كلمات: حسين شنقراي.. أمدر سلام إجمالي يغشاك يلثم خد زي مرايا يلالي حلوة وجميلة فيكي ليالي مكتول في هواك وإتقطعن أوصالي ——– سلام للفيها أحبابي وكمان عزالي سلام للهادي فيكي إمام والتاني أحلي ضلالي ——— سلام يسري ويمر بي فوق من البوستة لي دردوق يغشي الشهدا يمشي السوق ويلقي السينما فيها تسالي ——– سلام لي كل زول فردة سلام للساحة والعرضة وللماحي فيك مرضي وحاتك غير المهدي مابنرضي وليهو الجناب العالي ——— سلام يا أهلنا ودنوباوي دوام فيها القمر ضاوي جميلة ما ليها مساوي وأريت يا ناس تحس بي حالي ——— أدق بي حنية ياخي الباب أقالد الشرفا في الهاشماب أحس بي قلبي فيهم داب وأكوس للجية في الأسباب مشغول بيكم دوام بالي ——– القي الجميل وأسالم وما ظني أمرق سالم عباسية فيكي عوالم مكتول فيها يا عالم وحبها فيني طوالي ——– سلام الثورة والبنا وديك أبروف كمان جنة سلام ليكي الفؤاد حنه دوام في أحلامي بتمني غرامك فرض ما سنه وفيكي أربي أنجالي ——- سلام روحي يا العمدة عليل بيكي وكايس النجدة ما لقيت غير دواك أجدي أهيم سائح في هوي أمبدة متين ألقاك والعمر عدي وأشرب موية نيلك الحالي ——- سلام أمدر فراقها صعب دوام بكتب عريضة طلب عساي أعرف لي فراقها سبب ود ورو هواك فيني غلب ملازمين فيك وبيت المال وحي العرب هم قصدي وغاية آمالي ——– سلام أمدر صحيحة وسالمة حلاوة قلعة فيك ومسالمة أشوف عروسة مكي سمحة و كاملة درة في السودان ماكنتي أبدا هاملة تلفزيون ومسرح وإذاعة ياما شاملة هوي الأوطان فيها دايما غالي ——– سلام أمدر فيكي كل أحبابي موردة وأبعنجة وجنب الريفيرا ركابي خلاص في حبك فقدت أعصابي أريتني أعود زي زمان متصابي أعيش فيكي وأريح في هواك بالي ——– سلام للزول العليهو بسمو ديل الأشقاء دوام في حوش الزعيم إتلموا رافع العلم الناس في ضراهو إنجموا والعادهو سافين التراب وياما فيهو يخمو ليك مني كل السلام وإجلالي ———– سلام درة وطن ما خانت فيك قبة إمامنا للبلد زانت عاصيه علي العدو وللحبيب لانت صالحة وفتيح وقدامهم كمان بانت حرم لانسيتها لافي يوم علي هانت درة غناي وهناي وكتير موالي ——— سلام بت بتي والغزال طقطاقة لابسه العلم والرايه فوق خفاقه حافرات في تاريخنا أجمل طاقة لابخلن بي جهد للبلد لا طاقة نايرات زي أنوار جميل بقاقة بفراقكم نارا كتير حراقة سافرتن بيعد وتاني ما بنتلاقي ليكم مني السلام فرادي وكمان إجمالي ومكتول في هواكن وإتقطعن أوصالي
