في المثل يقولون : (الشراب من يد الرجال عطش) وهذه الفتاة تشرب من يد هذا الشاب في غياب (الكوز والكباية) ، والذى يبدو ان الشاب والشابة (مخطوبين لبعض) وفترة الخطوبة حافلة بمثل هذه اللقطات (عالية المحبة) ، هذه الصورة في حدود المثل (الشراب من يد الرجال عطش) تذكرنا المريخ الذى ادمن في معظم مبارياته (الشراب من يد الحكام) وبما ان سيكافا كانت منقولة عبر قناة غير متاحة في كل الاقمار الصناعية فمن حقنا ان نسأل : هل شرب المريخ من يد الرجال ؟ أنا ما بفسر وانت ما تقصر . كلام واتساب جمهور الوصيف شايف بفنجط ساي عدم الشغلة قالوا بعلم القوقاي الخبر الاكيد الجاب لينا هناي الكأس الجديد ببدأ الاحد الجاي كل اسبوع منافسة يا خى ما معقولة اندية المنافسة ذاتا غير مسؤولة بعد ما طارو فعلاً في البطولة الاولى اتلمو العطالة وعملو لينا بطولة كأس سيكافا مضحك وياخ حكايتو عجيبة اتلمو العطالة وعملو عملة مريبة اسماء الفرق في حد ذاتا غريبة التايواني راااقد ويا حليل توشيبا أول كأس لعلاء يوسف مع المريخ !! علاء الدين يوسف لعب للمريخ قبل ما يجى الهلال لما قلبو وقف وما حصل رفع كأس مع المريخ ولما (بصم) وجاء الهلال عن رغبة عرف الكاسات مع سيد البلد وكل نهاية موسم يصعد المقصورة يستلم مع الاسياد الكأس وبعد ما البرير شطبو لسوء السلوك عاد للمريخ (هوادة) مع هيثم مصطفى ، وتعتبر الان (بستلة سيكافا) هى اول (قطعة حديد) يرفعها علاء مع المريخ .. نحن نبارك لعلاء الدين هذه البستلة ونتمنى له حياة سيكافية سعيدة . الزول ده وين ؟ الشاب سعد صعدت إلى النجومية عبر (اساسنير) نجوم الغد ، ومع الايام هبطت ب(سلالم) الأهمال وربما الغرور والان انت شبه منسى ، النجومية ضل ضحى والغناء اجتهاد وشطارة مش (لعب عيال) . مكالمة لم يرد عليها !! مى عمر طاردتى الغناء وتوقفتى وطاردتى التقديم التلفزيونى وتوقفتى وهذا يقطع الشك باليقين ان (صاحب بالين كضاب) .. الان الفرصة امامك أما (بلح الغناء) أو (عنب الشاشة) وذلك لأن التركيز من اسباب النجاح ولكن تبقى الأولوية للدراسة الأكاديمية ومن بعد الشهرة ملحوقة وكذلك القروش. البِستله ما بتبقى كأس والطين في الكرعين ما ببقى نعلين !! المريخ خرج من هذا الموسم على الصعيد الخارجى (حافى القدمين) ، سقط سهوًا من تمهيدى الابطال (64) الشئ الذى لم يمكنه من اللحاق ب(الكونفدرالية) فحاول ان يعوض الخيبة ببطولة وهمية اطلق عليها جمال الوالى اسم (نيل الحوض) وفيها ايضاً سقط سهوًا من دور الثمانية علماً بأن المريخ (نظم هذا الحوض ودفع كل التكاليف) ثم (حنس) المريخ اتحاد سيكافا لإقامة سيكافا جديدة بعد (45) يوماً من دورة (الحوض) ، وبالفعل قامت (دورة العطالة) وحصل المريخ على كأسها الذى هو يوازي (بستلة اللبن) ، كل الذى يمكن قوله اذا اردنا التشبيه هو : (دورى الابطال يوازي الجزمة الايطالية والكونفدرالية توازي شبشب الجلد وحوض النيل توازي السفنجة،أما سيكافا فهى مثل الزول الحفيان) ، والمريخ الظريف شال كأس سيكافا الذى هو (طين) ولكنهم لا يعلمون أن (طين سيكافا ما ببقى نعلين في كرعين طيش الابطال) .. أزمة في (الخرفان) بسبب (كأس ايبولا) !! رغم إنو