سودارس : مول ومدينة طبية ونادي أسري (دي دعاية انتخابية ما اكتر)

غارة بطائرة مسيّرة تعبر الحدود من السودان وتوقع ضحايا في مدينة تشادية والي شرق دارفور يتفقد الطلاب الواصلين للنيل الابيض لاداء امتحانات الشهادة الثانوية مفوضية العون الانساني بسنار تدشن كسوة الأيتام غوتيريش يخاطب إسرائيل وأميركا: حان وقت إنهاء الحرب ترامب: سندمر حقل بارس للغاز إذا قررت إيران مهاجمة قطر للعام التاسع على التوالي.. الفنلنديون أكثر الشعوب سعادة السيسي يفاجئ الإمارات بزيارة خاطفة.. ويوجه رسالة بشأن الضربات الإيرانية إيران تضغط على "الفيفا" لنقل مباريات المونديال خارج أميركا مشيتك تفضحك.. هكذا يعرف الآخرون إن كنت غاضباً أو حزيناً من المستشفى.. منة عرفة تعلن تعرضها ل وعكة صحية شديدة القوات المسلّحة السودانية تعلن استرداد محطة مهمة تشاد تتوعد بالرد على الهجوم على بلدة الطينة المريخ ينازل موهانقا وعينه على إعتلاء الصدارة لجنة المنطقة الجنوبية تصدر برمجة الدورة الثانية لدوري الدرجة الثالثة الجنوبية بكوستي عثمان ميرغني يكتب: السودان وتحدي توحيد السلاح بالصورة والفيديو.. ناشطة سودانية تحكي قصة ارتباطها وزواجها من نجم السوشيال ميديا "برهومي": (الشاريك وعايزك بحارب عشانك وعمرو م يلعب بيك) مجمع الفقه الإسلامي غدا الخميس اليوم المتمم لشهر رمضان شاهد بالفيديو.. وضعوها على "شوالات".. سودانيون يقومون برمي المصاحف الممزقة داخل النيل وسط خلافات وجدلاً واسعاً على مواقع التواصل شاهد بالفيديو.. طلاب بجامعة بريطانية شهيرة يجمعون تبرعات للسودان بقيمة 21 ألف جنيه إسترليني بعد تجريد منتخب بلاده من كأس أفريقيا..الاتحاد السنغالي يعلن أول قراراته مقرّ خاتم الأنبياء العسكري يتوّعد بردّ قويّ عثمان ميرغني يكتب: عودة لجنة التفكيك تراجع معدّل التضخّم في السودان ظهور لنجاة الصغيرة يفرح جمهورها.. والفنانة ترد "رجعت الشغل تاني".. مطرب المهرجانات مسلم يعلن انتهاء أزمته مشهد الولادة بمسلسل محمد إمام يثير غضباً.. والممثلة توضح داركو نوفيتش : عودة قباني إضافة حقيقية للفريق بادي يصدر مرسوم تنظيم أعمال التعدين التقليدي وضبط آليات التعدين بالنيل الأزرق 6 عادات يوصى بتجنبها في المساء لحماية القلب عاجل.. اغتيال لاريجاني دراسة : الأطعمة فائقة المعالجة تهدد كثافة العظام ابتكار علاج لسرطان القناة الصفراوية من الحليب ياسين أقطاي يكتب: كيف وقعت إيران في هذا الخطأ الإستراتيجي؟ رئيس الأهلي مدني وابنه يتعرضان لحادث مروع المباحث تنهي مغامرات شبكة إجرامية متخصصة في الإحتيال علي أصحاب المحلات التجارية عن طريق اشعارات تطبيق بنكك المزيفة شركة كهرباء السودان تحديث حول سير أعمال الصيانة الطارئة للشبكة القومية لافروف قلق إزاء مستقبل نظام عدم انتشار الأسلحة النووية توقّعات بارتفاع غير مسبوق في أسعار النفط الترجي يهزم الأهلي في ذهاب ربع نهائي دوري أبطال أفريقيا ضبط 238 كجم من "الآيس" وأسلحة بجانب نحاس بولاية البحر الاحمر انقطاع طويل للكهرباء يضرب مُدناً وقُرى سودانية واسعة في رمضان ضبط 238 كجم من "الآيس" وأسلحة بجانب نحاس بولاية البحر الاحمر الشيخ بن زومة.. إلى جنة الخلد أغلى علبة كعك في مصر تشعل مواقع التواصل قيم الهلال المتوارثة يجب أن تبقى أبد الدهر بنك السودان المركزي يصدر توجيهًا للمصارف إبراهيم شقلاوي يكتب: الزراعة ما بعد اقتصاد الحرب في زمن الضجيج.. القرآن بوصلة المعنى والسكينة د.مزمل أبو القاسم يكتب: دموع الباز.. وزاهر! (2) السودان.. الدفاع المدني يستعين ب"التوك توك" طفح جلدي في رقبة الرئيس ترمب يثير تساؤلات حول صحته ملتقي التحصين للعام 2025 ينعقد بحضور التحالف العالمي للقاحات والشركاء صوت لا يغيب.. محمد رفعت ورحلة الآذان الخالد في رمضان أجهزة الأمن السودانية تنهي مغامرات لص الصيدليات في عطبرة شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم السودان.. فكّ طلاسم"تبيدي للمجوهرات" في الخرطوم والتحقيقيات تفجّر مفاجأة السودان.. مباحث مكافحة سرقة السيارات تطلق تحذيرًا

