في قروب (اعلام مجلس شباب الامة) رفع اسامة عناوين الصحف الصادرة صباح يوم السبت 10 اكتوبر الجاري، فبدأ السجال التالي: * محمد الماحي الانصاري: التحية اليوم لصحيفة الصيحة. – دياب حسن: عفوا يا انصاري الصحيفة فقط عايمة عوامة "سيدا". * الانصاري: والله هي الوحيده الطلعت بي خط يعبر عن حقيقة الحوار اليوم. – دياب: فقط تبادل أدوار … نفس الرقيب الأمني الذي يلف على كل الصحف التي امتنعت عن التعليق بمهنية هو نفسه. * محجوب عثمان: مافي رقيب امني الصحيفة حاولت استصحاب كل الآراء ما بين كمال عمر الذي قال "الحوار بركات السماء" وما بين قول برمة ناصر "الحوار لن يحل مشكلة". – احمد حمدان: ما بين هبة السماء وبركات السماء.. ربع قرن ونيف… * سوسن محجوب: والله يا محجوب فى تناقضات غريبة فى عناوين الصحف. بعضها كتب حركة مسلحة واحدة واخرين حركات والبعض ديبى وصل وحيدا. – عصام محجوب الماحي: لا ادري لماذا انشغال البعض بفقاعات المؤتمر الوطني والحركة الاسلاموية والوقوف عندها اكثر من اللازم. أصبح سهلا علينا ابتلاع السنارة بطعمها. ليكن ما يحدث اليوم علامة فارقة لاصطفاف حميد. * دياب يرفع علامة الاعجاب. – محجوب عثمان: نحن في الصحافة ما عندنا دور سياسي دورنا نملك الناس المعلومات والحقائق عشان يقدروا يكونوا رأي عام صائب وصحيح خاصة فيما يتعلق بالاخبار. * عصام: اذا انقسم المجتمع السوداني اليوم فانه حتما الانقسام المطلوب الذي سيقود مباشرة الى التعامل بجدية مع قضية وطن تمأزقت حلوله المطروحة نفسها. هيا لنبني اصطفافا حميدا لاجل غد مشرق. – قرشي عوض: هانت يا خلاسيين. * محجوب عثمان: يا البلد البقت فيك العقول محنانه.. حوارك عن تراجى وناس ندى الفنانه.. يات من خاب وعاب ادوهو فيك مكانه.. خوفى عليك باكر تحكمك حنانه.. ترى المارضنا فيك مازينا كل يوم عاهه.. زلوك الكوزن ودخلوك فى متاهه.. بيوتا نصهن جوه ونصيص يتباها.. ديل خلوك تغتس وتلحق امات طه.. شيخ الجكس مبعوث للبلود البره.. واولاد (سيدى) لاعبنبك كتابه وطره.. بعد ما شردو اولادك فوارس الكره.. فكو الدفه لى ابدقنه وكلاب السره.. – …….. عجبني المسدار ده. – عصام: جد رائع. * دياب: دور الصحافة تملك الناس الخبر والمعلومة الصاح المجردة من الغرض دا كلام صاح … – قرشي: فوضنا امرنا للشارع الممدود صوب القصر والرصاص والموت المؤكد بين ثانية واخرى. ياحراس القصر احذرونا نحن عزل الا من عشق مقاتل تندهش الرصاصة حين تعبرنا يسقط شهيد مليون اخر.. لن نحيد.. يمضي النشيد. —؛؛؛؛— * ثم بدأ عصام محجوب الماحي في متابعة جلسة الجمعية العمومية للحوار الوطني برئاسة الرئيس عمر البشير، وكتب: سأتابع لكم مشهد الجمعية العمومية التي دعى لها نظام الانقاذ كل الذين يريدون استمراره في حكم البلد ولو ليوم واحد اضافي وأضاف اليهم بعض قوم لم يتعودوا، خجلا او لشيء في انفسهم، قولة لا. إذن إنها "الجمعية العمومية لأهل الانقاذ ومن لف لفهم". عليه يصبح ما سيجري هو حوار الوثبة للمجهول. اليكم مشاهده التي افلح في