الزول الفي الصوره ده اسمو محمد علي الامين محمد خير (حمودي) ، خالي اخو امي الصغير .. إتوفى يوم الجمعه الموافق 24/10/2014 ، ربنا يرحمه ويغفر ليهو .. شغال امين مخازن في وزارة الصحة وموزع مستشفى احمد قاسم إتوفى في العناية المكثفة بتاعت مستشفى أحمد قاسم (اللي هي لي مرضى القلب والكلى) ، سبب الوفاة حسب شهادة الوفاة انو شارب (اسبرت) .. لحدي هنا وتمام وتم الدفن علي كده .. بعد داك بدت الحاجات تظهر واحده ورا التانيه .. امين مخازن وجامعي كيف يشرب اسبرت؟؟ ما عارف ضررو شنو؟ بالتاكيد لا .. وبدت الشكوك .. ليه هو رقدوهو في احمد قاسم وما ودوهو الحوادث؟ قالو لينا عشان زميلنا قلنا نلحقو سريع .. طيب هو شرب الاسبرت متين ولقاهو وين؟ مافي اجابه كافيه .. ،، لحدي ما اتجرجرت الخيوط وتم اكتشاف انو مكتول بي نزيف داخلي في المخ وفصل في النخاع الشوكي وكسر في الرقبه … اي والله .. بي نفس التفاصيل دي … وتم التستر بالكامل علي الجريمة دي بي كل تفاصيلها واشترك في التستر ده مدير مستشفى احمد قاسم والامين العام والدكتوره بتاعت العناية المكثفه … لما انا جيت المستشفى قالو لي محتاجين دوا بتاع اسبرت والدكتوره دي بي لسانها قالت لي هنا في السودان مافي الا تجيبوهو من بره … يللا طلعت لينا الروشته الفوق دي … وبعد ما كتبت الروشته اعلنت الوفاة مباشرة حتي ما خلتنا نشوف الدوا .. طيب الليله الطبيب الشرعي اثبت انو سبب الوفاة ما اسبرت … اها ده يقولو عليهو شنو؟ هل الاسبرت بعمل نزيف داخلي في المخ وبيفصل النخاع الشوكي وبيكسر الرقبه وضلعتين في الصدر؟؟؟؟ … والتستر علي جريمة قتل زي دي لشنو؟؟ … الموضوع وراهو شنو بالضبط اليخلي حرس مستشفى يكتل امين مخازن … وتتواطأ معاهو الاداره وتتستر عليهو لحدي ما الزول يندفن ويطلعو شهادة وفاة انو متعاطي ميثانول؟ … المهم : دي كلها حاجات حيجاوب عليها القضاء … والقضيه الان في نيابة بحري وجارية الامور القانونيه …. له الرحمة والمغفره وعلى الاخلاق السلام https://www.facebook.com/saddam.gwdawa