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

مول ومدينة طبية ونادي أسري (دي دعاية انتخابية ما اكتر)

قوون نشر في قوون يوم 12 - 05 - 2013

جمال الوالي يريد أن يفعل في (4) شهور ما عجز عنه في (10) سنوات

قاعدين زي (السلام عليكم)...قالوا لينا القاعدين ليها شنو؟.

أنا طوالي قلت يكون (سيد ود الشبوختري) مات أمس مشينا عليه (عصير المنقا) القدامو ما قدر يكملو.

طول ما ود الشبوختري ما قدر يكمل (عصير المنقا) دا يعني الزول دا ما كويس.

والله ما كويس.

اصلو ما كويس.

الزول دا ما طبيعي على باب الموت.

قمنا قلنا للحاجة في شنو يا (السرة بت خاتم المنى) طيرت قلبنا...الحاصل ايه؟.

قالت لينا (الجعبور ود السوتربي) اتسمم.

قلنا ليها طيب ما براحة هسع في داعي (تخلعينا) قدر الخلعة دي كلو دا عشان (تسمم).

التسمم دا حاجة ما خطيرة ...غسيل معدة والموضوع بنتهي.

أنت من زمن (التسمم) بكتل ليه زول.

بعدين (الجعبور ود السوتربي) دا التسمم جاهو من وين؟...الزول دا يأكل (الزلط) ما بتجيه حاجة.

تسمم (الحنكشة) دا الجعبور ما بعرفو ...ولا برقد ليه في سرير؟.

الجعبور دا كان تكونو عارفين مرة أكل ليه (فرخة) ...الفرخة (6) يوم رايحة في سنونو.

الفرخة وقت وصلت المعدة وصلت (سويسو).

والله أبوه (السويربي) يسمع بي انو ولدو (الجعبور) اتسمم إلا يقدد ليه عيونو.

كمان نحن عندنا زول (بتسمم).

الحاجات دي نحن ما بنقيف عندها ..ولا بتجينا الحمدلله...بعدين الواحد من يجيه (تسمم) بعد شوية كدا يقول ليك عندي (صداع)...وشاعر بي (ارهاق)..ونفسي مقفولة.

الحاجات دي نحن ما بنعرفها (دي أمراض جامعات ساكت).

تسمم شنو البتصاب بيه (الجعبور) في اخر عمرو؟ ..(والله دي ما كويسة في حقو).

عيب عديل في (تاريخو) النضالي.

ناس الحلة لو عرفو الموضوع دا بشيلوا حالو.