رصدها مع تعليقات واجبة: – حسين ابو صالح يتحدث. انه شخصية اضرت بالعمل السياسي ولم تفيده بشيء مطلقا. ليته بقي في عالم الطب الذي بعرفه ويجيد العمل فيه. هذه الشخصية هي احدى الاثار السيئة والسالبة للانتفاضة التي ساهمنا في اضاعتها. – د. الترابي يتحدث الان. جالس في مكانه لم يذهب لمنصة الحديث. لم يقل شيئا يستحق التسجيل. يبيع بضاعة مضروبة. تذكروا كلمة "اللولوة" التي وصفه بها د. منصور خالد. – البشير الذي يدير الجلسة ويوزع الفرص اعلن انه سيعطي كل متحدث ثلاثة دقائق فقط. أي شخصية تقبل الحديث في 3 دفائق تكشف عن نفسها بانها ليس لديها ما تقدمه. الافضل رفض الحديث بدلا من ان لا تتمكن من قول شيء. كامل ادريس يبدو انه رفض الحديث في 3 دقائق. سنرى. يتحدث الان فضل السيد شعيب. انه (……) من يتحدث. اترك لكل منكم ملء المساحة الفارغة التي تركتها فالصفة التي اخترتها لم أتعود كتابتها. انقطع الارسال لا استطيع ان اتابع ما يجري لاكتب عنه. – يا جماعة وباختصار الانقاذ تعود لمنصة انطلاقها في 90. هذا الموتمر هو حاصل جمع مؤتمرات السلام والنظام السياسي والاقتصادي التي عقدتها الانقاذ وهي "تتبى وتتخبى" للتمويه وانها ذات فكرة الترابي يدورها فيكم والانقاذ لعبت كل أوراقها فلم تدخل في مأزق لوحدها وانما ادخلت معها كل الوطن في المأزق. – الانقاذ تريد بهذا ان تجدد رخصتها بعد ان انتهت صلاحيتها. ساعدوها اذا اردتم اطالة عمرها او صبوا عليها ماءا باردا بمقاطعة ما يجرى واتركوها لوحدها ومن معها من فقاقيع ليحدثوا انفسهم ولا تشغلوا انفسكم بهم.. وبنهاية المسرحية السمجة ستجد نفسها عارية وسيصيح اصغر الاطفال عمرا: أنظروا سلطتنا العارية؛ وعندها ستسقط الانقاذ مضرجة بعارها وعريها معا. – يا شباب حزب الامة.. استمعوا دكتور التجاني السيسي.. وتمعنوا الي اين يذهب السقوط بالانسان. بئس الحالة. أتاسف على كل كلمة طيبة كتبتها عنه في الفترة 87- 1988. – ولدكم يتحدث يا انصار. اي نعم، عبد الرحمن الصادق. يتكلم عن سوريا ومرضي اليمن والحجاج في ماساة التدافع. برافو وجد ما يقوله في ال 3 دقائق.. لم ينس وليد تكساس احمد. يا جماعة "الزول ده ما اخد من ابوهو حاجة اصلا". ما فضل إلا يقول.. سير سير يا بشير. قوم لف بلا لمة معاك. النار تخرا الرماد. – تصوروا عبد الرحمن اقترح اضافة لجنة سابعة مهمتها الاتصال بمن لمن يحضر وقاطع. كل ذلك لاجل جر ابوه لهذه المسرحية السمجة. بئس الاقتراح. – اي شخص عاقل برضى لنفسه المشاركة في مسرحية معروفة سماجتها ويدعى لإلقاء كلمة من 3 دقائق في مثل هذا الجمع عليه ان يقول للرئيس: شكر الله سعيكم هيا الى اللجان لنسجل كلامنا فيها ولا اريد ان اكون جزءا من سماجة المسرحية التي تجري امامي. وعندها يغفر له الوطن واهله مشاركته حتى هذه اللحظة ومشاركته القادمة والتي حتما لن ترضى اهل الانقاذ وسيحاصرونه وقد يطردونه. – متحدث عن ما يسمى "حزب الامة الاصلاح والتنمية" يتحدث عن شعار السودان وطن يسع الجميع ويستحضر شعار السودان للسودانيبن.. ده