اهداء إلى شامة والدة محمد حسن المهدي وزينب والدة محمد صلاح وكل الكنداكات اللائي تحترق حشاهن بتعذيب الجنى على أيدي سفلة الأمن : يا والدة وليدك ساير بشّر جاب لينا بشاير ود زهرة جيله الثاير جيل قلبه محوّى بصاير يسّر لي بلده عساير داوالو هموم وحساير ما عد دماه خساير سام في وطنو الآهات شوفيه هتافه هدر في العزة ركابه سدر والغافل يشوفو شدر لمن يلفاه.. حضر تضحكي من غير كدر باكر تمسحي دمعات ** يا محمد قوم اتوضا لصلاتك قبل تفوت كبّر يا حبيب اتقدم واجهر بي مصير جالوت بي غَرَق فرعون وجنوده عقّب لي المولى قنوت: يتبدد ليلا طول والشعب الما بتحول ما بركع للجبروت يطلع سالم يتجمل زي يونس من الحوت يا محمد قوم اتوضا ما انت صلاتك جات اختم لصلاتك وسلم وأكتب في السور آيات لن نركع غير لي الله ما فينا جبان بتولى عجنونا صمود وثبات عاقدين لطروفنا حلفنا في قصرك أو في الجنة سجنك يا ظالم هدنة قسرية وباكر .. آت نقلب صفحات المحنة يبقى الضهبان الرحنا والالم البيه ما بحنا اطلال اثار ورفات كمامتك ليها سفحنا في وشك جينا وصحنا جوعك بندورلو شتات زنزانتك ضيقة علينا كل ما وسعت ملينا سورت وطنا علينا نايشنك ما جلينا لو سلمت ليك الكرة باكر بتجيك كرات مزعت بلدنا السمحة عدمت العيش والقمحة شردت ظلمت وتمحى من بلدك يومي جهات الدم بقى كابي دميرة دارفور والنوبة جميرة والأزرق عدم الميرة الجوع سويتلو بنات البندق دق دق دوى والعرض انباع في دوا وتدقو تمام في ممات – يا محمد قوم واتوضا ما انت صلاتك لامة وصفوف أحبابك تامة وأعراس البلد العامة لي الزيك ما بتنفات يا عريس الجُمَع انجم باكر بتلف العمة يا عالي الراس والهمة يا نضيف اليد والذمة يا الشلت هموم الأمة فوقك بتحق النمة والأبكم يصير زغرات! رباح الصادق المهدي