عامل لينا فيها (أبو عرام)...وهو قاعد (يتسمم) زيو وزي ناس تامر ومودي ولؤي.

خليت شنو يا الجعبور لي ناس (تامر) كمان قال اسمو (الجعبور).

عليكم الله هسع الاسم دا براهو كدا ما كفيل يطير ليه (برج حمام).

حاجة السرة قالت لينا هسع الكلام دا ما وقتو ....ألحقو الزول قبل ما يروح فيها والله خليتو بين الموت والحياة يهضرب متل (الجدادة) الراكدة ليها في (بيض).

كلبة والدة بس.

خليتو شغال زي (زي أفلام).

خلينا الفي ايدنا ...وجرينا على (الجعبور ود السوتربي)...لقينا ليك حالتو صعبة بالجد.

معلق زي (خطرات) اللوري = يا زول الحاصل عليك شنو؟....عامل كدا زي الشباك الفاتح (ضلفة) واحدة.

الجعبور ما قال كلمة.

خمينا ليكم في ملاية (مطرزة)...وجري على (الحوادث).

قبل ما نقفل الباب الجعبور فتح عينو (متل البطارية البتشيل حجرين)..وقال لينا موبايلي في الشاحن جيبو لي معاكم.

نحن من قال لينا الكلام دا عرفنا ليك انو (المعنى الزول دا كويس).

قلنا على الأقل ما بموت لينا في (الطريق).

وصلنا الحوادث زي الساعة (11)....(11) إلا ربع.

(11) إلا تلت بالظبط كدا...ساعتي مأخرة (5) دقائق.

الدكتور عاين ليه كدا قال ما بستلموا إلا بي اورنيك تمانية.

قلنا ليه يا زول الاورنيك لزومو شنو؟..الزول دا (تسمم) ما حادث.

بعدين ما بتستلموا هو (شوال) سمسم ..ولاَّ أنبوبة غاز يا زول اتكلم كويس.

قال لينا السممو منو (خطيبتو)...باقي أي تسممات بتدخل المستشفى الجاني فيها (الخطيبة).

يا دكتور (خطيبة) شنو؟ - شوف (الخلقة) القدامك دي - خلقة (خطوبة).

الزول دا ما عندو حاجة اسمها (خطيبة) الزول دا صعب يا دكتور...ما تعاين ليه كدا.

التسمم (هداهو) ساكت ...الجعبور دا قبل ما يتسمم كان متل (ياسر رحمة)...صخرة ما بتهدو.

يمين الزول دا هسع لو ما مسمم كان طلع ليك فوق (المروحة) دي شاف ليك (الصوت) الفيها دي من شنو؟.

الدكتور ما اشتغل بي كلامنا.

قلنا ليه يا دكتور الزول دا لو حصلت ليه أي حاجة أنت المسؤول.

الدكتور ما قلنا ليه كدا ...قام (صنقر) فينا زي (خليفة).

هسع خليفة الدخلو هنا شنو؟.

الدكتور مسك ليك ايدو ...لقى ليك (الجعبور) سخانتو ألف...لو رميت ليك فيه (زلابية) بتنضج.

الدكتور تاني سألنا ...مالو الزول دا؟.

قلنا ليه (تسمم) يا دكتور.

الدكتور قال دخلو لي جوة.

نحن بنعرف الدكتور من يقول دخلو المريض جوة (المعنى حالتو خطيرة).

في واحد فينا مستعجل ...(النوع البنزل من أول جرة داك)....قال لينا يا جماعة أحسن نضرب للشباب في الحلة ناس التوم وجبرئيل ود الفترو..عشان يجهزوا (المقبرة).

قلنا ليه يا زول اصبر قول باسم الله (مقبرة) شنو؟..الزول دا كويس.

بعدين (ود الفترو) دا بالذات ما تضرب ليه المرة الفاتت في (دافنة) خليل ..مشى معانا المقابر بي (شورت) تقول ماشي ليه (دافوري).