باين عليهو مفوت. قال كلام جيد ولكن للاسف لا يفهمه الرئيس. – البروف علي شمو يتحدث نيابة عن المحامي عمر عبد العاطي الذي غادر مستشفيا للندن وعن الحبيب دفع الله الحاج بوسف الذي حضر وذهب سريعا لود نوباوي فهي المكان الافضل بالنسبة له من الاستمرار في الجلوس ديكورا في قاعة الصداقة. شمو المتفائل يتوقع انضمام "الاخوة المقاطعين". – ابشروا وافرحوا لان الرجل الذي اضاع الانتفاضة مع سبق الاصرار والترصد غير موجود. طبعا عرفتوه: الجزولي دفع الله. * الجماعة رفعوا الجلسة للصلاة وسيعودون في الثانية والنص. واصل عصام رصده بعد عودتهم ولكن بعد غفوة صحى منها والرئيس ينادي على السر قدور ففرح وظن ان "شلة" برنامج اغاني واغاني ستقدم فاصلا لاغاني وطنية في المؤتمر. خاب ظنه فكتب: – اغاني واغاني اقوى من دبابير قوات الشرطة واهم من اتحاد الكتاب. البشير قال الكلمة الان السر أحمد قدور.. فيما المتحدث هو شقيقه عمر أحمد قدور الذي اخطر الحضور بان السر، في هذه اللحظه في منزله بالقاهرة. اتحاد كتاب ام اتحاد ادباء ام اتحاد ايه مش عارف، المهم عمر قدور قال انه نائب امين عام انحاد عربي واخر اسيوي وثالث افريقي. اللهم زد وبارك. – اكتملت الناقصة. علمنا اليوم ان هنالك حركة مساحة ترأسها امرأة اسمها افراح. يا لبختنا حتى الجنس اللطيف لم يحمل السلاح فحسب وانما يترأس حملته. والرئيسة الحاملة السلاح قالت انها جاية مباشرة من الميدان وما دايرة عفو ولا حاجة. – قلت لكم من قبل ان هنالك حركات حملتها الحكومة السلاح بقولها واشركتها باسم حملة السلاح.. لو كان هنالك كل تلك الحركات التي اعلن عنها أنها جاءت من الميدان لكانت الخرطوم وليس الفاشر سقطت من زماااااان. – على فكرة رئيسة الحركة التي حملتها الحكومة السلاح قالت انها جات من الميدان ومعها 10من القيادات الميدانية. يا ربي تكون افراح جات بكل حركتها وسلمت سلاحها وين؟ للرئيس ديبي، ام في مطار الخرطوم، او في نقطة تفتيش سوبا؟ – غايتو انا عجبتني رئيسة الحركة دي لانها ما مترهلة زي تابيتا بطرس. وين هي بالمناسبة؟ لم تظهر حتى الان؟ – يا فتحي الزول البتكلم ده من عندكم.. اسمه ابراهيم مادبو؟ غايتو ما عشان خاطرك.. لكن كلامو كويس. * كتب فتحي حسن مادبو: والله د. إبراهيم مادبو عمره مابقي كويس انتهازي وحاصل علي شهادة الأيزو في الانتهازية. ومستهبل كبير. يا أخي دا في السعودية عامل خلافات لحزب الامة لا اول ليها ولا آخر. الحمد لله خلانا وارتحنا من شروره. * عصام: باااااين عليهو مستهبل عشان كده قال كلام كويس. اسلوب استهبال وكده. اي واحد يشارك ويقول كلام كويس بكون مستهبل. المشاركين التانين ما محتاجين يظهروا استهبالهم. – يواصل عصام ويكتب راصدا: دانيييييييل كودي…. المستهبل الكبير يتحدث. اكيد تابيتا تكون قاعدة.. وقاعدة في كرسيين. شوفوا كودي يقدم حصة في الدبلوماسية. كويس المنصة اوقفته. – غايتو لبسة راشد دياب تجنن. الجماعة جننو العمة المزركشة دي. زول الحركات البتكلم ده جاب العمة المزركشة معاه من الميدان؟ – اجلال مبارك سنادة عابت اسلوب الجودية الذي يتكلم به البعض والابتعاد عن الوسائل العلمية التي تقود لحل المشكلة. اجلال دي تمثل تنظيم مايوي واللا شنو يا ناس؟ – زغرودة يا ناس طلع زول ثنى اقتراح عبد الرحمن الصادق لانشاء لجنة سابعة لجر الصادق المهدي للمشاركة. – واحد هاجم كمال شداد والمريخ والهلال وقال إنه يتحدث باسم "حزب شباب النهضة" واكد ان حزبه سيقف وقفه رياضية مع الحوار لا كوقفة كمال شداد. قال الصادق في الخارج ونسببه في الداخل. (القاعة ضحكت) – حلوة…. الاحزاب السياسية سموها ليكم من هنا ورايح "المواعين السياسية". المتحدث يريد معالجة خلل تلك المواعين. تكون يا ربي بقت مطرقعة. تصوروا صفقوا ليهو. هل ده موضوع الحوار؟ – عثمان ابراهيم – القيادة التاريخية: دي فرصة تاريخية………! كفاكم كده من كلامو. زول القيادة التاريخية ضم صوته لعبد الرحمن لانشاء لجنة سابعة. بتاع القيادة التاريخية قال حتى لو ما وصل الحوار لنهاياته فان الحوار اسس للدولة السودانية الجديدة. – يبدو أن اهم ما سيخلص له اجتماع الجمعية العمومية هو إنشاء لجنة سابعة تزرع الدرب سفرا "بين الخرطوم والقاهرة" وان عاد المهدي "بين القصر والملازمين". * كتب قرشي عوض: ديل عايزين يعرفوا الحوار يادوب. – عصام: خليهم يخترعوا العجلة. ثم واصل رصده وكتب: حزب الرباط القومي. رئيسه بتحدث. غايتو لو داير تعمل ليك حزب جديد ما حا تلقى اسم. * قرشي: بقو ا اكثر من فرق الروابط. واحد فيهم كان بقنب معانا جنب السفارة النيجيرية انا كنت فاكره معارض ابن فتلة، طلع من ناس اكتشاف العجلة. – عصام: تمشي للجنة 7+7 تقول ليها تديني القائمة بتاعة الاحزاب لانو أكيد ما المسجل عنده مثلها. ثم تبحث لك عن اسم لحزبك ولن تجد الا ان تسميه الحزب……. (ب) او الحزب….. (ج). * قرشي: ويمكن ج ا و ب 2. – عصام: اها واحد قال حا يتكلم وكلام جديد: نشوفوا. واصل عصام رصده: قال.. انا ما مؤتمر وطني لكن بتعامل مع كل انسان بتعامل مع الحق. * قرشي: الحق عمك. – عصام: تصوروا ده الكلام الجديد بتاعوا…. ياخي بلا شاعر بلا قال معاك… قوم امشي المؤتمر الوطني بتاعك وبس. عمك قاااااابض. داير يقدم نصايح كمان. انا ما عارف المؤتمر الوطني ده بجيب الناس ديل من وين؟ معقول البلد فيها الكمية دي كلها من المستهبلين؟ * قرشي: مابكون ادوهم قروش كتيرة يكون حسبوها ليهم زي الانتخابات اليوم ب 250 جنيه زايد الوجبات. ما بطالة معاهم. – ثم واصل عصام رصده وكتب: ياخي الحوار ده كشف بلاوينا كشف. – زووووم: الترابي لأول مرة متمحن. شوفوا يا ناس جنس المحنة المسكت في الترابي؟ تلاميذك فاتوووووك يا شيخنا. والله ديل مش يخلوك تتمحن انا خايفك.. تترحم. * كتب قرشي: تلاميذك.. تلاميذك. البلد ما فيها شغل ودا موسم زي الدهب وموسم الكضيب. دا كضيب سياسي.. تفطر وتتغدى وتضرب يوميتك. – عصام: ابو المستهبلين ظهر. عرفتوه؟ ثم واصل رصده: ابو المستهبلين يتحدث عن مؤتمر الحوار ويقول "الانقاذ عملت اول ايامها مؤتمر الحوار الوطني الذي ترأسه محمد الامين الخليفة والحمد لله نعمل بعد كم وعشرين سنة مؤتمر الحوار الوطني ويترأسه الرئيس بنفسه. يعني عشرة من عشرة". هل ابونا يقصد ما قلته لكم عاليه بان الانقاذ عادت لمحطة 1990؟ اراهن ابونا ده بكون قااااااصد. – الزول الاخير ده منو يا ناس فاتني؟ ده رهيب.. الاتكلم ببضع عبارات بالانحليزي. – مستهبل اخر يذكر الناس باكتوبر الذي حدثت فيه احداث تاريخية وينتظر ان يشهد اكتوبر الجاري بفضل الحوار حدثا تاريخيا مشابها. يا رااااااااجل. – جننوها جن عبارة "ان تأتي متأخرا خيرا من ان لا تأتي ابدا". للمرة الخامسة اسمعها. كل واحد يعجب بها من استعمال اخر لها فيستعملها. – "حزب الدعم الوطني" الاعلان عن حزب جديد في الطريق. – يعني حملة السلاح ديل تراهم لافين في نيالا والبلقى مقعد فاضي في الطيارة يجي الخرطوم ويعلن انه حركة مسلحة يريد المشاركة. المتحدث الاخير قال ذلك وحيا مناضلا حاملا السلاح وقال انه الان في القاعة مشاركا بعد أن كان لافي في نيالا الى ان لقى طيارة تجيبو الخرطوم. الجماعة ديل قايلين حمل مسدس او رشاش في سوق ما معناها تأسيس حركة. ياخي الجماعة ديل ابتزلوا اي حاجة لتفريغها من محتواها. – واحد طلب من الرئيس التنحي من رئاسة المؤتمر الوطني. قطعوا كلامه. – عبد الله مسار يتحدث. قال ان الصراع صراع سلطة وصراع حكم.. ليس صراع جامع أو كنيسة. قال ان القضية الاساسية كيف يحكم السودان. واضاف ان الغائبين ما معترضين على الحوار وانما يريدون الكرسي.. كرسي السلطة. – مسار قال شنو يا ناس؟ يااااا حليلك يا مدرسة المشاغبين ويا حليل يونس شلبي. – واحد قال نخلع جلباب الحزب خارج القاعة وندخل ونلبس جلباب الوطن. ده داير الناس تقعد تتحاور ميطي؟ بس معقول يا زول مع ناس الانقاذ الجاهزين طواااالي يحصل كده. * انهى الرئيس المداخلات وقال انه يؤيد تشكيل لجنة عبد الرحمن. واحد اعترض عليها. علي مهدي يؤيد تشكيل لجنة عبد الرحمن. – الرئيس يعلن: تشكل لجنة خاصة للاتصال مع القوى الرافضة. – تذكروا هذا ما قلته لكم مع بداية حديث عبد الرحمن الصادق. – رفعت الجلسة للسفسفة والعلف. – فاصل ولن اواصل. خلاص تعبت من المتابعة ومنتظر المعاتبة. * دياب حسن: مفيش فائدة يا صفية..! – عصام: يا حليلك يا سعد زغلول. * بكري خليفة: عصام رصد وتحليل موضوعي. واصل الرصد. – عصام: شكرا الحبيب بكري..لكن حقو يستلم مني واحد تاني. خش على الخط يا بكري. انا جد تعبت. ده انا تعباااااااان. انت قايل ما عندي شغلة؟ فعلا اليوم سبت اول ايام عطلة نهاية الاسبوع لكن الولية داخلة مارقة تنظر إلي شذرا.. بانني سأضيع عليها هذا اليوم. خلاص كفاكم شوفوا زول غيري. * بكري: ههههههههههه. – عصام: لولا ان اليوم بارد اكثر من المعتاد في هذا الوقت، لكنت الان في الحديقة اتجول فيها وامتع نفسي باخر ايام البساط الاخضر الذي سيتحول لاصفر مع تساقط اوراق الخريف استعدادا للشتاء الذي يبدو انه يطرق الأبواب بسرعة وليس بعنف، اي طرقات سريعة وليست عنيفة. [email protected]
