك والله لسع ما فتحنا الشنط.
لمن يرجع ..ما يفتح الشنط.
يا العجب قوم سخن ...(المريلة) اللبسوك ليها دي ...تاني ما اظنك تطلعها.
تقول ممرض.
العجب بالمريلة زي اللبن لمن يجيب ليه طعم ...(ببقى زبادي).
الدكتور مسك ليك يد (المريض)..قال لينا الزول دا عندو (بشة) في الرئة.
كلنا ختينا ايدنا في رأسنا ...(بشة دا وصل الرئة كمان).
قلنا ليه يا دكتور ...(بشة) في الرئة دي يعني شنو؟.
بي صراحة ..نحن ما كنا فاهمين اي حاجة...الفى رأسنا كلها كملت.
الدكتور قال لينا (بشة) في الرئة دي يعني انتفاخ في (البلة الجابرة) ..زايد سرحان حاد في (الموسي الزومة).
قلنا ليه : يا دكتور ...والحالة دي خطيرة.
بينا وبينكم نحن من سمعنا ليك حكاية (الموسي الزومة) عرفنا ليك طوالي ان الموضوع دا عندو علاقة بالكورة.
برضو نحن بنفهم ..في شوية انجليزي كدا.
الدكتور قال لينا والله لو الحالة دي (اتوصفت) ممكن تكتل طوالي.
الدكتور ...شال السماعة ..ووضع ليك السماعة في (القلب).
فجأة كدا الدكتور هاج ..وقعد يكورك ..لا الحالة دي خطيرة ..الحالة دي ما بتسكت عليها...جيبوا الاوكسجين ...ارفعوا الحواجب.
نحن نشيل ونرفع في الحواجب ...(من الاستغراب).
يا دكتور في شنو؟.
الدكتور قال لينا الزول دا عندو (نزار حامد) في البنكرياس.
كمان نزار حامد دا وصل (البنكرياس).
غايتو يا ناس الهلال بتيجبوا ليكم (لعيبة) كدا ..من وين ما عارف؟..الواحد فيهم من اول موسم (يبنكريس) ليك.
والمرض دا خطير يا دكتور...الزول دا واحيد عند اهلو.
يعني الزول لو كان واحيد عند اهلو ما يموت.
الدكتور قال لينا : خطير الشوية دي ...الزول دا لو ما اتلحق ..المرض دا ممكن يتضاعف ويبقى (تراوري) في الطوحال.
وصل الطوحال!!.
ونعمل شنو يا دكتور؟.
تحولوا ليه (دم) الان...دم فوري ..سريع.
صاحبكم العيان سمع كلمة (تحويل) دي ...رفع رأسو ...قال للدكتور انا لو لقيت لي (تحويل) رصيد ..بريحني اكتر من (الدم)...حولوا لي رصيد يا دكتور.
واحد مننا قال ليه اسكت ...انت بلا (شوبرك) دا ما في حاجة عاملها فيك ...انت ما تتكلم ...لو عندك كلام بس تقول لينا (وصيتك) ..لو مت ندفنك وين؟...غير الموضوع دا ما بنسمح ليك تتكلم في اي حاجة ...فوّت علينا المباراة...اسكت كمان عاوز تتكلم.
هسع لو سمحنا ليك تتكلم ..تقلبها لينا كورة.
انتوا الكورة وقت ما بتقدر عليها ..البحضرك ليها شنو؟.
مية مرة ..قلنا ليكم (بشة) دا يوم بكتل ليه واحد فيكم.
بشة دا إلا تثبتو (بعثة الاممالمتحدة)..وقوات حفظ الامن ...موسى الزومة ما بثبتو.
موسى الزومة هسع بقى في رقبتو.
موسى الزومة دا (النزول) ما بثبتو.
شوية كدا ..زولنا الجبناه للدكتور بقى يقول ليه في كلام ما مفهوم ...بقى يهضرب ...(مهند لا ...ما تشوت ...لا ...حرام عليك ...نحن عندنا شفع عاوزين نربيهم).
جرينا للدكتور ...قلنا ليه يا دكتور ..تعال شوف لينا الزول دا ...مالوا بهضرب كدا زي (بابور) الكهرباء.