زولكم حاول يقنعنا ليك قال يا جماعة الموت من الحياة ما معروفة - واكرام الميت دفنو.

قربنا (نقتنع)....الجعبور فتح عينو (زي اللبن المفور)..وقال لينا يا جماعة ما تستعجلوا على (القبر) أنا ما فيني أي حاجة أنا زي الطلقة...أنا كويس.

دخلناه غرفة الكشف الدكتور دخل عليه.

ساعة ونص الدكتور جوة.

كل مرة يطلع يرسل فينا واحد جيبو لي (حقنة).

نجيب (الحقنة).

يطلع تاني يقول لينا جيبو لي (درب).

نجيب (الدرب).

يقول عاوز (شاش).

نجيب (الشاش).

وين القطن؟.

نجيب (القطن).

عاوز (حبوب).

لمن قرفنا قلنا للدكتور واالله يا دكتور كلامك دا أفضل لينا منو نمشي (نحفر) القبر.

انتوا مستشفتكم دي (كافتريا) يا كافي البلاء لا فيها (حقن) لا فيها (دربات) لا فيها (قطن) لا فيها (شاش).

انتوا شغالين شنو؟.

منتدى ثقافي انتوا؟.

جنسكم شنو؟.

الدكتور قال لينا يا جماعة ما عاوز كلام كتير صحة المريض دا ما بتستحمل أي مناقشة بي صراحة كدا ونهاية الكلام الزول دا حالتو خطيرة.

خلوا أربعة منكم يمشوا يحفروا (القبر).

الجعبور سمع الكلام رفع ليك رأسو..وقال للدكتور ...أنت المستشفى دا مستشفى ولاَّ منطقة صناعية؟.

محلية!!.

أنت دكتور ولاَّ سمسار ؟ شنو البتقول ليهم امشوا احفروا القبر نحن (القبر) ضهبانين منو؟.

القبر كمان عاوز ليه (دكتور).

يا دكتور اشتغل شغلك القبر دا خليه لي ناس ( عابدين درمة) وجماعتو وقت نبقى عليه ما بتجينا أي عوجة.

والله عندنا شباب في الحلة ... يعجبوك المرحوم يدفنوا ليك في (5) دقائق.

(5) دقائق بس ويجوا راجعين يشربوا شاييهم وقوهتم.

الدكتور اتحرج ...(اتقرص) ...ما عرف يمشي وين؟.

بعد شوية ...الدكتور قال لينا تعالوا.

مشينا عليه (7) أشخاص ...أقل واحد فينا زي (فسحة المولد).

خير يا دكتور - ؟.

الدكتور قال لينا الزول دا أكل ليه (جبنة).

قلنا ليه أبدًا آخر (جبنة) أكلها في سماية (عباس ود الجضمة) ..جابوه ليه ولد الولد هسع دخل المدرسة.

الزول دا أكل ليه (باسطة)؟.

أبدًا يا دكتور الزول دا (الباسطة) من (4 -4 -2) ما بعرفها.

ملوخية (بايتة).

أبدًا.

سمك يكون أكل ليه (سمك) نوع (التسميك) دا كتير بجينا في المستشفى.

يا دكتور الزول دا ما قاعد يأكل السمك في الأساس ..قاطع السمك من طلبو بقى بي (20) جنيه.

طلب السمك بقى زي طلب اللوتري.

تمشي تقعد في محل السمك الطلب يجيك بعد سنة.

لمن تشبع (ريحة).

أنا ما عارف بأخرو (الطلب) كدا ليه تقول بودوه أول حاجة (الخارجية).

يكون أكل ليه (موز) بالمناسبة الموز برضو بسمم لو اكلتو قبل المسلسل.

الموز آخر مرة الجعبور دا شافو في (عيد الاستقلال) الفات.

لبن بس يكون شرب ليه (لبن) سممو.

أبدًا يا دكتور - (اللبن) ما بشربو عندو (مصران) و(4) أطفال اللبن بشربوه من الباب.

طيب الزول دا السممو شنو؟.

