بالعربى الكسيح محمد الطيب الدلع بيفسد التربية والوالى أفسد الجمهور بالدلال!! * (الدلع) في العادة هو من مُفسدات التربية.. * الدلع بيفسد التربية.. * في البيت (الأولاد) لو مدلعين من صغار لما يبقو كبار بيكونو (قليلين حياء وقليلين أدب).. * عشان كده الدلع بيعيق التربية الصحيحة.. * وفي حاجات ما بينفع معاها الدلع والدلال..
* الملاحظ والمتابع للوسط الرياضي يجد ان ظهور جمال الوالى (فجأة كده) في مجتمع المريخ جعل أهل المريخ (مدلعين).. * اللاعب في المريخ تلقاهو مدلع جداً.. * ولو طلبتوا مني دليل بقول ليكم (أكرم الهادى والحضري).. * أكرم الهادى كان مدلع لأبعد الحدود لدرجة جعلت الناس تطالع تصريح منسوب لأكرم جاء فيه: (ما في زول بيقدر يشطبني من المريخ).. * وبخلاف هذا التصريح هنالك كثير من مظاهر الدلع والدلال التى كانت ظاهرة في كل تصرفات أكرم والحضرى وحتى وارغو.. * وارغو أفسده الدلال والدلع.. * والحضري لم يقدم شيئاً للمريخ بسبب الدلع الذى وجده من جمال الوالى الشهير ب(عزو).. * المصيبة ان الدلع في المريخ تجاوز اللاعب وبلغ حتى المشجع.. * المشجع الذى حدوده المدرجات أصبح مدلع جداً في المريخ.. * الكل رابط مكنة جمال الوالى وهذا سببه الدلع.. * جمال الوالى من شدة الدلع فتح أبواب الاستاد أكثر من مرة مجاناً للجمهور لحضور مباريات المريخ المسيخ.. * أنا داير أقول إنو تهديدات جمهور المريخ التى انتشرت على (النت) بتخريب استاد الهلال غداً هى تهديدات فشنك.. * وسبب هذه التهديدات هو الدلع.. * لو ما مدلعين علي بالقسم ما بيقولوا كده.. * لكن ما مشكلة تعالوا بكرة وبنكمل ليكم الدلع ده.. * أدخلوا المقبرة وح تشوفوا براكم البيحصل شنو.. * تهديداتكم دى علي بالقسم (صحن) ما تكسرو خليك من تكسير استاد.. * جمهور المريخ قبل ما يزيدو موية ممكن يكسر الاستاد لكن جمهور الوالى الحالى ده (صحن صيني) ما يكسروا.. * وإحنا ما زيكم، ما بنهرب من استادنا خوفاً من التهديدات الفارغة.. * ما بنهرب وبنلعب جوة استادنا والراجل خلى يرفع رأسو.. * أصلو نوعية الجمهور الزي ده ما بينفع معاهم الكلام بالذوق.. * هنالك أعداد كبيرة من جماهير الوصيف عاقلة وراشدة ولكن الفئة التى ترسل تهديداتها عليها أن تنفذ ذلك إن استطاعت.. * خليكم قدر كلامكم.. * جوة الميدان بنغلبكم ومن الاستاد بتطلعوا بأدب ولا كتر خيركم.. * بالقانون بتطلعوا بأدب وبالرجاله بتطلعوا بأدب.. * والشرطة ظلت تحقق نجاحات منقطعة النظير في مباريات القمة.. * نجاحات الشرطة المتلاحقة والمتواصلة في مباريات القمة تؤكد أن تهديدات جمهور المريخ هى مثل (تهديدات نسوان الراجل الواحد).. * طول لسان ساكت.. * المهم.. * بكرة قريب.. والفيهو طيب بنشم.. * نتمنى أن نشاهد محمد عبد الرحمن.. * المريخ منتهى ومباراة الغد هى فرصة كبيرة يمكن أن نقدم فيها محمد عبد الرحمن للعالم أجمع.. * غداً نريد من كل لاعب هلالي أن يلعب بقوة ثلاث لاعبين.. * وجود المدرب البلجيكي في المقصورة غداً هو دافع كبير لنجوم الهلال من أجل عرض بضاعتهم لهذا المدرب.. * إذا وصل المدرب باتريك وتابع المباراة تكون هذه ضربة ملعم لأنه سيجعل كل لاعب يقدم أفضل ما عندو حتى يترك انطباع جيد عند باتريك.. * كل لاعب بيكون عايز (يلحم سلكو) مع المدرب الجديد . * عشان كده يا مهند لازم تلحم سلكك وتقدم أحلى ما عندك يا غالى.. * ونقول للكاردينال أى حديث عن التسجيلات واعادة قيد اللاعبين هذا ليس وقته.. * لو عندك تصريحات خليها بعد الكورة.. * الدُراب بتاعك ده يا الكاردينال ده ما وقتو.. * إحنا في وقت الحصاد عشان كده الكلام الشين ما في ليهو داعي.. * نرجع ونقول.. * أى عشرة ومعاهم نيلسون ممكن يغلبو المريخ.. * أى حداشر.. من طرف ختو معاهم نيلسون سيفوز الهلال.. * والقصة دى ما دايرة ليها درس عصر.. * صدفة المريخ في الكأس لن تتكرر في الدوري.. * وحتى لا ننسى.. * نبارك لهلال التبلدى الصعود للممتاز.. * والتحية لكل ناس كردفان ولناس الابيض تحديداً.. * صعود هلال التبلدي هو تعزيز للجسم الأزرق في المنافسة الزرقاء.. * كده عندنا أربعة (هلالات) في الممتاز.. * وما زلنا في انتظار هلال نيالا وهلال بورتسودان.. * دايرين الممتاز يكون فيهو تسعة هلال.. * وده من مصلحة المتعة.. * لأنو السودان كلو هلالاب.. * نعم في شوية مجموعة بتشجع المريخ ولكن نتوقع أن يكون لهم رأى آخر بعد مباراة القمة.. * جمهور المريخ في السودان ما بيستاهل أكتر من مريخ في الممتاز.. * لكن جمهور الهلال في السودان بيستاهل الممتاز يكون فيهو أكتر من سبعة هلال عشان الناس تشبع.. * مبروك للأبيض ومبروك لهلالها ومبروك لخالد بخيت وكل معاونيه.. * و.. و.. * ويا الفريد في عصرك أهدى لي من فضل…(جلاكسي اب شريحيتن)..