والله هضربتو دي هضربة (بابور) فضل عديل كدا.
الدكتور ..جانا فاتح صدرو ..وقف ليه في رأسو.
يا دكتور في شنو؟...(عندنا جماعة منتظرننا ..قالوا لينا لو في اي حاجة ..مسكلوا لينا عشان نجهّز القبر)..نمسكل ليهم يا دكتور.
الدكتور قال لينا اصبروا ..ما تضيقوا للقبر.
القبر دا كلنا ماشيين عليه.
طيب في شنو؟.
الزول دا عندو (مهند الطاهر) في الحبال الصوتية.
والمرض دا خطير؟.
خطير الشوية دي ...الزول دا لو ما اتلحق ...ممكن يروح فيها.
يا دكتور يتلحق اكتر من كدا كيف؟...نحن اكتر من نجيبو ليك ..نعمل ليه شنو؟.
والزول يهضرب ...(يا مهند لا ...الحضري كبير في السن ..اخر عشرة دقائق في المباراة ما بشوف).
الدكتور ..وقف ..قال لينا لازم نشيل (البنكرياس).
يا دكتور انت بتلعب ...الزول دا (البنكرياس) حقو ...شالوه مع حكومة مايو.
انت قاعد وين يا دكتور؟.
الدكتور شعر ليك بالاحراج ..واتعقد في الدنيا دي جنس تعقيد ..بقى زي (السجك).
غايتو الواحد ..وقت يكون نفسو في (سجك) بدخلوا ليك في اي حتة.
الدكتور ...حاول يتخارج من الحتة دي ...قال لينا لازم نشيل (الطوحال).
يا دكتور ...طوحال شنو؟...المحلية شالت الطوحال دا قبل 7 سنوات.
شالوا الطوحال ومعاه كراسي الجلسة والسفرة.
كمان المحليات دي خلت ليها (طوحال) حايم.
الدكتور ما عرف يمشي وين؟...شعرك ليك ان شهادة الطب الشايلها دي (شهادة اعدادي).
الدكتور قال خلاص ...نشيل (المرارة)....عشان ننتهى من الموضوع دا.
يا دكتور ...انت جنيت!!!.
المرارة دي شالناها 17 مرة ...وفي كل مرة نشيل فيها المرارة ..ناس التلفزيون يرجعوها.
لو عاوز تشيل يا دكتور ...شيل لينا (محمد حاتم سليمان).
الدكتور سماعتو وقعت منو...قال لينا الموضوع دا اكبر مني.
طيب يا جماعة ..انتوا زولكم دا لا فيه بنكرياس ..ولا فيه طوحال ..ولا فيه مرارة ...شغال كيف؟...عايش كيف؟.
يا دكتور انت كمان المريخاب ديل بيغبوا عليك.
هسع نحن المريخ دا شلنا منو كم نقطة؟..ولسع قاعدين يتفاصحوا.
ناس هلال كادوقلي شالوا منهم نقطة ...وبرضو يقولوا ليك (الزعيم).
الامل ضربهم في استادهم ...مع ذلك بتناقشوا معانا.
زولنا العيان قام تاني يغالط.
نحن عندنا طابق تاني ..والكأسات الجوية ...وقمة السبتين.
الدكتور شاف حالتو المتأخرة دي ......قال لينا جماعتكم المنتظرنكم ديل ...(مسكّلوا) ليهم.
نحن نسينا الموضوع ...(زي ما انتوا هسع نسيتوا).
قلنا ليه (نمسكّل) ليهم لي شنو يا دكتور؟.
الدكتور قال لينا عشان يجهزوا (القبر)...عشان تمشوا من هنا تدفنوا طوالي.
زول لا عندو بنكرياس ..لا طوحال ..لا مرارة ..لا دفاع ...لا وسط لا هجوم ...كمان بتفاصح.
ادفنوا الزول دا ..وتاني حالة متأخرة زي الحالة دي ما تجيبوها لي (ادفنوا) طوالي.
شلنا الزول ..وطلعنا على المقابر.
وصلنا المقابر ...لقينا (القبر) جاهز.