الدكتور دخل غرفة الكشف تاني ...غاب ليه تاني ساعة ونص.

بدأ لينا من أول جديد عاوز حقن نجيب الحقن.

عاوز دربات نجيب الدربات.

قطن شاش طبق فينا نفس النظرية.

آخر حاجة قال لينا الزول دا عندو (تعبعتر) في القاولون.

والتعبعتر دا شنو يا دكتور ؟ حاجة كعبة.

التعبعتر دا يعني (تبلبل) في الغدد المعوية.

والتبلبل دي بجي من وين؟.

من الأهداف العكسية.

كع الكلام وقع لينا.

قلت يا دكتور شنو؟ - أنت قلت (الأهداف العكسية) والله الزول دا كتلتو عديل كدا.

أنت عارف يا دكتور الزول دا قبل ما نجيبوا ليك كان بحضر في شنو؟.

الدكتور قال لينا بحضر في شنو؟.

قلنا ليه بحضر في إعادة مباراة المريخ والخرطوم الوطني.

الدكتور قال لينا وكمان بحضر في كورة (بايتة).

بس بس الزول دا سممو (هدف) بلة جابر العكسي.

الهدف دا جاب لينا كتر حالات (تسمم) في المستشفى دي.

عمل ليه ارتفاع في الأنسجة البلعومية ...نحن في الطب الحاجات دي بنسميها (الشخترة).

والشخترة دي خطيرة يا دكتور؟.

دي ممكن تقتل عديل كدا.

مرة جابوا لينا واحد هنا عندو انسداد في القصبة الهوائية نتيجة لانتفاخ كورات موسى الزومة العكسية.

نحن قاعدين كدا الجعبور جاء فينا طالع لقانا بنتكلم عن (هدف) بلة جابر العكسي.

زولكم طوالي قال لينا اضربوا لشباب الحلة ..قولوا ليهم احفروا القبر الدكتور كلامو صاح أنا بلة جابر دا من زمان قلت ليكم يوم بكتلني.

أها هدفو العكسي دا نشف ريقي.

طلعنا عشان نحفر القبر وخلينا ليكم (الجعبور) في المستشفى يشرب في الشاي.

قلنا ليه أشرب ساي الشاي دا آخر (شاي) ليك في حياتك.

ملحوظة : انتوا قايلنو كمل الشاي!!...ناس (ود الفترو) دفنوا ليك من (الجغمة) التانية.

هوامش

ضحكت شديد ..وأنا بقرأ عن اجتماع لجنة التسيير في المريخ.

ضحكت وسكت.

والإعلام السالب شغال زي كورال الأحفاد (لوردات) ساكت.

العندو (مزرعة دواجن) عملوه لورد.

توكيل غاز (لورد).

دكان في السوق الشعبي أم درمان (لورد).

اللجنة اجتمعت وانبثقت عنها كمية من (اللجان).

كلو اتنين عملوا ليهم (لجنة) براهم.

نظام نحن شغالين وكدا.

انبثاقات ساكت.

تتخيلوا قالوا شنو؟.

قالوا عاوزين يحولوا نادي المريخ إلى (مول تجاري).

قنعوا من الكورة يعني.

ناس مكسيم دا كورة ما منهم رجا ...جربوهم (ركشات).

وقالوا عاوزين يعملوا نادي أسري في شارع النيل.

الكلام الكان بقولوا صلاح إدريس قبل الانتخابات.

كمان (النيل) دا حق أبوكم.

انتوا فاكرنو = النيل الحصاحيصا.

وقالوا شنو؟.

قالوا عاوزين يعملوا ليهم مدينة طبية.

مدينة طبية لي منو؟.

لي ناس ضفر.

عشان يعملوا شنو؟.

انتوا قاعدين تنسوا نفسكم ولاَّ شنو؟.

وقالوا عاوزين يعملوا ليهم ملعب (رديف).

غير ملعب (وصيف).

جمال الوالي الذي عجز فيه في (10) سنوات عاوز يعملوا في (4) شهور.

تصوروا.

خلوني أنا.