مأمون حميدة قال : (الضفادع فيها بروتينات غنية) إلا أن اقطاب وجماهير المريخ وبعض (كسارين التلج) ضبحوا المئات من الخراف ابتهاجاً بكأس (ايبولا) ، مصادر اكدت ان معظم الخراف تم ذبحها (كيري ساكت) قدام منزل جمال الوالى الذى حصل على لقب (افضل لاعب في البطولة) بعد الاهداف الحاسمة التى سجلها في البطولة ، نحن لا نعترض على دم الخراف المهدر رغم انها لا ذنب لها ولكن لماذا ضرب اهل المريخ تصريحات مأمون حميدة عرض الحائط رغم كثرت الضفادع ؟ الكرامة في دورى الابطال (تور) والكرامة في الكونفدرالية (خروف) والكرامة في سيكافا (ضفدعة) . يوم بيكتل ليهو مدافع حركة بكرى في الملعب زي رسايل (قروب الواتساب) !! غايتو الحاجة الأنا متأكد منها إنو بكرى المدينة ده يوم من الايام بكتل ليهو مدافع ، بكرى بمستواه ده لو شارك في سيكافا كان كتل ليهو تلاتة اربعة مدافعين ، بسم الله ما شاء الله (شبعان ومانع) ، بكرى لو ضربك انت بتقع ولو انت ضربتو برضو انت بتقع ، يعنى في الحالتين (انت الواقع) ، حركة بكرى داخل المستطيل الاخضر تشبه لحد كبير رسايل (قروب الواتساب) قبل ما تقرأ الرسالة بتجيك الرسالة التانية ، دفاع الزمالك قبل ما يشيل نفسو من هجمة بكرى الاولى بيدور فيهم بهجمة تانية ، مهاجم زي بكرى ده لو في سيكافا ممكن في المباراة الواحدة يجيب (13) هدفاً خاصة لو واجه فرق زي (عزام) و(حماد) و(هشام) و(بنابر) . سيكافا بتاعت الشهر الجاى وين يا عزو ؟ بما إنو سيكافا بقت زي (علاج التأمين الصحى) البيصروفو العيان شهرياً من حقنا نسأل رئيس النادى جمال الوالى الشهير ب(عزو) عن سيكافا بتاعت الشهر الجاى ستكون في أى البلدان ، شخصياً شايف احسن تعملوها في جوبا عشان ممكن جمهوركم يمشى بالبر وبرضو جوبا قريبة ممكن اسامة عطا المنان يجى راجع الخرطوم بعد كل مباراة للمريخ . المريخ كان اسمو (نجمة المسالمة) وعزام بعد يكبر اسمو ح يكون (الفهود) .. عادة الزول لما يكون شافع ناس البيت بدلعوه بمشتقات من الاسم ، ومرات بيكون عندك اسم لما تكبر بتخجل منو وبتتنكر ليهو ، زمان المريخ لما كان صغير اسمو كان (نجمة المسالمة) وبعد ما كبر سمو (المريخ) ، اعلام الهلال سخر من فريق عزام التنزاني والسخرية ليس في محلها لان عزام الذى تم تكوينه يوم الاربعاء قبل الماضية لما يبقى كبير ممكن يسمى نفسو (الفهود). الطيارة وكت يكتر عليها (العبط) بتحرن !! من قلبي حزنت جدًا وقلقلت جدًا لما قالوا طيارة المريخ حصل عليها عطل (إحنا في النهاية بشر يعنى) ، وطيارة المريخ زي (الحافلة الروزا لما تكون شايله ليها شيلة عروس بايرة) ، الروزا لما تكون شايلة شيلة بت بايرة تلقاها في نص الكبرى بتقيف يا (بنزين ويا لستك) الروزا بتحرن ، هسه طيارة المريخ دى لما كتر عليها العبط حرنت عديل وبعد ما اللاعبين دخلتهم الخوفه والخوف طرد العبط الطيارة وافقت وجات بسلام .. حمدلله على السلامة يا حبايبنا . ابراج (قوون) .. حظهم اليوم أبراج حظهم اليوم جمال الوالى مهنياً : صعب جداً زول يكون (12) سنة بيطلع قروش اكتر من (الصراف الآلى) والمحصلة صفر .. عملياً : زي ما بيقولو اهلنا : (ما ابوك لكن بربيك) سيكافا دى كأسها ما