بالعربى الكسيح محمد الطيب جلابية ترباس أكبر من احمد الباشا والممتاز ما قدر المريخ !! * في المريخ عدد (الدجالين) الذين تمت الإستعانة بهم لمباراة القمة يوازي عدد اللاعبين الجالسين في كنبة الإحتياطي .. * بعض المنسوبين للمريخ جابو (دجالين) بعدد اللاعبين في تشكيلة الهلال .. * تشكيلتنا فيها حداشر لاعب لكن هم جابو (13) دجال.. * بكري المدينة براهو جابو ليهو تلاتة دجالين ..
* بكري جابو ليهو تلاتة دجالين وبعد داك دجال لكل لاعب .. * حتى محمد عبد الرحمن (الصغير وجاهل) جابو ليهو دجال إحتياطي .. * أنا ما عارف الناس ديل بقتنعوا بالحاجات دي كيف ؟؟ * بالجد ما عارف ؟؟ * ناس معاهم التحكيم بيعملوا شنو بالدجالين ؟؟ * بالمناسبة قصة التحكيم بقت كتيرة ومسيخة والله .. * واي حاجة لما تكتر بتفقد معناها .. * حتى (المحلبية) دي لما تكتر ما بتمسك (الحِنة) .. * يقول ليك: (كترت المحلبية) .. * وبصراحة كده الحكام كتروها شديد .. * ما ممكن كل سنة المريخ يجيب قون من تسلل .. * القصة دي بطريقتها دي ما بتجي والله .. * يا اخ إحنا موافقين كل تلاتة سنوات تفوزو بالتسلل .. * موافقين .. * لكن كل سنة دي صعبة شوية .. * وأنا لاحظت حاجة .. * البيجيب هدف المريخ التسلل السنة دي في السنة الجاية ما بجيب .. * كل سنة بيكون في متسلل جديد .. * الشغلانية زي الورثة .. * تواصل أجيال عديل .. * المريخ لو عندو (50) هدف في الممتاز تأكد إنو (51) هدف بيكون تسلل .. * بالميت كده (47) هدف بيكون تسلل .. * وحكام الرأية لو ما قادرين على الشغلانية دي خليهم يعتزلوا .. * اغرب حاجة الحكم الطاهر محمد عثمان في قناة (قوون) قال هدف ضفر تسلل واضح .. * وسيحة في تلفزيون السودان قال الهدف صحيح .. * انا كنت خايف ناس النيل الازرق يستضيفوا لينا درمة يقوم يقولوا الهدف ده بهدفين .. * غايتو جنس غايتو ؟؟ * المهم .. * الممتاز ده ما حقكم .. * الناس مقامات .. * وكل زول بيعرف حدودو .. * هسه (جلابية) حسين خوجلى ما ممكن يلبسها احمد الباشا .. * ما بتكون قدرو .. * وجلابية كمال ترباس ما ممكن يلبسها عبده جابر .. * بتكون اكبر منو .. * نفس الفهم .. * الممتاز اكبر من المريخ .. * وأنا بعجبني الزول البيعرف مقام نفسو يا محسن سيد .. * كورة الخميس دي اقنعوا منها ساكت .. * وإحنا يا نزار حامد ما بنقبل باقل من اربعة .. * الاربعة دي ممكن بكري براهو يجيبها .. * ما كتيرة .. * الوحدات الاردني ما افضل مننا .. * زي ما الوحدات الاردني جاب فيهم سبعة إحنا نجيب اقل منها بهدفين ان شاء الله .. * نريد من بكري المدينة هدفين قبل ان ينتهى عقده القديم .. * بمناسبة العقد .. * عصام كرار قال : قعدنا مع اللاعبين المفكوكين وحسمنا امرهم .. * نشوف يا كرار .. * بس الموضوع ما يطلع (كلام واتساب) .. * ان شاء الله يكون حقيقة .. * لكن الخوف يطلع كلام واتساب ساكت .. * خصوصاً والكاردينال لسه بره السودان .. * انا والله عندي سؤال .. * الكاردينال ده (25) ساعة في اليوم قاعد في دبى بيعمل شنو ؟؟ * (13) شهر في السنة الكاردينال قاعد في دبى .. * إنتو الكاردينال ده رئيس نادي الهلال ولا رئيس نادي العين الاماراتي ؟؟ * دي سؤالي .. * وداير اجابة .. * وطبعا اي زول حر في (سؤالاتو) !! * في الهلال هنالك خمسة مدربين .. * ناس عماد الطيب اي خط من خطوط الهلال التلاتة جابو ليهو جوز مدربين .. * شوقي عبد العزيز وفوزى المرضي مدربين خط الدفاع .. * الفاتح النقر ومحمد الفاتح مدربين خط الوسط .. * عاكف عطا مدرب خط الهجوم .. * وكترت الدايات اهلنا قالوا بتكسر رقبة الجنا .. * شوقي ده جبتو لشنو عليكم الله ؟؟ * شوقي ده بقضيها ليكم تنظير ساكت .. * ناس شوقى وفوزى المرضى لسه هم من زمن (الربع ساعة الاولى) .. * يقول ليك : (الربع ساعة الاولى لو مرت تاني ما فى حاجة) .. * والكلام ده برضو انا قاعد اسمع الرشيد بدوى عبيد بيقولوا كتير .. * ربع ساعة شنو وبطيخ شنو ؟؟ * الكرة السودانية دي تمسكها من المنتخب لاصغر نادي ما قاعدة تخسر إلا بعد الربع ساعة الاولى .. * عشان كده فكونا من النظريات دي .. * خلوكم مواكبين شوية .. * الناس من حولنا لو سمعوا كلامكم بتاع (الربع ساعة الاولى) ده بيضحكوا فيكم والله يا الرشيد بدوى عبيد .. * ما في حاجة اسمها ربع ساعة ولا (20 دقيقة) .. * نرجع ونقول .. * مباراة الخميس يجب ان يكون في المنطقة الفنية الفاتح النقر وعاكف عطا .. * الباقين يطلعوا المقصورة فوق .. * والكلام ده واضح يا شوقي . * تابع الكورة من المقصورة فذلك افضل لنا ولك .. * وإحنا ما ناقصين .. * المريخ ده اصلا ما داير ليهو مدرب .. * لو جبتو الشاعر الصادق الياس ممكن يقود الهلال امام المريخ .. * عشان ما تقعودو تتحاومو لينا قدام الكنبة .. * و..و.. * والعارف عزو مستريح ..