عاوزين ننزل (المرحوم)..قعد يناتل فينا...قال لينا يا جماعة انا لسع فينا شوية روح ...ما تدفنوني...ما تستعجلوا.
قلنا ليه اسكت ...كمان انت بتعرف اكتر من الدكتور.
قدر ما حاولنا ..ننزلوا في ود اللحد ...(المرحوم) ما نزل.
في واحد قال للمرحوم ..اسمع لو ما نزلت ..بنجيب ليك (3) تسعات.
المرحوم ..ما اشتغل بالموضوع ..برضو بناتل.
يا جماعة (المرحوم) دا نعمل ليه شنو؟.
في واحد قال ورهو تصديق الدفن ...يمكن يقتنع.
ورناهو (ورقة الوفاة) ...برضو ما اقتنع.
اخر شيء ..في زول جانا من الحلة الفوق ...قال لينا الحاصل شنو؟.
حكينا ليه الحاصل من قون بشة في الدورة الاولى للممتاز الماضي الي كورة تراوري الضربت في القائم.
الزول طلع (مفتح)...قال لينا الموضوع دا ساهل ...(المرحوم) دا لو رفض (يدفن)..جيبوا ليه (الشغيل).
المرحوم من سمع كلمة (الشغيل)..قال خلاص ..يا جماعة انا بندفن بس ما تكتروا لي (الطوب).
قلنا ليه ..بنكتر ليك (الطوب).
قال لينا ..خلاص عندي رصيد في تلفوني (3) جنيه ...جيبوا لي اكملها ..واعمل خدمة (عرض محلي جنن العالم).
قبل ما يكمل كلامو ..كبينا فيه التراب.
ملحوظة : دفنا وقلنا : (اي دمعة حزن لا لا).
هوامش
الليلة ان شاءالله الهلال ينتصر في ساحل العاج ..ويعود لنا من هناك بانتصار.
وان شاءالله يقدم هناك عرض خارجي يجنن العالم.
اصبروا بس.
ورينا اي قون يا اكانغا.
سجل ..ما ترجع ساكت.
ناس المريخ ..بعد مباراة القمة ...كلهم اتفرتكوا.
اتوزعوا في الدنيا دي.
الجنيات الجروا ...اكرم والباشا والعجب.
الجنيات الجروا بقيادة عصام الحضري.
في ناس جروا قبل الكورة زي (اكرم).
وناس جروا بعد الكورة زي (الحضري).
فيصل سيحة في برنامج عالم الرياضة مع رضا ..بعمل موازنات.
يجب مخالفة للهلال ...يقوم يجيب مخالفة للمريخ.
يقول علاءالدين يوسف مفروض يأخد كرت احمر ...يقول في اللقطة التانية مساوي مفروض يأخد كرت.
شغل الموزنات دي ما بنفع في تحليل اداء الحكام.
الفقرة دي يا رضا سموها فقرة (الموزنات)...ما شايفين لينا اي (امبراطور) في الفقرة دي.
في امبراطور بعمل موازنات كدا.
هي تحليل وإلا جمعية خيرية.
فريق هلال كادوقلي في الموسم القادم ان شاءالله يمثل السودان.
اهلي شندي يلعب غدا ..اتمنى ألا تتجاهل الفضائيات السودانية ذلك.
الهلال مباراته القادمة في مدني امام الاتحاد.
والمريخ الي الان ما طلع من العاصمة.
مع ذلك فان المريخ هو (وصيف) لهلال كادوقلي.
زمان المريخ كان ما رضيان بي ان يكون (وصيف) للهلال.
هسع بقوا (وصيف) لهلال كادوقلي.
هيثم مصطفى حتى الاسبوع السابع ...لو الموضوع دا استمر على هذا النحو ...ما بيلعب معاكم.
معقول هيثم يلعب مع وصيف الوصيف.
والله يا علاءالدين يوسف ..ساكت ...ابيتوا (اهلي شندي).
بعد دور ال (32) هل سيستمر الكوكي مع المريخ.
الكوكي مرق بخرم الابرة في الاسبوع الرابع.
وان كان نال سخط كل المريخاب ..وهو يتعادل مرتين على التوالي في الممتاز.