محسوب كأس لكن بربيك ما مشكلة .. عاطفياً : تدفع دفع الحوش وغير سيكافا ما بتحوش .. حظك : إنو جماهير المريخ رايح ليها الفرح عشان كده بتفرح لأبسط حاجة حتى ولو كانت (بستلة سيكافا) .. وسواد حظك : إنو اول مباراة للمريخ مع مريخ الفاشر وفيصل العجب بيخلى ليك المريخ في حتة ونجمة المسالمة في حتة .. أهو حظك مع (عزو). باسكال مهنياً : في سيكافا ظهرت بحلاقة زي (ضنب الكديس) ووقعت في (اطفال عزام) دق وشلاليت .. عملياً : والله العلى العظيم البيشوف حلاقتك في سيكافا يحلف يقول انت لاعب امام ابو تريكة والدراجى وبكرى المدينة والشرميطى .. عاطفياً : لو الحلاقة حسب البطولة المفروض انت تلعب سيكافا ب(طاقية كاب) .. حظك : إنو بسبب الكأس ده ممكن تشيل ليك دولارات تبني بيها فندق ومدرسة خاصة ومستشفى في بلدكم .. وسواد حظك : إنو كاريكا اكتر حاجة بيكرها الصبغة .. أهو حظك مع برج (الفرح) . صلاح إدريس مهنياً : لما اعلنت اعتزال الكتابة جماهير الهلال فرحت وذلك لأن قلمك يبخس الهلال اكتر من قلم مزمل أبو القاسم وسلك ومعاوية الجاك .. عملياً : توقفك عن الكتابة ح يدفع تمنو الفنانين لأنو تانى ح تكون متفرغ ل(الالحان الدائرية) التى لا تطرب .. عاطفياً : الكاردينال الذى هو (اول الانتخابات) بدأ منذ الان الترتيب للترشح بعد ثلاث سنوات .. حظك : إنك مقيم بره البلد وما عارف رأي الجمهور فيك .. وسواد حظك : إنك ما قدرت تكتب وتتغزل في الحبيب تكعيب الذى فاز بكأس (الابطال) .. هو حظك مع برج (العقال) . نعمة عثمان مهنياً : في برنامج الصباح وعبر شاشة النيل الازرق قلتي : (شهر رمضان انتهى بخيرو وشرو) ، ورمضان ما فيهو شر يا بتنا .. عملياً : على بالقسم كلامك ده اشبه بكلام عزو : (العارف عزو مستريح) .. عاطفياً : ايقافك بقرار من الجنرال حسن فضل المولى هو قرار موفق ولكنه ناقص لأن مثل هذه الاخطاء تستاهل الفصل . حظك : إنو الناس المتشددين ما تابعو الحلقة .. وسواد حظك : إنو مذيعات اليومين ديل شاطرات في البودرة وما عدا ذلك (معلمات الله) .. اهو حظك مع برج (الشاشة) . نزار حامد مهنياً : خانتك في وسط مانشيتر يونايتد فاضية وللأسف ليك كم مباراة كده خانتك في الهلال برضو فاضية مع إنك مشارك .. عملياً : مستواك الحالى ده ما بيشبهك وما عندو علاقة بنزار حامد الذى كشح (بيضة) لفييرا رايح جاي .. عاطفياً : ناس المريخ لما فشلوا في تسجيلك جابو الزول البيشبهك في الطول (احمد ابكر) .. حظك : إنو جمهور الهلال بيحبك جداً وبتمنى إنو تراجع مستواك يكون سحابة صيف عابرة .. وسواد حظك : إنو تركيزك قدام القون زيرو .. اهو حظك مع برج (الطول والعلا) . شريف الفحيل مهنياً : في اكبر عملية جهل اعلان (ألبومك الجديد) تم وضعه على حيطة (مقابر بري) .. عملياً : الناس الذين ماتوا لن يسمعوا هذا الألبوم المُعلن عنه في حيطة المقابر والناس الاحياء برضو لن يسمعوا لأنو انت فنان بدون جمهور .. عاطفياً : المقابر مكان للاستغفار وليس ملصقات الغناء والرقيص .. حظك : إنو البلد الما فيها (حوت) بيقدلوا فيها فنانين (شق الشعر) .. وسواد حظك : إنو ألبومك ده البيسمعوهو (10) اشخاص .. أهو حظك مع برج (المشاترة) .