انتوا الكلام دا هسع بتصدقوا.

دا زي الإستاد العالمي حق الكاردينال.

كلام قبل الانتخابات.

والطيارة الجات بي فوق عشان تشيل الخرط (بالفوقاني).

والإستاد التاني في الصالحة.

الواضح والثابت كدا الجماعة ال (17) ديل عاوزين يعملوا ليهم (دعاية) انتخابية.

الانتخابات بعد (4) شهور ..وكلامهم البقولوا في دا الآن ..ما بلحقوا (يتنوا).

الناس ديل الظاهر عليهم (ولفوا).

المعنى عاوزين يقعدوا.

عاوزين يغشوا الجماعة عشان ينتخبوهم للمول والمدينة الطبية والنادي الأسري.

عشان يكملوا الحاجات البقولوا فيها دي.

وانتوا تشيلوا وتصدقوا.

غايتو لقتيوا ليكم إعلام يعمل ليكم إعلان.

يطبل ليكم.

ناس عصام الحاج وود الياس ..في (النفخ) والمولات دي ما عندهم أي طريقة.

انفخوا ساكت.

هسع قبل المول وقبل النادي الأسري وقبل المدينة الطبية شوفوا موضوع (الديدان) دا.

الحقوا (نجيلتكم) البقت زي رأس أحمد بدير.

ما تقعدوا تغشوا في الناس.

هسع في ال (4) شهور دي اعملوا الحاجات البتتعمل (النجيلة)....(الجير)....(الكراسي).

الحاجات العاوزة ليها (سنين) كتيرة دي ما تعملوها لينا في (الجرايد).

الناس ما فاضية للحاجات دي.

المواقع المصرية والصحف هناك مازالت تطلق على جمال الوالي الرئيس (السابق).

طبعاً التكريم ومباراة المريخ والأهلي القاهرة وقعت عقودها على أساس أن جمال الوالي الرئيس (السابق).

سابق لمدة (5) شهور فقط.

والله أنا بديت أشك في الزول القطع كهربة نادي المريخ.

أنا عرفتو غايتو.

العمال الهاجمهم عصام الحاج ديك يكونوا قطعوا الكهرباء ..وما سددوها إلى أن قطعت عشان المريخاب يفتقدوا جمال الوالي.

ديل النجيلة عطشوها.

جابوا ليها (ديدان).

عشان الناس تقول يا حليل الوالي.

أول مرة عصام الحاج يطلع كلامو صاح.

تقشفك يا عصام الحاج كان (تقشف) حقاني.

المشكلة عصام الحاج مع (التقشف) دا .....عاوز (يخبت).

في خبت بكون مع (تقشف).

شفت لو (برشلونة) ذاتها اتقشفت ...بتنزل التانية.

هسع يا عصام الحاج ...لو شبكت جماعتك دي بي أنك ح تعمل مول ومدينة طبية ونادي أسري ..وقطر ..وطيارة ..ومطار كنت إلى الآن بتكون قاعد في المريخ.

وكنت ح تكون كمان الرئيس الأكثر شعبية في الوطن العربي.

لكن أنت ما فهمتها.

عملتها لينا كلها (تقشف) لمن رحت فيها.

وناس متوكل أحمد علي ذاتهم راحو فيها.

يا أزهري وداعة الله انتوا اتخدتعوا.

صدقني خدعوكم.

جابوكم عشان (تتقشفوا) عشان ناس جمال الوالي يرجعوا تاني.

والله ديل لو عارفين الموضوع فيه (مول)...ما كانوا بستقيلوا.

مساكين حاصروهم ليك بالحضري وفاتورة الكهرباء ..وغرامة الكاف لمن استقالوا.

لبدوا خلوكم سجلتوا هيثم مصطفى وظهروا ليك ال( 17).

ولسع ما خفي كان أعظم.

انتظرونا بس.

عاجل : الحضري يوم يومين ح يكون في الخرطوم (وصافية لبن كمان).

انقر هنا لقراءة الخبر من مصدره.